1 Tan dia ed onia nanengneng tayo so aliwan inkamatua, tan ontan met ed aliwan inkamatuor na puso na saray anak na totoo; on, tan nanengneng tayo a say Katawan dia ed baleg ya andi-angaan a kamaoñgan to bendicionan tan paaliguasen to so saraman so iter da so talek da ed sikato.

2 On, tan nanengneng tayo ed panaon sano paaliguasen to so saray totoo to, on, dia ed idakel na saray kaalugan da, saray manok da tan ayayep da, tan dia ed balitok, tan dia ed pilak, tan amin a nengneng na ankabli a beñgatla ed balang sakey a kanengneñgan tan marakep ya inkagawa; dia ed pañgiligyas to ed saray bilay da, tan dia ed pañgilaban to ed sikara manlapu ed lima na saray kabusol da; a palemeken to so puso na saray kabusol da pian ag ira mañgibawag na bakal sumpa ed sikara; on, tan dia ed arum a salita, gagawaen to ya amin so beñgatla ya onkana ed pankaabigan tan panliketan na saray totoo to; on, dia ed saman a panaon paaweten da so saray puso ra, tan lingwanan da so Katawan a Dios da, tan gatin-gatinan da ed saray sali ra so Masanto a Bugtong—on, tan saya so lapu ed inawa ra, tan mapalalo ya aliguas da.

3 Tan dia ed onia nanengneng tayo likud no deriaen na Katawan so saray totoo to ed dakel a doknal, on, likud no sikara so dalawen to na patey tan katekep so mapalalo a takot, tan eras tan amin a nengneng na salot, sikato so ag da nanunotan.

4 O agay la so inkamakulang-kulang, tan agay la ya andi-kakanaan, tan agay la so inkauges, tan kademonyoan, tan agay la so siglat da a mangawa na karelmeñgan, tan agay la so tantan da a mangawa na kaabigan, na saray anak na totoo; on, agay la so siglat da ya ondeñgel ed saray salita na sakey a mauges, tan iteen da so puso ra ed saray andi-kakanaan a beñgatla ed mundo!

5 On, agay la so siglat da a mampatagey ed kinon; on, agay la so siglat da a mampasirayew, tan mangawa na amin a say nengneng to karelmeñgan; tan agay la so tantan da a makanunot ed Katawan a Dios, da, tan ideñgel da so layag da ed saray simbawa to, on, agay la so tantan na kurang da ed basbas na kakabatan!

6 Nia, ag da pilalek a say Katawan a Dios da, a sikato so amalsa ed sikara, so mañgoley tan mañgipañgulo ed sikara; angaman ontan so kinabaleg na kaabigan to tan panañgasi to ed sikara, ipasen da ya andi-kana so saray simbawa to, tan ag da kaliktan a sikato so mañgiwanwan ed sikara.

7 O agay la so kabaleg na inkaangapo na anak na saray totoo; on, angan sikara so lalo ya abeba nen say sapok na dalin.

8 Tan nia, say sapok na dalin so ondere dia tan diman, dia ed pakapaldua to, dia ed gangan na andi-angaan a Dios tayo.

9 On, nia dia ed voces to saray pukdol tan saray palandey so ongiwgiw tan onyegyeg.

10 Tan dia ed pakapanyari na voces to saraya so nabuyak, tan manmaliw a mapalanas, on, anga ed sakey a patar.

11 On, dia ed pakapanyari na voces to say lapag a dalin so onyegyeg;

12 On, lapu ed pakapanyari na voces to, saray letnegan so ongalaw, anga ed pegley.

13 On, tan no ikuan to ed say dalin—Dere—saya so ondere.

14 On, no ikuan to ed dalin—Sika so ompawil, pian ondukey so agew na dakel ya oras—saya so nagawa;

15 Tan dia ed onia, unong ed salita to say dalin so ompawil, tan dia ed pakanengneng na too say agew so nampareen; on, tan nengneng yo, saya so tua; balet say peteg say dalin so ongagalaw tan aliwa a say agew.

16 Tan nengneng yo, met, no ikuan to ed saray danum na kaaraleman—Sika so ommaga—saya so nagawa.

17 Nengneng yo, no ikuan to ed saya a palandey—Sika so ontagey, tan onla ka dia tan ontabon ka ed saman a ciudad, pian natabonan—nengneng yo saya so nagawa.

18 Tan nia, no say sakey a too iamot to so kayamanan to ed dalem na dalin, tan say Katawan ikuan to—Sika so naayew, lapu ed karelmeñgan na saman so añgiamot—nia, saya so naayew.

19 Tan no say Katawan ikuan to—Sika so naayew, pian angapo so too a makaalmo ed sika manlapu ed saya a panaon ya anga ed arapen tan kapiganman—nia, angapo so too a makaalmo ed saya manlapu ed natan ya anga ed anga.

20 Tan nia, no say Katawan ikuan to ed sakey a too—Lapu ed karelmeñgan mo, sika so naayew ya anga ed anga—saya so nagawa.

21 Tan no say Katawan ikuan to—Lapu ed saray karelmeñgan mo sika so naandi ed arapan ko—igangan to a saya so nagawa.

22 Tan abagey so saman a too a pañgibagaan to na onia, tan saya so nagawa ed saman so mangagawa na karelmeñgan, tan sikato so ag la nilaban; dia ed ontan, lapu ed saya a pamaakaran, pian saray totoo so nilaban, kanian say pambabawi so niparungtal.

23 Dia ed ontan, mapalar so saray mambabawi tan ondeñgel ed voces na Katawan a Dios da; tan saraya so saraman so nilaban.

24 Tan komon say Dios iabuloy to, ed baleg a pakapanyari to, pian saray totoo so naawit ed pambabawi tan dia ed saray maong a kimey, pian sikara so nipawil ed gracia ya onkana ed gracia, unong ed saray kimey da.

25 Tan pirawat ko ya amin a totoo so nilaban. Balet nabasa tayo a dia ed makana tan kaunoran ya agew wala so saray arum a nipulisay, on, sikara so nipulisay ed arapan na Katawan;

26 On, sikara so nigena ed sakey a kipapasen na andi-angaan ya ermen, pian sumpalen da so saray salita a mankuan: Saraman so nangawa na maong so initer ed sikara so andi-angaan a bilay; tan saraman so nangawa na mauges niiter ed sikara so andi-angaan a kadudusa. Tan saya so onia. Amen.