1. Munat wawajja, wastat jumar kellkansma, nayan jacascaquitajj yatiñamataqui; ucampis llaquisiñäqui ucjjat nayajj mä jucʼa kellkansma.

2. Nayajj Laman jakenacampiw mä jachʼa nuwasïwin nuwasta, ucansti janiw nanacajj atipapcti; Archeantusamp Luramamp Emronampiw espadan jiwayatäpjje. Jïsa, walja suma chʼaman jakenacajjaw jiwapjje.

3. Wawajjay, Laman jakenacan aca jakenacar tʼunjañapat ajjsarta, cunalaycutejj jupanacajj janiw juchanacapat cutiquipstapquiti; Satanasasti jupanacarojj jupanac pur kʼapisiñcamaw turiyascapuniraqui.

4. Nayajj jupanacampejj sapa cutiw irnakta. Diosan arup chʼamamp arscta ucapachajja, jupanacajj nayatac kʼapisisaw qhathatipjje; chʼamamp arscta ucapachasti, ucjjaruw chuymanacap chʼollkheptayapjje. Ucat Tatitun Ajayupan jupanacamp kʼewtasiñ niy jaytjatapat ajjsarta.

5. Cunalaycutejj jupanacan wali jachʼa kʼapisitap laycojja, jiwañat jan ajjsarapcaspas uqhäm amuyasta. Jupanacasti jupanac pur munasiñap chhaktayasipjje; wil wartañampita, uqhämat uqhäm apsusiñampitjja, umatjam pharjayasipjje.

6. Jichhasti, munat wawajja, jupanacan chuymanacapajj kalaratäc-chisa, jan karisay irnakañäni; jiwasatejj irnakañ jaytanucuñänejja, juchañchatäñaruw pursna. Jiwasajj aca ñekʼe janchincasajja, mä luräw phokhañasawa, take asquin timapar atipjañasataqui, Diosan khapak marcapan samarañasataqui.

7. Jichhasti, mä jucʼa aca jakenacan tʼakhesïwinacapat kellkä. Amoronat catokat yatiyäwirjamajja, Laman jakenacajj Sherriza saytʼu pucarat ansusin catuntatanacanïpjjewa. Ucanacasti chachanacamp warminacamp wawanacampiwa.

8. Ucatsti, jupanacajj uca warminacampin wawanacampin chachanacaparu, tatanacaparuw jiwayapjje. Warminacarusti, chachanacapan janchipat mankʼayapjje, wawanacarus tatanacapan janchipat mankʼayapjjaraqui; mä jucʼa umaquirac jupanacar wajjtʼapjje.

9. Uca Laman jakenacan jachʼa ajjtcañ luräwipajj utjc-chisa, Moriantumanquir jakenacasan luräwipatjj janiw jucʼampïquiti. Jupanacajj walja Laman jakenacan phuchanacap catuntatjam catjjäsipjje; take cunat sipan jucʼamp munatäqui kʼomäqui, jan chach uñtʼirïtap jupanacat apakasinjja.

10. Jïsa, uc lurasinjja jupanacarojj wali tʼakhesiyasaw jiwayapjje, janchinacapar jiwañcam tʼakhesiyasa. Uc luratapatjja, jupanacajj lakʼonacjamaw janchinacap mankʼapjje, chuymanacapan kalaratätap laycu. Ucsti kamasanïtap uñachayañataquiw lurapjje.

11. Ay munat wawajja, cunjäms aqhäm chʼuñchʼjam jakenacajja–

12. (Jupanacan wali suma, munat jakenacäpjjatapat jucʼa maranacaquiraquiw sarakasqui).

13. Ay, wawajja, cunjämats mä aqhäm ajjtcañ lurañat cʼuchitasir marcajja–

14. Cunjämarac jiwasanacar taripañat Diosan amparapar jarcʼasiñap suysnasti?

15. Chuymajjajj aqhäm sasaw artʼi: Ay aca marcata; jupanacar taripam Dios! Juchanacapamp ñankhä ajjtcañ luräwinacapamp juman nayramat imantam!

