1 Ere bachan e ke yoeg fare Somoel ngakʼ Alma ni fapi salthaw rokʼ fare pilung i Noah e bay rabaed ngoraed, ma ki yoeg ngakʼ fapi gidiiʼ rokʼ, ere ra kunuyed nga taʼabang fapi gamanman roraed, mar feked boech e awoch roraed, ma ranoed nga lan wuruʼ e binaw u mʼon ko fapi salthaw rokʼ fare pilung i Noah.

2 Ma fare Somoel e piiʼ gelingraed, ni nga dabi koel raed fapi gidii rok fare pilung i Noah ngar liiʼed raed.

3 Mar milekag gaed ni meruk e rran nga lan wuruʼ e binaw.

4 Mar baed nga bangi binaw, arragon, nga bangi binaw nib felʼ usun mab felʼ e paer riy, ni bangi binaw nib machalbog e rran riy.

5 Mar nʼufed e pi tent roraed ngalang, mar tabab gaed i ngongoliy e mileayʼ, mar tabab ko dumow naʼun; arragon, riyaed ba tamuruwel, ere ur muruwel gaed ni rib gel.

6 Ma fapi gidiiʼ e yaed baʼadag ni Alma ni nge mang pilung roraed, ya rib tʼuf ko gidiiʼ rokʼ.

7 Machane gaʼar ngoraed: Musap gaed, detʼuf ni nge yog e pilung ngodaed; ya gaʼar fare Somoel: Dab mu tayed beeʼ ni nge tolang ngakʼ beeʼ, ara beeʼ nib moʼon e dabi lemnag ir nib felʼ ngakʼ yug beeʼ; ere gube yoeg ngomed ni detʼuf ni nge yog e pilung ngomed.

8 Yug aram rogon machane, faʼanra yog ni nge gubin e ngiyalʼ ma bay e pumoʼon nib matʼaw ni nge mang pilung romed meʼere rib mangil ni nge yog e pilung ngomed.

9 Machane mu tayed u wunʼmed fare ngongol rokʼ fare pilung i Noah nge fapi priest rokʼ; ya mus ngog magu oloboch riy, nggu rinʼ boʼor bogi banʼen ni thʼabi kireb u mit Somoel, niʼir e kʼaring ngog e makalngaenʼ ni rib almarin.

10 Machane, tomuren nib gel e kirbaenʼ ni kug tay, ma fare Somoel e runguyeg nge motoyil ko meybil ni gube tay, me piiʼ e fulweg ko pi meybil rog, ma ke tayeg ni gub talin e muruwel u lani paʼ ni nggu fek boʼor i gimed iyib ko naʼab ni morngaʼagen e tin riyulʼ rokʼ.

11 Machane, dagur ʼuf ko biney, ya gag e dabi bung rogog ni nggu ʼuf ni morngaʼageg.

12 Ere chiney e gube yoeg ngomed, ni ke gafgow nagmed fare pilung i Noah, ma kuʼum manged sib ngakʼ nge fapi priest rokʼ, ma kar feked gimed iyib nga fithikʼ e ngongol ni kireb, ere ni mʼagmed nga gafan e ngongol ni kireb.

13 Ere chiney ni kan chuwegmed u gelingin Got kam chuw gaed ko fapi mʼagan e ngongol ni kireb, arragon, u paʼ e pi toʼogor romed ni pilung i Noah nge fapi gidiiʼ rokʼ, nge ku pi mʼagan e ngongol ni kireb, ere ri aramfan nug baʼadag ni ngam chichiʼiyed gimed ko gin ni ke puf-matʼawmed riy, ma dabi pagaenʼmed ngakʼ beeʼ ni nge mang pilung romed.

14 Ma ku dabi pagaenʼmed ngakʼ beeʼ ni nge mang sensey romed ara tamachib romed, ma kemus ni faʼanra beeʼ nib gidiiʼ rokʼ Got, ni be yaen ko pi woʼ rokʼ ma be fol ko pi motochiyel rokʼ.

15 Aray rogon ni Alma e fil ko gidiiʼ rokʼ, ni nge gubin e gidiiʼ ma nge tʼufeg e chaʼ ni bugul yoror rokʼ ni boed ir, ni nge dabi yibe maleʼeg thin nga fithikʼraed.

16 Ere chiney e Alma, e ire tolang ko priest roraed, ya ire yarmiy e galasia roraed.

17 Me yibi buch ni dariy beeʼ ni bay matʼawon ni nge machib ara fil banʼen ma kemus niʼir e ke piiʼ Got matʼawon. Ere bangbeng nag gubin e priest roraed nge sensey roraed; ma dariy beeʼ nni bangbeng nag ma kemus ni faʼanra beeʼ nib moʼon nib matʼaw.

18 Ere ur guyed e gidiiʼ roraed, mar duruwʼiyed raed ko pinʼen nib lʼeag rogon ko tin nib matʼaw.

19 Me yibi buch ni arame ra tabab gaed ko monʼog me felʼ rograed u lan fare binaw; mar tunguyed fithingan e re binaw nem ni Helam.

