1 ’E i muri a’era, ’ia ma’iri nā matahiti e piti i tō Abinadi haerera’a mai i rotopū ia rātou ma te huna, ’aita roa rātou i ’ite ē ’o vai ’oia, ’e ’ua ha’amata ’oia i te tohu i rotopū ia rātou, i te nā-’ō-ra’a ē : ’Ua nā ’ō mai te Fatu i te fa’aue mai iā’u, i te nā-’ō-ra’a mai ē—E Abinadi, ’a haere ’e ’a tohu atu i tō’u nei mau ta’ata, nō te mea ’ua fa’a’eta’eta rātou i tō rātou ’ā’au i tā’u ra mau parau ; ’aita ā rātou i tātarahapa i tā rātou mau ’ohipa ’ī’ino ; nō reira, e tā’iri au ia rātou i roto i tō’u nei riri, ’oia ïa, i roto i tō’u nei riri rahi, e fa’autu’a vau ia rātou nō tā rātou mau ’ohipa ’ī’ino ’e te mau ’ohipa vi’ivi’i.

2 ’Oia ïa, ’auē ho’i teie nei u’i ē ! ’E ’ua parau mai ra te Fatu iā’u : ’A fa’atoro atu i tō ’oe rima ’e ’a tohu, i te nā-’ō-ra’a atu ē : Tē nā ’ō mai ra te Fatu, ’e a muri a’era e fa’atītīhia ’e e tā’irihia te pāpāri’a o teie nei u’i nō tā rātou mau ’ohipa ’ī’ino ; ’oia ïa, e tīahihia rātou e te ta’ata, ’e e taparahihia ; ’e nā te mau manu o te reva, ’e nā te mau ’ūrī, ’oia ïa, ’e nā te mau ’ānimara ’ōviri e ’amu i tō rātou ’i’o.

3 ’E a muri a’era, e riro te ora o te ari’i ra ’o Noa mai te ’ahu i roto i te umu auahi ve’ave’a ra ; ’e e ’ite ho’i ’oia ē, ’o vau mau te Fatu.

4 ’E a muri a’era, e tā’iri ho’i au i teie nei mau ta’ata nō’u i te mau ’ati rahi, ’oia ïa, i te o’e, ’e te ma’i rahi ; ’e e fa’atupu vau i te ’auē rahi i roto ia rātou i te tā’āto’ara’a nō te mahana.

5 ’Oia ïa, e fa’atae mai au i te mau hōpoi’a teiaha ’ia ru’uru’uhia i ni’a i tō rātou mau tua ; ’e e tūra’ihia rātou ’ia haere i mua mai te ’āsini vava ra.

6 ’E a muri a’era, e ha’ama’iri mai au i te ua pa’ari i ni’a ia rātou ; ’e e tā’iri te reira ia rātou ; ’e e tā’iri-ato’a-hia rātou e te mata’i nō te hiti’a o te rā ra ; ’e e fa’a’ino ato’a te mau manumanu ri’i i tō rātou fenua, ’e e ’amu ha’apau ho’i i tā rātou sītona.

7 E tā’irihia rātou i te ma’i rahi—’e nā reira vau nō tā rātou mau ’ohipa ’ī’ino ’e te mau ’ohipa vi’ivi’i.

8 ’E a muri a’era, ’ia ’ore rātou e tātarahapa e ha’amou roa vau ia rātou mai ni’a atu i te fenua nei ; e vaiiho mai rā rātou i te hō’ē pāpa’a parau i muri mai ia rātou, ’e e fa’aherehere au i te reira nā te tahi atu mau nūna’a ’o tē pārahi i ni’a i taua fenua ra ; ’oia ïa, e nā reira iho ā vau nō te fa’a’ite atu i te mau ’ohipa vi’ivi’i a teie nei mau ta’ata i te tahi atu mau nūna’a. ’E e rave rahi te mau mea tā Abinadi i tohu atu nō ni’a i teie nei feiā.

9 ’E i muri a’era, ’ua riri ihora rātou iāna ; ’e ’ua rave ihora rātou iāna ’e ’ua ’āfa’i ru’uru’u atu ra iāna i mua i te ari’i, ’e ’ua parau atu ra rātou i te ari’i : Inaha, i ’āfa’i mai nei mātou i te hō’ē ta’ata i mua ia ’oe ’o tei tohu i te mau mea ’ino e tupu i ni’a i tō ’oe mau ta’ata, ’e ’ua nā ’ō mai ho’i ’oia ē, e ha’amou te Atua ia rātou.

10 ’E ’ua tohu ato’a ho’i ’oia i te mau mea ’ino e tupu i roto i tō ’oe orara’a, ’e tē nā ’ō ra ’oia, e riro tō ’oe ora mai te ’ahu i roto i te umu auahi ra.

