1 Tan natan agawa a si Samuel, a Lamanite, so namprofesiya na dakel ni a baleg ira a beñgatla a saraya so ag la nisulat.

2 Tan nia, inkuan to ed sikara: Nengneng yo, iter ko ed sikayo so sakey a pakapatnagan; tan limara a taon ni so onsabi, tan nia, dia ed ontan onsabi so Anak na Dios a manundon ed amin na saraman so manisia ed ñgaran to.

3 Tan nia, saya so iter ko ed sikayo a pakapatnagan ed panaon na isabi to; tan nia, wala so saray baleg a liwawa ed tawen, ya angan dia ed labi sakbay na isabi to angapo so biluñget, angan say pakanengneng na too a saya so siñga agew.

4 Dia ed ontan, wala so sakey ya agew tan sakey a labi tan sakey ya agew, a siñga saksakey ya agew tan angapo so labi; tan saya so onkana ed sikayo a pakapatnagan; lapu ed amta yo so ibutay na agew tan ontan met ed iselek to; dia ed ontan nakabatan da a peteg a wala so duara ya agew tan sakey a labi; manwari ya ontan say labi ag ombiluñget; tan saman so labi sakbay na inkianak to.

5 Tan nengneng yo, wala so ombutay a sakey a balo a bitewen, ya angapo ni so siñga onia ya anengneng yo; tan saya met so sakey a pakapatnagan ed sikayo.

6 Tan nia aliwa ni a saya ya amin, wala ni so dakerakel a pakapatnagan tan pakelaw ed tawen.

7 Tan nagawa a sikayo ya amin so nikelawan, tan mankelaw, lapu ed saya sikayo so niparukol ed dalin.

8 Tan nagawa a siopaman a manisia ed Anak na Dios, sikato met lamlamang so nawalaan na andi-angaan a bilay.

9 Tan nia, onia so ingangan na Katawan ed siak, ed panamegley na angel to, a siak so onla ed sikayo tan ibagak so saya a beñgatla ed sikayo; on, ingangan to ak a mamprofesiya na saraya a beñgatla ed sikayo; on, tan inkuan to ed siak: Ikelyaw mo ed saya a totoo, mambabawi kayo tan iparaan so dalan na Katawan.

10 Tan natan, lapu ed sakey ak a Lamanite, tan imbalikas ko ed sikayo so saray salita na Katawan ya ingangan to ed siak, tan lapu ed saya so ansakit sumpa ed sikayo, sikayo so mamapasnok ed siak tan aanapen yo a siak so deralen yo, tan siak so pinagit yo a pinapaway ed limog yo.

11 Tan nareñgel yo so saray salitak, kanian, lapu ed saya a gagala so inakaran ko dia ed tagey na padir na saya a ciudad, pian nareñgel yo tan nakabatan yo so saray panañgokom na Dios a manaalagar ed sikayo makaseñgeg ed saray karelmeñgan yo, tan ontan met pian nakabatan yo so saray nakaukolan ed pambabawi;

12 Tan ontan met pian nakabatan yo so isabi nen Jesu Cristo, say Anak na Dios, ya Ama na tawen tan dalin, say Manamalsa na amin a beñgatla manlapu ed gapo; tan pian nakabatan yo so saray pakapatnagan na isabi to, ed gagala a manisia kayo ed ñgaran to.

13 Tan no manisia kayo ed ñgaran to sikayo so mambabawi ed amin a kasalanan yo, pian dia ed onia sikayo so nawalaan na pakapaandi ed saraya ed panamegley na matunong a kimey to.

14 Tan nia, lamet, sakey ni a pakapatnagan so iter ko ed sikayo, on, say pakapatnagan na ipatey to.

15 Tan nia, sikato so andi-saew ya ompatey pian say kilalaban so onsabi; on, nakaukolan ed sikato tan manmaliw a nakaukolan a sikato so ompatey, pian nagawa so kioli ed bilay na saray inaatey, pian dia ed ontan saray totoo so naawit ed kawalaan na Katawan.

16 On, nia, saya a patey gagawaen to so kioli ed bilay, tan dundonen to so amin a katooan manlapu ed unaan a patey—saman so inkaespiritu a patey; lapu ed amin a katooan, lapu ed inkigapol nen Adan so asian ed kawalaan na Katawan, so nibilang ya inatey, mandapag ed beñgatla ya inkalaman tan beñgatla ya inkaespiritu.

17 Balet nia, say kioli ed bilay nen Cristo dundonen to so katooan, on, iñgen amin a katooan, tan awiten to ra ya ipawil ed kawalaan na Katawan.

