1 ’E i teienei, i muri a’era, ’ua hōro’a atu ra Zenifa i te bāsileia ia Noa, te hō’ē o tāna mau tamaiti ; nō reira, ’ua ha’amata ihora ’o Noa i te fa’atere ’ei mono nōna ; ’e ’aita ’oia i haere nā te ’ē’a o tōna ra metua tāne.

2 Inaha ho’i, ’aita ’oia i ha’apa’o i te mau fa’auera’a a te Atua, ’ua pe’e rā ’oia i te mau hina’aro o tōna iho ’ā’au. ’E e rave rahi tāna mau vahine ’e te mau vahine tāvini. ’E ’ua arata’i ’ē ’oia i tōna mau ta’ata ’ia rave i te hara, ’e ’ia rave i te mau mea vi’ivi’i i mua i te aro o te Fatu. ’Oia ïa, ’e ’ua rave rātou i te mau ’ohipa tai’ata ’e te mau huru ’ohipa ’ī’ino ato’a.

3 ’E ’ua tītau ’oia i te tute, ’oia ho’i i te pae o te tufa’a o tā rātou ato’a ra mau tao’a, te pae o te tufa’a o tā rātou ’auro ’e tā rātou ’ārio, ’e te pae o te tufa’a o tā rātou zifa ’e tā rātou kapa, ’e tā rātou veo ’e tā rātou ’āuri ; ’e te pae o te tufa’a o tā rātou mau fanau’a ’ānimara poria ra ; ’e ’oia ato’a te pae o te tufa’a o tā rātou sītona.

4 ’E ’ua nā reira ’oia nō te tauturu iāna iho, ’e tāna mau vahine ’e tāna mau vahine tāvini ; ’e tōna ato’a mau tahu’a, ’e tā rātou mau vahine ’e tā rātou mau vahine tāvini, ’e ’ua nā reira ’oia i te fa’ahuru ’ē i te mau ’ohipa nō te bāsileia.

5 ’E ’ua fa’aru’e atu ’oia i te mau tahu’a ato’a i fa’atōro’ahia e tōna metua tāne ; ’e ’ua fa’atōro’a ’oia i te mau tahu’a ’āpī ’ei mono nō rātou, ’o tei fa’ateiteihia i roto i te te’ote’o o tō rātou ’ā’au.

6 ’Oia ïa, ’ua nā-reira-hia rātou i te tauturuhia i roto i tō rātou fa’atau, ’e i roto i tā rātou ha’amorira’a ’īdolo, ’e i roto i tā rātou mau ’ohipa tai’ata, nā roto i te mau tute tā te ari’i Noa i tītau i tōna ra mau ta’ata ; ’e ’ua nā reira te mau ta’ata i te rave i te ’ohipa rahi nō te tauturu i teie mau ’ohipa ’ī’ino.

7 ’Oia ïa, ’ua ha’amata ato’a rātou i te ’ohipa ha’amori ’īdolo, nō te mea ’ua ha’avarehia rātou e te parau ma’ama’a ’e te tāvaimanino a te ari’i ’e te mau tahu’a ; ’e ’ua parau ho’i rātou i te mau parau tāvaimanino ia rātou.

8 ’E i muri a’era, ’ua hāmani ihora te ari’i ra ’o Noa i te mau fare nehenehe ’e te ’ā’ano e rave rahi ; ’e ’ua fa’anehenehe a’era ’oia i te reira i te ’ohipa rā’au maita’i ato’a, ’e te mau huru tao’a rahi ato’a, ’e te ’auro, ’e te ’ārio, ’e te ’āuri, ’e te veo, ’e te zifa, ’e te kapa.

9 ’E ’ua hāmani ato’a ’oia i te hō’ē aora’i rahi roa nōna, ’e te hō’ē terōno ho’i i rōpū i te reira, ’e ’ua hāmanihia te reira i te rā’au maita’i roa ’e ’ua fa’a’una’unahia i te ’auro ’e te ’ārio ’e te mau mea tao’a rahi.

10 ’E ’ua fa’aue ato’a ’oia ’ia rave tōna mau ta’ata rave ’ohipa i te mau huru ’ohipa nehenehe ato’a i roto i te hiero, ’oia ho’i i te rā’au maita’i roa, ’e te kapa, ’e te veo.

11 ’E ’ua fa’anehenehe ihora ’oia i te mau pārahira’a i fa’ata’ahia nō te mau tahu’a rahi i te ’auro mau, ’e tei ni’a a’e te reira i te mau pārahira’a ato’a ; ’e ’ua fa’aue ’oia ’ia hāmanihia te hō’ē ’āu’a i mua ia rātou, ’ia ti’a ia rātou ’ia turu i tō rātou tino ’e tō rātou rima i ni’a iho i te reira, ’a parau atu ai rātou i te mau parau ha’avare ’e te ma’ama’a i tōna ra mau ta’ata.

