1 Ne nanku tudi mua kumona bu mudiyi ya mashimi ne kabidi ya dibenga kusuminyina mitshima ya bana ba bantu; eyowa, tudi mua kumona ne Mukalenga mu buimpa buenda budi kabuyi ndekelu udi ubenesha ne ulubuluja badi bateka tshieyemenu tshiabu kudiye.

2 Eyowa, ne tudi mua kumona mena diba didiye ulubuluja bantu benda, eyowa, bitangila divulangana dia madimi abu, bisumbu bia bimuna bikesa ne binena biabu, ne dia ngolo, ne dia tshiamua tshia mpalata, ne dia mishindu yonsu ya bintu bia mushinga bia mushindu onsu ne ngenzedi wabi yonsu; wepeshela mioyo yabu, ne ubapatuisha mu bianza bia bena lukuna babu; utekesha mitshima ya bena lukuna babu bua ne kabakebi mvita nabu to; eyowa, ne mu tshikosu, wenza bintu bionsu bua diakalenga ne musangelu bia bantu benda; eyowa, ki diba adi badi bapapisha mitshima yabu, ne bapua Mukalenga Nzambi wabu moyo, ne badiatakaja Wa Tshijila muinshi mua makasa abu—eyowa, ne ebi mbualu kabena ne makenga to, ne mbua bubanji buabu.

3 Ne nanku tudi tumona ne pa kumbusha Mukalenga yeya munyoka bantu benda ne ntatu ya bungi, eyowa, pa kumbusha yeya mubakumbula ne lufu ne ne bôwa bukola, ne ne tshiyola ne ne mishindu yonsu ya tshipupu, kabakumuvuluka to.

4 Ô bu mudi bana ba bantu bapota, ne baditambishi, ne babi, ne bena diabulu, ne bu mudibu ne lukasa lunena bua kuenza malu mabi, ne lujoku lunena bua kuenza malu mimpa; eyowa, bu mudibu ne lukasa lunena bua kuteleja mêyi a muena bubi, ne kuteka mitshima yabu pa bintu bia tshianana bia pa buloba!

5 Eyowa, bu mudibu ne lukasa lunena bua kudibandisha mu diditambisha; eyowa, bu mudibu ne lukasa lunena bua kudiamba, ne kuenza mishindu yonsu ya malu mabi; ne bu mudibu ne lujoku lunena bua kuvuluka Mukalenga Nzambi wabu, ne bua kuteka matshi ku mibelu yenda, eyowa, bu mudibu ne lujoku lunena bua kuenda mu njila ya lungenyi!

6 Monayi, kabena bajinga ne Mukalenga Nzambi wabu, uvua mubafuka, abakôkesha ne ikala mukalenga wabu to; nansha mudi buimpa bunena buenda ne lusa luenda kudibu, badi bapetula mibelu yenda, ne kabena basua ne ikala muludiki wabu to.

7 Ô bu mudibu bunena butupu bua bana ba bantu; eyowa, badi mena ne mushinga mukesa kumpala kua lupuishi lua buloba.

8 Bualu monayi, lupuishi lua buloba ludi luenda eku ne eku, lupanduluka pankatshi, ku mukenji wa Nzambi munena ne wa kashidi.

9 Eyowa, monayi ku dîyi dienda tukuna ne mikuna bidi bizakala ne binyungana.

10 Ne ku bukola bua dîyi dienda idi yupuka, ne ilua mishemakana, eyowa, mena bu mudi tshibanda.

11 Eyowa, ku bukola bua dîyi dienda buloba bujima budi bunyungana;

12 Eyowa, ku bukola bua dîyi dienda, bishimikidi bidi binyungana, mena munkatshi-nkatshi.

13 Eyowa, ne padiye wambila buloba ne—Umbuka—budi bumbuka.

14 Eyowa, padiye wambila buloba ne—Ne upingana panyima, bua bulepesha bula bua dituku bua meba a bungi—bidi bienzeka;

15 Ne nanku, bilondeshila ku dîyi dienda buloba budi bupingana panyima, ne bidi bimueneka kudi muntu ne diba didi dimana muaba umua; eyowa, ne monayi, bidi nanku; bualu bulelela buloba ki budi bunyunga ne ki ndiba to.

16 Ne monayi, kabidi, pambilaye ndondu ya ndondu mula—Ûma—bidi bienzeka.

17 Monayi, yeya muambila mukuna ne—juka, ne luaku apa ne kulukila tshimenga atshi, bua tshijîkibua—monayi bidi bienzeka.

18 Ne monayi, pikala muntu musokoka tshiuma tshienda mu buloba, ne Mukalenga muamba ne—Lekelayi tshitshipibua, bua malu mabi a udi mutshisokoka—monayi, netshitshipibua.

19 Ne pikala Mukalenga muamba ne—Tshipibua, bua muntu katshipetshi kubangila tshikondu etshi tô ne bua kashidi—monayi, muntu kakutshipeta tshikondu etshi tô ne bua kashidi to.

20 Ne monayi, pikala Mukalenga muambila muntu ne—Neutshipibua bua kashidi, bua malu mabi eba—nebienzeka.

21 Ne pikala Mukalenga muamba ne—Bua bualu bua malu mabi eba neukoshibua ku mpala kuanyi—neenza ne nebikala nanku.

22 Ne diakabi kudi wambilaye nanku, bualu nebikala kudi udi wenza malu mabi, ne kena mua kupandishibua to; nanku, bua bualu ebu, dikudimuna dia mutshima divua difidibua bua bantu kupandabu.

23 Nanku, babeneshibua bobu bikala bakudimuna mutshima ne bumvuila dîyi dia Mukalenga Nzambi wabu; bualu aba ki bobu bapandishibua.

24 Ne Nzambi anyisha, mu tshiwudi tshienda tshinena, ne bantu bafikishibua ku dikudimuna dia mutshima ne dienza dia midimu mimpa, bua bikala mua kupingajibua ku ngâsa pa mutu pa ngâsa, bilondeshila ku midimu yabu.

25 Ne ndi musua ne bantu bapandishibua. Kadi tudi tubala ne mu dituku dinena ne dia ndekelu kudi bamua bipatshibua, eyowa, bumbushibua ku mpala kua Mukalenga;

26 Eyowa, bâtekibua mu ngikadilu wa dikenga kadiyi ndekelu, ne nanku nebikumbaja miaku idi yamba ne: Bobu badi benza malu mimpa nebapeta moyo wa kashidi; ne bobu badi benza bibi nebapeta dipîshibua dia kashidi. Ne nanku mudibi. Amena.