1. Jichhajj naya Moronejj Mormon awquijjan mä kawkha iyawsäwit suyäwit qhuyapayasïwit arsuta arunacap kellkä. Jupanacan yupaychañatac utachat sinagogapan jupanacar yatichasajja, aqhäm arsüna:

2. Jichhajja, naya Mormonajj juma munat jilanacajjaruw parlapjjsma. Dios Awquin Jesucristo Tatitusan qhuyapayatapata, jupan kollan munañapata, jupan kollan jawsäwip nayar wajjtʼatap laycuw, nayajj jumanacar jichhajj arsuñajjatac antutatäta.

3. Ucat nayajj juma iyawsiri tamanquiri Cristor sumancañan arquiri, jichhat alajjpachan jupamp samarapcät ucapachcam Tatitun samarañapar mantañatac suyäwi catokerinacaruw parlañ munapjjsma.

4. Jichhasti, jilanacajja, nayajj jumanacan jaken wawanacapamp sumancañampi sarnakapjjatam laycuw jumanacan uqhamäpjjatam amuyapjjsma.

5. Nayajj Diosan aqhäm siri arup amtasta: Luräwinacapat jupanacar uñtʼapjjäta; luräwinacapatejj asquïchejja, jupanacajj asquïpjjaraquiwa.

6. Cunalaycutejj Diosajj siwa: Mä ñankha jakejj janiw asc lurcaspati; jupatejj mä churäwi loktaspa, jan ucajja, Diosat mayisispa, ucat cheka chuymamp uc lurqui ucqhajja, janiw juparojj cuna ascs lurquiti.

7. Ucajj janiw jupatac ascjam jaqhutäquiti.

8. Cunalaycutejj ñankha jakenacatejj churäwi churapcan ucajja, jupanacajj pä chuymampiw uc churapjjani; ucat uca churäwi catusisipcaquispas uqhäm jupanacataquejj jaqhutawa; ucat jupanacajj Dios nayrakatan ñankhjam jaqhutäpjje.

9. Uqhämaraqui, jakenacatejj pä chuymamp Diosat mayisipjjaspajja, ucajj jupanacatac ñankhjam jaqhutaraquiwa. Ucajj janiw jupanacatac cunans walïquiti, Diosajj janiw uqhämanac catokquiti.

10. Ucat ñankha jakenacajj janiw asc lurapcaspati, janiraquiw suma asqui churäwi churapcaraquispati.

11. Cʼallcʼu uma jalsutjja janiw suma umajj jalscaspati, janiraquiw suma uma jalsutjja, cʼallcʼu umajj jalscaraquispati. Ucat supayar lokeri jakenacajj janiw Cristor arcapcaspati; jupanacatejj Cristor arcapjjaspajja, janiw supayar lokerïpcaspati.

12. Ucat take cunatejj asquïqui ucanacajja, Diosat juti, take ñankha cunanacasti supayat juti. Supayajj Diosan timapäsaw jupampejj jan inactʼas nuwasi. Jupajj juch lurañaru, ñankhäqui uc lurañaruw sapa cut irpasajj amtayi.

13. Ucampis cunatejj Diosat jutqui ucajja, asc jan tucus lurañar irpasaw amtayi. Ucat take cunatejj asqui lurañaru, Diosar munañaru, jupar lokañaru, irpas amtayqui ucajja, jupan amuyayatawa.

14. Uqhämasti, munat jilanacajja, amuyasipjjam, janiw ñankhäqui ucajj Diosat jutcaspati, Diosat jutir asquis supayat jutcaraquispati. Ucatarac jumanacast uqhäm amuyasisipcasman.

15. Jilanaca, asquïtap ñankhätap amuyasiñamataquiw jumanacarojj churata, phokhatpach yatiñanacamataquejj khanaraquiwa, cunjämatejj urojj khanäqui, arumajj chʼamacäcarac uc uñjapctas uqhäma.

16. Criston Ajayupajj takpach jakenacaruw churata, asquïts ñankhäts yatiñapataqui. Take cunatejj asqui lurañar irpqui, Cristor iyawsañar amtayqui ucajja, Criston chʼamapan wajjtʼäwipan apayatawa. Ucat phokhat yatïwimpiw ucan Diosat jutatap yatipjjasma.

17. Ucampis take cunatejj jakenacar ñankha lurañar waytʼqui, Cristor jan iyawsañaru, jupar ajjalnucuñaru, Diosar jan lokañar amtayqui ucajja, phokhat yatïwimpiw ucan supayat jutatap yatipjjasma. Uqhäm supayajj luri; jupajj janiw cawquïr jakerus asc lurañar irpquiti, janiw maynirusa. Janiraquiw qhitanacapas jupar jaysayasirinacas uqhäm lurcaraquiti.

18. Jichhasti, jilanacajja, amuyasiñamatac khan uñtʼatam laycojj (ucajj Criston khanapawa), jan pantasit amuyasipjjamti, cunalaycutejja, cuna amuyumpitejj amuyapcäta uca quipca amuyumpiw taripatäpjjäta.