11 ’E teie fa’ahou, tē nā ’ō ra ’oia ē, e riro ’oe mai te rā’au, ’oia ho’i, mai te rā’au marō o te ’āua i horohia ’e te mau ’ānimara ’e tei ta’ata’ahihia e tō rātou ’āvae.

12 ’E teie fa’ahou, tē nā ’ō mai ra ho’i ’oia ē, e riro ’oe mai te pua o te mōtu’u, ’e ’ia para ana’e te huero, ’e ’ia farara mai te mata’i, e puhi-noa-hia ïa i ni’a i te fenua. ’E tē parau fa’ahua mai ra ’oia mai te mea ra ē, nā te Fatu ïa i parau mai i te reira. ’E tē nā ’ō ra ’oia ē, e tae mai teie mau mea i ni’a ia ’oe ’ia ’ore ’oe e tātarahapa, e nō tā ’oe mau ’ohipa ’ī’ino e tae mai ai te reira.

13 ’E i teienei, e te ari’i, e aha tā ’oe na ’ohipa ’ino rahi i rave, ’e e aha ho’i te mau hara rahi i ravehia e tō ’oe na mau ta’ata, i ti’a ai ia tātou ’ia fa’ahapahia e te Atua ’e ’aore rā ’ia ha’avāhia e teie nei ta’ata ?

14 ’E i teienei, e te ari’i, inaha, ’aita tā mātou e hapa, ’e ’o ’oe na, e te ari’i, ’aita tā ’oe e hara i rave ; nō reira, ’ua ha’avare teie nei ta’ata nō ni’a ia ’oe na, ’e ’ua tohu faufa’a ’ore noa ’oia.

15 ’E inaha, e mea pūai tātou, e’ita roa tātou e fa’atītīhia, ’e ’aore rā e ’āfa’i-faatītī-hia e tō tātou mau ’enemi ; ’oia ïa, ’ua manuia roa ’oe i ni’a i te fenua nei, ’e e manuia atu ā ’oe.

16 Inaha, teie te ta’ata, ’e tē tu’u atu nei mātou iāna i roto i tō ’oe rima ; ’ia ti’a ia ’oe ’ia rave iāna mai te au i tō ’oe hina’aro.

17 ’E i muri a’era, ’ua fa’aue atu ra te ari’i ra ’o Noa ’ia hurihia Abinadi i roto i te fare ’āuri ; ’e ’ua fa’aue ato’a ho’i ’oia i te mau tahu’a ’ia ’āmui tāhō’ē mai rātou ’ia ti’a iāna ’e rātou ato’a ’ia fa’atupu i te hō’ē ’āpo’ora’a nō te fa’ata’a e aha tāna e rave i ni’a iāna.

18 ’E i muri a’era, ’ua parau atu ra rātou i te ari’i : ’A ’āfa’i mai iāna i’ō nei ’ia ti’a ia mātou ’ia uiui atu iāna ; ’e ’ua fa’aue atu ra te ari’i ’ia ’āfa’ihia mai ’oia i mua ia rātou.

19 ’E ’ua ha’amata ihora rātou i te uiui iāna, ’ia ti’a ia rātou ’ia ha’afifi iāna, ’e i muri iho a pari atu ai iāna ; ’ua pāhono atu rā ’oia ia rātou ma te mata’u ’ore i te ha’amorohira’a i tā rātou ato’a ra mau uira’a ; ’oia ïa, ’ua māere roa rātou i te mea ’ua ti’a iāna ia pāhono ti’a atu i tā rātou mau uira’a ato’a, ma te ha’afifi atu ia rātou i roto i tā rātou iho mau parau.

20 ’E i muri a’era, ’ua parau mai ra te hō’ē ’o rātou iāna : E aha te aura’a nō te mau parau i pāpa’ihia ’e tei ha’api’ihia ho’i e tō tātou mau metua, i te nā-’ō-ra’a ē :

21 ’Auē te nehenehe o te ’āvae o te ve’a i ni’a i te mau mou’a, ’o tei hōpoi mai i te mau parau maita’i ; ’o tei fa’a’ite mai i te parau hau ; ’o tei hōpoi mai i te mau parau maita’i nō te maita’i, ’o tei fa’a’ite mai i te fa’aorara’a ; ’o tei parau mai ia Ziona, tē fa’atere ari’i nei tō ’oe Atua.

22 E fa’ateitei tō ’oe mau fa’ehau i tō rātou reo ; ’e e ’āmui tāhō’ē tō rātou reo i te hīmenera’a ; ’e e ’ite rātou te mata ’e te mata ’ia fa’aho’i mai te Fatu ia Ziona.

23 ’Ia puroro noa atu te ’oa’oa ; ’a hīmene ’āmui mai e te mau vāhi ano nō Ierusalema ; ’ua ha’amāhanahana ho’i te Fatu i tōna mau ta’ata, ’e ’ua fa’aora ’oia ia Ierusalema.

