1 ’E i teienei, i muri a’era, ’ua tātarahapa ihora Alama, ’o tei horo nā mua atu i te mau tāvini o te ari’i ra o Noa, i tāna mau hara e tāna mau ’ohipa ’ī’ino, ’e ’ua haere huna atu ra ’oia i rotopū i te mau ta’ata, ’e ’ua ha’amata ihora i te ha’api’i i te mau parau a Abinadi—

2 ’Oia ïa, i te mau mea e tupu a muri atu, ’e te ti’afa’ahoura’a o te feiā pohe ra, ’e te fa’aorara’a o te mau ta’ata, ’o tei fa’atupuhia nā roto i te mana, ’e te māuiui, ’e te pohe o te Mesia, ’e tōna ti’afa’ahoura’a ’e tōna revara’a i ni’a i te ra’i.

3 ’E ’ua ha’api’i ’oia ia rātou ato’a i tei fa’aro’o i tāna parau. ’E ’ua ha’api’i huna ’oia ia rātou ’ia ’ore te reira ’ia ’iteahia e te ari’i. ’E e rave rahi tei ti’aturi i tāna mau parau.

4 ’E i muri a’era, ’ua haere atu ra rātou ato’a ’o tei ti’aturi iāna i te hō’ē vāhi i parauhia ’o Moromona, ’e nā te ari’i i ma’iri i tō te reira i’oa, tei te mau ’ōti’a o te fenua ra i ’ī roa i te mau ’ānimara ’ōviri taehae i terā taime ’e i terā taime, ’oia ho’i i terā ’anotau ’e i terā ’anotau.

5 I teienei, tē vai ra te hō’ē pape piha’a mā i Moromona, ’e ’ua mātau ho’i Alama i te haere i reira, nō te mea tei pīha’i iho i taua pape piha’a ra te hō’ē uru rā’au ri’i, ’e tei reira tōna tāpunira’a i te ao i tā te ari’i ra mau ’imira’a iāna.

6 ’E i muri a’era, ’ua haere rātou ato’a ’o tei ti’aturi iāna nō te fa’aro’o i tāna mau parau.

7 ’E i muri a’era, ’ia hope a’era te mau mahana e rave rahi, ’ua putuputu ihora te feiā e rave rahi i te vāhi nō Moromona, nō te fa’aro’o i te mau parau a Alama. ’Oia ïa, ’ua putuputu ihora te mau ta’ata ato’a ’o tei ti’aturi i tāna ra parau nō te fa’aro’o iāna. ’E ’ua ha’api’i atu ra ’oia ia rātou, ’e ’ua a’o atu ra ia rātou i te parau nō te tātarahapa, ’e te fa’aorara’a, ’e te fa’aro’o i te Fatu.

8 ’E i muri a’era, ’ua parau atu ra ’oia ia rātou : Inaha, tei ’ō nei te mau pape o Moromona (’e te reira te i’oa i topahia) ’e i teienei, nō te mea ’ua hina’aro ’outou ’ia ō mai i roto i te nana a te Atua, ’e ’ia parauhia ’ei mau ta’ata nōna, ’e ’ua hina’aro ’outou ’ia amo te tahi i tā te tahi mau hōpoi’a, ’ia māmā te reira ;

9 ’Oia ïa, ’e ’ua hina’aro ’outou ’ia ’oto ’a ’oto ai te feiā ’oto ra ; ’oia ïa, ’e ’ia tāmāhanahana ia rātou ’o tē au ’ia tāmāhanahanahia, ’e ’ia ti’a ’ei mau ’ite nō te Atua i te mau taime ato’a ’e nō te mau mea ato’a, ’e i roto i te mau vāhi ato’a tā ’outou e pārahi ra, ē tae noa atu i te pohera’a, ’ia fa’aorahia ’outou e te Atua, ’e ’ia tai’ohia i rotopū ia rātou nō te ti’afa’ahoura’a mātāmua, ’ia noa’a ia ’outou te ora mure ’ore—

10 I teienei tē parau atu nei au ia ’outou, mai te mea ē ’o teie te hina’aro o tō ’outou ’ā’au, e aha ïa te mea e ’ore e au ai ia ’outou ’ia bāpetizohia nā roto i te i’oa o te Fatu, ’ei fa’a’itera’a pāpū i mua iāna ē, ’ua fafau ’outou i te hō’ē fafaura’a iāna, ’e e tāvini ’outou iāna ’e e ha’apa’o ho’i i tāna ra mau fa’auera’a, ’ia nīni’i rahi mai ’oia i tōna Vārua i ni’a ia ’outou ?

11 ’E i teienei, ’ia fa’aro’o a’era te mau ta’ata i teie nei mau parau, ’ua pōpō ihora rātou i tō rātou rima nō te ’oa’oa, ’e ’ua parau mai ra : ’o tē hina’aro teie o tō mātou ’ā’au.

