1. Mormon awquijjan naya Moronir apayanit kellkäwi; nayan Tatitur lokañajjataqui jawsatätajjat jucʼa pacharuw nayar apayanitäna. Aqhäm sasaw nayar kellkanitu:

2. Munat Moroni yokajja, Jesucristo Tatituman jumat amtasisaw jupan lokeripäñamataqui kollan luräwipar jumar jawsatapat nayajj wal cusista.

3. Nayajj mayisïwinacajjan amtasipunsmawa; sapa cutiw kollan Jesus Wawapan sutipjjarojj Awquit mayista, jupan jan wati sumätap laycu, qhuyapayäwip toke, jupan sutipar tucuycam iyawsascaquiñamatac jumar imañapataqui.

4. Jichhasti, wawajjay, cunatejj walpin llaquisiyquitu ucat arsüma. Jumanac taypin juchhiquïwinacan utjatapajj walpun llaquisiyitu.

5. Cuntejj yatcta ucatejj chekächejja, wawanacamar bautisañjjat juchhiquïwinacajj jumanac taypin utji.

6. Munat wawajja, nayajj juman jan karjasis irnakañam munirista, uca jachʼa pantasïw jumanac taypit apakañataqui. Ucataquiw aca kellkäw kellkta.

7. Jumajj ucanacat yatiyquista ucspachaw Tatitur ucjjat jisctʼta; Tatitun arupasti Kollan Ajayun chʼamapan nayarojj aqhäm sasaw purinitu:

8. Criston arunacap istʼam; Cutsuyirimaru, Tatitumaru, Diosamaru. Janiw nayajj asqui jakenac jawsir acapachar jutcti, jan ucasti, juch luririnacar juchanacapat cutiquipstañatac ewjjeriw oraker jut-ta. Cʼumaranacataquejj janiw kollirejj waquisquiti, jan ucasti, usutanacataquiw waquisi. Uqhämasti, wawanacajj kʼomäpjjewa, cunalaycutejj jupanacajj janiw juch lurapcaspati. Ucat Adanan ñankhachäwipajj naya tokew jupanacat apakata, jupanacjjaru jan cuna chʼamanïñapataqui; circuncidaña leyisti nayampiw tʼunjasjje.

9. Uqhäm Kollan Ajayojj Diosan arup nayar yatiyitu; ucat munat wawajja, wawanacar bautisañajj Dios nayrakatan wali amuytʼcay sawcawa; ucsti nayajj yat-twa.

10. Nayajj sismawa, aqhäm yatichäta, qhititejj juch luraspa ucanacampitac amuyuninacampitaquiquiw juchanacat cutiquipstañamp bautisasiñampejja; jïsa, awquir taycar yaticham, jupanacan juchanacapat cutiquipstasin bautisasiñapan waquisitapa, wawanacapjam chuymanacapar llampʼuptayañapan waquisitapa; ucat take jupanacajj wawanacapamp-pach khespiyatäpjjani.

11. Wawanacapan juchanacat cutiquipstapjjañapas bautisasipjjañapas janiw waquisquiti. Bautisasiñajj juchanacat cutiquipstañataquiwa, camächitanacar phokhañataqui juchanacar pampachañcama.

12. Ucampis wawanacajj Criston jacapjje, oraken kalltäwipatpacha. Janitejj uqhamäcaspajja, Diosajj maynir alcatir Diosaquïspawa; jakoquiptir Diosaquiraquïspawa; jakenacar alekac ajlliriraquïspawa, cunalaycutejj kawkha wawanacas jan bautisatajj jiwapjjejja!

13. Uqhämasti, wawanacatejj jan bautisasiñamp jan khespiyatäcaspajja, ucanacajj wiñay mankhapacharuw sarapjjasapäna.

14. Nayajj jumaruw sisma: Cawquïrinacatejj wawanacan bautisasiñap waquisirïtap amuyapqui ucanacajja, cʼallcʼu mulljam cʼallcʼuncapjjewa, ñankha luräwinacan phalanacapancapjjewa, cunalaycutejj janiw iyawsquiti, janiw suyquiti janiw qhuyapayascaraquiti. Uqhämasti, uca lupʼisatejj jiwaspajja, mankhapachar sarañapäniwa.

15. Diosajj bautisasitap laycuw mä wawarojj khespiyi, jan bautisasir wawasti chhaktaniwa –sas amuyañajj jachʼa ajjsarcay ñankhawa.

16. Ay Tatitun luräwinacap uqhäm ñankhar tucuyirinacata; cunalaycutejj janitejj juchanacapat cutiquipstapcanejja, chhaktapjjaniwa. Nayajj chʼaman cancañ Diosat catokcasinjja kamasampiw arsta; janiw nayajj jakenacan lurañapat ajjsarcti, cunalaycutejj phokhat munasiñajj take ajjsarañ apanucu.

