1 ’E i teienei, ’ua parau atu Abinadi ia rātou : ’Ua hina’aro vau ’ia ’ite ’outou ē, e haere mai te Atua iho i raro nei i rotopū i te mau tamari’i a te ta’ata nei, ’e e fa’aora ’oia i tōna ra mau ta’ata.

2 ’E nō tōna pārahira’a i roto i te tino nei, e parauhia ai ’oia te Tamaiti a te Atua, ’e ’ua auraro ’oia i te tino nei i te hina’aro o te Metua ; ’e ’ua riro ’oia te Metua ’e te Tamaiti ato’a ho’i—

3 Te Metua, nō te mea ’ua tōhia ’oia e te mana o te Atua ; ’e te Tamaiti, nō te tino ’i’o ; e mea nā reira ’oia i te rirora’a ’ei Metua ’e ’ei Tamaiti—

4 ’E ’ua riro rāua ’ei hō’ē ā Atua, ’oia ïa, te Metua mure ’ore mau nō te ra’i ’e te fenua.

5 ’E nō reira ’ua auraro te tino i te Vārua, ’oia ho’i te Tamaiti i te Metua, e hō’ē ā ïa Atua, ’e e ro’ohia ’oia i te fa’ahema, ’e ’aita roa ’oia e auraro i te fa’ahema, e vaiiho rā ’oia iāna iho ’ia tāhitohitohia, ’e ’ia papa’ihia, ’e ’ia ti’avaruhia i rāpae, ’e ’ia hunahia e tōna ihora mau ta’ata.

6 ’E ’ia hope ana’e te reira, ’e i muri a’e ho’i i te ravera’a i te mau semeio mana e rave rahi i rotopū i te mau tamari’i a te ta’ata nei, e arata’ihia ’oia, ’oia ïa, mai tā Isaia i parau mai ra, mai te māmoe e māmū i mua i te aro o te feiā e paoti i tōna huruhuru, ’aita rā tōna vaha i hāmama noa atu.

7 ’Oia ïa, e nā reira ’oia i te arata’ihia, ’e i te fa’asātaurohia, ’e i te taparahihia, i auraro ho’i te tino ē tae noa atu i te pohe, ’e ’ua horomi’ihia te hina’aro o te Tamaiti i te hina’aro o te Metua.

8 ’E e nā reira te Atua i te ha’amotu i te mau tā’amu nō te pohe, i roa’a ho’i iāna te rē i te pohe ; ’e ’ua roa’a tō te Tamaiti mana ’ia ti’a iāna ’ia riro ’ei ārai nō te mau tamari’i a te ta’ata nei—

9 ’Ua haere ’oia i ni’a i te ra’i ; ’e tei roto iāna te aroha ; ’ua ’ī ’oia i te aroha i te mau tamari’i a te ta’ata nei ; tē ti’a ra ’oia i rōpū ia rātou ’e te parauti’a ; ’ua motu iāna te mau tā’amu nō te pohe ; ’ua rave i ni’a iāna iho i tā rātou mau ’ohipa ’ī’ino ’e tā rātou mau hara, ’e ’ua fa’aora ia rātou ’e ’ua ha’amāha i te tītaura’a a te parauti’a.

10 ’E i teienei, tē parau atu nei au ia ’outou, nā vai e paraparau mai nō ni’a i tōna u’i ? Inaha, tē parau atu nei au ia ’outou, ’ia fa’arirohia ra ’oia ’ei tāra’ehara, e ’ite ’oia i tōna hua’ai. ’E i teienei, e aha tā ’outou e parau mai ? ’E ’o vai tē riro ’ei hua’ai nōna ?

