ယာကုပ် ၇

အခန်းကြီး ၇

ရှေရင်သည် ခရစ်တော်ကို ငြင်းပယ်၏၊ ယာကုပ်နှင့် ရန်တွေ့၏၊ နိမိတ်လက္ခဏာကို တောင်းဆို၍၊ ဘုရားသခင်၏ဒဏ်ခတ်တော်မူခြင်းကို ခံရ၏—ခပ်သိမ်းသောပရောဖက်တို့သည် ခရစ်တော်နှင့် သူ၏အပြစ်ဖြေခြင်းမင်္ဂလာအကြောင်းကို ဟောလေ၏—နီဖိုင်းအမျိုးသားတို့သည် မိမိတို့နေ့ရက်များကို အရပ်ရပ်သို့လည်သောသူများ၊ ဒုက္ခဆင်းရဲ၌မွေးဖွားသူများနှင့် လာမန်အမျိုးသားတို့၏ အမုန်းခံရသူများအဖြစ် အသက်ရှင်နေထိုင်ကြ၏။ ဘီစီ ၅၄၄–၄၂၁ ခန့်။

၁ ယခုမူကား၊ အချိန်တန်လာသောအခါ၊ နှစ်အချို့ ကုန်လွန်လေပြီးနောက်၊ နီဖိုင်းလူမျိုးများထဲ၌၊ ရှေရင်ဟု အမည်တွင်သောသူတစ်ဦး ပေါ်ပေါက်လာခဲ့၏။

၂ ဤသို့အားဖြင့်အချိန်တန်လာသောအခါ၊ ထိုသူသည် လူတို့၌ ဟောပြောခြင်းငှာ၊ ထို့အတူ ခရစ်တော်ရှိလိမ့်မည်မဟုတ်ကြောင်း သူတို့အားဟောကြားခြင်းငှာ အစပြု၏။ လူတို့အား မြှောက်ပင့်သည့်အရာ များစွာတို့ကိုလည်း ဟောပြော၏။ ဤအမှုကို သူပြုသည်မှာလည်း၊ ခရစ်တော်၏ဩဝါဒကို ဖျက်ဆီးနိုင်ခြင်းငှာပေတည်း။

၃ လူတို့၏စိတ်နှလုံးကို လှည့်ဖြားခေါ်ဆောင်သွားခြင်းငှာလည်း လုံ့လဝီရိယထက်သန်စွာ အလုပ်လုပ်၍၊ စိတ်နှလုံးများစွာတို့ကို လှည့်ဖြားခေါ်ဆောင်သွား၏။ ကြွလာတော်မူမည့်ခရစ်တော်ကို ငါယာကုပ်ယုံကြည်ခြင်းရှိကြောင်းကိုလည်း သူသိ၍၊ ငါ့ထံသို့လာနိုင်ခြင်းငှာ အခွင့်ကို များစွာရှာ၏။

၄ သူသည် ပညာလည်းတတ်၍ လူတို့၏ဘာသာစကားအကြောင်း စုံလင်သော အသိပညာ ရှိလေ၏။ သို့ဖြစ်၍၊ သူသည် နတ်ဆိုး၏တန်ခိုးအတိုင်း၊ များစွာသောမြှောက်ပင့်ခြင်းနှင့် စကားအရာ၌ များစွာသော အစွမ်းသတ္တိတို့ကို သုံးနိုင်လေ၏။

၅ ဤအရာတို့နှင့်စပ်လျဉ်း၍၊ ငါမြင်ခဲ့ရလေသည့် ဗျာဒိတ်တော်များစွာနှင့် များစွာသောအရာတို့ ရှိသော်ငြားလည်း သူသည် ငါ၏ယုံကြည်ခြင်းကို တုန်လှုပ်စေရန် မျှော်လင့်၏။ အကြောင်းမူကား၊ ငါသည် ကောင်းကင်တမန်တို့ကို အမှန်ပင်မြင်ခဲ့ရလေ၏၊ သူတို့သည်လည်း ငါ့ကို အမှုတော်ဆောင်ကြ၏။ အမှန်ပင်စကားအားဖြင့် ငါ့ကို မြွက်ဆိုတော်မူလျက်ရှိသည့် ကိုယ်တော်ရှင်၏အသံကိုလည်း အချိန်နှင့်အမျှ ငါကြားရလေပြီ။ သို့ဖြစ်၍၊ ငါ့ကို မတုန်လှုပ်စေနိုင်။