18 On, tan awiten a nagawa so nakaukolan ed pambabawi, a siopaman a mambabawi sikato met lamlamang so ag nabatang tan nibuntok ed apoy; balet siopaman ya ag mambabawi sikato so nabatang tan ibuntok ed apoy; tan onsabi ed sikara lamet so sakey a patey na espiritu, on, komadua a patey, tan sikara so nabatang lamet ed saray beñgatla a nipaakar ed inkamatunong.

19 Dia ed ontan mambabawi kayo, mambabawi kayo, dia ed pakapikabat yo ed saraya a beñgatla tan ag yo sumpalen mantepel kayo ed inkasikayo a naawit ed kadodusa, tan sikayo so naawit ed saya a komadua a patey.

20 Balet nia, unong ed inkuan ko ed sikayo nipaakar ed sakey ni a pakapatnagan, say pakapatnagan na ipatey to, nia, dia ed saman ya agew a sikato so manlikna na patey say agew so ombiluñget tan ag mañgiter na liwawa to ed sikayo; tan ontan met ed bulan tan saray bitewen; tan angapo so liwawa ed tapew na saya a dalin, iñgen manlapu ed panaon na panirap to na patey, ed loob na talora ya agew, anga ed sikato so onoli ed bilay manlapu ed saray inaatey.

21 On, dia ed oras na pañgiawat to ed espiritu to wala so saray karul tan kirmat ed loob na dakel ya oras, tan say dalin so onyegyeg tan onmayegmeg; tan saray ankakabaleg a bato a wala ed tapew na saya a dalin, mandapag a wala ed tapew na dalin odino dia ed dalem, a kabat yo ed saya a panaon so tibukel, odino say babaleg a kabiañgan na saya so sakey a tibukel a beñgatla, saraya so nabuyak;

22 On, saraya so naboybuyak a mankaddua, tan saraya so naalmo ed saray letak tan lamat, tan apisag-pisag ed tapew na amin a dalin, on, mandapag dia ed tapew na dalin tan dia ed dalem.

23 Tan nia, wala so saray mabiskeg a bagyo, tan dakel so saray palandey ya onabeba, a siñga patar, tan wala so saray pasen a tatawagen natan a patar so manmaliw a palandey, ya agay la so kinaatagey da.

24 Tan dakel a dalan so nabuyak, tan dakel a ciudad so manmaliw ya angapo so manayam.

25 Tan dakel a lubok so nalukasan, tan iawat da so dakel ed saray inaatey da; tan dakel a sasantos so omparungtal ed dakel.

26 Tan nia, dia ed onia so impisalita na angel ed siak; tan inkuan to ed siak a wala so saray karul tan kirmat ed loob na dakel ya oras.

27 Tan inkuan to ed siak a legan ya onlalabas so karul tan kirmat, tan ontan met ed mabiskeg a bagyo, a saraya a beñgatla so nagawa, tan say biluñget sakoban to so tapew na amin a dalin ed loob na talora ya agew.

28 Tan say angel inkuan to ed siak a dakel so makanengneng na ankakabaleg ni nen say saraya a beñgatla, ed gagala pian manisia ra a saraya a pakapatnagan tan saraya a pakelaw so nakaukolan a nagawa ed amin a tapew na saya a dalin, ed gagala ya angapo so señgegan na ag-panisia ed limog na anak na saray totoo—

29 Tan saya a gagala so onkana ed siopaman a manisia so nilaban, tan siopaman ya ag manisia, sakey a matunong a tutol so onsabi ed sikara; tan ontan met no sikara so nadusa sikara so añgawit ed dili a kadodusa ra.

30 Tan natan nunot yo, nunot yo, kaagian ko, siopaman so ompatey, sikato so ompatey ed inkasikato a dili; tan siopaman so mangawa na karelmeñgan, saya so gawaen to ed inkasikato a dili; tan nia, sikayo so bulos; sikayo so naabuloyan ya ongalaw ed inkasikayo a dili; tan nia, say Dios initer to ed sikayo so kakabatan tan ginawa to kayo a bulos.

31 Initer to ed sikayo pian nakabatan yo so maong manlapu ed mauges, tan initer to ed sikayo pian pilien yo so bilay odino patey; tan nayarian yo so mangawa na maong tan sikayo so nipawil ed saman so maong, odino wala so kipawil na saman so maong ed sikayo; odino nayarian yo so mangawa na mauges, tan wala ed sikayo so saman so mauges ya ompawil ed sikayo.