24 ’Ua fa’a’ite mai ho’i te Fatu i tōna rima mo’a i mua i te mata o te mau nūna’a ato’a ; ’e e ’ite tō te mau hope’a ato’a o te fenua nei i te fa’aorara’a a tō tātou Atua ?

25 ’E i teienei ’ua parau atu ra Abinadi ia rātou : E ’ere ānei ’outou i te mau tahu’a, ’e tē fa’ahua na ’outou ia ’outou iho ’ei ’orometua nō teie nei feiā, ’e ’ei ’ite i te Vārua nō te tohu, ’e tē ui mai nei ho’i ’outou iā’u i te aura’a nō teie nei mau mea ?

26 Tē parau atu nei au ia ’outou na, ’auē ho’i ’outou ē, i te mea tē ha’api’o ra ’outou i te mau ’ē’a ti’a o te Fatu ! ’Āhiri ē ’ua māramarama ’outou i teie nei mau mea, ’aore ā ’outou i ha’api’i atu i te reira ; nō reira, ’ua ha’api’o ’outou i te mau ’ē’a ti’a o te Fatu.

27 ’Aita tō ’outou ’ā’au i tītau i te māramarama ; nō reira, ’aita ’outou i rave ma te pa’ari. Nō reira, e aha tā ’outou i ha’api’i atu i teie nei feiā ?

28 ’E ’ua parau mai ra rātou : Tē ha’api’i nei mātou i te ture a Mose.

29 ’E ’ua parau fa’ahou atu ra ’oia ia rātou : Mai te mea tē ha’api’i nei ’outou i te ture a Mose, nō te aha ïa ’aita ’outou i ha’apa’o i te reira ? Nō te aha ho’i tō ’outou ’ā’au i nounou ai i te mau tao’a rahi ? Nō te aha ho’i ’outou i rave ai i te mau ’ohipa taiata e i ha’amāu’a ai i tō ’outou pūai i rotopū i te mau vahine tai’ata ; ’oia ïa, i arata’i atu ai ho’i i teie mau ta’ata ’ia rave i te hara, ’e ’ua tono mai te Fatu iā’u ’ia tohu atu nō ni’a i teie nei feiā, ’oia ïa, ’ia fa’a’ite atu i te ’ino rahi e tae mai i ni’a i teie nei mau ta’ata ?

30 ’Aita ānei ’outou i ’ite ē, tē parau nei au i te parau mau ? ’Oia ïa, ’ua ’ite ’outou ē, tē parau nei au i te parau mau ; ’e ’ua ti’a roa ia ’outou ’ia rurutaina i mua i te Atua.

31 E a muri a’era, e tā’irihia ’outou nō tā ’outou mau ’ohipa ’ī’ino ; i parau na ho’i ’outou ē, te ha’api’i na ’outou i te ture a Mose. ’E e aha ho’i tā ’outou i ’ite nō ni’a i te ture a Mose ? E tae mai ānei te fa’aorara’a nā roto i te ture a Mose ? Nāhea ’outou i te parau ?

32 ’E ’ua pāhono mai ra rātou ma te parau mai ē, e mea nā roto i te ture a Mose e tae mai ai te fa’aorara’a.

33 ’Āre’a rā i teie nei ’ua parau atu ra Abinadi ia rātou : ’Ua ’ite au ē, mai te mea e ha’apa’o ’outou i te mau fa’auera’a a te Atua, ’oia ïa, mai te mea e ha’apa’o ’outou i te mau fa’auera’a i hōro’ahia mai e te Fatu ia Mose i ni’a i te mou’a ra i Sinai, ’o tei nā ’ō mai ē :

34 ’O vau te Fatu tō Atua, ’o tei ’āfa’i mai ia ’outou i rāpae i te fenua nō ’Aiphiti, i rāpae i te ’utuāfare nō te fa’atītīra’a.

35 ’Eiaha roa tō ’outou ’ei Atua ’ē atu i mua iā’u nei.

36 ’Eiaha roa ’outou e hāmani i te ’īdolo tarai nō ’outou, ’e te hōho’a nō te hō’ē mea i ni’a i te ra’i ra, ’e nō te hō’ē mea i raro i te fenua nei.

37 I teienei ’ua parau atu ra Abinadi ia rātou, ’ua ha’apa’o ānei ’outou i teie mau mea ato’a ? Tē parau atu nei au ia ’outou na, ’Aita roa ’outou i nā reira. ’E ’ua ha’api’i ānei ’outou i teie nei mau ta’ata ’ia rave i teie mau mea ato’a ? Tē parau atu nei au ia ’outou na, ’Aita, ’aita roa ’outou i nā reira.