11 Inaha, tē parau atu nei au ia ’outou, ’o tei fa’aro’o i te mau parau tā te mau peropheta, ’oia ïa, tā te mau peropheta ato’a i tohu mai nō ni’a i te taera’a mai o te Fatu—tē parau atu nei au ia ’outou, ’o te ta’ata ato’a i fa’aro’o i tā rātou ra mau parau, ’e tei ti’aturi ē, e fa’aora te Fatu i tōna ra mau ta’ata, ’e tei hi’o i mua i taua mahana ra nō te ha’amatarara’a i tā rātou ra mau hara, tē parau atu nei au ia ’outou ē, ’o tōna hua’ai ïa teie, ’oia ho’i, e feiā ’āi’a rātou i te bāsileia o te Atua.

12 ’O te feiā ïa nā rātou te mau hara tāna i amo ; ’o te feiā ïa nō rātou i pohe ai ’oia, nō te fa’aora ia rātou i tā rātou mau hara. ’E i teienei, e ’ere ānei rātou i te hua’ai nōna ?

13 ’Oia ïa, e ’ere ānei te mau peropheta ato’a ; rātou tāta’itahi tei hāmama i tō rātou vaha nō te tohu, ’o tei ’ore i ’ōfati i te ture ; ’oia ho’i te mau peropheta mo’a ato’a mai te ha’amatara’a mai ā o te ao nei ? Tē parau atu nei au ia ’outou na ē, ’o tōna hua’ai ïa rātou.

14 ’O te feiā ïa teie ’o tei fa’a’ite mai i te parau hau, ’o tei hōpoi mai i te mau parau maita’i nō te maita’i, ’o tei fa’a’ite mai i te parau nō te fa’aorara’a ; ’e ’o tei parau mai ia Ziona : Tē fa’atere ari’i nei tō ’oe Atua !

15 ’E ’auē te nehenehe o tō rātou ’āvae i ni’a i te mau mou’a !

16 ’E teie fa’ahou, ’auē te nehenehe i ni’a i te mau mou’a te ’āvae o te feiā e fa’a’ite nei i te hau !

17 ’E teie fa’ahou, ’auē te nehenehe i ni’a i te mau mou’a te ’āvae o te feiā e fa’a’ite nei i te hau a muri nei, ’oia ïa, mai teie nei atu taime ē a muri noa atu !

18 ’E inaha, tē parau atu nei au ia ’outou, e’ita te reira ana’e. ’E ’auē ho’i te nehenehe i ni’a i te mau mou’a te ’āvae nōna ’o tei hōpoi mai i te mau parau maita’i, ’oia ho’i tei fa’ati’a i te hau, ’oia ïa, ’o te Fatu, ’o tei fa’aora i tōna ra mau ta’ata ; ’oia ïa, ’oia ’o tei hōro’a mai i te fa’aorara’a i tōna ra mau ta’ata.

19 ’E ’āhiri ho’i ’aita te fa’aorara’a o tāna i rave nō tōna mau ta’ata, ’o tei fa’aineinehia mai te ha’amatara’a mai ā o te ao nei, tē parau atu nei au ia ’outou, ’āhiri ’aita teie, ’ua ha’amouhia te mau ta’ata ato’a.

20 Inaha rā, e motu te mau tā’amu nō te pohe, ’e e fa’atere ari’i te Tamaiti, ’e tei iāna te mana i ni’a a’e i te feiā pohe ; nō reira, e fa’atupu ’oia i te ti’afa’ahoura’a o te feiā pohe.

21 ’E tē vai atu ra te hō’ē ti’afa’ahoura’a, ’oia ho’i te ti’afa’ahoura’a mātāmua ; ’oia ïa, te ti’afa’ahoura’a o te feiā ’o tei vai na, ’o tē vai nei, ’e ’o tē vai ra, ē tae roa atu ho’i i te ti’afa’ahoura’a o te Mesia—e nā reira ho’i ’oia i te parauhia.

