1 ’E i teienei, i muri a’era, ’ia fa’aoti a’era Abinadi i teie nei mau parau, ’ua fa’aue atu ra te ari’i i te mau tahu’a ’ia hōpoi ’ē atu iāna ’e ’ia taparahi ha’apohe iāna.

2 Tē pārahi ra rā te tahi i rotopū ia rātou ’o Alama tōna i’oa, ’e e hua’ai ato’a ho’i ’oia nō Nephi. ’E e ta’ata ’āpī ’oia, ’e ’ua ti’aturi ’oia i te mau parau tā Abinadi i parau, ’e ’ua ’ite ato’a ho’i ’oia i te mau ’ohipa ’ī’ino ’o tā Abinadi i parau ra nō ni’a ia rātou ; nō reira ’ua ha’amata ’oia i te tāparu atu i te ari’i ’eiaha ’oia e riri ia Abinadi, ’ia tu’u atu rā iāna ’ia haere ma te hau.

3 ’Āre’a rā ’ua rahi roa atu tō te ari’i riri, ’e ’ua fa’aue atu ra ’oia ia ti’avaruhia Alama i rāpae mai rotopū atu ia rātou ra, ’e ’ua tono atu ’oia i tōna mau tāvini ia ’au’au ’e ’ia taparahi iāna.

4 ’Āre’a rā ’ua horo ’ē atu ra ’oia mai mua atu ia rātou, ’e tāpuni ihora, ’e ’aita ’oia i ’itea ia rātou. ’E ’a tāpuni ai ’oia e rave rahi mahana, ’ua pāpa’i ’oia i te mau parau ato’a tā Abinadi i parau.

5 ’E i muri a’era, ’ua fa’aue atu ra te ari’i ia ha’a’ati tōna mau tīa’i fa’ehau ia Abinadi ’e ’ia haru mai iāna ; ’e ’ua ru’uru’u ihora rātou iāna ’e ’ua huri atu ra iāna i roto i te fare tāpe’ara’a.

6 ’E ’ia ma’iri e toru mahana nō tōna ’āpo’ora’a ’e tōna mau tahu’a, ’ua fa’aue atu ra ’oia ’ia hōpoi-fa’ahou-hia mai ’oia i mua iāna.

7 ’E ’ua parau atu ra ’oia iāna : E Abinadi, ’ua ’ite mātou i te tahi fa’ahapara’a ia ’oe, ’e ’ua tano roa ho’i ia ’oe te pohe.

8 I parau na ho’i ’oe ē, e tae mai te Atua iho i rotopū i te mau tamari’i a te ta’ata nei ; e i teienei, nō te reira e taparahihia ’oe, maori rā ’ia fa’a’ore ’oe i te mau parau ’ino tā ’oe i parau mai nō ni’a iā’u ’e i tō’u ra mau ta’ata.

9 I teienei ’ua parau mai ra Abinadi iāna : Tē parau atu nei au ia ’oe na, e’ita roa vau e fa’a’ore i te mau parau tā’u i parau atu ia ’oe na nō ni’a i teie nei feiā, nō te mea e parau mau roa te reira ; ’e ’ia ’ite ’oe ē, e parau mau ïa, ’ua fa’ati’a ïa vau iā’u iho ’ia ma’iri i roto i tō rima na.

10 ’Oia ïa, e fa’a’oroma’i au ē tae noa atu i te pohera’a, e ’ore roa rā vau e fa’a’ore i tā’u ra mau parau, ’e e riro ho’i te reira ’ei fa’a’itera’a pāpū ia ’oe na. ’E ’ia taparahi mai ’outou iā’u nei, ’ua ha’amani’i ïa ’outou i te toto o te ta’ata hara ’ore, ’e e riro ato’a te reira ’ei fa’a’itera’a pāpū ia ’outou i te mahana hope’a ra.

11 ’E i teienei ’ua fātata roa te ari’i ra ’o Noa i te tu’u atu iāna, nō te mea ’ua mata’u ’oia i tāna ra parau ; ’e ’ua mata’u ho’i ’oia ’o te tae mai te mau ha’avāra’a a te Atua i ni’a iho iāna.

12 ’Āre’a rā ’ua fa’ateitei ihora te mau tahu’a i tō rātou reo nō te fa’ahapa iāna, ’e ’ua ha’amata ihora i te pari iāna, i te nā-’ō-ra’a mai ē : ’Ua fa’a’ino ’oia i te ari’i. Nō reira ’ua tupu ihora te riri o te ari’i iāna ra, ’e ’ua tu’u atu ra ’oia iāna ’ia taparahihia.

13 ’E i muri a’era, ’ua rave ihora rātou iāna, ’e ’ua ha’amāuiui ihora i tōna ’iri i te mau vahie ’ama, ’oia ïa ē tae noa atu i te pohera’a.

14 ’E ’ia pa’apa’a a’era ’oia i te auahi, ’ua ti’aoro atu ra ’oia ia rātou, nā ’ō atu ra :

15 Inaha, mai tā ’outou e rave mai iā’u nei, e nā reira ato’a tō ’outou hua’ai i te hāmani ’ino i te mau ta’ata e rave rahi, ’oia ho’i nā roto i te māuiui pohe i te auahi ; e nā-reira-hia rātou nō te mea ’ua ti’aturi rātou i te fa’aorara’a a te Fatu tō rātou Atua.

16 ’E a muri a’era, e riro ato’a ’outou i te ha’amāuiuihia i te mau huru ma’i ato’a nō tā ’outou mau ’ohipa ’ī’ino.

17 ’Oia ïa, e tā’irihia ’outou i terā rima ’e i terā rima, ’e e ti’avaruhia ’outou ’e e ha’apurarahia ho’i i terā vāhi ’e i terā vāhi, mai te nana māmoe ’ōviri e ha’apurarahia e te mau ’ānimara ’ōviri ’e te taehae ra.

18 ’E i taua mahana ra e a’ua’uhia ’outou, ’e e haruhia e te rima o tō ’outou mau ’enemi, ’e i reira ’outou e ha’amāuiuihia ai i te māuiui pohe i te auahi, mai iā’u ho’i e ha’āmuiuihia nei.

19 E nā reira ho’i te Atua i te fa’atae mai i te tāho’o i ni’a i te mau ta’ata ’o tē ha’amou i tōna ra mau ta’ata. E te Atua, ’a fāri’i mai na i tō’u nei vārua.

20 ’E i teienei, ’ia oti a’era tā Abinadi paraura’a i teie nei mau parau, ’ua ma’iri ihora ’oia i raro, ’ua pohe roa ho’i ’oia i te auahi ; ’oia ïa, ’ua taparahihia ’oia nō te mea ’aita ’oia i huna i te mau fa’auera’a a te Atua, ’e ’ua riro tōna pohe ’ei tāpa’o fa’a’ite pāpū i te parau mau nō tāna ra mau parau.