1 Nia, natan agawa sanen nibalikas nen Nephi so saraya a salita, wala so saray totoo ed limog da so binmatik ed yuroñgan na panañgokoman; on, angan limara so linma, tan inkuan da ed inkasikara a dili, legan a sikara so oonla:

2 Nia, natan nakabatan tayo a peteg no kasi saya a too so sakey a profeta tan say Dios so nangangan ed sikato a mamprofesiya na makapakelaw a beñgatla ed sikatayo. Nia, ag tayo manisia a wala ed sikato so saya; on, ag tayo manisia a sikato so sakey a profeta; manwari ya ontan, no saya a beñgatla ya inkuan to nipaakar ed pañgulo ya okom so tua, a sikato so inatey, dia ed ontan manisia tayo a saray arum a sinalita to so tua.

3 Tan agawa a sikara so binmatik ed angaan na pakayari ra, tan sikara so linmoob ed yuroñgan na panañgokoman: tan nia, say pañgulo ya okom so niparukol ed dalin, tan sikato so mandokdukol ed dili a dala to.

4 Tan natan nia, sanen saya so anengneng da sikara so nikelawan a mapalalo, a dia ed say sikara so niparukol ed dalin; lapu ed ag ira anisia ed saray salita nen Nephi nipaakar ed pañgulo ya okom.

5 Balet natan, sanen anengneng da sikara so anisia, tan say takot so sinmabi ed sikara ag la piga ya amin a tutol a sinalita nen Nephi so onsabi ed saray totoo; dia ed ontan sikara so ginmiwgiw, tan niparukol ed dalin.

6 Natan, tampol sanen say okom so apatey—lapu ed sikato so sinaksak nen agi to dia ed maamot a sulong, tan sikato so binmatik, tan saray igagangan so binmatik tan impakabat da ed saray totoo, ya ineyag da so pateyan ed limog da;

7 Tan nia saray totoo nantitipon ira diman ed pasen na yuroñgan na panañgokoman—tan nia, dia ed kelaw da anengneng da so limara a totoo a niparukol ed dalin.

8 Tan natan nia, ag kabat na totoo so nipaakar ed saray karaklan ya atiptipon ed tanamanan nen Nephi; dia ed ontan inkuan da ed limog da a dili: Saraya a totoo so amatey ed okom, tan binakbak ira na Dios pian ag ira makabatik ed sikatayo.

9 Tan agawa a sikara so dinegkeman da, tan binalor da ra tan impisok da ra ed pañgawan. Tan agawa a sakey a pakabat so nibawag ed paway na saman a dalin a say okom so inatey, tan saray amatey so naerel la tan nipisok la ra ed pañgawan.

10 Tan agawa dia ed kaimbuasan saray totoo so nantitipon ira ed inkasikara a manermen tan manayuno, ed pumpon na pañgulo ya okom a sikato so inatey.

11 Tan ontan met na saraman so okom a wala ed tanamanan nen Nephi, tan nadñgel da so saray salita to, sikara met so atipon ed pumpon.

12 Tan agawa a sikara so nantepet-tepet ed saray totoo, a kuan da: Iner so kawalaan na saraman so limara ya imbaki a mantepet nipaakar ed pañgulo ya okom no kasi sikato so inatey? Tan sikara so inmebat a kuan da: Nipaakar ed saray limara a kuan yo a sikara so imbaki yo, ag mi amta; balet wala so limara a sikara so amatey, a sikara so impisok mi ed pañgawan.

13 Tan agawa a saray okom nampilalekan da ya awiten da ra; tan sikara so inawit da, tan nia sikara so saraman so limara a nibaki; tan nia saray okom so nantepet ed sikara pian nakabatan da so nipaakar ed saya ya agawa, tan insalaysay da ed sikara so amin a ginawa ra, a kuan da:

14 Sikami so binmatik tan akasabi kami ed pasen na yuroñgan na panañgokoman, tan sanen anengneng mi so amin a beñgatla unong ed pinaneknekan nen Nephi, sikami so nikelawan a dia ed say sikami so niparukol ed dalin; tan sanen pinmawil la so liknaan mi lapu ed inkikelawan mi, nia sikami la so nipañgaw.

15 Natan, no nipaakar ed impatey na saya a too, ag mi kabat no siopa so nangawa; tan saya labat so amta mi; sikami so binmatik tan sikami so akasabi unong ed pilalek yo, tan nia sikato so inatey, unong ed saray salita nen Nephi.

16 Tan natan agawa a saray okom impaliwawa ra so saya ya agawa ed saray totoo, tan sikara so nansalita sumpa ed si Nephi, a kuan da: Nia, amta mi a saya a Nephi so akinonong ed sakey pian sikato so mamatey ed okom, tan dia ed ontan saya no ibawag to ed sikatayo, pian sikatayo so napasimbalo to ed pananisia to, pian ipaatagey to so inkasikato a sakey a baleg a too, a pinili na Dios, tan sakey a profeta.

17 Tan natan nia, kabaten tayo so saya a too, tan ipatua to so liñgo to tan ipakabat to ed sikatayo so tua ya amatey ed saya ya okom.

18 Tan agawa ya imbulos da so saray limara ed saman ya agew na pumpon. Manwari ya ontan, nampasnokan da so saray okom lapu ed saray salita ya imbalikas da sumpa ed si Nephi, tan sikara so akibaliñgaan ed sikara ed sakey tan sakey, a dia ed saya sikara so kinewkew da.