20 Me yibi buch ni ra yoʼor gaed ma ri felʼ rograed u lan fare binaw nu Helam; mar ngongoliyed nib binaw, mar tunguyed fithingan ni fare binaw nu Helam.

21 Yug aram rogon ma fare Somoel e be guy nib tʼuf ni nge yalʼuweg e gidiiʼ rokʼ; arragon, ma sikeng nag e gumʼaenʼ roraed nge mich roraed.

22 Machane—anra tay e pagaenʼ rokʼ ngakʼ e ireram e chaʼ ni yira chibiy ngalang ko bin tomur e rran. Arragon, ma aray rogon ko tiney e gidiiʼ.

23 Ya musap gaed, bay gu dag ngomed nni fekraed nga kalbus, ma dariy beeʼ ni yog ni nge pagraed ma kemus ni fare Somoel ni Got roraed, arragon, ni fare Got ku Abraham nge Isaac nge Jacob.

24 Me yibi buch ni pagraed u kalbus, medag fare gelingin rokʼ ngoraed, ma rigel e falfalaenʼ roraed.

25 Ya musap gaed, yibi buch u napʼan ni ur moyed u lan fare nam nu Helam, arragon, u lan fare binaw nu Helam, u napʼan ni yaed be ngongoliy e mileayʼ u yungi binaw nib liyeg raed, ma musap gaed baey ba ulung i salthaw rokʼ fapi Lamanites u wuruʼ fare binaw.

26 Ere chiney e yibi buch ni fa piʼin walagen Alma e ra miil gaed ngar chuw gaed ko fayungi falang roraed, mar mukun gaed nga taʼabang u lan fare binaw nu Helam; ma kar tamdag gaed nga rarogon e mʼug ni ke tay fapi Lamanites.

27 Machane Alma e yaen nge yaen i sakʼiy nga pʼoewchraed, me yoeg ngoraed ni dabra tamdag gaed, ma nge yib ngaenʼraed fare Somoel ni Got roraed ma ra ayuwegraed.

28 Ere mʼay e tamdag roraed, mar tabab gaed ko meybil ngakʼ Somoel ni nge munguy nag gumʼirchaʼen fapi Lamanites, ni ngar paged ni dabra liiʼed raed, nge pi leʼengiraed, nge pi bitir roraed.

29 Me yibi buch ni fare Somoel e munguy nag gumʼirchaʼen fapi Lamanites. Ma Alma nge pi walagen e ranoed ngar piiʼed yaed nga lan paʼraed; ma fapi Lamanites e ra suweyed fare binaw nu Helam.

30 Chiney e fapi salthaw rokʼ fapi Lamanites, ni yaed e ur leaked fapi gidiiʼ rokʼ fare pilung i Limhi, e ra malog gaed u lan wuruʼ e binaw nib yoʼor e rran.

31 Ere musap gaed, ra pirʼeged fapi priest rokʼ fare pilung i Noah, u bangi banʼen ni karoeged e Amulon ngay; mar tabab gaed i suwey fare binaw nu Amulon mar tabab niged i ngongoliy e mileayʼ.

32 Arame chiney e fithingan fachaʼ nib gaaʼ ko fapi priest e Amulon.

33 Me yibi buch ni Amulon e wenig ngakʼ fapi Lamanites; ma kur lʼoeged e pi leʼengiraed ni yaed fapi ppin ni fak fapi Lamanites, ni ngar wenig gaed ngakʼ pi walagraed, ni nge dabra liiʼed e pi figirngiraed.

34 Ma fapi Lamanites e rrunguyed faʼanem i Amulon nge pi walagen, ma dar liiʼed raed, ni bachan e pi leʼengiraed.

35 Ere Amulon nge pi walagen e ra manged ngakʼ fapi Lamanites, ma ur milekag gaed u lan wuruʼ e binaw ni yaed be gay farengi binaw ku Nephi u napʼan nra pirʼeged fare binaw nu Helam, niʼir e be paer Alma nge pi walagen riy.

36 Me yibi buch ni fapi Lamanites e ra michmich gaed ngakʼ Alma nge pi walagen, ni faʼan yaedra dag ngoraed e kanawoʼ ni yaen ko fare binaw ku Nephi ma dab ni liiʼraed ma yira piiʼ e puf-matʼawon roraed ngoraed.

37 Machane tomuren ni Alma e ke dag ngoraed e kanawoʼ ni yaen ko fare binaw ku Nephi ma fapi Lamanites e dar fol gaed ko michmich nra tayed; ere ratayed e matanag nge liyeg fare binaw nu Helam, ni ngar matangiyed Alma nge pi walagen.

38 Ma piʼin ni magaey e ranoed ko fare binaw ku Nephi; ma boechi yaed e ra suloed ko fare binaw nu Helam, ma kur feked pi leʼengin nge pi bitir ko fapi matanag ni faʼan yaed e kan tay raed ko fare binaw.

39 Ma fare pilung ko fapi Lamanites e piiʼ matʼawon Amulon ni nge mang pilung me mang gaaʼ ko gidiiʼ rokʼ, ni yaed bay u lan fare binaw ku Helam; machane dariy gelingin ni nge rinʼ ni demutrug banʼen nib togopluw nga rogon ni baʼadag fare pilung ko Lamanites.