12 ’E i teienei, i muri a’era, ’ua rave ihora Alama ia Helama, ’e ’o ’oia te mātāmua, ’e ’ua haere atu ra e ti’a atu ra i roto i te pape, ’e ’ua ti’aoro atu ra, i te nā-’ō-ra’a ē : E te Fatu, ’a nīni’i mai i tō ’oe Vārua i ni’a i tō ’oe tāvini nei, ’ia rave ’oia i teie nei ’ohipa ma te ’ā’au mā.

13 ’E ’ia oti a’era iāna te parau i teie nei mau parau, ’ua tae mai ra te Vārua o te Fatu i ni’a iāna, ’e ’ua parau atu ra ’oia : E Helama, nō te mana i hōro’ahia mai nō ’ō mai i te Atua manahope ra, tē bāpetizo nei au ia ’oe ’ei fa’a’itera’a pāpū ē, ’ua fafau ’oe i te hō’ē fafaura’a ’ia tāvini iāna ē tae noa atu ’ua pohe ’oe i te tino tāhuti nei ; ’e ’ia nīni’ihia mai te Vārua o te Fatu i ni’a ia ’oe ; ’e ’ia hōro’a mai ’oia i te ora mure ’ore nō ’oe, nā roto i te fa’aorara’a a te Mesia, ’o tāna i fa’aineine mai te ha’amatara’a mai ā o te ao nei.

14 ’E ’ia fa’aoti a’era Alama i te parau i teie nei mau parau, ’ua tanuhia ihora Alama rāua ’o Helama i raro i te pape ; ’e ’ua ti’a a’era rāua ’e ’ua haere mai ra mai raro mai i te pape ma te ’oa’oa, ’e ’ua ’ī ho’i rāua i te Vārua.

15 ’E teie fa’ahou, ’ua rave ihora Alama i te tahi atu ta’ata, ’e ’ua haere atu ra i te piti o te taime i roto i te pape, ’e ’ua bāpetizo atu ra iāna mai tāna i bāpetizo i te ta’ata mātāmua ra, ’aita rā ’oia i tanu fa’ahou iāna iho i raro i te pape.

16 ’E ’ua nā reira ’oia i te bāpetizo ia rātou ato’a ’o tei tae i taua vāhi ra nō Moromona ; ’e e piti hānere ’aore ’e maha ta’ata ’ia tai’ohia, ’oia ïa, ’e ’ua bāpetizohia rātou i roto i te mau pape nō Moromona, ’e ’ua fa’a’īhia rātou i te maita’i o te Atua.

17 ’E ’ua parauhia rātou te ’ēkālesia a te Atua, ’oia ho’i te ’ēkālesia a te Mesia, mai taua taime mai ra. ’E i muri a’era ’ua ’āmuihia mai te mau ta’ata ato’a ’o tei bāpetizohia nā roto i te mana ’e te ha’amanara’a nō ’ō mai i te Atua ra i roto i tāna ’ēkālesia.

18 ’E i muri a’era nā roto i te mana i hōro’ahia mai nō ’ō mai i te Atua ’ua fa’atōro’a Alama i te tahi mau tahu’a ; ’ua fa’atōro’a ’oia i te ta’ata hō’ē ’ei tahu’a nō roto mai i te mau pae ’ahuru ta’ata ato’a nō rātou, nō te a’o ’e nō te ha’api’i ia rātou i te mau mea nō ni’a i te bāsileia o te Atua.

19 ’E ’ua fa’aue atu ’oia ia rātou, ’eiaha rātou e ha’api’i i te hō’ē a’e mea, maori rā te mau mea tāna i ha’api’i, ’e tei parauhia e te vaha o te mau peropheta mo’a ra.

20 ’Oia ïa, ’ua fa’aue atu ’oia ia rātou, ’eiaha rātou e a’o i te hō’ē mea, maori rā te parau nō te tātarahapa ’e te fa’aro’o i te Fatu, ’o tei fa’aora i tōna ra mau ta’ata.

21 ’E ’ua fa’aue atu ’oia ia rātou, ’eiaha te mārōra’a ’ia vai i rotopū i te tahi ’e i te tahi, ’ia hi’o rā rātou i mua ma te mata hō’ē, ’e ma te fa’aro’o hō’ē ’e te bāpetizora’a hō’ē ; ’e ma te tāhō’ē mai i tō rātou ’ā’au i roto i te tāhō’ēra’a ’e i roto i te here te tahi i te tahi.

22 ’E ’ua nā reira ’oia i te fa’aue ia rātou ’ia a’o. ’E ’ua nā reira rātou i te riro ’ei mau tamari’i nā te Atua.

