Guruy Ni 14
Isaiah e weliy morngaʼagen fare Messiah—Fare dariy fan nge pi gafgow ntay ngakʼ fare Messiah e ni weliy morngaʼagen—I piiʼ ir ni maligach ni fan ko denen Rokʼ e gidiiʼ me ngongoliy e bayul ni fan ko pi tadenen—Mu taʼareb nag ko Isaiah 53. Napʼan 148 M.K.
1 Arragon, ni gathi boed ni yoeg Isaiah: Niʼir e ke michaenʼ ko thin rodaed, ma ire ke yiʼiy nag Somoel gelingin ngakʼ?
2 Ya bayi ilal rokʼ Got ni boed boechi ke gakʼiy nib mirerey, ma boed ba likʼngin ni ke thaey u fithikʼ e butʼ nib malikʼ; ire defelʼ yaʼan ara ba felʼ usun; ma napʼan ni gadaed ra guy ma defelʼ yaʼan ni nge mʼagaenʼ daed ngakʼ.
3 Ire i paer e gidiiʼ nga ur dariy fan niged ma ur feked yathin; beeʼ nib moʼon ni bay e kirbaenʼ rokʼ, ma manang amthune kirbaenʼ; ma gaed fek oewchdaed rokʼ; un dariy fan nag, ma daʼ ud lemniged.
4 Rriyulʼ ni i gafgow i thamiy amthun e kirbaenʼ rodaed, nge malngin i chibiy e pi gafgowaenʼ rodaed; machane da lemniged ni Got e ke gechig nag, me gafgow ko amith.
5 Machane ni madʼad ngakʼ ni bachan e pi ngongol rodaed nib kireb, ma i bech doew ni bachan e pi denen rodaed; Gafgowen e gapas rodaed e aw nga dakean; nge pi dumow ni un tay ngakʼ e ke thapegdaed riy.
6 Gadaed gubin, ni boed e saaf, ni yaen ngab yang; ni ra bagdaed me yaen ko gin nibe lemnag; ma fare Somoel e ri gafgow ni bachan e pi denen rodaed ni gadaed gubin.
7 Un abngey, ma un gafgow nag, machane dariy banʼen ni yoeg; nni fek ni boed e saaf iyaen nga tafen e maliiʼ gamanman, ni boed ba saaf nib maʼay u pʼoewchen e chaʼ ni ma puy bunuʼen e gamanman ma dariy banʼen ni yoeg.
8 Ire ni chuweg u kalbus ma dan piiʼ matʼawon nga rogon yalen e pufthin; ma miniiʼ e piʼin ni yaedra yoeg ni yaed e bitir rokʼ? Ya ni liiʼ ngemʼ nge chuw u fayleng; ya pi ngongol ni kireb ko gidiiʼ rog e ni gafgow nag riy.
9 I un ngakʼ e gidiiʼ nib denen ngar mʼaed, min kʼeyag nga tafen e gumʼeyag ko falaʼab; ni bachan e dariy banʼen nib kireb ni rinʼ, ara yoeg banʼen nib baen.
10 Machane mʼagaenʼ fare Somoel ngay ni ngan madʼad ngakʼ; ke pag ni nge thamiy amthune kirbaenʼ nge gafgow; napʼan i gur Somoel e bay mu dugliy ni ir ba maligach ni fan ko denen ma bayi guy e gidiiʼ rokʼ, ma bayi muguʼuliy e muruwel rokʼ u napʼan e pi rran rokʼ, ma falfalaenʼ rokʼ fare Somoel e bayi monʼog u paʼ.
11 Ra guy e gafgow nra tay, ma ra felʼ u waenʼ e maligach ni tay; u dakean e llowaenʼ rokʼ ma tapigpig rokʼ nib matʼaw e ra thapeg e gidiiʼ nib yoʼor; ya bayi fek malngin e denen ko gidiiʼ.
12 Ere bay gu piiʼ bang ko tawaʼath rog ngakʼ e chaʼ nib gilbugwan, ma bayi piiʼ boech fare chugum ngakʼ e piʼin nib yargael; ni bachan e ke piiʼ ir kan liiʼ ngemʼ; ma ni uneg ko mathaʼeg nga fithikʼ e pi tadenen; me fek malngin e denen rokʼ e gidiiʼ nib yoʼor, me bayul nag e pi tadenen.