1 Ere chiney e Abinadi e gaʼar ngoraed: Gu baʼadag ni ngam nanged fan ni Got e ire ra yib nga butʼ nga fithikʼ e gidiiʼ, me bayuliy e gidiiʼ rokʼ.

2 Ma bachan e ra yib i paer ni bay doewngin ere bay ni pining ni fare Tir ni Fak Got, ere bay doewngin ni boed ni lemnag fachaʼ ni Chitamangiy, ere ir fare Chitamangiy nge fare Fak—

3 Fare Chitamangiy, ni bachan e ire sum nga mayal u dakean fare gelingin ku Got; ma fare Fak, ni bachan fare dowef; ere aray rogon ni mang fare Chitamangiy nge Fak—

4 Ma yow taʼab Got, arragon, ri fare Chitamangiy ni Gubinfen nu tharmiy ngu fayleng.

5 Ere aray rogon ni fare dowef e aw nga tane gagyeg ko fare Kan ni Thothup, ara fare Fak ko fare Chitamangiy, ni yaed taʼab Got, ni ra gafgow ko lumel, ma de pag ir nga paʼ e lumel, machane pag nga un kuʼ nag, ma yibe gafgow nag, ma gidiiʼ rokʼ e ra keruʼuyed mar feked yathin.

6 Ma tomuren gubin e pinnʼey, u tomuren ni ke rinʼ e maʼangʼang nib yoʼor u fithikʼ fapi gidiiʼ, ma bay ni powiʼiy, arragon, ni ri boed ni yoeg Isaiah, ni boed rogon ba saaf nib maʼay u pʼoewchen e chaʼ ni ma puy bunuʼen e gamanman ere dariy banʼen ni yoeg.

7 Arragon, ni bay ni powiʼiy, min kuruth nag, min liiʼ nge yimʼ, ma fare dowef e bayi munguy nga paʼ e yamʼ, ma laniyaenʼ fachaʼ ni Fak e ra mʼing nga laniyaenʼ fachaʼ ni Chitamangiy.

8 Ma aray rogon ni Got e ra chuwegey ko yamʼ, ni bachan e ire yog ni chuweg ir ko yamʼ; make piiʼ ngakʼ fachaʼ ni Fak e gelingin ni nge ngongoliy e bayul ni fan ko gidiiʼ—

9 Me yaen nga tharmiy, mab sug ko wurengaenʼ, mab sug ko murnguy ngakʼ e gidiiʼ; make sakʼiy nga thilraed e justice; ma ra chuwegey ko yamʼ, ni fek nga dakean e denen roraed nge pi ngongol roraed nib kireb, me bayuliyraed, me ayliy e pi yalen e justice.

10 Ere chiney e gube yoeg ngomed, miniiʼ e piʼin ni yaedra yoeg ni yaed e mfen rokʼ? Musap gaed, gube yoeg ngomed, u napʼan ni ra piiʼ ir ni maligach ni fan ko denen ma ra guy e gidiiʼ rokʼ. Ere chiney mang e kamoeged? Nge miniiʼ e pichaʼ ni ra mang gidiiʼ rokʼ?

11 Musap gaed gube yoeg ngomed, ni enra rungʼag me fol ko thin rokʼ fapi profet, arragon, gubin fapi profet ni kar prophesy gaed ni morngaʼagen fare wub rokʼ fare Somoel—Gube yoeg ngomed, ni piʼin ra fol ko thin roraed, me michaenʼraed ni fare Somoel e ra bayuliy e gidiiʼ rokʼ, ma yaed be soen nag e re rran nem ni ngan nʼaegfan e pi denen roraed, gube yoeg ngomed, ni ireray e pichaʼ ni gidiiʼ rokʼ, ara yaedra tafnaʼ fare gilʼilungun Got.

12 Ya ireray e pichaʼ ni denen roraed e kefek nga dakean; ireray e pichaʼ ni ke yimʼ ni fan ngoraed, ni nge bayuliyraed ko pi ngongol roraed nib kireb. Ere chiney, gathi yaed e gidiiʼ rokʼ?

13 Arragon, ma gathi yaed fapi profet, ni yaed gubin ma kar prophesy gaed, ni dawor ra mul gaed nga fithikʼ e ngongol ni kireb, gube yipʼ fan ngakʼ gubin e pi profet nib thothup ni kaʼaram ni tabab e fayleng? Gube yoeg ngomed ni yaed e gidiiʼ rokʼ.

14 Ma ireray e pichaʼ ni kar yog niged e gapas, nge pichaʼ ni kar feked iyib e pi thin ko felʼ nib mangil, nge pichaʼ ni kar weliyed morngaʼagen e thap; mar gaʼar gaed ngakʼ Zion: Got romed e suwon e lung!

15 Ma rib felʼ usun u dakean e pi burey, rifrifanʼayraed!

16 Nge ku bayay, rib felʼ usun u dakean e pi burey, rifrifanʼay e piʼin ni ku yaed be aw nag e gapas!

17 Nge ku bayay, rib felʼ usun u dakean e pi burey, rifrifanʼay e piʼin ku yaed be aw nag e gapas nga tomuren e ngiyalʼ ney, arragon, ko ngiyalʼ ney iyaen e ngaram ma dariy nʼumngin i napʼan.