17. Cunatejj wiñay munasiñäqui uca qhuyapayasïwimp phoktʼatätwa. Uqhämasti, take wawanacaw nayataquejj quicpaquïpjje. Ucat jiscʼa wawanacarojj phokhatpach munasiñamp munta. Jupanacasti quipcäsajja, khespiyäwi catokerinacäpjjewa.

18. Nayajj Diosan jan mayni saparuc alcatir Diosätap yat-ta. Janirac mayj tucurïtap yatiracta; jupajj wiñayat wiñaycam jan mayj tucuriwa.

19. Wawanacajj juchanacat janiw cutiquipstapcaspati; uqhämasti, Diosan jupanacar qhuyapayañap ajjalnucuñajja, ajjsarcañ ñankhawa. Takpach jupanacajja, jupan jacapjje jupan qhuyapayatap laycu.

20. Qhititejj wawanac bautisañajj waquisiw sisqui ucajja, Criston qhuyapayäwinacaparuw ajjalnucu. Jupan juchanacan tʼakhesiyäwipar phokhäwipamp jactäwipan chʼamapampirojj jan cunäcaspas uqhämaruw tucuyi.

21. Ay jupanacata; cunalaycutejj jiwañ mankhapachar wiñay tʼakhesïwir jalantirjamäpjjewa. Nayajj kamasampiw uc arsta; Diosajj camächit churitu. Ucanac istʼasajj yäkamaya, janitejj uqhäm lurcätajja, Criston taripäw konuñap nayrakatanjja, juma contraw ircatapjjani.

22. Takpach wawanacaw Criston jacapjje, uqhämaraqui, take jan leyinïqui ucanacasa, cunalaycutejj take jan leyinïqui ucanacamp-pacharuw cutsuyäwin chʼamapajj puri. Uqhämasti, jan juchañchatanacajja, jan ucasti, jan juchañchañamp jicjjatasirinacajj janiw juchanacat cutiquipstapcaspati; ucanacataquisti bautisasiñajj janiw cunataquïquisa.

23. Antisas ucajj Dios nayrakatan jiscʼachañawa, cunalaycutejj Criston qhuyapayäwinacapampiru, Kollan Ajayupan chʼamapampiruw ajjalnucupjje, ucatsti jiwat luräwinacaruw alcatapjje.

24. Jichhasti, wawajjay, ucajj janiw utjañapäquiti. Juchanacat cutiquipstañajj juchañchatanacataquiwa, tʼunantat leyin ñankhachäwip mankhanquirinacataquiraquiwa.

25. Juchanacat cutiquipstañan nayrïr achupajj bautisasiñawa. Bautisasiñasti camächitanacar phokhañatac iyawsañanïñ toket puri; camächitanacar phokhañasti, juchanacar pampachäw puriyi.

26. Juchanacar pampachäwisti, llampʼu chuymanïña, altʼir chuymanïñ puriyi. Llampʼu chuymanïñ altʼir chuymanïñ laycusti, Kollan Ajayun tumpäwipaw purini; uca Chuymachiristi, suyäwimp phokhatpach munasiñamp phoktʼayi. Tucuyäwejj purincani, take kollananacajj Diosamp utjapcani ucapachcamaw jan karis Diosat mayisiñ toke uca munasiñajj utjascaquini.

27. Janitejj nayajj mä jucʼampirojj Laman jakenacamp nuwasir sarcäjja, wastat kellkanïma; janitejj juchanacapat cutiquipstapcanejja, aca marcana, jan ucajja, Nefi jakenacan jachʼa jachʼa tucutapajj tʼunjäwiruw puriyani.

28. Jupanacataqui, juchanacat cutiquipstañan jupanacar puriñapataqui Diosat mayisim, wawajjay. Ucampis Ajayun jupanacamp kʼewtasiñ niy jaytjatapat nayajj ajjsarta. Acsa toke orakensti, jupanacajj Diosat jutquis take uca chʼamampir chʼaman cancañampiruw atipañ munapjje; Kollan Ajayurusti ajjalnucupjjaraquiwa.

29. Uqhäm jachʼa yatïw jan catokatapatjja, jucʼa pacharojj tucusipjjañapäniwa, Diosan arjirinacan arjäwinacaparu, Khespiyirisan quicpa arsut arunacapar phokhañataqui.

30. Diosampïmay wawajja, wastat kellkañajjcama, jan ucajja wasitat jiquisiñascama. Uqhamäpan.