1 Ne mpindiewu biakalua ne Samuele, Muena Lamana, wakamba ku Nyuma bitangila malu manena a bungi avua kâyi mua kufundibua to.

2 Ne monayi, wakabambila ne: Monayi, ndi nupesha tshimanyinu; bualu bua bidimu bitanu bikuabu nebipita, ne monayi, pashisha Muana wa Nzambi nealua bua kusungila bonsu bitabuija mu dîna dienda abu.

3 Ne monayi, nennupesha tshimanyinu etshi bua diba dia dilua dienda; bualu monayi, nekuikala bukenka bukola mu diûlu, mua ne butuku kumpala kua yeya kulua kakuakuikala mîdima to, mua ne nebimueneka kudi bantu bu ne badi mundamunya.

4 Bua nanku, nekuikala dituku dimua ne butuku bumua ne dituku dimua, bikala bu mudi dituku dimua ne kakuyi butuku to; ne etshi netshikala kunudi bu mudi tshimanyinu; bualu nenumanya papatuka diba ne pabueladi kabidi; bua nanku nebamanya bushuwa ne matuku abidi ne butuku bumua; nansha nanku butuku kabuakuila to; ne nebuikala butuku bua kumpala kua yeya kuledibua.

5 Ne monayi, mutotu mupia-mupia neupatuka, unudi kanuyi banji kumona to; ne etshi netshikala kabidi tshimanyinu kunudi.

6 Ne monayi ebi ki mbionsu to, nekuikala bimanyinu ne malu a dikema bia bungi mu diûlu.

7 Ne nebilua ne nenukatshila bonsu, ne nenukema, mua ne nenupona pa buloba.

8 Ne nebilua ne ewu yonsu witabuija Muana wa Nzambi, nyeye mena neapeta moyo wa kashidi.

9 Ne monayi, ki muakampesha Mukalenga mukenji, kudi muanjelu wenda, ne ndua ne nnuambila bualu ebu; eyowa, udi mumpesha mukenji ne ngamba ku Nyuma bitangila malu â; eyowa, udi mungambila ne: Bila kudi bantu aba ne, kudimunayi mutshima ne longololayi njila wa Mukalenga.

10 Ne mpindiewu, bualu ndi Muena Lamana, ne ndi munuambila mêyi adi Mukalenga mumpeshila mukenji, ne bualu adi makola kunudi, nudi numfîkila tshiji ne nudi nukeba bua kunshipa, ne nuakangipata munkatshi muenu.

11 Ne nenumvua mêyi anyi, bualu, bua dijinga edi ndi mubanda pa bimanu bia tshimenga etshi, bua numvua ne numanya bitungu bia Nzambi binuindila bua malu mabi enu, ne bua numanya kabidi mikenji ya dikudimuna dia mutshima;

12 Ne kabidi ne numanya bua dilua dia Yezu Kilisto, Muana wa Nzambi, Tatu wa diûlu ne wa buloba, Mufuki wa bintu bionsu kumbukila ku mbangilu; ne numanya bimanyinu bia dilua dienda, bua dijinga dia ne nuitabuija mu dîna dienda.

13 Ne binuitabuija mu dîna dienda nenukudimuna mutshima ku mibi yenu yonsu, nanku bua nupeta dilekedibua diayi ku njila wa makumbanyinyi enda.

14 Ne monayi, kabidi, ndi nupesha tshimanyinu tshikuabu, eyowa, tshimanyinu tshia lufu luenda.

15 Bualu monayi, bushuwa udi ne tshia kufua bua lupandu lulua; eyowa, budiyi nabu ne tshidi tshikengela mbua ne afua, bua kuvuija dibika ku lufu dia bafua, nanku bua bantu batuadibua ku mpala kua Mukalenga.

16 Eyowa, monayi, lufu elu ludi lutuala dibika, ne ludi lusungila bukua bantu bonsu ku lufu lua kumpala—lufu lua nyuma alu; bualu bukua bantu bonsu, ku dipona dia Adama bikala bakoshibua ku mpala kua Mukalenga, badi bikala bu bafua, bubidi bua malu a mu mubidi ne a malu a mu nyuma.

17 Kadi monayi, dibika dia Kilisto ku lufu didi disungila bukua bantu, eyowa, mena bukua bantu bonsu, ne didi dibapingaja ku mpala kua Mukalenga.