၆ ဤသို့အားဖြင့်အချိန်တန်လာသောအခါ၊ သူသည် ငါ့ထံသို့လာ၍ ဤသို့ဆိုလျက် ပြောလေသည်ကား၊ ညီအစ်ကိုယာကုပ်၊ ငါသည် သင်နှင့် စကားပြောခြင်းငှာ အခွင့်ကို များစွာရှာလေပြီ။ အကြောင်းမူကား၊ သင်သည် ဧဝံဂေလိတရားတော် သို့မဟုတ် ခရစ်တော်၏ဩဝါဒဟု သင်ခေါ်သည့်အရာကို ဟောပြောလျက် အရပ်ရပ်သို့ များစွာသွားလာကြောင်းကို ငါကြား၍၊ သိလည်းသိ၏။

၇ သင်သည် ဤလူမျိုးတို့မှ များစွာသောသူတို့ကို လမ်းလွဲသို့ လှည့်ဖြားခေါ်ဆောင်သွား၍၊ သူတို့သည် ဘုရားသခင်၏ မှန်သောတရားလမ်းတော်တို့ကို မှောက်လှန်လျက်၊ မှန်သောတရားလမ်း ဖြစ်သည့် မောရှေ၏ ပညတ်တရားကို စောင့်ထိန်းခြင်းမရှိကြ။ မောရှေ၏ ပညတ်တရားကိုလည်း သင်ပြောသည့် နှစ်ရာပေါင်းများစွာကြာမှ ရောက်လာမည့် ပုဂ္ဂိုလ်အား ကိုးကွယ်ခြင်းသို့ ပြောင်းလဲ ပစ်၏။ ယခုမူကား၊ ရှုလော့၊ ဤအရာသည် ဘုရားကို ပြစ်မှားသည့်အပြစ်ဖြစ်သည်ဟု သင့်ကို ငါရှေရင်ဟောကြား၏။ အကြောင်းမူကား၊ ထိုကဲ့သို့သော အရာများကို အဘယ်သူမျှမသိ။ ဖြစ်လာမည့် အရာတို့အကြောင်းကိုလည်း မပြောနိုင်။ ဤကဲ့သို့အားဖြင့် ရှေရင်သည် ငါ့ကို ဆန့်ကျင်၍ရန်တွေ့၏။

၈ သို့ရာတွင်၊ ရှုလော့၊ ကိုယ်တော်ရှင်ဘုရားသခင်သည် သူ့ဝိညာဉ်တော်ကို ငါ့ဝိညာဉ်ထဲသို့ သွန်းလောင်းတော်မူသည်ကား ထိုသူ၏စကားခပ်သိမ်းတို့ကို ငါချေပသည့်တိုင်အောင်ပင်တည်း။

၉ ငါကလည်း သင်သည် ကြွလာတော်မူမည့် ခရစ်တော်အား ငြင်းပယ်သလောဟု မေးရာ၊ ခရစ်တော်ရှိလျှင်၊ ငါသည် သူ့ကို မငြင်းဆို။ သို့ရာတွင်၊ ခရစ်တော်မရှိကြောင်း ငါသိ၏။ ရှိလည်းမရှိခဲ့၊ ရှိလိမ့်မည်လည်းမဟုတ်ဟု သူဖြေ၏။

၁၀ သင်သည် ကျမ်းစာတို့ကို ယုံကြည်သလောဟု ငါမေးလျှင်၊ ဟုတ်ကဲ့ဟု သူဖြေ၏။

၁၁ ငါကလည်း သူ့ကို ဆိုသည်ကား၊ ထိုသို့ဖြစ်လျှင်၊ သင်သည် ထိုကျမ်းစာတို့ကို နားမလည်။ အကြောင်းမူကား၊ ထိုကျမ်းစာတို့သည် ခရစ်တော်အကြောင်းကို အမှန်ပင်သက်သေခံ၏။ ရှုလော့၊ သင့်ကို ငါဆိုသည်ကား၊ ဤခရစ်တော်၏အကြောင်းကို ပြောလေသည်မှတစ်ပါး၊ အဘယ်ပရောဖက်ကမျှ မရေး၊ ပရောဖက်ပြု၍လည်းမဟော။