19 Manwari ya ontan, ingangan da ya erelen si Nephi tan baloren da tan iakar ed arap na karaklan, tan sikato so ginapoan da a tepetan ed nanduroma a pamaakaran pian napambabalingliñgan to so salita to, pian tutolan da na patey—

20 Ya inkuan da ed sikato: Sika so akinonong; siopa so saya a too so nangawa na saya ya impamatey? Natan ibagam ed sikami, tan birbir mo la so liñgom; a kuan da ni: Nia wala dia so kuarta; tan ontan met iter mi ed sika so bilay mo no ibagam ed sikami, tan birbiren mo so impinonong a ginawam ed sikato.

21 Balet si Nephi inkuan to ed sikara: O sikayo a makulang-kulang, sikayo ya ag-agalsiman ed puso, sikayo a bulag, tan sikayo a matalker so teñger a totoo, kabat yo no panon karokey so pantepel na Katawan a Dios yo pian sikayo so mampatuloy ed saya a dalan yo a panagkasalanan?

22 O nepeg yo la a gapoan so onaglem tan manermen, lapu ed baleg a kadederal a dia ed saya a panaon manaalagar la ed sikayo, likud no sikayo so mambabawi.

23 Nia inkuan yo a siak so akinonong ed sakey a too pian sikato so mamatey ed si Seezoram, say pañgulo ya okom tayo. Balet nia, ikuan ko ed sikayo, lapu ed pinaneknekan ko ed sikayo pian nakabatan yo so nipaakar ed saya a beñgatla; on, angan onkana a sakey a tasi ed sikayo, a kabat ko so karelmeñgan tan saray karumsisan a wala ed limog yo.

24 Tan lapu ed saya so ginawak, ikuan yo ya akinonong ak ed sakey a too pian sikato so mangawa ed saya a beñgatla; on, lapu ed impanengneng ko ed sikayo so saya a tanda mamapasnok kayo ed siak, tan pilalek yo a deralen so bilay ko.

25 Tan natan nia, ipanengneng ko ed sikayo so sananey ni a tanda, tan nengneng yo no kasi dia ed saya a beñgatla pilalek yo ak ni a deralen.

26 Nia ikuan ko ed sikayo: Onla kayo ed abong nen Seantum, a sikato so laki ya agi nen Seezoram, tan ikuan yo ed sikato—

27 Si Nephi, saman so mankonkonwari a profeta, a sikato so añgiprofesiya na dakel a kaugsan nipaakar ed saya a totoo, so akinonong ed sika, dia ed onia pinatey mo si Seezoram, a sikato so agim?

28 Tan nia, ikuan to ed sikayo, Andi.

29 Tan ikuan yo ed sikato: Pinatey mo so agim?

30 Tan sikato so onalagey a napno na takot, tan piri-piri ya ag to amta so ibaga to. Tan nia, saya so ag to birbiren ed sikayo; tan ipanengneng to a kunwari a mankelaw; manwari ya ontan, ikuan to ed sikayo ya angapo so kasalanan to.

31 Balet nia, sikato so sukaitan yo, tan narumog yo so dala ed saloy na kolibemben to.

32 Tan sano saya so nanengneng yo, ikuan yo ed sikato: Iner so nanlapuan na saya a dala? Ag mi kasi kabat a saya so dala nen agim?

33 Tan dia ed saya sikato so ongiwgiw, tan say nengneng to so omposisaw, a siñga say patey so sinmabi ed sikato.

34 Tan dia ed ontan ikuan yo ed sikato: Lapu ed saya a takot tan impusisaw na lupam, nia, kabat mi ya sika so nankasalanan.

35 Tan babaleg ni a takot so onsabi ed sikato; tan dia ed ontan, ipatua to ed sikayo, tan ag to la iburi a sikato so nangawa ed saya ya impamatey.

36 Tan dia ed ontan ikuan to ed sikayo, a siak, Nephi, angapo so amtak nipaakar ed saya ya agawa likud no saya so niiter ed siak ed panamegley na pakapanyari na Dios. Tan dia ed ontan nakabatan yo a sakey ak a matua a too, tan siak so nibaki ed sikayo a nanlapu ed Dios.

37 Tan agawa a sikara so linma tan ginawa ra, so angan unong ed inkuan nen Nephi ed sikara. Tan nia, saray salita ya inkuan to so tua; tan unong ed salita to sikato so namburi; tan unong met ed salita to sikato so nampatua.

38 Tan sikato so inawit da pian pamintuan to a sikato a dili so amatey, a dia ed saraman so limara so imbulos da, tan ontan met ed si Nephi.

39 Tan wala so pigara ed saray Nephite ya anisia ed saray salita nen Nephi; tan wala ra met so arum ya anisia lapu ed paneknek na saray limara, lapu ed sikara so apasimbalo legan a wala ra ed dalem na pañgawan.

40 Tan natan wala so pigara ed limog na saray totoo, ya añgikuan a si Nephi so sakey a profeta.

41 Tan wala ra so arum a nankuan: Nia, sikato so sakey a dios, tan likud no sikato so sakey a dios ag to nakabatan so amin a beñgatla. Tan nia, imbaga to so kanunotan na saray puso tayo, tan ontan met imbaga to ed sikatayo so saray beñgatla; tan iñgen inawit to ed pikakabat tayo so tua ya amatey ed pañgulo ya okom tayo.