22 ’E i teienei, te ti’afa’ahoura’a o te mau peropheta ato’a, e rātou ato’a tei ti’aturi i tā rātou mau parau, ’oia ho’i rātou ato’a tei ha’apa’o i te mau fa’auera’a a te Atua, e ti’afa’ahou mai ïa rātou i ni’a i te ti’afa’ahoura’a mātāmua ; nō reira, ’o tē ti’afa’ahoura’a mātāmua ïa rātou.

23 E fa’ati’ahia mai rātou i ni’a nō te pārahi i pīha’i iho i te Atua ’o tei fa’aora mai ia rātou ; nō reira e noa’a ia rātou te ora mure ’ore nā roto i te Mesia, ’o tei hahae i te mau tā’amu nō te pohe.

24 ’E ’o te feiā teie tei ia rātou te ti’afa’ahoura’a mātāmua ; ’e ’o rātou teie ’o tei pohe i roto i tō rātou pōiri, hou te taera’a mai o te Mesia, ’e ’aita te fa’aorara’a i fa’a’itehia mai ia rātou. ’E e nā reira te Fatu i te fa’atupu i te rāve’a nō te fa’aora ia rātou ; ’e e ti’a mai rātou i te ti’afa’ahoura’a mātāmua, ’oia ho’i e noa’a ia rātou te ora mure ’ore, ma te fa’aorahia e te Fatu.

25 ’E e fāri’i ato’a te mau tamari’i ri’i i te ora mure ’ore.

26 Hi’o rā, ’e ’a mata’u, ’e ’a rurutaina i mua i te Atua ; ’ia rurutaina ho’i ’outou e ti’a ai ; ’e e ’ore ho’i te Fatu e fa’aora ia rātou i tei mārō atu iāna ’e tei pohe i roto i tā rātou mau hara ; ’oia ïa, ’o rātou ato’a tei pohe i roto i tā rātou mau hara mai te ha’amatara’a mai ā o te ao nei, tei ’aro atu i te Atua ma te hina’aro mau ; rātou ato’a tei ’ite i te mau fa’auera’a a te Atua, ’aita rā rātou i ha’apa’o i te reira ; e ’ore roa rātou e ti’afa’ahou mai i te ti’afa’ahoura’a mātāmua.

27 Nō reira, e ’ere ānei i te mea au ’ia rurutaina ’outou ? E ’ore ho’i te fa’aorara’a e tae ia rātou mai te reira te huru ; e ’ore ho’i te Fatu e fa’aora i te ta’ata mai te reira te huru ; ’oia ïa, e ’ore ho’i e ti’a i te Fatu ’ia fa’aora ia rātou ; e ’ore ho’i e ti’a iāna ’ia huna iāna iho ; e ’ore ho’i e ti’a iāna ’ia fa’a’ere i tā te parauti’a ’ia ti’a tāna tītaura’a.

28 ’E i teienei tē parau atu nei au ia ’outou, tē vai ra te taime e fa’a’itehia ai te fa’aorara’a a te Fatu i tō te mau nūna’a ato’a, ’e tō te mau ’ōpū ato’a, ’e tō te mau reo ato’a, ’e i te mau ta’ata ato’a.

29 ’Oia ïa, e te Fatu, e fa’ateitei tō ’oe mau fa’ehau i tō rātou reo ; ’e e ’āmui tāhō’ē tō rātou reo i te hīmenera’a ; ’e e ’ite rātou te mata ’e te mata ’ia fa’aho’i mai te Fatu ia Ziona.

30 ’Ia puroro noa atu te ’oa’oa, ’a hīmene ’āmui, e te mau vāhi pararī nō Ierusalema ; ’ua ha’amāhanahana ho’i te Fatu i tōna mau ta’ata ; ’e ’ua fa’aora ’oia ia Ierusalema.

31 ’Ua fa’a’ite mai ho’i te Fatu i tōna rima mo’a i mua i te mata o te mau nūna’a ato’a ; ’e e ’ite tō te mau hope’a ato’a o te fenua nei i te fa’aorara’a a tō tātou Atua.