1 Ere chiney e yibi buch u napʼan ni ke muʼ Abinadi i yoeg e pi thin ney, ma fare pilung e yoeg ngakʼ fapi priest ni ngar koeled ngar feked ngar liiʼed nge yimʼ.

2 Machane immoy bagyaed u fithikʼraed ni fithingan e Alma, ku ir rebe gidiiʼ rokʼ Nephi. Ma beeʼ ni kab pagael, ma i michaenʼ ko fapi thin ni weliy Abinadi, ya manang morngaʼagen fare denen ni Abinadi e ke yoeg nib togopluw ngoraed; ere i wenig ngakʼ fare pilung ni nge dab ki puwaenʼ ngakʼ Abinadi, ma nge pag nge yaen u fithikʼ e gapas.

3 Machane fare pilung e rigel e damomuw rokʼ, me yoeg ni Alma e ngan fek ngan chuweg u fithikʼraed, me lʼoeg e pi tapigpig rokʼ ngakʼ ni ngar liiʼed nge yimʼ.

4 Machane me miil roraed nge yaeni miith ma dar pirʼeged. Ma napʼan ni be miith nib yoʼor e rran me yoloey gubin fapi thin ni weliy Abinadi.

5 Me yibi buch ni fare pilung e yoeg ni pi matanag rokʼ e ngar longbiyed Abinadi ngar feked; mar mʼaged ngar tayed nga kalbus.

6 Ma tomuren dalip e rran riy, ni kar muʼ gaed fapi priest rokʼ ko puruyʼ, me yoeg ni ngan fek bayay iyib nga pʼoewchen.

7 Me gaʼar ngakʼ: Abinadi, kug pirʼeged banʼen nib buch e roem riy, ere gur e bafelʼ ni nga mumʼ.

8 Ya gur e kamoeg ni Got e ra yib nga butʼ nga fithikʼ e gidiiʼ; ere chiney, e aray fan ni gur e ngan liiʼem nga mumʼ ma kemus ni faʼan gara thilyeg fapi thin ni kamoeg nib kireb ni morngaʼageg nge gidiiʼ rog.

9 Ere gaʼar Abinadi ngakʼ: Gube yoeg ngom, dabgu thilyeg fapi thin ni kug weliy ngom ni morngaʼagen e pi gidiiʼ ney, ya bogi thin nib riyulʼ; ma rogon me yog ni ngam nang fini riyulʼ e arfan ni kug pageg nga lani paʼam.

10 Arragon, ma gura pageg nge madaʼ ko ngiyalʼ ni kugumʼ, ma dabgu thilyeg fapi thin rog, ma bay ra pired ni ngar manged mich nib togopluw ngom. Ma faʼan gara liiʼeg nggumʼ ma gara puʼoeg e rachaʼ ni dariy tapgin, nge biney e kura paer ni mich nib togopluw ngom ko bin tomur e rran.

11 Ere chiney e fare pilung i Noah e ri chugur ni nge pag nge yaen, ya ke rus ko thin rokʼ; ya ke rus ni ra gechig nag Got.

12 Machane fapi priest e ra nonaed nib gaaʼ lamraed nib togopluw ngakʼ, mar tabab gaed i dugliy e kireb nga dakean, ni yaed be gaʼar: Ke kireb nag thiin fare pilung. Ere fare pilung e ra kʼarnged nge damomuw ngakʼ, me pag ni ngan liiʼ nge yimʼ.

13 Me yibi buch nra feked ngar mʼaged, muʼur toeyed ngakʼ yuthum i papaʼngin e gakʼiy ni kan mʼag nga taʼabang, arragon, ni aram rogon nge madaʼ ko ngiyalʼ ni nge yimʼ.

14 Ma ngiyalʼ ney u napʼan ni arame be yikʼ ko dramrom, me non ngoraed u fithikʼ e amith nib gaaʼ laman, nibe gaʼar:

15 Musap gaed, rogon ni kam rinʼed ngog, e bay yibi buch ni pifakmed e bayra guyed rogon ni nge yoʼor e gidiiʼ ni nge gafgow ko amith ni boed ni kug gafgow riy, ni boed rogon e pi amithngin e yamʼ u fithikʼ e nifiy; ma fan ni aray rogon e bachan e rib michaenʼraed ko fare woʼen e thap rokʼ Somoel ni Got roraed.

16 Ma bay yibi buch ni gimed ra gafgow ni amith ko gubin mite mʼar ni bachan e pi denen romed.

17 Arragon, ma bay ni gafgow nagmed u gubin yang, ma bay ni tulufmed ngam garar gaed iyaen nga mʼon nge sul nga tomur, ni boed rogon ba saaf ni tuluf e gamanman nib malboch mab tacham.

18 Ma langgin e re rran nem e bay un gaymed, ma yira koelmed nge fekmed e pi toʼogor romed, ma arame bay mu gafgow gaed, ni boed rogon e gafgow ni kug tay, ni amithngin e yamʼ u fithikʼ e nifiy.

19 Aray rogon ni Got e ra sulweg labgen ngakʼ e piʼin ni ma liiʼ e gidiiʼ rokʼ. O Got, mu fek e yaʼel rog.

20 Ere ngiyalʼ ney, u napʼan ni Abinadi e ke yoeg e pi thin ney, me munguy ni ke awe fan rokʼ, ni ke yimʼ ko nifiy; arragon, ni kan liiʼ ngemʼ ni bachan e dabi fek yathin fapi motochiyel rokʼ Got, ere ke micheg e thin rokʼ ko yamʼ ni tay.