1. Jichhajj bautisasiñat arsü. Amawtʼanacamp sacerdotenacamp yatichirinacampejj bautisatäpjjänwa. Janitejj jupanacajj bautisatäñatac asqui luräwinac lurapcasapänjja, janiw bautisatäpcasapänti.

2. Janitejj jupanacajj altʼir pʼaquintat chuymamp jutasin iyawsir tamar take juchanacapat chekpach cutiquipstatapat ircatapcasapänjja, janiw jupanacajj qhitirus bautisatäñatac catokapcasapänti.

3. Janitejj Criston sutip catjjarus tucusiñcam jupar lokañ munañan thurtʼasipcasapänjja, janiw qhitis bautisatäñataquejj catokatäpcänti.

4. Ucat bautisatätapatjja, jupanacajj Kollan Ajayun chʼamapan kʼomachatätapatjja, Criston iyawsir tamapanquir jakenacampiw jaqhutäpjjäna. Jupanacan sutinacapajj kellkataraquïnwa, jupanacat amtasiñataqui, Diosan suma arupamp chʼamañchasitäñanacapataqui, cheka thaquin sarnakayatäñanacapataqui, jan inactʼas uñjasisin mayisiyatäñanacapataqui, qhititejj iyawsäwip kalltayirïqui phokhaptayirïqui uca Criston asquïtaparuc alcatasa.

5. Iyawsiri tamasti walja cutiw mayisiñataqui, ayunañataqui, jupanacan wiñay waliquïñapataqui, purap arustʼasiñataquejj tantachasipjjäna.

6. Jupanacasti walja cutiw Jesus Tatitut amtasisajj tʼantʼa mankʼañataqui, vin umañataquejj tantachasipjjaraquïna.

7. Cuna ñankhas jupanac puran jan utjañapataquiw wali sum uñjasipjjäna; ucat qhitinacatejj ñankh lurir catjatäpcän ucanacajja, iyawsiri tamanquir quimsa ircatiriw amawtʼanac nayrakatan jupanacar juchañchapjjaraquïna. Janitejj jupanacajj juchanacap arsusisin cutiquipstapcänjja, ucanacan sutinacapajj chhaktayatänwa. Jupanacasti janiw Criston jakenacap taypin jaqhutäpcänti.

8. Ucampis kawkha cutitejj jupanacajj juchanacapat cutiquipstasin cheka chuymamp juchanacapar pampachäw munasarac mayipcän ucanacan juchanacapajj pampachatänwa.

9. Ajayun uñachayäwiparjamaw iyawsiri tamajj tantachäwinacap sarayäna, Kollan Ajayun chʼamapampiraqui. Cunjämtejj Kollan Ajayun chʼamapajj jupanacar yatiyañataquis ewjjañataquis, mayisiñataquis, achictʼañataquis, kʼochuñataquis saraycänjja, uqhäm lurapjjäna.