၁၂ ဤအရာသည်ကား၊ အလုံးစုံတို့မဟုတ်သေး—ထိုအမှုကို ငါ့အား ထင်ရှားစွာပြထားတော်မူလေပြီ။ အကြောင်းမူကား၊ ငါသည် ကြားလေခဲ့၊ မြင်လေခဲ့ပြီ။ ထိုအမှုကို သန့်ရှင်းသောဝိညာဉ်တော်၏တန်ခိုးအားဖြင့်လည်း၊ ငါ့ကို ထင်ရှားစွာပြထားတော်မူလေပြီ။ သို့ဖြစ်၍၊ အပြစ်ဖြေခြင်းမင်္ဂလာကို ပြုခဲ့ခြင်းမရှိလျှင်၊ ခပ်သိမ်းသော လူသားတို့ပျောက်ဆုံးရကြမည်ကို ငါသိ၏။

၁၃ ဤသို့အားဖြင့်အချိန်တန်လာသောအခါ၊ သင်များစွာသိရသည့် ဤသန့်ရှင်းသောဝိညာဉ်တော်၏တန်ခိုးအားဖြင့် နိမိတ်လက္ခဏာကို ငါ့အား ပြလော့ဟု သူဆို၏။

၁၄ ငါဆိုသည်ကား၊ သင်သိသည့်အရာကို အမှန်ဖြစ်ကြောင်း သင့်အား နိမိတ်လက္ခဏာကိုပြရန်၊ ဘုရားသခင်ကို ငါအဘယ်ကြောင့် စုံစမ်းရမည်နည်း။ သင်သည် နတ်ဆိုး၏လူဖြစ်သောကြောင့်၊ ထိုအရာကို ငြင်းဆိုလျက်ရှိလိမ့်ဦးမည်။ အဘယ်သို့ပင်ဖြစ်စေ၊ ငါအလိုရှိသည်အတိုင်း ဖြစ်မည်မဟုတ်။ သို့ရာတွင်၊ ဘုရားသခင်က သင့်ကို ဒဏ်ခတ်တော်မူလျှင်၊ သူသည် ကောင်းကင်ဘုံနှင့် မြေကြီးနှစ်ခုစလုံး၌ တန်ခိုးရှိတော်မူကြောင်းနှင့် ခရစ်တော်ကြွလာတော်မူမည့်အကြောင်း၊ ထိုအရာက သင့်အတွက် နိမိတ်လက္ခဏာဖြစ်ပါစေ။ ထို့အတူ၊ အို ကိုယ်တော်ရှင်၊ ကိုယ်တော်အလိုရှိသည်အတိုင်း ဖြစ်ပါစေ၊ အကျွန်ုပ်အလိုရှိသည်အတိုင်း မဖြစ်ပါစေနှင့်။

၁၅ ဤသို့အားဖြင့်အချိန်တန်လာသောအခါ၊ ငါယာကုပ်က ဤစကားများကို ပြောလေသောအချိန်တွင်၊ ကိုယ်တော်ရှင်၏တန်ခိုးတော်သည် သူ့ထံသို့ ကျရောက်လေရာ မြေကြီးသို့ သူလဲကျသည့်တိုင်အောင်ပင်တည်း။ ဤသို့အားဖြင့်အချိန်တန်လာသောအခါ၊ သူ့ကို ရက်ပေါင်းများစွာကြာအောင် ပြုစုကျွေးမွေးရ၏။

၁၆ ဤသို့အားဖြင့်အချိန်တန်လာသောအခါ၊ လူတို့ကို သူဆိုလေသည်မှာ၊နက်ဖြန်နေ့၌ အတူတကွ စုဝေးကြလော့၊ အကြောင်းမူကား၊ ငါသေရတော့မည်။ သို့ဖြစ်၍၊ ငါသည် မသေမီ၊ လူတို့ကို စကားပြောလို၏။

၁၇ ဤသို့အားဖြင့်အချိန်တန်လာသောအခါ၊ နောက်တနေ့တွင် လူအစုအဝေးသည် အတူတကွစုဝေးလေ၏။ သူသည်လည်း ရှင်းလင်းစွာပြော၍၊ ထိုသူတို့အား သူသွန်သင်ပေးခဲ့လေသည့်အရာများကို ငြင်းပယ်၏၊ ခရစ်တော်၊ သန့်ရှင်းသောဝိညာဉ်တော်၏ တန်ခိုး၊ ထို့အတူ၊ ကောင်းကင်တမန်များအမှုတော်ဆောင်ခြင်းတို့ကို ဝန်ခံ၏။

