1 Tan agawa dia ed saya met lamlamang a taon, si Nephi iniawat to so yuroñgan na panañgokoman ed sakey a too a manñgaran na Cezoram.

2 Tan unong a saray gangan tan oley da so niletneg ed voces na saray totoo, tan saraman so nampili na mauges so dakerakel nen say saraman so nampili na maong, dia ed ontan sikara la so asinger la ed kadederal, tan saray gangan so nanmaliw la ya aliwa a maptek.

3 On, tan aliwa ni a saya ya amin; sikara so totoo a matalker so teñger da, a dia ed onia ag ira naoleyan na gangan ni say kaptekan, likud no dia ed kaderal da.

4 Tan agawa ya akesawan si Nephi lapu ed karelmeñgan da; tan inikbanan to so yuroñgan na panañgokoman, tan pinili to so mampulong na salita na Dios ed amin a nakekeraan ya agew to, tan ontan met ed si agi to a Lehi, ed amin a nakekeraan ya agew to;

5 Tan anunotan da so saray salita ya imbalikas nen ama ra a Helaman ed sikara. Tan saraya so salita ya imbalikas to:

6 Nia, anak ko a lalaki, pirawat ko a nunoten yo ya onoren so saray gangan na Dios; tan labay ko ya ipulong yo ed saray totoo so saraya a salita. Nia, initer ko ed sikayo so kañgaranan na saray inmuna ya ateng tayo a sikara so pinmaway ed dalin na Jerusalem; tan saya so ginawak pian no nanunotan yo so saray ñgaran yo sikara komon so nanunotan yo; tan no sikara so nanunotan yo komon nanunotan yo so saray kimey da; tan sano nanunotan yo so saray kimey da komon nakabatan yo no panon a saraya so asalita, tan nisulat met, a sikara so maong.

7 Dia ed ontan, anak ko a lalaki, pilalek ko a gawaen yo so saman so maong, pian nikuan ed sikayo, tan nisulat met, anga ed siñga saya so asalita tan nisulat nipaakar ed sikara.

8 Tan natan anak ko a lalaki, nia wala ni so siñga labay ko ed sikayo, a saya a pilalek, pian ag yo gawaen so saraya a beñgatla pian sikayo so mampasirayew, balet pian gawaen yo so saraya a beñgatla pian nisinop yo so onkana ed inkasikayo so sakey a kayamanan ed tawen, on, a saya so andi-angaan, tan saman so kapiganman ag onkupas; on, pian nawalaan kayo na saman so pinabli a palabo na andi-angaan a bilay, a wala so kanepegan tayo a mañgipasen a saya so niiter ed kaamaan tayo.

9 O nunoten yo, nunoten yo, anak ko, so saray salita nen ari Benjamin ya imbalikas to ed saray totoo to; on, nunoten yo ya angapo so arum a dalan odino pamaakaran pian say too so nilaban, no ag labat ed panamegley na dala a bagat nen Jesu Cristo a pamaandi na kasalanan, a sikato so onsabi; on, nunoten yo a sikato so onsabi a manundon ed mundo.

10 Tan nunoten yo met so saray salita ya imbalikas nen Amulek ed si Zeezrom, diman ed ciudad na Ammonihah; tan inkuan to ed sikato a say Katawan so andi-saew ya onsabi a manundon ed saray totoo to, balet sikato so ag onsabi a manundon ed saray kasalanan da, balet dundonen to ra manlapu ed saray kasalanan da.

11 Tan wala ed sikato so pakapanyari ya initer na Ama ed sikato a manundon ed sikara manlapu ed saray kasalanan da lapu ed pambabawi; dia ed ontan imbaki to so saray angeles to a mañgibawag ed saray balita nipaakar ed saray pambabawi, a saya so mañgawit na pakapanyari ed Mananundon, onkana ed kilalaban na saray kamarerua ra.

12 Tan natan, anak ko a lalaki, nunoten yo, nunoten yo a saya so wala ed bato a dampay na Mananundon tayo, a sikato si Cristo, ya Anak na Dios, a sikato so pañgitalindegan yo na letnegan yo; pian sano say demonyo ibaki to so saray mabiskeg a dagem to, on, say pana to ed alimbosabos, on, sano amin a kristal a yelo to tan mabiskeg a bagyo to so ombasig ed sikayo, angapo so pakapanyari to a mañgiguyor ed sikayo ed leksab na kaaraleman na segsegang tan andi-angaan a kaermenan, lapu ed say bato a niletnegan yo, a saya so petepeteg a letnegan, sakey a letnegan sano diman a mampaalagey so saray totoo ag ira napelag.

13 Tan agawa a saraya so salita ya imbañgat nen Helaman ed saray anak to a lalaki; on, imbañgat to ed sikara so dakerakel a beñgatla ya ag la nisulat, tan ontan met dakel a beñgatla a saraya so nisulat.

