1. Jichhasti, naya Moronejj amuyujjarjamaw asquïquejj uqhäm kellkä. Nayajj Laman jake jilanacajjaruw kellkta. Criston jutäwipat uñachayäwi churatatjja, pusi patac pä tuncan jila maran sarakatap jupanacan yatiñap munirista.

2. Nayajj mä kawkha ewjjer arunac kellkañajj khepatjja, aca kellkatanac tucuyasaw lluchʼintä.

3. Jichhasti, jumanacaruw ewjjapjjsma, Diosatejj acanac leepjjañam munanejja, take acanac leecasajja, cunj qhuyapayasirïcäntejj Tatitojj jakenacataquejj uc amtasipjjasma, Adanas luratäcän ucqhata, acanac catokapcät ucqhacama. Ucatsti, chuymanacaman lupʼipjjaraquisma.

4. Ucatsti, cunapachatejj acanac catokapcät ucqhajja, Criston sutipjjaru, Dios Wiñay Awquir acanacan chekätapat jisctʼapjjam. Jumanacatejj cheka chuymamp cheka yatiñ munañamp Cristor iyawsas jisctʼapjjätajja, jupajj Kollan Ajayun chʼamapan acanacan chekätap uñachayapjjätam.

5. Kollan Ajayun chʼamapampiquiw take cunan chekätapjj yatipjjasma.

6. Cunatejj sumäqui ucajj asquiwa, chekaraquiwa. Ucat janiw cuna asqui sumas Cristor ajjalnucquiti; antisas ucajj jupan utjatap arsusi.

7. Jumanacajj jupan utjatap Kollan Ajayun chʼamapan yatipjjasma; ucat nayajj ewjjasaw sapjjsma: Diosan chʼamapar jan ajjalnucupjjamti; cunalaycutejj jupajj jaken wawanacapan iyawsañaparjamaw chʼamamp luri; lurañapasti quipcaquiwa; jichhüru, kharüru, wiñayataqui.

8. Uqhämaraqui, jilanacajja, ewjjasaw sapjjaracsma: Diosan churäwinacap jan ajjalnucupjjamti; cunalaycutejj ucanacajj waljawa; quipca Diosat jutaraqui. Uca churäwinacamp lurañanacajj cunaymaniwa; ucampis quipca Diosaw takpachat takpach luri; uca churäwinacasti jakenacan asquipatac Diosan Ajayupan uñstayäwinacapan jupanacar churatawa.

9. Jichhasti, maynin suma amuyat aru yatichañapataquiw Diosan Ajayupan juparojj churata.

10. Maynirusti, uca quipca Ajay toke yatïwin arup yatichañapatac churatawa.

11. Yakharusti, wali jachʼa iyawsañaw churata. Yakharusti, cʼumaraptayañ churäwinacaw churata, quipca Ajay toke.

12. Yakharusti, jachʼa musphcañ luräwinac lurañapataquiw churata.

13. Uqhämaraqui yakharojj take cunanacat arjañajj churata.

14. Yakharusti, alajjpach qhitanaca, yanapañatac tumpir ajayunac uñjañaw churata.

15. Yakharusti, cunayman lajjranac parlañaw churata.

16. Yakharusti, arunac khanañchañampi, cunayman lajjranac khanañchañampiw churata.

17. Take uca churäwinacajj Criston Ajayupïpan puripjje; ucanacasti yakha yakhawa, sapakat mayniruw puri, jupan munañaparjama.

18. Nayajj ewjjasaw sapjjsma: Munat jilanaca, take suma churäwejj Cristot juti.

19. Nayajj ewjjapjjsmaw munat jilanaca, jupan jichhüru, kharüru, wiñayatac quipcätap amtasipjjam. Cuna kollan churäwinacat-tejj nayajj arscta ucanacajja, janipuniw tucuscaniti, oraken utjañ tucuyañapcamajja; jaken wawanacapan jan iyawsañaparjamaquiw ucanacajj tucusini.

20. Uqhämasti, iyawsañajj utjañapawa. Iyawsäwitejj utjaspajja, suyäwejj utjañaparaquiwa. Suyäwitejj utjanejja, qhuyapayasïwejj utjañaparaquiwa.