19. Ucat jilanaca, nayajj jumanacat mayisipjjsma, Criston khanaparjam jan karis thakapjjam, asquit ñankhat yatiñanacamataqui; jumanacatejj take asqui cunanacar catupjjäta, ucat janirac ucar juchañchapcätajja, chekpachaw Criston wawanacapäpjjäta.

20. Ucampis jilanaca, cunjämats take asqui cunjj catupjjasmajja?

21. Jichhajja, iyawsäwit parlapjjäma – sapjjäyäsmawa, ucat jichhaw uca iyawsäwit parlapjjäma. Jichhasti, cunjämat-tejj take asqui cun catupcasma uc yatiyapjjäma.

22. Diosajj take cun yatisaw wiñayat wiñaycam utjasisa, alajjpach qhitanac qhitanïna, jaken wawanacapar yatichañataqui, Criston jutañapat yatiyañataquiraqui. Cristöpan take asqui cunajj jutañapa.

23. Diosajj quipca lacapat Criston jutañap arjirinacar yatiyaraquïna.

24. Jupajj cunaymanampiw asqui cunanac jaken wawanacapar uñstayäna. Take asqui cunanacajj Cristot juti; janitejj uqhamäcaspajja, jakenacajj tincutäñ cancañancapjjaspawa, janiraquiw cuna asquis jupanacarojj jutcasapänti.

25. Ucat alajjpach qhitanacan yanapir tumpäwinacata, Diosan lacapat mistur take arupat jakenacajj Cristor iyawsañampi lurañ kalltapjjäna. Uqhäm iyawsañampiw take asqui cunjja catupjjäna. Uqhamänwa Criston jutañapcamajja.

26. Ucat jupan jutatap khepatarac jakenacajja, jupan sutipjjar iyawsañampi khespiyasipjjaraquïna. Iyawsañampiw jupanacajj Diosan yokanacapar tucupjje. Cristojj chekpachaw jaqui; uca pachpa chekampiw jupajj aca arunac awquinacasar arsu: Cuna asctejj jumanacajj catokañamar iyawsasin Awquit nayan sutijj-jjar mayipcätajja, ucajj jumanacatac luratäniwa.

27. Ucat munat jilanaca, Criston alajjpachar maqhatatap laycu, jupan jaken wawanacapjjar qhuyapayañatac wactʼäwinacap Awquit catokañapataqui Diosan cupëjjapar kontʼasitap laycu, muspharcañ luräwinacajj tucusiti?

28. Jupajj leyin cunataquïtapjj phokhewa; uqhämaraqui cawquïrinacatejj jupar iyawsapqui ucanacajj nayanquiwa –siw jupajja. Cawquïrinacatejj jupar iyawsapqui ucanacajja, take asquinac catupjjani; ucat jupajj jaken wawanacaparojj arjjati, jupasti wiñayaw alajjpachan utjaraqui.

29. Munat jilanaca, jupan uc luratap laycojj muspharcañ luräwinacajj tucuyiti? Nayajj sapjjsmawa: Janiw tucuyquiti, janiraquiw alajjpach qhitanacan jaken wawanacapar yanapañatac tumpir jutapjjañapajj tucusipcaraquiti.

30. Jupanacajj Cristoruw yäkapjje, camächitapan aruparjam yanapir jutasin tumpañataqui, wali thurtʼat iyawsir jakenacan Diosjam take cunan lurañ amtat jakenacar uñachayasisa.

31. Jupanacan yatiyir ut-tʼayatäwipajja, jakenacar juchanacapat cutiquipstañatac ewjjañawa, uqhämaraqui Awquin jaken wawanacapar lurat amtäwinacapan luräwip phokhas lurañawa, jaken wawanacap taypin thac waquichañataqui, Criston arup Tatitun ajllit catokerinacar yatiyasa, jupanacan jupat ircatapjjañapataqui.

32. Uqhäm lurasaw Dios Tatitojj jiltʼa jakenacan Cristor iyawsañapataqui, Kollan Ajayun chʼamaparjam Kollan Ajayun chuymanacapan utjañapataquiw waquichi; Awquejj uqhäm jaken wawanacaparojj jupan lurat amtäwinac phokhayi.

33. Cristosti siwa: Nayar iyawsapjjetätajja, cunatejj nayan amuyujjarjam waquisqui uc lurañatac chʼamanïpjjätawa.

34. Jupasti siwa: Take orakenquirinaca, juchanacamat cutiquipstasin nayar jutapjjeta. Sutijjar bautisasipjjam; khespiyasiñanacamataquisti nayar iyawsapjjeta.

35. Jichhasti, munat jilanaca, cunanactejj arsupcsma ucanacatejj chekächejja, (Diosasti khep khepa urun ucanacan chekätapjj jachʼa chʼamamp khapak cancañamp uñachayapjjätam), ucat ucanacatejj chekächejja, muspharcañ luräwinac urojj tucusjjeti?

