1 Tan natan agawa sanen nibalikas la nen Nephi so saraya a salita, nia, wala so saray totoo a sikara so okom, a sikara met so kabiañgan na saray maamot ya olop nen Gadianton, tan sikara so mamapasnok, tan sikara so nansalita sumpa ed sikato, a kuan da ed saray totoo: Akin ag yo singkaten so saya a too tan awiten yo dia, pian niiter ed sikato so tutol unong ed kasalanan a ginawa to?

2 Akin nenengneñgen yo so saya a too, tan sikato so dedeñgelen yo a mampapauges sumpa ed saya a totoo tan sumpa ed gangan tayo?

3 Tan nia, si Nephi so nansalita nipaakar ed kaugsan na gangan da; on, dakel a beñgatla so sinalita nen Nephi ya ag la nisulat; tan angapo so antokaman a sinalita to a sumlang ed gangan na Dios.

4 Tan saraman ya okom so mamapasnok ed sikato lapu ed sinalita to ed sikara a malinlinew so nipaakar ed saray maamot a kimey da ed kabiluñgetan; manwari ya ontan, sikato so ag da labay a limaan, lapu ed antakot da so saray totoo ag la piga sikara so mansalita sumpa ed sikara.

5 Dia ed ontan sikara so inmiñgal ed saray totoo, a nankuan: Akin papaulyanan yo so saya a too a mamapauges sumpa ed sikatayo? Tan nia tututolan to so saya a totoo, anga ed kaderal da; on, tan ontan met ed saray ankakabaleg a ciudad tayo so naekal ed sikatayo, ya angapo la so pankayarian tayo ed saraya.

6 Tan natan kabat tayo a saya so ag nayari a nagawa, tan nia, sikatayo so makapanyari, tan saray ciudad tayo so ankakabaleg, dia ed ontan saray kabusol tayo angapo so pakapanyari ra ed sikatayo.

7 Tan agawa a dia ed onia pinagalaw da so saray totoo a mampasnok sumpa ed si Nephi, tan ingapo ra so pambabaliñgaan ed limog da; lapu ed wala so saray arum ya inmiñgal a nankuan; Paulyan yo so saya a too, lapu ed sikato so maong a too, tan saray beñgatla a sinalita to so andi-saew ya onsabi a nagawa likud no sikatayo so mambabawi;

8 On, nia, amin a tutol so onsabi ed sikatayo a saraya so pinaneknekan to ed sikatayo; tan kabat mi a saray pinaneknekan to so peteg nipaakar ed saray karelmeñgan tayo. Tan nia saraya so dakerakel, tan kabat to ya amin so saray beñgatla ya onsabi ed sikatayo unong ed say pikakabat to ed saray karelmeñgan tayo;

9 On, tan nia, no sikato so ag sakey a profeta ag to nayarian a paneknekan so nipaakar ed saraman a beñgatla.

10 Tan agawa a saraman so totoo a labay da a deralen si Nephi apasuotan ira lapu ed takot da, kanian sikato so ag da nilimaan; dia ed ontan ginapoan to lamet so mansalita ed sikara, lapu ed anengneng to a sikato so akala na tulong ed mata na saray arum, dia ed onia saray nakdaan so tinmakot.

11 Dia ed ontan sikato so apasuotan a mansalita na dakel ni ed sikara a nankuan: Nia, agagik ira, ag yo ni abasa a say Dios initer to so pakapanyari ed sakey a too, angan si Moises, a bakbaken to so danum na Ambalañga a Dayat, tan saya so abelsay a nansian dia tan diman, a dia ed saya saray Israelita, a sikara so kaamaan tayo, so binmasil ed amaga a dalin, tan say danum so nansaip ed saray ñgayew a taga-Egipto tan sikara so inakmon to?

12 Tan natan nia, no say Dios initer to ed saya a too so ontan a pakapanyari, sirin akin pansusupiatan yo ed limog yo a dili, tan ikuan yo ya ag to initer ed siak so pakapanyari pian nakabatan ko so nipaakar ed tutol ya onsabi ed sikayo likud no sikayo so mambabawi?

13 Balet, nia, ag yo labat imburi so saray salitak, balet imburi yo met so amin a salita ya imbalikas na kaamaan tayo, tan ontan met ed saray salita ya imbalikas na saya a too, si Moises, a sikato so awalaan na ontan la a kabaleg na pakapanyari a niiter ed sikato, on, saray salita ya imbalikas to nipaakar ed isabi na Mesias.

14 On, ag kasi pinaneknekan to a say Anak na Dios so onsabi? Tan unong ya impaatagey to so pinanday a gansa ya oleg ed kalawakan, angan ontan met nipaatagey so saman so onsabi.

