1 Ne mpindiewu biakalua ne mu tshidimu tshia makumi muanda mukulu ne tshisambombo, Bena Nefi batshivua bashala mu bubi, eyowa, mu bubi bupita, pavua Bena Lamana batangila bua kulama mikenji ya Nzambi ne bushuwa menamena, bilondeshila ku mikenji ya Mose.

2 Ne biakalua ne mu tshidimu etshi kuvua muntu umua uvua ne dîna ne Samuele, Muena Lamana, wakalua ku bulaba bua Zalahemela, ne wakabanga kuyisha bantu. Ne biakalua ne wakayisha bantu, matuku a bungi, bua dikudimuna dia mutshima, ne bakamuipata, ne ukavua pabuipi ne kupingana ku bulaba buenda.

3 Kadi monayi, dîyi dia Mukalenga diakalua kudiye, bua ne apingana kabidi, ne amba ku Nyuma kudi bantu bitangila bintu bionsu biamuluila ku mutshima wenda.

4 Ne biakalua ne kabakalekela ne abuela mu tshimenga to; bua nanku wakaya ne wakabanda pa mutu pa tshimanu tshiatshi, ne wakôlola tshianza tshienda ne wakabila ne dîyi dikola, ne wakamba ku Nyuma kudi bantu bitangila bintu bionsu bivua Mukalenga wela mu mutshima wenda.

5 Ne wakabambila ne: Monayi, mema, Samuele, Muena Lamana, ndi ngakula mêyi a Mukalenga adiye wela mu mutshima wanyi; ne monayi udi muela mu mutshima wanyi bua kuambila bantu aba ne ne muela wa mvita wa bululama udi mulembelela pa mitu ya bantu aba; ne bidimu nkama inayi kabiakupita to amu pa kumbusha muela wa mvita wa bululama muponela bantu aba.

6 Eyowa, dibutuka dikola didi dindila bantu aba, ne bushuwa didi diluila bantu aba, ne tshintu nansha tshimua katshiena mua kupandisha bantu aba to amu pa kumbusha bikala dikudimuna dia mutshima ne ditabuija kudi Mukalenga Yezu Kilisto, walua bushuwa pa buloba, ne wakenga makenga a bungi ne washipabu bua bantu benda.

7 Ne monayi, muanjelu wa Mukalenga wakabimanyisha, ne wakatuadila anyima wanyi mukenji mulenga. Ne monayi, ngakatumibua kunudi bua kunumanyishalu penu, bua nupeta mukenji mulenga; kadi monayi nuakabenga kungakidila.

8 Bua nanku, Mukalenga udi wamba ne: Bua dipapisha dia mitshima ya bantu ba Bena Nefi, pa kumbusha bobu bakudimuna mutshima nengumbusha dîyi dianyi kudibu, ne nengumbusha Nyuma wanyi kudibu, ne ntshiakubatukijila kabidi to, ne nenshintula mitshima ya bana babu kudibu.

9 Ne bidimu nkama inayi kabiakupita to kumpala kua mema kuenza ne batûtshibua; eyowa, nembakumbula ne muela wa mvita, ne ne tshiyola, ne ne tshipupu.

10 Eyowa, nembakumbula mu tshiji tshianyi tshikola, ne nekuikala bamua ba ku lukongu lua bantu luinayi, ba ku bena lukuna benu, bikala ne moyo, bua bamona dibutuka dijima dienu; ne ebi nebienzeka bushuwa pa kumbusha nuenu bakudimuna mutshima; ne ba ku lukongu lua bantu luinayi nebenzeja dibutuka dienu, mudi Mukalenga wamba.

11 Kadi panuakudimuna mutshima ne panuapingana kudi Mukalenga Nzambi wenu nendekela tshiji tshianyi, Mukalenga udi wamba nanku; eyowa, nanku Mukalenga udi wamba, babeneshibua bobu bikala bakudimuna mutshima ne bapingana kundi, kadi diakabi kudi yeya udi kayi ukudimuna mutshima to.

12 Eyowa, Mukalenga udi wamba ne, diakabi kudi tshimenga tshinena etshi tshia Zalahemela; bualu monayi, tshidi tshipandishibua bua bantu badi bikala bakana; eyowa, Mukalenga udi wamba ne, diakabi kudi tshimenga tshinena etshi, bualu ndi mumona ne kudi bantu ba bungi, eyowa, mena tshitupa tshinena tshia tshimenga tshinena etshi, bâpapisha mitshima yabu kundi.