၁၈ နတ်ဆိုး၏တန်ခိုးအားဖြင့် လှည့်စားထားခြင်းကို သူခံခဲ့ရလေကြောင်းကိုလည်း ရှင်လင်းစွာပြောပြ၏။ ငရဲအကြောင်း၊ ထာဝရဖြစ်တည်ခြင်းအကြောင်းနှင့် ထာဝရပြစ်ဒဏ်ပေးတော်မူခြင်းအကြောင်းတို့ကိုလည်း ပြောပြ၏။

၁၉ ထို့အတူ၊ သူပြောသည်မှာ၊ ငါသည် ခွင့်မလွှတ်နိုင်သောအပြစ်ကို ကျူးလွန်မိပြီဟု စိုးရိမ်မိလေပြီ။ အကြောင်းမူကား၊ ငါသည် ဘုရားသခင်ကို မုသားပြောလေပြီ။ ခရစ်တော်အား ငြင်းဆို၍၊ ကျမ်းစာများကို ယုံကြည်သည်ဟုလည်း ပြောခဲ့၏။ ထိုကျမ်းစာတို့သည် သူ့အကြောင်းကို အမှန်ပင် သက်သေခံ၏။ ငါသည် ဘုရားသခင်ကို ထိုကဲ့သို့၊ မုသားပြောသောကြောင့်လည်း၊ ငါ၏အမှု အလွန်ဆိုးရွားမည်ကို ကြီးစွာစိုးရိမ်၏။ သို့ရာတွင်၊ ငါသည် ဘုရားသခင်ထံသို့ ဝန်ခံပါ၏။

၂၀ ဤသို့အားဖြင့်အချိန်တန်လာသောအခါ၊ သူသည် ဤစကားများကို ပြောလေပြီးလျှင်၊ မပြောနိုင်တော့၊ အသက်ချုပ်၍သေ၏။

၂၁ လူအစုအဝေးတို့သည် သူအသက်ချုပ်ခါနီး၌ ဤအရာတို့ကို သူပြောကြောင်း မြင်ကြလျှင်၊ လွန်စွာအံ့ဩကြ၏၊ ဘုရားသခင်၏တန်ခိုးတော်သည် သူတို့အပေါ် ကျရောက်လာသဖြင့် သူတို့သည် မိန်းမောတွေဝေ၍ မြေကြီးသို့လဲကျကြ၏။

၂၂ ယခုတွင်၊ ဤအမှုသည် ငါယာကုပ်ကို နှစ်သက်စေ၏။ အကြောင်းမူကား၊ ငါသည် ထိုအမှုကို ကောင်းကင်ဘုံ၌ရှိတော်မူသော ငါ့အဘထံမှ တောင်းခံလေပြီ။ သူသည် ငါ၏တောင်းလျှောက်ခြင်းကို ကြားတော်မူ၍၊ ငါ၏ဆုတောင်းခြင်းကို ဖြေတော်မူ၏။

၂၃ ဤသို့အားဖြင့်အချိန်တန်လာသောအခါ၊ ဘုရားသခင်၏ငြိမ်းချမ်းခြင်းနှင့် ချစ်ခြင်းသည် လူတို့၌ တစ်ဖန်ပြန်လည်ရောက်ရှိ၏။ သူတို့သည်လည်း ကျမ်းစာများကို စေ့စေ့ဖတ်၍၊ ဤဆိုးညစ်သောသူ၏စကားများကို စေ့စေ့နားမထောင်ကြတော့။

၂၄ ဤသို့အားဖြင့်အချိန်တန်လာသောအခါ၊ လာမန်အမျိုးသားတို့အား သမ္မာတရားအကြောင်း အသိပညာသို့၊ ပြန်လည်ခေါ်ဆောင်၍၊ ပြန်လည်ရောက်ရှိစေခြင်းငှာ၊ များစွာသောအစီအစဉ်တို့ကို ကြံစည်လေ၏။ သို့ရာတွင်၊ ထိုအမှုခပ်သိမ်းတို့သည် အချည်းနှီးဖြစ်လေ၏။ အကြောင်းမူကား၊ သူတို့သည် စစ်တိုက်ခြင်းများနှင့် အသွေးသွန်းလောင်းခြင်းတို့၌ မွေ့လျော်၍ သူတို့၏ညီအစ်ကို ငါတို့အပေါ်၌ ထာဝရမုန်းတီးခြင်းကို ထားရှိကြလေပြီ။ သူတို့၏လက်နက်များအစွမ်းဖြင့် ငါတို့ကို အစဉ်မပြတ်ဖျက်ဆီးခြင်းငှာလည်း ကြိုးစားအားထုတ်ခဲ့ကြ၏။