15 Tan no kaonoñgan so karakel na saray ontañgay ed saman ya oleg sikara so nabilay, angan ontan met no kaonoñgan so kinarakel na saraman so ontañgay ed Anak na Dios a walaan na pananisia, a walaan na mapaabeba ya espiritu, so nabilay, angan onkana ed bilay a saya so andi-angaan.

16 Tan natan nia, aliwa labat a si Moises so nampaneknek ed saraya a beñgatla, balet ontan met na amin a masanto a profeta, nanlapu ed saray agew to ya anga ed saray agew nen Abraham.

17 On, tan nia, anengneng nen Abraham so isabi to, tan sikato so napno na liket tan sikato so nangayaga.

18 On, tan nia ikuan ko ed sikayo, aliwa labat a si Abraham so makapikabat ed saraya a beñgatla, balet wala ni ra so dakel sakbay na saray agew nen Abraham a sikara so atawag ed gangan na Dios; on, angan unong ed gangan na Anak to; tan saya pian nipatnag ed saray totoo, ed dakel a nilibo a taon sakbay na isabi to, ya angan say pananundon so onsabi ed sikara.

19 Tan natan pilalek ko a nakabatan yo, a nanlapu la ed saray agew nen Abraham wala la so dakel a profeta a nampaneknek ed saraya a beñgatla; on, nia, si profeta Zenos so nampaneknek ya andi-takot; a lapu ed saya sikato so pinatey da.

20 Tan nia, ontan met nen Zenock, tan si Ezias met, tan ontan met nen Isaias, tan si Jeremias, (si Jeremias sikato met lamlamang so profeta a nampaneknek ed kaderal na Jerusalem) tan natan kabat tayo la a say Jerusalem so aderal unong ed saray salita nen Jeremias. O sirin akin a say Anak na Dios so ag onsabi unong ed profesiya to?

21 Tan natan pansusupiatan yo ni kasi a say Jerusalem so aderal? Ikuan yo ni kasi a saray lalaki ya anak nen Sedekias ag da ra pinatey, ya amin da likud ed si Mulek? On, tan ag yo kasi nanenengneng a saray boleg nen Sedekias wala ra dia ed sikatayo, tan sikara so pinapaway da ed dalin na Jerusalem? Balet nia, aliwa ni a saya ya amin—

22 Si ama tayo a Lehi so dinagdag da a pinmaway ed Jerusalem lapu ed pinaneknekan to so saraya a beñgatla. Si Nephi pinaneknekan to met so saraya a beñgatla, tan amin met lawari a kaamaan tayo, ya anga ed saraya a panaon; on, pinaneknekan da so isabi nen Cristo, tan nantalaran ira ed arapen, tan sikara so nangayaga ed agew to a saya so onsabi.

23 Tan nengneng yo, sikato so Dios, tan sikato so wala ed sikara, tan imparungtal to so inkasikato ed sikara, a sikara so dinundon to; tan initer da ed sikato so gloria, lapu ed saman so onsabi.

24 Tan natan, lapu ed anengneng ko a kabat yo so saraya a beñgatla tan saraya so ag yo niburi likud no mantila kayo, dia ed ontan sikayo so nankasalanan, lapu ed impulisay yo so amin a beñgatla, manwari ya ontan a dakel a pakapatnagan so naawat yo; on, angan naawat yo so amin a beñgatla, mandapag a saray beñgatla a wala ed tawen, tan amin a beñgatla a wala ed dalin, ya onkana a tasi a saraya so tua.

25 Balet nia, ag yo inawat so katuaan, tan sikayo so inmalsa sumpa ed masanto a Dios yo; tan angan dia ed saya a panaon, imbes a mantipon kayo na kayamanan yo ed tawen, a diman angapo so manderal, tan diman angapo so makaunla ya aliwa a malinis, ilulosbo yo ed inkasikayo so sanok sumpa ed agew na panañgokom.

26 On, anga ed saya a bekta sikayo so asinger la a naderal, lapu ed saray panagpatey yo tan say panaamong yo ya angapo so kasal tan say karelmeñgan yo, onkana ed andi-angaan a kadederal; on, tan likud no mambabawi kayo saya so onsabi ed sikayo ya ag la ombayag.

27 On, nia saya so angan natan wala la ed saray puerta yo; on, onla kayo ed yuroñgan na panañgokoman, tan mansukait kayo; tan nengneng yo, say okom yo so pinatey da, tan sikato so mandokdukol ed dala to; tan sikato so pinatey na dili ya agi to, a mampipilalekan to ya onyurong ed yuroñgan na panañgokoman.

28 Tan nia, sikara a dua so kabiañgan na maamot ya olopan, a say añgiletneg si Gadianton tan saman so mauges a pampipilalekan to a deralen so saray kamarerua na totoo.