1 Ere chiney, e yibi buch ni Alma, niʼir faram e miil rokʼ fapi tapigpig rokʼ fare pilung i Noah, e kalngaenʼ ko pi denen rokʼ nge pi ngongol rokʼ nib kireb, me yaen nib mamith u fithikʼ fapi gidiiʼ iyaen, me tabab i fil iyaen fapi thin rokʼ Abinadi—

2 Arragon, ni morngaʼagen e pinʼen ni bay yib, nge ku morngaʼagen fare foskoyamʼ nra tay e pi yamʼ, nge fare bayul ko gidiiʼ, ni yira muguʼuliy u dakean fare gelingin, nge pi gafgow, nge yamʼ nra tay Kristus, nge foskoyamʼ nge yaen nga tharmiy nra tay.

3 Ma gubin e piʼin ni yaedra motoyil ko thin rokʼ e fil ngoraed. Ma i fil ngoraed nib mamith morngaʼagen, ni nga dabi nang fare pilung. Ma bayoʼor e piʼin ni michaenʼ ko thin rokʼ.

4 Me yibi buch ni oren e piʼin ni michaenʼraed ngakʼ e ranoed ko farengi nʼen ni kanoeg Mormon ngay, ni tunguy fare pilung fithingan, ni immoy nga mathil ko binaw ni suguy e gamanman ni malboch dakean u bingyalʼ ngo bingyalʼ.

5 Ere chiney, immoy u lan yu Mormon ba alublub i raen nib machalbog, ma Alma e yaen ngaram, ni bachan e immoy riy ba chuwoʼ i gakʼiy nib dubʼag mab achichig kean, ni ireram e gin ni ma miith riy ni rran rokʼ fare pilung.

6 Me yibi buch ni gubin e piʼin ni michaenʼraed ngakʼ e ranoed ngaram ni ngar rungʼaged e pi thin rokʼ.

7 Me yibi buch u tomuren nib yoʼor e rran ni ke yaen make yoʼor e gidiiʼ ni ke mukun nga taʼabang ko farengi nʼen nu Mormon, ni ngar rungʼaged fapi thin rokʼ Alma. Arragon, gubin e piʼin ni kar mukun gaed nga taʼabang nib michaenʼraed ko thin rokʼ, e ngar motoyil gaed ngakʼ. Ere me fil ngoraed, me machib nag ngoraed e kalngaenʼ, nge fare bayul, nge micheanʼ ngakʼ fare Somoel.

8 Me yibi buch ni gaʼar ngoraed: Musap gaed, baʼaray fare raen rokʼ Mormon, (ya ireray fithingan ni kar tunguyed) ere chiney, e bachan e gimed baʼadag ni ngam baed ko ulung rokʼ Got, ma noeg ni gimed e gidiiʼ rokʼ, mab mʼagaenʼmed ngay ni ngam ayuweged gimed, ni nge yog ni ngam baʼud gaed;

9 Arragon, mab mʼagaenʼmed ngay ni nge kirbaenʼmed ngakʼ e piʼin nibe kirbaenʼ; arragon, mi gimed falʼeg laniyaenʼ e piʼin nib tʼuf rokʼ ni ngan falʼeg laniyaenʼ, ma ngam pired ni gimed e pi mich rokʼ Got ni gubin e ngiyalʼ ngo fithikʼ gubin banʼen, nge gubin yang ni gimed bay riy, nge yaeni madaʼ ko ngiyalʼ ni kam mʼaed, ni nge yog ni bayuliymed Got, mi gimed un nga fithikʼ e mathaʼeg ngakʼ e piʼin ni yaed bay ko bin sommʼon e foskoyamʼ, ni nge yog ngomed e yafos ni gubinfen—

10 Ere chiney e gube yoeg ngomed, faʼanra ireray e athap ko gumʼirchaʼ romed, ere mangfan ni dab ni tawfe nagmed u fithgan Somoel, nib mich riy ngakʼ ni kam falʼeged ba mʼag u thilmed, ni gimed ra pigpig ngak mi gimed fol ko pi motochiyel rokʼ, ni nge yog ni piiʼ e Kan ni Thothup rokʼ nga dakeanmed?