14 Tan anunotan da so saray salita to; tan dia ed ontan sikara so linma, ya onoren da so saray gangan na Dios, pian ibañgat da so salita na Dios ed limog na amin a totoo nen Nephi, ya ingapo ra ed ciudad na Bountiful;

15 Tan nanlapu diman anga ed ciudad na Gid; tan nanlapu ed ciudad na Gid ya anga ed ciudad na Mulek;

16 Tan angan manlapu ed sakey a ciudad ya anga ed sananey, anga ed sikara so akakar ed limog na amin a totoo nen Nephi a wala ed dalin a mamaabalaten; tan nanlapu diman anga ed dalin na Zarahemla, ed limog na saray Lamanite.

17 Tan agawa a sikara so nampulong ed baleg a pakapanyari, a dia ed saya kinmelaw so saray sinmisian a tinmaynan a nanlapu ed saray Nephite, dia ed onia sikara so dinmago tan impatua ra so saray kasalanan da tan sikara so abiniagan onkana ed pambabawi, tan sikara a tampol so pinmawil ed saray Nephite a nankimey pian nipulang da ed sikara so saray kaugsan a ginagawa ra.

18 Tan agawa a si Nephi tan si Lehi so nampulong ed saray Lamanite ed ontan la a kabaleg na pakapanyari tan pakaoley, lapu ed awalaan ira na pakapanyari tan pakaoley a niiter ed sikara pian sikara so makapansalita, tan niiter met ed sikara no anto so salitaen da—

19 Dia ed ontan sikara so nansalita ed baleg a pankelaw na saray Lamanite, ya akatanguyor ed sikara, a dia ed saya wala so walo a libo ed saray Lamanite a wala ed dalin na Zarahemla tan dia ed kaliber-liber so abiniagan onkana ed pambabawi, tan sikara so apanisia ra ed karelmeñgan na saray sisia a tawir na kaamaan da.

20 Tan agawa a linma si Nephi tan si Lehi manlapu diman ya amaarap ira ed dalin na Nephi.

21 Tan agawa a sikara so inerel na ñgayew na saray Lamanite tan impisok da ra ed pañgawan; on, angan diman met lamlamang a pañgawan no iner si Ammon tan saray kaagian to so impisok na saray aripen nen Limhi.

22 Tan kayari a sikara so nipisok ed pañgawan ed loob na dakel ya agew ya angapo so panañgan, nia, nila da ra ed pañgawan pian sikara la so alaen da a pateyen.

23 Tan agawa a si Nephi tan si Lehi so aliktob na siñga apoy, angan dia ed saya ag da idiwit so saray lima da ed sikara lapu ed takot da ag la piga sikara so napoolan. Manwari ya ontan, si Nephi tan si Lehi so ag apoolan; tan sikara so nanalalagey ed pegley na apoy tan ag ira apoolan.

24 Tan sanen anengneng da a sikara so aliktob na siñga lusek ya apoy, tan saya so ag akapool ed sikara, say puso ra so awalaan na biskeg na linawa.

25 Tan anengneng da a saray Lamanite so antakot da ra a limaan; ni ag ira onasinger ed sikara, balet sikara so akaalagey a siñga ra naemel ed pankelaw.

26 Tan agawa ya akaalagey si Nephi tan si Lehi tan ginapoan da so mansalita ed sikara, a kuan da: Ag kayo natatakot, tan nia, say Dios so añgipanengneng ed sikayo na saya a makapakelaw a beñgatla, a saya ya impanengneng to ed sikayo pian ag yo kami nalimaan a pateyen.

27 Tan nia, sanen nibalikas da so saraya a salita, say dalin so yinmegyeg a mapalalo, tan yinmugayog so dingding na pañgawan a siñga ñgalñgali nageba ed dalin; balet nia, ag ira akusbo. Tan nia, saraman so wala ed dalem na pañgawan so saray Lamanite tan saray sinmisian a Nephite.

28 Tan agawa a sikara so atalukboñgan na lurem na kabiluñgetan, tan masimuon a takot so sinmabi ed sikara.

29 Tan agawa a sinmabi so sakey a voces a siñga manlalapu ed tagey na lurem na kabiluñgetan, a nankuan: Mambabawi kayo, mambabawi kayo, tan ag yo la panseseetan a deralen so saray igagangan ko ya imbakik ed sikayo a mañgibawag na maong a balita.

30 Tan agawa sanen nadñgel da so saya a voces, tan atalineng a saya so aliwa a voces na karul, ni say saya so voces na baleg a magulo ya iñgal, balet nia, saya so sakey a makalna a voces a nagnap ed ulimek, a siñga sakey ya esaes, tan, tinmalos anga ed utel na kamarerua—

31 Tan manwari a say voces so maulimek, nia saya say dalin so minmayegmeg a mapalalo, tan saray dingding na pañgawan so yinmugayog lamet, a siñga ñgalñgali nageba ed dalin; tan nia say lurem na kabiluñgetan, ya akatalukbong ed sikara, so ag ni binmuyak—

32 Tan nia say voces so sinmabi lamet, a nankuan: Mambabawi kayo, mambabawi kayo, say panarian na tawen asinger la; tan ag yo la panseseetan a deralen so saray igagangan ko. Tan agawa a say dalin minmayegmeg lamet, tan saray dingding so yinmugayog.