21. Janitejj qhuyapayasipcätajja, janiw cunjämats Diosan khapak marcapan khespiyatäpcasmati. Janitejj iyawsapcaraquïtajja, janiraquiw Diosan khapak marcapan khespiyatäpcasmati. Janitejj suyapcaraquïtajja, janiw khespiyatäpcasmati.

22. Janitejj suyapcätajja, jumanacajj llacthapitäpjjañamäniwa; llaquisiñasti ñankha luräwinac laycuw puri.

23. Cristojj awquinacasarojj chekpachaw sï: Iyawsapjjätajja, nayan waquisquitu take ucanac lurapjjasma.

24. Jichhasti, takpach orak thiyanquirinacaruw arsta: –Diosan chʼamapamp churäwinacapampejj jumanac taypin tucuscan ucürutejj purinchinejja, ucajj jan iyawsañ laycüniwa.

25. Uqhamän ucajja, ay jaken wawanacapata, cunalaycutejj janiw qhitis jumanac taypin asc lurcaniti; janiw mayniquis asc lurcaniti. Cunalaycutejj maynejj jumanac taypin asc luranejja, jupajj Diosan chʼamapampiw churäwinacap toket cunanac lurani.

26. Ay ucanac tucqhas jiwapcan ucanacata; cunalaycutejj jupanacajj juchanacapamp jiwasaw Diosan khapak marcapan jan khespiyatäpcaniti. Ucsti, nayajj Criston arunacaparjamaw arsta; janiraquiw cʼariscti.

27. Nayajj ucanac amtasiñanacamataquiw ewjjapjjsma; nayan jan cʼarisitajj yatipcäta ucapachajj lakaw jutani. Jumanacasti Diosan taripäwi chekapan uñjapjjetäta. Dios Tatitusti sapjjätamwa: Aca jakejj jiwatat artʼcaspasa, lakʼat artʼcaspas uqhäm kellkqui uca arunacjja, janit yatiyapcsma?

28. Ucanacsti, nayajj Diosan arjäwinacar phokhañataquiw yatiyta. Ucanacajj wiñay Diosan lacapat mistuni, jupan arupasti mitat mitaruw jiscʼat arsusini.

29. Cuntejj nayajj kellkcta ucan chekätap Diosajj uñachayapjjätam.

30. Wastata, Cristor jutasin take suma asqui churäw catokañanacamataquiw ewjjapjjsma. Ñankha churäws cuna kʼañs jan llamqhapjjamti.

31. Pʼarjjtam, lakʼat sartam Jerusalena; Sionan phuchapa, jiwaquïqui uca isinacamamp uscusim; chʼacurunacamar chʼamañchasis thiyanacam wiñay jachʼaptayam, jan jucʼamp pejjtuntatäñamataqui, Wiñay Awquin juma Israelan utapar lurata amtäwinacapan phokhasiñapataqui.

32. Jïsa, Cristor jutapjjam jupan phokhataptayasipjjam, take jan wali cunanacat jarcʼasisa; ucat take cunanacat jarcʼasipjjätajja, take chʼamachasiñamampi, amuyumampi, chʼamamampi Diosar munapjjätajja, jupan qhuyapayäwipajj walïniw jumanacataqui; jupan qhuyapayawipïpan Criston phokhatäpjjasma; Diosan qhuyapayawipïpan Criston phokhatäpjjätajja, janipuniw Diosan chʼamaparojj ajjalnucupcasmati.

33. Uqhämaraqui, jumanacatejj Diosan qhuyapayawipïpan Criston phokhatäpjjätajja, janirac jupan chʼamapar ajjalnucupcätajja, Diosan qhuyapayawipïpan Criston kollanaptayatäpjjätawa, Criston wilap wartäwi laycu; uca wartäwisti Awquin amtäwipanquiwa juchanacamar pampachañataqui; jumanacan kollanaru, jan kʼañunir tucupjjañamataqui.

34. Jichhasti, takeniruw jiquisiñcama –sapjjsma. Ucat jucʼa pacharojj Diosan cusisiñ pachapar samaririw sarä, ajayujjamp janchijjampejj wastat chicachasipcan ucapachcama, atipjatajjat cusisis jumanacamp jiquisiñajjataqui, jiwatanacarus jaquirinacarus Wiñay Taripirïqui uca jachʼa Jehovan cusisiyir taripäwipar laka chek apanitäcäjj ucapachcama. Uqhamäpan.