1 ’E i teienei, ’ia fa’aro’o a’era te ari’i i teie mau parau, ’ua nā ’ō atu ra ’oia i tōna ra mau tahu’a : ’A hōpoi ’ē atu i teie ta’ata, ’e ’a taparahi atu iāna ; e aha ho’i tā tātou iāna, ’ua ma’ama’ahia ’oia.

2 ’E ’ua ti’a a’era rātou i ni’a ’e ’ua tāmata ihora i te haru iāna ; ’āre’a rā ’ua pāto’i atu ra ’oia ia rātou, ’e ’ua nā ’ō atu ra ia rātou :

3 ’Eiaha e tāpe’a mai iā’u nei, e tā’iri mai ho’i te Atua ia ’outou mai te mea e fa’atae mai ’outou i tō ’outou rima i ni’a iā’u nei, nō te mea ’aore ā vau i fa’a’ite atu i te parau tā te Fatu i tono mai iā’u nei nō te fa’a’ite atu ; ’e ’aore ho’i au i fa’a’ite atu i tā ’outou i tītau mai iā’u nei ’ia fa’a’ite atu ; nō reira, ’aita te Atua e fa’ati’a noa atu ’ia taparahihia vau i teienei.

4 ’Āre’a rā e mea ti’a roa iā’u ’ia fa’atupu i te mau fa’auera’a tā te Atua i fa’aue mai iā’u, ’e nō te mea ’ua fa’a’ite atu vau i te parau mau ia ’outou na, i riri mai ai ’outou iā’u nei. ’E nō te mea ho’i ’ua parau atu vau i te parau a te Atua, i mana’o ai ’outou ē, ’ua ma’ama’ahia vau.

5 I teienei, i muri a’era, ’ia oti a’era tā Abinadi paraura’a atu i teie mau parau, ’aita roa te mau ta’ata o te ari’i ra ’o Noa i fa’atae atu i tō rātou rima i ni’a iāna, ’e tei ni’a iho ho’i iāna te Vārua o te Fatu ; ’e ’ua ’ana’ana ihora tōna mata i te ’ana’ana rahi roa, mai tō Mose, ’a pārahi ai ’oia i te mou’a ra i Sinai, ’a paraparau ai ho’i ’oia i te Fatu.

6 ’E ’ua parau atu ra ’oia nā roto i te mana ’e te ha’amanara’a nō ’ō mai i te Atua ra ; ’e ’ua parau fa’ahou atu ra ’oia, i te nā-’ō-ra’a atu :

7 Tē ’ite na ’outou ē, ’aita roa tō ’outou e mana nō te taparahi mai iā’u nei, nō reira tē fa’aoti nei au i tā’u nei parau. ’Oia ïa, ’e ’ua ’ite ho’i au ē, nā te reira e pātia i tō ’outou nā ’ā’au, nō te mea tē fa’a’ite nei au i te parau mau nō ni’a i tā ’outou mau ’ohipa ’ī’ino.

8 ’Oia ïa, nā tā’u nei mau parau i fa’a’ī ia ’outou i te ’ūmere, ’e te māere, ’e te riri.

9 ’Āre’a rā e fa’aoti au i tā’u nei parau ; ’e i reira ’aita tō’u e pe’ape’a i te vāhi tā’u e haere ra, mai te mea e fa’aorahia vau.

10 ’Āre’a rā teie noa tā’u parau iti ia ’outou na ; tā ’outou e rave mai iā’u i muri nei, e riro ïa te reira ’ei taipe ’e ’ei ata nō te mau mea e tupu a muri atu.

11 ’E i teienei, e tai’o atu vau i te toe’a o te mau fa’auera’a a te Atua, ’ua ’ite ho’i au ē, ’aita te reira i pāpa’ihia i roto i tō ’outou ’ā’au ; ’e ’ua ’ite ho’i au ē, ’ua ’imi ’e ’ua ha’api’i atu ho’i ’outou i te mau ’ohipa ’ī’ino i te pae rahi o tō ’outou orara’a.

