1 Na sasa, ikawa kwamba baada ya Abinadi kuzungumza maneno haya alinyosha mkono wake na kusema: Wakati utakuja ambapo wote wataona wokovu wa Bwana; wakati kila taifa, kabila, lugha, na watu wataona ana kwa ana na kutubu kwa Mungu kwamba hukumu zake ni za haki.

2 Na kisha waovu watatupwa nje, na watakuwa na sababu ya kupiga makelele, na kulia, na kuomboleza, na kusaga meno yao; na haya ni kwa sababu hawakutii sauti ya Bwana; kwa hivyo Bwana hatawakomboi.

3 Kwani wana tamaa na uibilisi, na ibilisi ana uwezo juu yao; ndiyo, hata yule nyoka wa kale aliyewadanganya wazazi wetu wa kwanza, ambayo ilikuwa ni sababu ya kuanguka kwao; ambayo ni sababu ya wanadamu wote kuwa na tamaa, tamaa za kimwili, uibilisi, kujua uovu na wema, na kujitolea kwa ibilisi.

4 Hivyo wanadamu wote walipotea; na tazama, wangekuwa wamepotea daima kama sio kwamba Mungu aliwakomboa watu wake kutoka hali yao ya upotevu.

5 Lakini kumbuka kwamba yule anayeendelea na kufuata hali yake ya tamaa, na kuendelea katika njia za dhambi na kumuasi Mungu, hubaki katika hali yake ya kuanguka na ibilisi ana uwezo wote juu yake. Kwa hivyo kwake yeye ni kama ukombozi haukufanywa, akiwa adui kwa Mungu; na pia ibilisi ni adui wa Mungu.

6 Na sasa kama Kristo hangekuja ulimwenguni, akizungumza kuhusu vitu vitakavyokuja kama tayari vimeshakuja, hakungekuwa na ukombozi.

7 Na kama Kristo hangefufuka kutoka kwa wafu, au kuvunja kamba za kifo kwamba kaburi lisiwe na ushindi, na kwamba kifo kisiwe na uchungu, hakungekuwa na ufufuo.

8 Lakini kuna ufufuo, kwa hivyo kaburi halina ushindi, na uchungu wa kifo umemezwa katika Kristo.

9 Yeye ni nuru na uzima wa ulimwengu; ndiyo, nuru isiyo na mwisho, ambayo haiwezi kuwekwa giza; ndiyo, na pia uzima usio na mwisho, kwamba hakutakuwa tena na kifo.

10 Hata huu mwili wenye kufa utajivika kutokufa, na hii iharibikayo itavaa isiyoharibika, na italetwa kusimama mbele ya kiti cha hukumu cha Mungu, kuhukumiwa na yeye kulingana na matendo yao kama ni mema au kama ni maovu—

11 Kama ni wema, watafufuliwa katika maisha na furaha isiyo na mwisho; na kama ni waovu, watafufuliwa katika laana ya milele, na kuwekwa kwa ibilisi, ambaye amewatawala, ambayo ni laana—

12 Kwa vile walienda kulingana na nia zao za tamaa na tamaa za kimwili; wakiwa wamekosa kumlingana Bwana waliponyoshewa mikono ya rehema; kwani walinyoshewa mikono ya rehema, na hawakukubali; wao wakiwa wameonywa kuhusu uovu wao lakini hawakuuacha; na waliamriwa watubu lakini hawakutubu.

13 Na sasa, haiwapasi ninyi kutetemeka na kutubu dhambi zenu, na kukumbuka kwamba ni kwa na katika Kristo pekee mnakoweza kuokolewa?

14 Kwa hivyo, kama mnafundisha sheria ya Musa, fundisheni pia kwamba ni kivuli cha vile vitu vitakavyokuja—

15 Wafundishe kwamba ukombozi huja kwa Kristo aliye Bwana, ambaye ni Baba kamili hasa wa Milele. Amina.