33 Tan ontan lamet ed komatlo a panaon say voces so sinmabi, tan sinalita to ed sikara so saray makapakelaw a salita ya ag nibalikas na too; tan saray dingding yinmugayog lamet, tan say dalin yinmegyeg a siñga la napaldua so saya.

34 Tan agawa a saray Lamanite ag ira makabatik lapu ed saman a lurem na kabiluñgetan a tinmalukbong ed sikara; on, tan ontan met ag ira makagalaw lapu ed takot a sinmabi ed sikara.

35 Natan wala so sakey ed limog da a sikato so inianak a Nephite, a sikato nen saman so miembro na simbaan na Dios balet sikato so sinmian ed sikara.

36 Tan agawa a sikato so linmiñgaw, tan nia, tinmanek so pakanengneng to ed lurem na kabiluñgetan tan anengneng to so lupa nen Nephi tan si Lehi; tan nia, sikara so masmasnag a maong, angan siñga lupa na saray angeles. Tan anengneng to ya intangwa ra so saray mata ra ed tawen; tan say awawey da siñga ra mitotungtong odino ibebesñgaw da so voces da ed sakey a pinalsa a sankanengneng da.

37 Tan agawa a saya a too so inmeyag ed saray karaklan, pian sikara so onliñgaw tan onnengneng. Tan nia, wala so pakapanyari a niiter ed sikara kanian linmiñgaw ira tan ninmengneng; tan anengneng da so lupa nen Nephi tan si Lehi.

38 Tan inkuan da ed saman a too: Nia, anto so kabaliksan na saraya a beñgatla, tan siopa so pisasalitaan na saraya a totoo?

39 Natan say ñgaran na saman a too so Aminadab. Tan si Aminadab inkuan to ed sikara: Sikara so mitotungtong ed saray angeles na Dios.

40 Tan agawa a saray Lamanite inkuan da ed sikato: Anto so gawaen tayo, pian saya a lurem na kabiluñgetan so naekal ya akatalukbong ed sikatayo?

41 Tan si Aminadab inkuan to ed sikara: Nakaukolan a mambabawi kayo, tan ibelyaw yo ed voces, anga ed sikayo so nawalaan na pananisia ed si Cristo, a sikato so imbañgat ed sikayo nen Alma, tan si Amulek, tan si Zeezrom; tan sano saya so gawaen yo, say lurem na kabiluñgetan so naekal ya akatalukbong ed sikayo.

42 Tan agawa a ginapoan da ya amin so onkelyaw ed saman a voces na saman so amayegpeg ed dalin; on, sikara so nankelyaw anga ed say lurem na kabiluñgetan so abuyak.

43 Tan agawa a sanen inwandag da so saray mata ra ed kaliber-liber, tan anengneng da a say lurem na kabiluñgetan so abuyak ed impantalukbong to ed sikara, nia, anengneng da a sikara so aliktob ya aliber-liber, on balang sakey a kamarerua, na siñga lusek ya apoy.

44 Tan si Nephi tan si Lehi so wala ed pegley da; on, sikara so aliktob ya aliber-liber; on, sikara so siñga wala ed pegley na manliob ya apoy, balet sikara so ag kapiganman asakitan na saya, ni say dingding na pañgawan so ag apoolan; tan sikara so napno na gayaga ya ag-nibalikas tan napno na gloria.

45 Tan nia, say Masanto ya Espiritu na Dios so linmasur a nanlapu ed tawen, tan linmoob ed saray puso ra, tan sikara so napno na siñga apoy, tan sikara so akapambalikas na saray makapakelaw a salita.

46 Tan agawa a wala so sakey a voces a sinmabi ed sikara, on, sakey a voces a makaruyo, a siñga sakey ya esaes, a nankuan:

47 Kareenan, kareenan so onsabi ed sikayo, lapu ed pananisia yo ed Inararok a Maong, a sikato so wala la nanlapu ed inletneg na mundo.

48 Tan natan, sanen saya so nadñgel da intangwa ra so saray mata ra a siñga onnenengneng ira ed nanlapuan na voces; tan nia, anengneng da so tawen a linmukas; tan saray angeles so linmasur a nanlapu ed tawen tan saraya so nantalima ed sikara.

49 Tan wala so ñgalñgali talora a lasus a kamarerua so akanengneng tan akadñgel ed saraya a beñgatla; tan sikara so nigangan ya onla tan ag ira mankelaw, ni say sikara so manduarua.

50 Tan agawa a sikara so linma, tan nampulong ira ed saray totoo, ya imbabawag da ed amin a pasen ed kaliber-liber so amin a beñgatla a nadñgel tan anengneng da, a dia ed saya wala so dakerakel a kabiañgan na saray Lamanite ya akuyong da, lapu ed ontan la a kabaleg na paneknek a naawat da.

51 Tan no kaonoñgan so saray akuyong ingaton da so saray agamil da ed bakal, tan ontan met ed busol da tan sisia a tawir na kaamaan da.

52 Tan agawa ya initer da ed saray Nephite so saray dalin a kayarian da.