11 Ere ngiyalʼ ney u napʼan ni rungʼag fapi gidiiʼ e pi thin ney, mar weywey gaed ko falfalaenʼ, miyaed gaʼar: Ireray e re athap ko gumʼirchaʼ romaed.

12 Ere chiney e yibi buch ni Alma e fek Helam, niʼir e chaʼ ni sommʼon, ma ranow ra sakʼiy gow nga lan farengi raen, me non nib gaaʼ laman, ni gaʼar: O Somoel, mpiiʼ e Kan ni Thothup rom nga dakean e tapigpig rom, ni nge yog ni rinʼ e re muruwel ney u fithikʼ e gumʼirchaʼ nib thothup.

13 Ma napʼan ni yoeg e pi thin ney, ma fare Kan ni Thothup rokʼ Somoel e yib ngakʼ, me gaʼar: Helam, Nggu tawfe nigem, u matʼawog ni ke yib rokʼ fare Got ni Gubin ma ra yog rokʼ, ni pow riy ni kam man nga langgin ba mʼag ni ngam pigpig ngakʼ nge madaʼ ko ngiyalʼ ni kamumʼ ko biney e dowef; ma nge yib fare Kan ni Thothup rokʼ Somoel nga dakeanam; me yog ni piiʼ ngom e yafos ni gubinfen, u dakean fare bayul rokʼ Kristus, niʼir e tanmeg Got aram ko sommʼon nni sunmiy e fayleng.

14 Me tomuren ni ke yoeg Alma e pi thin ney, ma yow lʼagruw Alma nge Helam nra lith gow nga fithikʼ e raen; mar suloew ngalang mar bow nga wuruʼ farengi raen u fithikʼ e falfalaenʼ, ni kar sug gow ko fare Kan ni Thothup.

15 Ma ku bayay, Alma e ki fek bagyaed fapi gidiiʼ, me yaen nga maraen ko yaen lʼagruw yay, me tawfe nag ni boed rogon ko yaen sommʼon, machane yaney e daki un ko yaen nga fithikʼ e raen.

16 Ma ireray rogon ni tawfe nag gubin e piʼin ranoed ko farengi binaw nu Mormon; ma urngiraed e gonpon lʼagruw miriʼay nge aningeg e gidiiʼ; arragon, ma ni tawfe nagraed u lan farengi raen ku Mormon, mar sug gaed ko murnguy rokʼ Got.

17 Ma kanoeg ni yaed fare galasia rokʼ Got, ara fare galasia rokʼ Kristus, ko ngiyalʼ nem iyaen nga mʼon. Me yibi buch ni chaʼ nni tawfe nag u gelingin nge matʼawon Got e un ko galasia rokʼ.

18 Me yibi buch ni Alma, e bay matʼawon Got rokʼ, e yibliy e priest; ni ra wugem e gidiiʼ ma taʼareb e priest ni yibliy me dugliy ngay ni ngar machib gaed ngoraed, mar filed ngoraed morngaʼagen e pinʼen ni bay rogon nga gilʼilungun Got.

19 Me chiyliy ngoraed ni dariy banʼen ni ngar filed iyaen ma kemus ni pinʼen ni ke fil ngoraed, ma ireram e pinʼen ni weliy e pi profet nib thothup.

20 Arragon, niki chiyliy ngoraed ni dabra machib niged banʼen ma kemus ni kalngaenʼ nge mich ngakʼ Somoel, niʼir e ke bayuliy e gidiiʼ rokʼ.

21 Me chiyliy ngoraed ni dabra lʼelʼeged e thin u thilraed, machane nge taʼareb laniyaenʼraed ko changar roraed ko athap nga mʼon, ni nge taʼareb laniyaenʼraed me taʼareb e mich, me taʼareb e tawfe, ma nge taʼareb gumʼirchaʼraed u taʼabang ngo fithikʼ e tʼufeg roraed ngoraed.

22 Ere ireray rogon e pinʼen ni chiyliy ngoraed ni ngar machib niged. Ma aray rogon ni ra manged bitir rokʼ Got.

23 Me chiyliy ngoraed ni ngar tayed fan fare rran ni madnom, mar tayed nib thothup, ma ku gubin e rran ni ngar oged e magaer ngakʼ fare Somoel ni Got roraed.

