1 Monayi, mpindiewu biakalua ne mu tshidimu tshia makumi asambombo ne tshia tshitema tshia dikôkesha dia balumbuluishi pa mutu pa bantu ba Nefi, ne Nefi, muana wa Helamana, wakapingana ku bulaba bua Zalahemela ufuma ku buloba bua ku node.

2 Bualu uvua muya munkatshi mua bantu bavua mu bulaba bua ku node, ne wakabayisha dîyi dia Nzambi, ne wakamba ku Nyuma pa bintu bia bungi kudibu;

3 Ne bakabenga mêyi enda onsu, bua ne kavua mua kushala munkatshi muabu to, kadi wakapingana kabidi ku bulaba bua diledibua dienda.

4 Ne pakamonaye ne bantu bavua mu ngikadilu wa bubi bukola, ne banyengi ba Gadiantona bavua basomba mu nkuasa ya bilumbuluilu—bikala banyenga bukalenga ne bukôkeshi bua mu bulaba; balekela mikenji ya Nzambi ku luseka, ne kabayi ne buakana nansha bukesa kumpala kuenda to; kabayi benzela bululama kudi bana ba bantu to;

5 Bapîsha bakana bua buakana buabu; balekela bapîla ne bena bubi baya kabayi banyokibua to bua makuta abu; ne menamena kabidi bua kushiyibua mu mudimu ku mutu kua bukalenga, bua kukôkesha ne kuenza bilondeshila ku disua diabu, ne bua kupeta makasa ne butumbi bia kudi ba pa buloba, ne menamena kabidi, bua kuluabi biteketa bua bobu kuenda masandi, ne kuiba, ne kushipa, ne kuenza bilondeshila ku disua diabu—

6 Mpindiewu bualu bubi bunena ebu buakaluila Bena Nefi, kabiyi mu mutantshi wa bidimu bia bungi to; ne pavua Nefi mubumona, mutshima wenda wakuwula ne kanyinganyinga mu munda muenda; ne wakatua tshikemu ne dipampakana dia anyima wenda, wamba ne:

7 Ô, bu matuku anyi mikala mu matuku avua tatuanyi Nefi diambedi mupatuka ku bulaba bua Yelushalema, mvua mua kusanka nenda mu buloba bulaya; mu matuku â, bantu benda bavua bateketa bua kubasengelela, bakamakana mu dilama dia mikenji ya Nzambi, ne kabayi basakibua ku dienza dia bubi lukasa to; ne bavua bateleja mêyi a Mukalenga lukasa—

8 Eyowa, bu matuku anyi mikala mu matuku awu, anyima wanyi uvua mua kuikala ne disanka bua buakana bua bana betu.

9 Kadi monayi, ndi muenjibua ne â ki matuku anyi, ne anyima wanyi neuwula ne kanyinganyinga bualu bua ebu bubi bua bana betu.

10 Ne monayi, mpindiewu biakalua ne bivua pa mutu pa kaleya, kavua mu budimi bua Nefi, buvua ku tshibeba tshivua tshilombola ku tshisalu tshinena, tshivua mu tshimenga tshia Zalahemela; bua nanku, Nefi uvua muinama pa mutu pa kaleya kavua mu budimi buenda, kaleya kavua kabidi pabuipi ne tshibuelelu tshia ku budimi tshivua tshilombola ku tshibeba.

11 Ne biakalua ne kuvua bantu bakuabu bavua bapitapu ne bakamona Nefi pavuaye witshikija anyima wenda kudi Nzambi pa mutu pa kaleya; ne bakanyema ne bakambila bantu tshivuabu bamona, ne bantu bakatuilangana pamua mu misumba bua bamona mua kumanya tshiena bualu tshia kudila kunena eku bua bubi bua bantu.

12 Ne mpindiewu, pakajuka Nefi wakamona misumba ya bantu bavua badisangisha pamua.

13 Ne biakalua ne wakabulula mukana muenda ne wakabambila ne: Monayi, bua tshinyi nudi badisangisha pamua? Bua mema kunuambila bua malu mabi enu?

14 Eyowa, bualu ndi mubanda pa kaleya kanyi bua kuitshikija anyima wanyi kudi Nzambi, bua kanyinganyinga kapita ka mutshima wanyi, kadi kikala bua malu mabi enu!