36. Alajjpach qhitanacajj jaken wawanacapar uñstañjj tucuyiti? Jupajj Kollan Ajayun chʼamapjj jupanacat jarqʼiti? Jan ucajja, pachajj utjcani, orakejj utjcani, mayni jakes aca oraken khespiyatäñatac utjcan ucqhajja, uca chʼam jarcʼaniti?

37. Nayajj sapjjsmawa: Janiw jarcʼcaniti, cunalaycutejj muspharcañ luräwinacajj iyawsäwimpiw lurasi. Iyawsäwin alajjpach qhitanacajj uñstasaw jakenacar yanapañatac tumpapjje. Ucat ucanacatejj tucuychejja, ay jaken wawanacapata, cunalaycutejj ucajj jan iyawsañ laycuwa, takpachajj inamayaraquïspawa.

38. Janitejj Criston arunacaparjam sutipar iyawsapcanejja, janiw cawquïr jakenacas khespiyatäcaspati. Ucatsti, ucanacatejj tucuychejja, iyawsäwejj tucuyaraquiwa. Jakenacan utjäwipasti ajjsarcañäspawa, cunalaycutejj cutsuyäwejj jan utjcasapän uqhämaw jupanacajj jaytatäpjjaspa.

39. Ucampis munat jilanaca, nayajj jucʼamp sumanac jumanacat amuyapjjsma; jumanacan llampʼütam laycuw Cristor iyawsatanacamjj amuyta. Janitejj jupar iyawsapcstajja, janiw iyawsir tamapanquir jakenacamp jaqhutäñataquejj asquïpctati.

40. Uqhämaraqui munat jilanaca, nayajj suyäwit arsuñ munapjjsma. Cunjämarac iyawsañst jicjjatapjjasma, jan suyäwimpisti?

41. Cunarus suyapjjäta? Nayajj sapjjsmawa: Criston juchanacan tʼakhesiyäwipar phokhäwip laycu, jactäwipan chʼamap laycu, wiñay jacäwir aytatäñaruw suyapjjäta, ucasti arsüwirjam jupar iyawsatam laycuwa.

42. Uqhämasti, mä jaketejj iyawsañanejja, suyañanïñapawa; cunalaycutejj jan iyawsäwimpejj janiw cunarus suycaspati.

43. Uqhämaraquiw nayajj sapjjsma: Janitejj maynejj altʼat llampʼu chuymanïcaspajja, janiw iyawsañanïcaspati, janiraquiw suycaraquispasa.

44. Uqhamäspajja, iyawsäwipamp suyäwipampejj inamayaquïspawa, cunalaycutejj altʼat llampʼu chuymaninacaquiw Dios nayrakatan walejja. Ucat, jakenacatejj altʼat llampʼu chuymanïpjjaspa, Kollan Ajayun chʼamapan Jesusan Cristötap arsusipjjaspa, jupanacan qhuyapayasiñajj utjañapawa. Janitejj qhuyapayasiñanïcaspajja, janiw jupanacajj cunäpquisa, ucat qhuyapayasiñanïpjjañapajja.

45. Qhuyapayasïwisti jachʼa chuymaniwa, suma chuymaniwa, janiw kʼenasquiti, janiw jachʼa jachʼa tucurïquiti, jupa quipcataquejj janiw munquiti, janiw mäc thithirïquiti, janiw cuna ñankhs lupʼquiti, ñankha luräw lantejj chekat cusisi, take cunan thurtʼasi, take cunaruw iyawsi, take cunaruw suyi, take cunat llampʼüsin tʼakhesi.

46. Ucat munat jilanacajja, janitejj qhuyapayasïwinïpcätajja, janiw cunäpctasa, cunalaycutejj qhuyapayasïwejj janipiniw tʼuqhartquiti. Uqhämasti, taket jucʼampïqui uca qhuyapayasïwir catupjjam; cunalaycutejj take cunajj tʼuqhartañapawa.

47. Ucampis qhuyapayasïwejj Criston kʼoma munasiñapawa; ucajj wiñayaw utjascaquini; qhitinacatejj khep khepa urun uc catjjäsquir jicjjatatäpcanejja, jupanacataquejj sumäniwa.

48. Ucat munat jilanaca, Jesucristo Yokapar take cheka arquirinacar Awquejj churqui uca munasiñan phoktʼatäñanacamataqui, take chuyman chʼamapampi Awquit mayisipjjam, jumanacan Diosan wawanacapar tucuñanacamataqui; cunapachatejj jupajj uñstancani ucapachajja, jupamp quipcäñasataqui, (cunalaycutejj cunjämäquitejj jupajja, uqhämpach jupar uñjapjjañäni); uqhämasti, ucar suyapjjañäni, cunjämatejj jupajj kʼomäqui uqhäm kʼomaptayatäñanacasataqui. Uqhamäpan.