18 Ere musap gaed, gube yoeg ngomed, gathi kemus aray. Ya rib felʼ usun u dakean e pi burey, rifrifanʼay fachaʼ nra yib nag e thin nib felʼ, niʼir e ma piiʼ e gapas, arragon, ni fare Somoel, niʼir e ke bayuliy e gidiiʼ rokʼ; arragon, niʼir e ke thapeg e gidiiʼ rokʼ;

19 Ya faʼan manga boech ni dariy e bayul ni falʼeg ni fan ko gidiiʼ rokʼ, niʼir e ni tanmeg aram ko sommʼon ni sunmiy e fayleng, gube yoeg ngomed, faʼan manga boech ni gathi arragon, ma gubin e gidiiʼ ma ra mathmit.

20 Machane musap gaed, fare wolan e yamʼ e ra mathʼ nge chuw, ma fachaʼ ni Fak e ra suwey e lung, me thang wolbuwen e yamʼ; ere, ke yognag e foskoyamʼ ko pi yamʼ.

21 Ma arame yib e foskoyamʼ, niʼir e bin mʼon e foskoyamʼ; arragon, ni ba foskoyamʼ ko piʼin ni ke yimʼ, nge piʼin be yimʼ, nge piʼin ni bay yimʼ, ni aram iyaen nge madaʼ ko ngiyalʼ nra fos Kristus ko yamʼ—ya aray rogon fithingan ni yira pining.

22 Ere chiney, fare foskoyamʼ ko gubin fapi profet, nge gubin e piʼin ni ke michaenʼ ko thin roraed, ara gubin e piʼin ni kar fol gaed ko fapi motochiyel rokʼ Got, e yaedra un ko bin sommʼon e foskoyamʼ; ere, yaed e tin sommʼon e foskoyamʼ.

23 Yaed e kan fasegraed ni ngar pired rokʼ Got niʼir e ke bayuliyraed; ere aray rogon ni yog e yafos ni gubinfen ngoraed u dakean Kristus, niʼir e thʼaeb wolan e yamʼ.

24 Ma ireray e piʼin ni yaed ba un ko bin sommʼon e foskoyamʼ; ma ireray e pichaʼ ni kar mʼaed u mʼon ni nge yib Kristus, u fithikʼ e minaenʼ roraed, ma dan weliy morngaʼagen fare thap ngoraed. Ere aray rogon ni fare Somoel e yib nag fare sulyarmen ko pichaʼ ney; ma yaed ba un ko fabin sommʼon e foskoyamʼ, ara rayog ngoraed e yafos ni gubinfen, ni bachan e ke bayuliy raed fare Somoel.

25 Nge piʼin bitir e ku rayog e yafos ni gubinfen ngoraed.

26 Machane musap gaed, ngam rus gaed mi gimed tʼon u pʼoewchen Got, ya thingar mu tʼon gaed; ya fare Somoel e dabi bayuliy e re miti gidiiʼ ni ma togopluw ngakʼ mar mʼaed nga fithikʼ e pi denen roraed; arragon, ni mus ngakʼ gubin e piʼin ni kar mʼaed nga fithikʼ e pi denen roraed aram ko sommʼon ni tabab e fayleng, nra lemniged ni ngar togopluw gaed ngakʼ Got, ni piʼin ni yaed manang fapi motochiyel rokʼ Got, ma dabra fol gaed riy; ere ireray e piʼin ni dabra uned ko bin sommʼon e foskoyamʼ.

27 Ere damur lemniged ni thingar mu tʼon gaed ni murus? Ya woʼen e thap e dabiyog ni yog ngakʼ e mitnir e gidiiʼ; ya fare Somoel e de bayuliy e mitnir e gidiiʼ; arragon, ara rayog ni nge bayuliy Somoel e mitnir e gidiiʼ; ya dabiyog ni nge fek yathin ir, ya dabiyog ni nge siyeg e justice ni aram rogon ni bay e gechig riy.

28 Ere chiney e gube yoeg ngomed ni fare ngiyalʼ innʼem e bay yib, ni fare woʼen e thap rokʼ Somoel e bay noeg ngakʼ gubin e pi nam, mfen, thin nge gidiiʼ.

29 Arragon, Somoel, matanag rom e yaedra non nib gaaʼ lamraed; ni bay ur tang gaed u taʼabang; ya yaedra guy nga oewchraed, u napʼan ni fare Somoel e bay yib nag bayay fare Zion.

30 Ma bay ra tolul gaed u fithikʼ e falfalaenʼ, ma yaed be tang u taʼabang ni yaed ba gaʼar, gimed e pi yungi nʼen nu Jerusalem ni kan gatheaymed; ya fare Somoel e ke falʼeg laniyaenʼ e gidiiʼ rokʼ, ma ke bayuliy yu Jerusalem.

31 Fare Somoel e ke dag falʼngin i paʼ nib thothup u mit gubin e pi nam, nge gubin e gidiiʼ ko tin tomur e rran e yaedra guy fare woʼen e thap rokʼ fare Got rodaed.