12 ’E i muri a’era, ’ua fa’ati’a a’era ’oia i te hō’ē pare i pīha’i iho i te hiero ; ’oia ïa, te hō’ē pare teitei roa, ’e e mea teitei mau te reira ’ia ti’a iāna ’ia ti’a i ni’a roa ’e ’ia hi’o atu i te fenua nō Siloma, ’e te fenua ato’a nō Semelona, tei noa’a i te mau ’āti Lamana ; ’e e ti’a ato’a iāna ’ia hi’o atu i te mau fenua ato’a ē ’ati noa a’e.

13 ’E i muri a’era, ’ua fa’aue atu ’oia ’ia fa’ati’ahia te mau fare e rave rahi i te fenua nō Siloma ; ’e ’ua fa’aue atu ra ’oia ’ia fa’ati’ahia te hō’ē pare rahi i ni’a i te ’āivi i te pae i apato’erau i te fenua nō Siloma ra, ’o tei vai na ’ei ha’apūra’a nō te mau hua’ai o Nephi i te tau i horo ai rātou i rāpae i te fenua ; ’e ’ua nā reira ’oia nā roto i te mau tao’a i noa’a iāna nā roto i te tutera’a i tōna ra mau ta’ata.

14 ’E i muri a’era, tei ni’a i tāna ra mau tao’a tōna ’ā’au, ’e ’ua puhura ’oia i tōna pu’e mahana i roto i te orara’a tai’ata i pīha’i iho i tāna mau vahine ’e tāna mau vahine tāvini ato’a ; ’e ’ua nā reira ato’a ho’i tōna mau tahu’a i pīha’i iho i te mau vahine tai’ata.

15 ’E i muri a’era, ’ua tanu ihora ’oia i te mau ’ō vine ē ’ati noa a’e te fenua ; ’e ’ua hāmani ihora ’oia i te mau tāvirira’a vine, ’e ’ua hāmani rahi ’oia i te uaina ; ’e nō reira ’ua riro ’oia ’e tōna mau ta’ata ato’a ’ei mau ta’ata inu uaina.

16 ’E i muri a’era, ’ua ha’amata te mau ’āti Lamana i te haere mai e taparahi i tōna mau ta’ata, ’oia ho’i i ni’a i te tahi mau pupu iti, ’e ’ua taparahi ia rātou i roto i tā rātou mau fa’a’apu, ’a tīa’i ai rātou i tā rātou mau nana.

17 ’E ’ua tono atu ra te ari’i ra ’o Noa i te mau tīa’i ē ’ati noa a’e te fenua nō te tīahi atu ia rātou ; ’aita rā i nava’i te mau ta’ata tāna i tono, ’e ’ua tae mai ra te mau ’āti Lamana i ni’a ia rātou, ’e ’ua taparahi ihora ia rātou, ’e ’ua tīahi atu ra i tā rātou mau nana e rave rahi i rāpae i te fenua ; ’e ’ua nā reira ihora te mau ’āti Lamana i te ha’amata i te ha’amou ia rātou, ’e i te fa’a’ohipa i tō rātou ’ino’ino i ni’a ia rātou.

18 ’E i muri a’era, ’ua tono atu ra te ari’i ra ’o Noa i tōna mau nu’u fa’ehau e ’aro ia rātou, ’e ’ua tūra’ihia rātou i muri, ’oia ho’i ’ua tīahi ’ē atu ra rātou ia rātou nō te hō’ē taime ri’i ; nō reira, ’ua ho’i mai rātou ma te ’oa’oa rahi nō tā rātou mau tao’a i noa’a mai.

19 ’E teienei, nō taua tama’i manuia rahi ra, ’ua fa’ateiteihia rātou i roto i te te’ote’o o tō rātou ’ā’au ; ’ua fa’aahaaha rātou i tō rātou iho pūai, i te nā-’ō-ra’a ē, e ti’a i tō rātou e pae ’ahuru ta’ata ’ia ’aro atu i te mau ta’ata e rave rahi tauatini nō te mau ’āti Lamana ; ’e ’ua nā reira rātou i te fa’aahaaha, ’e ’ua ’oa’oa rātou ’ia taparahi, ’e ’ia ha’amani’i i te toto o tō rātou mau taea’e ; ’e ’ua nā reira rātou nō te mau ’ohipa ’ī’ino a tō rātou ari’i e mau tahu’a.