16. Uqhämaraqui, wawajja, Sherrizan kheparir walja ijmanacamp phuchanacapampiw utji; Laman jakenacajj jan apasipcän uca juyranac Zenephin nuwasir tamapajj catuntasi, jupanacar mankʼa thaker cawqharus saranucuñapatac jaytjasina. Walja chuyman awichanacasti sarcäwiw chʼam thayjtayasisin jiwapjje.

17. Nayampïqui uca nuwasir tamasti, tʼuqhawa, Laman jakenacan nuwasir tamanacapasti Sherrizat nayarojj yakharstʼayapjjetu. Cawquïrinacatejj Aaronan nuwasir tamapar jaltapqui ucanacajja, ajjsarcañ khorütaparuw jalcatapjje.

18. Ay marcajjan ajjtcañätapata! Jupanacajj cuns lurasipcaquiwa, janiraquiw qhuyapayasiñanïpquiti. Nayajj jakequïtwa, jaken chʼamapaquiw utjitu; janiw jucʼamp sarayir arunacajjar phokhayquirist-ti.

19. Jupanacajj asqui cutekatapan chʼamaniptapjje; jupanacajj quipca khorüpjjewa. Qhitirusa, chuymanirus wawarus tucqhasipcaquiwa; take jan wali luräwinacat cʼuchisipjje. Warminacasan wawanacasan ac-chʼpach orakjjan tʼakhesiñapajj takets jucʼampiwa. Janiw lajjras ucjj yatiycaspati, janiraquiw ucajj kellkatäcaraquispasa.

20. Jichhasti, wawajja, janiw jucʼamp uca ajjsarcañ ajjtcañat arscäti. Jumajj aca marcan ñankhätapjj yat-tawa, jumajj jupanacan cun lurascaquirïtaps jan chuym chʼalljjtayasirïtaps yatiractawa; jupanacan ñankhätapajj Laman jakenacan ñankhätapat sipan jucʼampiwa.

21. Wawajjay, janiw nayajj jupanacat Diosar asc arsquirist-ti. Uqhäm luriristjja, jupajj jawkʼantitaspawa.

22. Ucampis, wawajjay, nayajj jumat Diosar asquinac arsta. Juman khespiyatäñamjj Criston suyasaw amuyta. Nayajj Diosat mayista, aca marcan Diosar cut-tañapataqui, jan ucajj kʼala tʼunjatäñap juman uñjañamatac Diosan jumar jacayascaquiñapataqui. Janitejj jupar juchanacapat cutiquipstapcanejja, jupanacajj tucusipjjañapäniwa. Ucjj nayajj yat-twa.

23. Jupanacatejj tucusipjjanejja, Jared jakenacjam chuymanacapan kalaratätapata, wil wartañ thakerïpjjatapata, uqhämat uqhäm apsusiñ munirïpjjatap laycüniwa.

24. Jupanacatejj tucqhatäpjjanejja, walja jilanacasan Laman jakenacar niyas maqhatatapjja, walja jucʼampin jupanacar maqhatañap yat-tanwa. Ucat jumatejj jacascaquïtajja, nayasti jan jumamp jiquisis jiwquirist ucqhajja, mä kawkhanac kellkam. Ucampis nayajj jucʼa pacharojj jumamp jiquisiñajj amuyta, cunalaycutejj nayaw kollan kellkatanac catta, ucanacsti jumaruw catuyañ munsma.

25. Wawajjay, Cristor iyawsascaquim. Cuntejj nayajj kellkcta ucanacajj jan jumar jiwañcam jathjas llaquisiypati; antisas Cristojj jumar aytpan, jupan tʼakhesïwinacapas jiwañapasa, awquinacasar janchip uñachayatapas qhuyapayañapas jachʼa chuymanïñapasa, jupan khapak cancañapar wiñay jacäwir suyañasa, wiñayataqui amuyuman utjpan.

26. Wali alay alajjpachan sarayäwi konuñanïqui uca Dios Awquina, uqhämaraqui qhititejj chʼamapan cupëjjapan konqui take cun jupar jaysañapcama, uca Jesucristo Tatitusampin qhuyapayäwipajj jumanjja, wiñayan wiñayapatac utjpan. Uqhamäpan.