23 ’E ’ua fa’aue atu ’oia ia rātou ’ia ha’apa’o i te mahana sābati, ’e ’ia ha’amo’ahia, ’e ’ia ha’amaita’i ho’i rātou i te Fatu tō rātou Atua i te mau mahana ato’a.

24 ’E ’ua fa’aue atu ho’i ’oia ia rātou ’ia rave te mau tahu’a ’o tāna i fa’atōro’a i te ’ohipa ma tō rātou iho rima nō te tauturu ia rātou iho.

25 ’E ’ua fa’ata’ahia te hō’ē mahana i te mau hepetoma ato’a ’ia ha’aputuputu rātou ia rātou iho nō te ha’api’i i te mau ta’ata, ’e nō te ha’amori i te Fatu tō rātou Atua, ’e i te mau mahana ato’a ho’i e au ia rātou ’ia ha’aputuputu rātou ia rātou iho i te vāhi hō’ē.

26 ’E ’eiaha te mau tahu’a e ti’aturi i ni’a i te mau ta’ata nō te tauturu i tō rātou orara’a ; ’ia roa’a rā ia rātou te maita’i o te Atua ’ei utu’a nō tā rātou ’ohipa, ’ia pūai rātou i te Vārua, ma te fāri’i i te ’ite nō te Atua, ’ia ti’a ia rātou ’ia ha’api’i ma te mana ’e te ha’amanara’a nō ’ō mai i te Atua ra.

27 ’E teie fa’aahou ā, ’ua fa’aue atu Alama ’ia hōro’a te mau ta’ata o te ’ēkālesia i tā rātou tao’a, te ta’ata tāta’itahi mai te au i tāna tao’a ; te ta’ata e mea rahi tāna, ’ia rahi ato’a tāna e hōro’a ; ’e te ta’ata e mea iti tāna, ’ia iti ato’a te tītauhia iāna ; ’e te ta’ata ’aita tāna e tao’a, e hōro’ahia ïa iāna.

28 ’E ’ia nā reira rātou i te hōro’a atu i tā rātou tao’a, mai te au i tō rātou iho hina’aro i te Atua, ’e i te mau tahu’a tei ’ere, ’oia ïa, i te feiā veve ato’a ’e tei taha’a noa.

29 ’E ’ua parau atu ’oia i teie nei parau ia rātou, nō te mea ’ua fa’auehia ’oia e te Atua ; ’e ’ua haere rātou ma te parauti’a i mua i te Atua, i te hōro’ara’a te tahi i te tahi i te mau mea pae tino ’e pae vārua mai te au i tō rātou veve ’e tō rātou mau hina’aro.

30 ’E i teienei, i muri a’era, ’ua ravehia te reira i Moromona ; ’oia ïa, i pīha’i iho i te mau pape nō Moromona ; ’oia ïa, i roto i te uru rā’au i pīha’i iho i te mau pape nō Moromona ; ’oia ïa, te vāhi nō Moromona, te mau pape nō Moromona, te uru rā’au nō Moromona, ’e e mea nehenehe roa te reira i te mata o te mau ta’ata ’o tei fāri’i i te ’ite nō ni’a i tō rātou Tāra’ehara i reira ; ’oia ïa, ’ua ha’amaita’ihia rātou, ’e e hīmene ho’i rātou nō te ’ārue iāna ē a muri noa atu.

31 ’E ’ua ravehia teie nei mau mea i te mau hiti o te fenua, ’ia ’ore te reira ’ia ’iteahia e te ari’i.

32 Inaha rā, i muri a’era ’ia ’ite a’era te ari’i i te hō’ē ’ārepurepura’a i rotopū i te mau ta’ata, ’ua tono atu ra ’oia i tōna mau tāvini nō te hi’o ia rātou. Nō reira i te mahana i ha’aputu ’āmui mai ai rātou ia rātou iho nō te fa’aro’o i te parau a te Fatu ’ua ’itehia ’e ’ua fa’a’itehia te reira i te ari’i.

33 ’E i teienei ’ua parau ihora te ari’i ē, tē fa’ati’arepu ra Alama i te mau ta’ata ’ia ’aro mai iāna ; nō reira ’ua tono atu ’oia i tōna nu’u fa’ehau nō te ha’amou ia rātou.

34 ’E i muri a’era, ’ua fa’a’itehia Alama ’e te mau ta’ata o te Fatu i te haerera’a mai o te nu’u fa’ehau o te ari’i ; nō reira ’ua rave rātou i tō rātou mau ti’ahapa ’e tō rātou mau ’utuāfare ’e ’ua haere atu ra i roto i te mēdēbara.

35 E maha hānere ’e pae ’ahuru rahira’a ta’ata ’ia tai’ohia.