13 Kadi babeneshibua bobu badi bakudimuna mutshima, bualu bobu nengepelesha. Kadi monayi, bu biobi kabiyi bua bantu bakana badi mu tshimenga tshinena etshi to, monayi, mvua ngenzeja ne kapia kapueka mu diûlu ne katshibutula.

14 Kadi monayi, bua bualu bua bakana ki tshiditshi tshepeleshibua. Kadi monayi, diba didi dilua, Mukalenga udi wamba nanku, ne panuipata bakana munkatshi muenu, pashisha nenuikala baboba bua dibutuka; eyowa, diakabi dikala kudi tshimenga tshinena etshi, bua bubi ne malu mapita bubi bidimu.

15 Eyowa, ne diakabi dikala kudi tshimenga tshia Gideona, bua bubi ne malu mapita bubi bidimu.

16 Eyowa, ne diakabi dikala kabidi kudi bimenga bionsu bidi ku mpenga yonsu ya mu bulaba, bidi Bena Nefi basamu, bua bualu bua bubi ne malu mapita bubi bidimu.

17 Ne monayi, Mukalenga wa Misumba udi wamba ne, mutshipu neulua mu bulaba, bua bualu bua bantu badi mu bulaba, eyowa, bua bubi buabu ne malu mapita bubi abu.

18 Ne Mukalenga wa Misumba udi wamba ne, eyowa, Nzambi wetu munena ne mulelela, nebilua ne ewu yonsu wasokoka biuma munda mua buloba kakubipeta kabidi to, bua mutshipu munena wa mu bulaba, amu pa kumbusha yeya muikala muntu muakana ne pabisokokaye bua Mukalenga.

19 Mukalenga udi wamba ne, bualu ndi musua ne basokoka biuma biabu kundi; ne batshipibua bikala badi kabayi basokoka biuma biabu kundi to; bualu muntu nansha umua kena usokoka biuma bienda kundi, amu pa kumbusha pikalaye muntu muakana; ne udi kayi usokoka biuma bienda kundi to, udi mutshipibua, ne kudi tshiuma tshienda kabidi, ne muntu nansha umua kakutshiangula to bua mutshipu wa mu bulaba.

20 Mukalenga udi wamba ne, dituku nedilua diasokokabu biuma biabu, bualu badi bateka mitshima yabu ku mabanji; ne bualu badi bateka mitshima yabu ku mabanji, ne nebasokoka biuma biabu pânyemabu kumpala kua bena lukuna babu; bualu kabakubisokoka kundi to, batshipibua bikala bobu ne kabidi biuma biabu; ne mu dituku adi nebatûtshibua.

21 Monayi, nuenu bantu ba mu tshimenga tshinena etshi, ne telejayi mêyi anyi; eyowa, telejayi mêyi adi Mukalenga wamba; bualu monayi, udi wamba ne nudi batshipibua bua mabanji enu, ne kabidi mabanji enu mmatshipibua bualu nudi bateka mitshima yenu kudiwu, ne kanuena bumvuila mêyi a wakanupeshawu to.

22 Kanuena nuvuluka Mukalenga Nzambi wenu bua bintu bidiye munubenesha nabi to, kadi nudi nuvuluka diba dionsu mabanji enu, kanuyi nusakidila Mukalenga Nzambi wenu buawu to; eyowa, mitshima yenu kayena midifila kudi Mukalenga to, kadi idi yuwula ne diditambisha dikola, tô ne ku didiamba, ne tô ne ku didileja dikola, malakana, luntûta lua bungi, budimu, dikengeshangana, ne dishipa dia bantu, ne mishindu yonsu ya malu mabi.

23 Bua bualu ebu Mukalenga Nzambi wakaluisha mutshipu pa mutu pa bulaba, ne kabidi pa mabanji enu, ne ebi nanku bua malu enu mabi.

24 Eyowa, diakabi kudi bantu aba, bualu tshikondu etshi tshidi tshifika, tshinudi nuipata bambi, ne nubaseka, ne nubâsa mabua, ne nubashipa, ne nubenzela mishindu yonsu ya malu a bubi, mena bu munuakenzela bantu ba mu tshikondu tshia kala.

25 Ne mpindiewu panudi nuakula, nudi nuamba ne: Bu matuku etu mikala mu matuku a batatuetu ba kala, katuvua tushipa bambi to; katuvua tubâsa mabua, ne tubipata to.

26 Monayi nudi bibi kubapita; bualu bu mudi Mukalenga ne moyo, padi muambi ulua munkatshi muenu ne padiyi uyisha dîyi dia Mukalenga, didi dijadika bua mibi yenu ne malu enu mabi, nudi numufîkila tshiji, ne numuipata ne nukeba mishindu wa njila yonsu ya kumushipa; eyowa, nudi ne yeya udi muambi wa mafi, ne muenji wa mibi, ne tshia diabulu, bualu udi ujadika ne bienzedi bienu bidi bibi.