၂၅ သို့ဖြစ်၍၊ နီဖိုင်းလူမျိုးတို့သည် ထိုသူတို့တစ်ဖက်တွင် မိမိတို့ကယ်တင်ခြင်း၏ကျောက်နှင့် ဘုရားသခင်အား ကိုးစားလျက်၊ လက်နက်များ၊ ထို့အတူ အစွမ်းသတ္တိရှိသမျှတို့နှင့် အင်အားခိုင်မာစေခဲ့ကြ၏။ သို့ဖြစ်၍၊ သူတို့သည် ရန်သူတို့ကို ယခုကာလတိုင်အောင် အနိုင်ရသူများ ဖြစ်လာခဲ့ကြ၏။

၂၆ ဤသို့အားဖြင့်အချိန်တန်လာသောအခါ၊ ငါယာကုပ်သည် အိုမင်းစပြုလာ၏။ ဤလူမျိုးတို့၏မှတ်တမ်းကိုလည်း နီဖိုင်း၏အခြားပုရပိုက်ပြားများပေါ်တွင် ရေးထား၏။ သို့ဖြစ်၍၊ ငါ၏ အသိပညာအစွမ်းရှိသမျှအတိုင်း၊ ရေးလေပြီဟုဟော ပြောခြင်းအားဖြင့်လည်းကောင်း၊ ငါတို့သည် အဖော်မဲ့၍၊ စိတ်အားထက်သန်သောလူမျိုး၊ အရပ်ရပ်သို့လည်သောသူများဖြစ်လျက်၊ ယေရုရှလင်မြို့မှ နှင်ထုတ်ခံရလျက်၊ တောရိုင်းထဲတွင်၊ ဒုက္ခဆင်းရဲခြင်း၌ မွေးလျက်၊ စစ်တိုက်ခြင်းများနှင့် ရန်တွေ့ခြင်းများကိုဖြစ်စေသည့် ငါတို့ညီအစ်ကိုများ၏ မုန်းတီးခြင်းကို ခံရလေလျက်၊ အချိန်သည် ငါတို့နှင့်အတူ ကုန်လွန်၍ ငါတို့၏အသက်တာသည်လည်း ငါတို့အဖို့ အိပ်မက်မက်သကဲ့သို့ ဖြစ်လေပြီဟု ပြောဆိုခြင်းအားဖြင့်လည်းကောင်း ဤမှတ်တမ်းကို ငါလက်စသတ်၏။ သို့ဖြစ်၍၊ ငါတို့၏ဘဝတစ်လျှောက်လုံး ငိုကြွေးမြည်တမ်းခဲ့ရကြ၏။

၂၇ ငါယာကုပ်သည် မကြာမြင့်မီတွင် ငါ၏သင်္ချိုင်းတွင်းသို့ ဆင်းသွားရတော့မည်ကိုလည်း သိမြင်၏။ သို့ဖြစ်၍၊ ငါ့သားဧနုတ်အား ဤပုရပိုက်ပြားများကို ယူလော့ဟုဆို၏။ ငါ၏အစ်ကိုနီဖိုင်း မိန့်မှာခဲ့သည့်အရာတို့ကိုလည်း ပြောပြလျှင်၊ မိန့်မှာချက်များကို နာခံပါမည်ဟု သူကတိပေး၏။ ငါသည် အနည်းငယ်မျှသောရေးခြင်းဖြစ်သည့် ဤပုရပိုက်ပြားပေါ်၌ ငါ၏ရေးခြင်းကိုလည်း လက်စသတ်တော့မည်။ ငါ၏ညီအစ်ကိုတို့မှ များစွာသောသူတို့သည်လည်း ဤစကားများကို ဖတ်လိမ့်မည်ဟု မျှော်လင့်လျက်၊ ဖတ်သူကို မင်္ဂလာရှိပါစေဟု ငါနှုတ်ဆက်၏။ ညီအစ်ကိုတို့၊ လိမ္မာရစ်ကြလော့။