18 Eyowa, ne didi dituala mukenji wa dikudimuna dia mutshima, bua ne ewu yonsu udi ukudimuna mutshima yeya kena upudibua ne wedibua mu kapia to; kadi ewu yonsu udi kayi ukudimuna mutshima to udi upudibua ne wedibua mu kapia; ne lufu lua nyuma ludi lubaluila kabidi, eyowa, lufu luibidi, bualu badi bakoshibua kabidi bua malu adi matangila buakana.

19 Bua nanku kudimunayi mutshima, kudimunayi mutshima, bua mu dimanya dia bintu ebi ne kanuyi nubienza, kanudilekedi bua kulua mu dipîshibua to, ne nutulukibua ku lufu elu luibidi.

20 Kadi monayi, bu mungakanuambila bitangila tshimanyinu tshikuabu, tshimanyinu tshia lufu luenda, monayi, mu dituku diakengaye lufu, diba nedifîkishibua ne nedibenga bua kunupesha bukenka buadi; ne kabidi ngondu ne mitoto; ne kakuakuikala bukenka pa mpala wa bulaba ebu to, mena katshia ku tshikondu tshiafuaye, bua mutantshi wa matuku asatu, tô ne tshikondu tshiajukaye kabidi ku bafua.

21 Eyowa, tshikondu tshiakulaye moyo nekuikala makubakuba ne mipenyi bua mutantshi wa meba a bungi, ne buloba nebunyungana ne nebuzakala; ne mabua adi pa mpala wa buloba ebu, adi pa mutu pa buloba ne adi muinshi, anudi bamanya ne adi malamakana mpindiewu, anyi tshitupa tshiawu tshinena tshidi tshilamakana pamua, neapanduluka;

22 Eyowa, neapandika mu bipesa bibidi, ne nebâsanga kunyima kua apu ne mishonyi ne ne mitanta, ne mu bipesa pa mpala wa buloba bujima, eyowa, bionsu pa mutu ne muinshi mua buloba.

23 Ne monayi, nekuikala tshipepela tshikola, ne mikuna ya bungi neikuluka panshi, tshibanda, ne nekuikala miaba ya bungi idibu babikila mpindiewu ne bibanda yalua mikuna, mipita bula.

24 Ne bibeba bia bungi nebikoseka, ne bimenga binena bia bungi nebishala bitupu.

25 Ne nkita ya bungi neikanguka, ne neipatula bafua bayi ba bungi; ne bansantu ba bungi nebamueneka kudi bantu ba bungi.

26 Ne monayi, ki muakangambila muanjelu nanku; bualu wakangambila ne nekuikala makubakuba ne mipenyi bua mutantshi wa meba a bungi.

27 Ne wakangambila ne pikala makubakuba ne mipenyi biela, ne tshipepela, ne bintu ebi nebikalaku, ne ne mîdima neibuikila mpala wa buloba bujima bua mutantshi wa matuku asatu.

28 Ne muanjelu wakangambila ne ba bungi nebamona bintu binena bipita ebi, bua dijinga dia ne bitabuija ne bimanyinu ebi ne malu a dikema â nebilua pa mpala onsu wa bulaba ebu, bua kipatshila ka ne kakuikadi bualu bua dipanga ditabuija munkatshi mua bana ba bantu to—

29 Ne ebi mu dijinga ne bonsu bitabuija bapandishibua, ne bonsu badi kabayi bitabuija, tshitungu tshiakana tshilua pa mutu pabu; ne kabidi biapîshibuabu badi badituadila pa mutu pabu dipîshibua diabu nkayabu.

30 Ne mpindiewu vulukayi, vulukayi, bana betu, ne ewu yonsu udi ufua, udi udifuisha nkayenda; ne ewu yonsu udi wenza malu a bubi, udi udienzelawu nkayenda; bualu monayi, nudi badisuila; nudi ne dianyisha dia kudienzela nkayenu; bualu monayi, Nzambi udi munupesha dimanya ne munuenza badisuila.

31 Udi munupesha bua ne nujingulula buimpa ku bubi, ne udi munupesha bua ne nusungula moyo anyi lufu; ne nudi mua kuenza buimpa ne kupingulujibua ku tshidi tshimpa, anyi ne kuenza ne tshidi tshimpa tshipingulujibua kunudi; anyi nudi mua kuenza bubi, ne kuenza ne tshidi tshibi tshipingulujibua kunudi.