15 Ne nudi badisangisha pamua bua didila ne muadi wanyi, ne nudi nukema; eyowa, ne nudi ne bua kukema bikola; eyowa, nudi ne tshia kukema bualu nudi badifila kudi diabulu ne udi ne bukôkeshi ku mitshima yenu.

16 Eyowa, munyi munuvua mua kupesha njila kudi bulobeshi bua yeya udi upuekesha anyima yenu mu dikenga dia kashidi ne diakabi kadiyi ndekelu?

17 Ô kudimunayi mutshima, kudimunayi mutshima! Nudi basua kufua bua tshinyi? Kudimukayi, kudimukayi kudi Mukalenga Nzambi wenu. Bua tshinyi wanulekedi?

18 Mbualu nudi bapapisha mitshima yenu; eyowa, kanuakuteleja dîyi dia mulami wa mikoku muimpa; eyowa, nudi bamuyobola bua anufîkila munda.

19 Ne monayi, pamutu pa kunusangisha, pa kumbusha nuenu bakudimuna mutshima, monayi, neanutangalaja bua nulua biakudia bia mbua ne nyama ya dîtu.

20 Ô, munyi munuvua mua kupua Nzambi wenu moyo mu dituku mena divuaye munupatuisha?

21 Kadi monayi, mbua kupeta makasa, mbua kusamunyibua kudi bantu, eyowa, ne mbua nupeta ngolo ne mpalata. Ne nudi bateka mitshima yenu pa mabanji ne bintu bia tshianana bia pa buloba ebu, binudi nushipa, ne nupawula, ne nuiba, ne nushiminyina mukuenu malu, ne nuenza bubi bua mishindu yonsu ya malu a bubi.

22 Ne bua bualu ebu diakabi nedinukuata, pa kumbusha nuenu bakudimuna mutshima. Bualu nuenu kanuyi bakudimuna mutshima to, monayi, tshimenga tshinena etshi, ne kabidi bimenga binena abi bidi ku mpenga yonsu, bidi mu bulaba butudi basa, nebinyengibua bua kanuikadi ne muaba munkatshi muabi to; bualu, Mukalenga kakunupesha bukola to, bu mudiye muenza tô ne mpindiewu, bua nukandamena bena lukuna benu.

23 Bualu monayi, Mukalenga udi wamba nanku: Ntshiakuleja bena bubi bukola buanyi to, ne kudi umua kupita kudi mukuabu, amu kudi badi bakudimuna mutshima yabu ku mibi yabu, ne bumvuila mêyi anyi. Mpindiewu, nanku, ndi musua ne numona, bana betu, ne nebikala bilengela bua Bena Lamana kupita buenu pa kumbusha nuenu bakudimuna mutshima.

24 Bualu monayi, badi bakana bikola kunupita, bualu kabena benza mibi kushilangana ne dimanya dinena dinudi bapeta to; bua nanku Mukalenga neikala ne lusa kudibu; eyowa, nealepesha matuku abu ne neavudija ndelanganyi yabu, nansha panuabutuka bonsu, pa kumbusha nuenu bakudimuna mutshima.

25 Eyowa, diakabi dikala kunudi bua ne malu abu a bubi bupita manena budi bulua munkatshi muenu; ne nudi badisangisha kudibu, eyowa, ku tshisumbu tshia musokoku atshi tshivua Gadiantona mushikika!

26 Eyowa, diakabi nedinuluila bualu bua diditambisha dinudi balekela ne dibuela mu mitshima yenu, didi dinutambisha kupita tshidi tshimpa bua mabanji enu matamba bungi!

27 Eyowa, diakabi dikala kunudi bua bubi ne malu enu a bubi bupita!

28 Ne nenufua pa kumbusha nuenu bakudimuna mutshima; eyowa, mena malaba enu neanyengibua kunudi, ne nenubutuka pa mpala wa buloba.

29 Monayi mpindiewu, ntshiena ngamba ne bintu ebi nebienzeka, nkayanyi, bualu ntshiena mudimanyina bintu ebi to; kadi monayi, ndi mumanya ne bintu ebi bidi bilelela bualu Mukalenga Nzambi uvua mubimanyisha, bua nanku ndi njadika ne nebienzeka.