12 ’E i teienei, ’ua ha’amana’o na ’outou ē, i parau atu vau ia ’outou na ē : ’Eiaha roa ’outou e hāmani i te ’īdolo tarai nō ’outou, ’e ’aore rā i te hōho’a nō te hō’ē mea i ni’a i te ra’i ra, ’e ’aore rā nō te hō’ē mea i raro i te fenua nei, ’e ’aore rā nō te hō’ē mea i raro i te pape i raro a’e i te fenua.

13 ’E teie fa’ahou ā : ’Eiaha roa ’outou e pi’o i raro ia rātou, ’eiaha ho’i e tāvini ia rātou ; ’e ’o vau nei ho’i te Fatu tō ’oe Atua, ’e e Atua tāho’o ho’i au nei ; ’e tē tāho’o nei ho’i au i te mau ’ohipa ’ī’ino a te mau metua i ni’a i te mau tamari’i, ē tae noa atu i te toru ’e te maha o te mau u’i ’o tē ’ino’ino mai iā’u nei.

14 ’E e fa’a’ite atu ho’i au i te aroha i te feiā e rave rahi tauatini ’o tei hina’aro mai iā’u ’e ’o tē ha’apa’o i tā’u nei mau fa’auera’a.

15 ’Eiaha roa ’outou e fa’ahiti faufa’a ’ore noa i te i’oa o te Fatu ’o tō ’outou Atua ; e ’ore ho’i te Fatu e fa’ariro iāna ’ei ta’ata hapa ’ore ’o tei fa’ahiti faufa’a ’ore noa i tōna ra i’oa.

16 ’A ha’amana’o i te mahana sābati, ’ia ha’amo’ahia ïa.

17 E ono mahana tā ’outou e ha’a, ’e nō te rave i tā ’outou mau ’ohipa ato’a.

18 ’Āre’a rā te hitu o te mahana ra, ’o te sābati ïa nō te Fatu tō ’outou Atua, ’eiaha roa ’outou e rave i te ’ohipa i te reira mahana, ’eiaha ato’a tā ’outou tamaiti, ’eiaha ato’a tā ’outou tamāhine, ’e tō ’outou tāvini tāne, ’eiaha ato’a tō ’outou tāvini vahine, ’eiaha ato’a tā ’outou mau pua’atoro, ’eiaha ato’a te ta’ata ’ē i’ō ’outou ra.

19 E ono ho’i mahana tō te Fatu hāmanira’a i te ra’i ’e te fenua, ’e te tai, ’e te mau mea ato’a i roto ra ; nō reira ’ua ha’amaita’i ihora te Fatu i te mahana sābati, ’e ’ua ha’amo’a ihora ho’i i te reira.

20 ’A fa’atura atu i tō ’outou metua tāne ’e tō ’outou metua vahine ; ’ia ha’amaorohia tō ’outou pu’e mahana i ni’a i te fenua ’o tā te Fatu tō ’outou Atua i hōro’a nō ’outou na.

21 ’Eiaha roa ’outou e taparahi i te ta’ata.

22 ’Eiaha roa ’outou e fa’aturi. ’Eiaha roa ’outou e ’eiā.

23 ’Eiaha roa ’outou e pari ha’avare i tō ’outou ta’ata tupu.

24 ’Eiaha roa ’outou e nounou i te fare o tō ’outou ta’ata tupu, ’eiaha ato’a ’outou e nounou i te vahine a tō ’outou ta’ata tupu, ’eiaha ato’a i tōna tāvini tāne, ’eiaha ato’a i tōna tāvini vahine, ’eiaha ato’a i tāna pua’atoro, ’eiaha ato’a i tāna ’āsini, ’eiaha ato’a i te mau mea ato’a a tō ’outou ta’ata tupu.