20 ’E i muri a’era, tē vai ra te hō’ē ta’ata i rotopū ia rātou, ’o Abinadi tōna i’oa ; ’e ’ua haere atu ’oia i rotopū ia rātou, ’e ’ua ha’amata ihora i te tohu, i te nā-’ō-ra’a atu ē : Inaha, tē nā ’ō mai ra te Fatu, tē nā ’ō mai ra ’oia i te fa’auera’a mai iā’u, i te nā-’ō-ra’a mai ē : ’A haere atu, ’e ’a parau atu i teie nei feiā ē, tē nā ’ō mai ra te Fatu—’Auē ho’i teie nei feiā ē, nō te mea ’ua ’ite au i tā rātou mau ’ohipa vi’ivi’i, ’e tā rātou ’ohipa ’ī’ino, ’e tā rātou mau ’ohipa tai’ata ; ’e ’ia ’ore rātou ’ia tātarahapa, e tae tō’u riri i ni’a iho ia rātou.

21 ’E ’ia ’ore rātou ’ia tātarahapa ’e ’ia fāriu mai i te Fatu tō rātou Atua, inaha, e tu’u atu vau ia rātou i roto i te rima o tō rātou mau ’enemi ; ’oia ïa, e fa’atītīhia rātou, ’e e hāmani-’ino-hia rātou i te rima o tō rātou ra mau ’enemi.

22 ’E a muri a’era, e ’ite rātou ē, ’o vau nei te Fatu tō rātou Atua, ’e e Atua tāho’o ho’i au, ’e te tāho’o ho’i i te mau ’ohipa ’ī’ino a tō’u ra mau ta’ata.

23 ’E a muri a’era, ’ia ’ore teie nei feiā ’ia tātarahapa ’e ’ia fāriu mai i te Fatu tō rātou Atua, e fa’atītīhia rātou ; ’e ’aita roa te hō’ē e fa’aora ia rātou, maori rā te Fatu te Atua Manahope.

24 ’Oia ïa, ’e a muri a’era, ’ia ti’aoro mai rātou iā’u, e fa’atāere au i te fa’aro’o atu i tā rātou mau ti’aorora’a ; ’oia ïa, e fa’ati’a vau ’ia papa’ihia rātou e tō rātou mau ’enemi.

25 ’E ’ia ’ore rātou ’ia tātarahapa ma te ’ahu ’oto ’e te rehu auahi, ’e ’ia ti’aoro ’ū’ana atu i te Fatu tō rātou Atua, e ’ore roa vau e fa’aro’o atu i tā rātou mau pure, e ’ore ho’i au e fa’aora ia rātou i tō rātou mau ’ati ; ’e tē nā reira mai ra te Fatu, ’E tē nā reira mai ra te Fatu i te fa’aue mai iā’u.

26 I teienei, i muri a’era, ’ia oti a’era tā Abinadi paraura’a atu i teie nei mau parau ia rātou, ’ua riri ihora rātou iāna, ’e ’ua tītau ihora ’ia taparahi iāna ; ’āre’a rā ’ua fa’aora te Fatu iāna mai roto mai i tō rātou rima.

27 I teienei, i tō te ari’i ra ’o Noa fa’aro’ora’a i te mau parau tā Abinadi i parau mai i te mau ta’ata, ’ua riri ato’a ihora ’oia ; ’e ’ua nā ’ō mai ra : ’O vai Abinadi, i ti’a ai iā’u ’e tō’u mau ta’ata ’ia ha’avāhia e ana, ’e ’aore rā ’o vai te Fatu, ’o tē tu’u mai i teie ’ati rahi i ni’a iho i tō’u nei mau ta’ata ?

28 Tē fa’aue atu nei au ia ’outou ’ia ’āfa’i mai ia Abinadi i teie vāhi, ’ia taparahi au iāna, nō te mea ’ua parau ’oia i teie nei mau mea nō te fa’ati’arepu i tō’u mau ta’ata ’ia riri te tahi i te tahi, ’e nō te fa’atupu ho’i i te mau mārōra’a i rotopū i tō’u nei mau ta’ata ; nō reira e taparahi au iāna.

29 I teienei, ’ua ha’amatapōhia te mata o te mau ta’ata, nō reira ’ua fa’a’eta’eta rātou i tō rātou ’ā’au ’eiaha e fāri’i i te mau parau a Abinadi, ’e ’ua ’imi rātou mai taua taime mai ra ’ia haru iāna. ’E ’ua fa’a’eta’eta te ari’i ra ’o Noa i tōna ’ā’au i te parau a te Fatu, ’e ’aita roa ’oia i tātarahapa i tāna ra mau ’ohipa ’ī’ino.