24 Ma ki chiyliy ngoraed ni fapi priest ni ke yibliy raed e thingar ra muruwel gaed nga paʼraed ni fan ko tin ba tʼuf roraed banʼen.

25 Ma bay rebo rran u lan gubin e wik ni kan kiiʼeg ni nga ur kunuyed yaed riy nga taʼabang ni ngar filed e thin rokʼ ko fapi gidiiʼ, ma nga ur meybil gaed ko fare Somoel ni Got roraed, nge ku arragon, ni urngin yay nra i yog u gelingraed, ni nga ur moʼolung gaed nga taʼabang.

26 Ma fapi priest e dabra tagaʼ gaed ko gidiiʼ ko tin ba tʼuf roraed banʼen; machane, bachan e muruwel ni yaedra tay e rayog riy ngoraed e falaʼab rokʼ Got, ni gomanga yog ni ngar monʼog gaed u dakean fare Kan ni Thothup, ni ke yog ngoraed e naʼab rokʼ Got, ni gomanga yog ni ngar filed ko gidiiʼ u gelingin nge matʼawon Got.

27 Nge ku bayay ni Alma e chiyliy ni gidiiʼ ko galasia e thingar ra piiʼed boech e tin bay roraed banʼen, ni yaed gubin nra beeʼ ma be yaen u rogon e tin bay rokʼ; faʼanra bayoʼor ni bay rokʼ beeʼ ma thingari piiʼ nib yoʼor; ma chaʼ ni buchʼuw e bay rokʼ, e buchʼuw e ra piiʼ; ma chaʼ ni bay rokʼ e dab ni piiʼ ngakʼ.

28 Ere aray rogon ni ngar piiʼed e tin bay roraed banʼen u fithikʼ e lʼagaenʼ nge athap roraed ngakʼ Got, nge ngakʼ fapi priest ni ke tʼuf banʼen roraed, arragon, nge gubin e piʼin nib tʼuf banʼen roraed, nge piʼin dariy e mad roraed.

29 Ma ireray e nʼen ni yoeg ngoraed, ni bachan e ke chiyliy Got ngakʼ; ma u ranoed nib matʼaw u pʼoewchen Got, ni yaed be piiʼ roraed ngoraed ni tin bagaʼ fan ko dowef nge yaʼel, u rogon e tin ba tʼuf roraed nge tin yaed baʼadag.

30 Ere chiney e yibi buch ni gubin e pinnʼey e nrinʼ u Mormon, arragon, nib chugur ko farengi raen ku Mormon, u lan e loway u charen farengi raen ku Mormon; arragon, farengi binaw rokʼ Mormon, farengi raen rokʼ Mormon, fare loway rokʼ Mormon, rib felʼ usun u oewchen e piʼin ni kar baed ngaram ke tamilang laniyaenʼraed u morngaʼagen e Tabiyul roraed; arragon, ma rib falaenʼ Somoel ngoraed, ya yaedra tang ni yaed be oge magaer ngakʼ ni gubinechubog.

31 Ma gubin e pinnʼey e nrinʼ u wuruʼ farengi binaw ni nga dabi nangraed fare pilung.

32 Machane musap gaed, yibi buch ni fare pilung, e pirʼeg ba mithmith u fithikʼ fapi gidiiʼ, ere lʼoeg e tapigpig rokʼ nge damit nagraed. Ere u lan fare rran ni yaed be moʼolung nga taʼabang ni ngar rungʼaged fare thin rokʼ Somoel ma noeg raed ngakʼ fare pilung.

33 Ere chiney e fare pilung e yoeg ni Alma e be kʼaring fapi gidiiʼ ni ngar togopluw gaed ngakʼ; ere, lʼoeg e salthaw rokʼ ni ngar liiʼed yaed.

34 Me yibi buch ni Alma nge fapi gidiiʼ rokʼ Somoel e ni kuruf e thin ngoraed u morngaʼagen e salthaw rokʼ fare pilung ni yaed be yaen ni ngar baed ngoraed; ere rafeked e pi tent roraed nge tabinaew roraed nga ranoed nga lan wuruʼ e binaw.

35 Ma urngiraed e gonpon aningeg miriʼay nge wugem e gidiiʼ.