27 Kadi monayi, palua muntu munkatshi muenu ne pambaye ne: Enzayi nanku, ne kakuena bualu bubi to; enzayi naka ne kanuakukenga to; eyowa, unuambila ne: Endayi bu munudi nudiumvua mu mitshima yenu; eyowa, endayi bu munudi nudimona ku mesu enu, ne enzayi tshionsu tshidi mitshima yenu ijinga—ne palua muntu munkatshi muenu ne pambaye nanku, nenumuakidila, ne nenuamba ne udi muambi.

28 Eyowa, nenumuzanjika, ne nenumupesha bimua bia ku bintu bienu; nenumupesha imua ya ku ngolo yenu, ne ya ku mpalata yenu, ne nenumuvuadika ne bilamba bia mushinga mukola; ne bualu udi wakula ne mêyi a lubombu kunudi, ne udi wamba ne bintu bionsu bidi bimpa, apu kanuakumukuata tshilema to.

29 Ô nuenu lukongu lua bantu lubi ne lunyanguka; nuenu bantu bapapa ne ba nshingu mîminyina, mutantshi bula kayi unuatshinka ne Mukalenga neanutukijila nuenza nanku? Eyowa, mutantshi bula kayi unuadilekela ne baludiki bapota ne mpofu banulombola? Eyowa, mutantshi bula kayi unuasungula mîdima pa mutu pa bukenka?

30 Eyowa, monayi, tshiji tshia Mukalenga tshikadi tshinutemela; monayi, udi utshipa bulaba bua malu enu mabi.

31 Ne monayi, tshikondu tshidi tshilua tshidiye utshipa mabanji enu, bua alua ne bufinu, bua ne kanuena mua ku’alama to; ne mu matuku a bupela buenu kanuena mua ku’alama to.

32 Ne Mukalenga wa Misumba udi wamba ne, mu matuku a bupela buenu nenubila kudi Mukalenga; ne nenubila tshianana, bualu kabutu kenu kakadi kamana kulua pa mutu penu, ne dibutuka dienu didi dia bushuwa; ne pashisha nenudila ne nenuela mikunda mu dituku adi. Ne pashisha nenudilakana, ne nenuamba ne:

33 Ô bu mema mukudimuna mutshima, ne ntshivua mushipa bambi, ne ntshivua mubâsa mabua, ne ntshivua mubipata to. Eyowa, nenuamba mu dituku adi ne: Ô bu tuetu bavuluka Mukalenga Nzambi wetu mu dituku diakatupeshaye mabanji etu, ne pashisha ka’avua alua ne bufinu bua tuetu katu’ajimiji to; bualu monayi, mabanji etu atunyemi.

34 Monayi, tudi tuteka tshiamu tshia mudimu apa ne malaba tshidi tshijimina; ne monayi miela yetu ya mvita idi mitunyenga mu dituku tuyikeba bua kuluangana mvita.

35 Eyowa, tuakasokoka biuma bietu ne biakatufinuka, bua mutshipu wa mu bulaba.

36 Ô bu tuetu bakudimuna mutshima mu dituku diakalua dîyi dia Mukalenga kutudi; bualu monayi bulaba budi butshipibua, ne bintu bionsu bidi bilua ne bufinu, ne katuena mua kubilama to.

37 Monayi, nyuma mibi idi mitunyungulula, eyowa, banjelu ba udi ukeba bua kufuisha anyima yetu badi batunyungulula ku mpenga yonsu. Monayi, malu mabi etu adi makola. Ô Mukalenga, kuena mua kumbusha tshiji tshieba kutudi anyi? Ne ewu neikala ngakuilu wenu mu matuku awu.

38 Kadi monayi, matuku enu a kutêtshibua akadi mapita; nuvua bapumbisha dituku dia lupandu luenu tô ne padidi dipita bua kashidi, ne dibutuka dienu didi dia bushuwa; eyowa, bualu mu matuku onsu a moyo wenu nuakakeba tshinuvua kanuyi mua kupeta to; ne nuakakeba musangelu ku dienza dia malu mabi, tshintu tshidi tshishilangana ne buikadi bua buakana ebu budi munda mua Mfumu wetu munena ne wa Tshiendelela.

39 Ô nuenu bantu ba pa bulaba, telejayi mêyi anyi! Ne ndi nsambila ne tshiji tshia Mukalenga tshiumbuka kunudi, ne nukudimuna mutshima ne nupandishibua.