25 ’E i muri a’era, ’ia fa’aoti a’era Abinadi i teie nei parau, ’ua nā ’ō atu ra ’oia ia rātou : ’Ua ha’api’i ānei ’outou i teie nei mau ta’ata ’ia rave rātou i teie nei mau mea ato’a, ’e ’ia ha’apa’o ho’i i teie nei mau fa’auera’a ?

26 Tē parau atu nei au ia ’outou na, ’Aita roa ; nō te mea ’āhiri ’outou i nā reira, ’aita ïa te Fatu e tono mai iā’u nei nō te tohu atu i te ’ino ’o tē tae i ni’a i teie nei feiā.

27 ’E i teienei, ’ua parau mai ’outou ē, nā roto i te ture a Mose e tae mai ai te fa’aorara’a. Tē parau atu nei au ia ’outou na, e mea ti’a ïa ’ia ha’apa’o ā ’outou i te ture a Mose ; ’āre’a rā tē parau atu nei au ia ’outou na, e tae mai te tau e ’ore roa e tītau-fa’ahou-hia ’ia ha’apa’o i te ture a Mose.

28 ’E tē parau fa’ahou atu nei ā vau ia ’outou na, ’aita te fa’aorara’a e tae mai nā roto i te ture ana’e ra ; ’e ’āhiri ’aita te tāra’ehara tā te Atua iho e rave nō te mau hara ’e te mau ’ohipa ’ī’ino a tōna ra mau ta’ata, e pohe mau iho ā rātou, noa atu ā te ture a Mose.

29 ’E i teienei, tē parau atu nei au ia ’outou na, e mea ti’a roa ’ia hōro’ahia mai te hō’ē ture i te mau tamari’i o ’Īserā’ela, ’oia ïa, te hō’ē ture ’eta’eta ; nō te mea e feiā ’ā’au ’eta’eta rātou, ’oi’oi i te rave i te mau ’ohipa ’ī’ino, ’e te tāere i te ha’amana’o i te Fatu tō rātou Atua.

30 Nō reira, tē vai ra te hō’ē ture i hōro’ahia ia rātou, ’oia ïa, te hō’ē ture nō te ravera’a i te mau ’ohipa ’e te mau ’ōro’a, te hō’ē ture i tītauhia ia rātou ’ia ha’apa’o māite i terā mahana e i terā mahana, nō te fa’aha’amana’o ia rātou i te Atua ’e tā rātou ’ohipa i mua iāna.

31 Inaha rā, tē parau atu nei au ia ’outou na, e mau taipe ana’e teie nei mau mea nō te mau mea e tae mai.

32 ’E i teienei, ’ua māramarama ānei rātou i te ture ? Tē parau atu nei au ia ’outou na ē, ’Aita roa, ’aita rātou ato’a i māramarama i te ture ; nō te ’eta’eta o tō rātou ’ā’au ; ’aore ho’i rātou i māramarama ē, e ’ore roa te ta’ata e fa’aorahia, maori rā nā roto i te fa’aorara’a a te Atua.

33 Inaha ho’i, ’aita ānei Mose i tohu ia rātou nō ni’a i te taera’a mai o te Mesia, ’e e fa’aora te Atua i tōna ra mau ta’ata ? ’Oia ïa, ē tae noa atu i te mau peropheta ato’a i tohu mai te mātāmua mai ā o teie nei ao—’aita ānei rātou i parau rahi mai ’e ’aore rā i te parau ri’i mai nō ni’a i teie nei mau mea ?

34 ’Aita ānei rātou i parau ē, e haere mai te Atua iho i raro nei e pārahi i rotopū i te mau tamari’i a te ta’ata nei, ’e e riro ’oia mai te ta’ata nei te huru, ’e e haere ho’i i ni’a i te fenua nei ma te mana rahi ?

35 ’Oia ïa, ’aita ānei rātou i parau ato’a mai ē, e fa’atupu ’oia i te ti’afa’ahoura’a ’o tei pohe ra ; ’e e hāmani-’ino-hia ’e e ha’amāuiuihia ’oia ?