1 ’E i muri a’era, ’ua au-roa-hia mai ra Amulona e te ari’i o te mau ’āti Lamana ; nō reira ’ua fa’ati’a mai te ari’i o te mau ’āti Lamana iāna ’e tōna ra mau taea’e ’ia fa’ata’ahia rātou ’ei mau ’orometua i ni’a iho i tōna ra mau ta’ata, ’oia ïa, i ni’a i te mau ta’ata i te fenua ra nō Semelona, ’e i te fenua ra nō Siloma, ’e i te fenua ra ho’i i Amulona.

2 ’Ua haruhia teie mau fenua ato’a ra ’e te mau ’āti Lamana ; nō reira, ’ua fa’ata’a te ari’i o te mau ’āti Lamana i te tahi mau ta’ata ’ei ari’i nō teie mau fenua ato’a.

3 ’E i teienei te i’oa o te ari’i o te mau ’āti Lamana, ’o Lamana ïa, ’e ’ua ma’irihia ’oia i te i’oa o tōna metua tāne ; ’e nō reira ’ua parauhia tōna i’oa ’o te ari’i Lamana. ’E ’ua riro ’oia ’ei ari’i nō te mau ta’ata e rave rahi.

4 ’E ’ua fa’ata’a ’oia i te mau taea’e o Amulona ’ei mau ’orometua i te mau fenua ato’a i pārahihia e tōna ra mau ta’ata ; ’e nō reira ’ua ha’amatahia te reo o te mau ’āti Nephi i te ha’api’ihia i rotopū i te mau ta’ata ato’a o te mau ’āti Lamana.

5 E mau ta’ata ho’i rātou tei aroha te tahi i te tahi ; ’āre’a rā ’aita rātou i ’ite i te Atua ; ’e ’aita ho’i te mau taea’e o Amulona i ha’api’i ia rātou i te tahi mea nō ni’a i te Fatu tō rātou Atua, ’aita ho’i i te ture a Mose ; ’e ’aita ato’a ho’i rātou i ha’api’i ia rātou i te mau parau a Abinadi.

6 ’Āre’a rā ’ua ha’api’i rātou ia rātou ’ia pāpa’i i tā rātou pāpa’a parau nō ni’a ia rātou iho, ’e ’ia pāpa’i atu ho’i te tahi i te tahi.

7 ’E ’ua tupu atu ra te tao’a a te mau ’āti Lamana i te rahi, ’e ’ua ha’amata rātou i te ho’o atu i te tahi ’e te tahi, ’e ’ua rahi roa atu ra tā rātou, ’e ’ua ha’amata ihora rātou ’ia riro ’ei feiā ha’avare ’e te ’ite i te rāve’a pa’ari nō teie nei ao, ’oia ïa, ’ei feiā ha’avare, i te hina’arora’a i te mau huru ’ohipa ’ī’ino ato’a ’e te haru tao’a, ’eiaha rā i rotopū i tō rātou iho mau taea’e.

8 ’E i teienei, i muri a’era, ’ua ha’amata ihora Amulona i te fa’a’ohipa i tōna mana i ni’a a’e ia Alama ’e tōna mau taea’e, ’e ’ua ha’amata ho’i ’oia i te hāmani ’ino mai iāna, ’e ’ua fa’aue atu i tāna ra mau tamari’i ’ia hāmani ’ino atu i tā rātou mau tamari’i.

9 ’E ’ua ’ite ho’i Amulona ia Alama, ’o ’oia ho’i te hō’ē o te mau tahu’a o te ari’i, ’e ’o ’oia ho’i tei ti’aturi i te mau parau a Abinadi ’e ’ua ti’avaruhia atu mai mua atu i te ari’i, ’e nō reira ’ua riri ’oia iāna ; e tei raro a’e ho’i ’oia i te ari’i ra ia Lamana, ’e ’ua fa’ahepo noa mai ho’i ’oia ia rātou, ’e ’ua tu’u i te mau ’ohipa rave ’atā i ni’a ia rātou, ’e ’ua tu’u ato’a i te mau ra’atira hi’opo’a ’ohipa i ni’a ia rātou.

10 ’E i muri a’era, nō te rahi o tō rātou mau ’ati ’ua ha’amata ihora rātou i te ti’aoro māite atu i te Atua.

11 ’E ’ua fa’aue atu ra Amulona ia rātou ’ia fa’aea i tā rātou mau ti’aorora’a ; ’e e tu’u ’oia i te tahi mau tīa’i i ni’a ia rātou nō te hi’opo’a ia rātou, ’e ’o te ta’ata e ’itehia i te purera’a i te Atua e ha’apohehia ïa ’oia.

12 ’E ’aita atu ra Alama ’e tōna mau ta’ata i fa’ateitei i tō rātou reo i ni’a i te Fatu tō rātou Atua, ’āre’a rā ’ua nīni’i māite atu rātou i tō rātou ’ā’au iāna ; ’e ’ua ’ite mai ho’i ’oia i te mau mana’o o tō rātou mau ’ā’au.

13 ’E i muri a’era, ’ua tae mai ra te reo o te Fatu ia rātou i roto i tō rātou mau ’ati, i te nā-’ō-ra’a mai ē : ’A fa’ateitei mai i tō ’outou upo’o ’e ’ia au maita’i noa, ’e ’ua ’ite ho’i au i te fafaura’a tā ’outou i fafau mai iā’u ra ; ’e e fafau atu ho’i au i tō’u ra mau ta’ata ’e e fa’aora ho’i ia rātou i te fa’atītīra’a.

14 ’E e ha’amāmā vau i te mau hōpoi’a teiaha i tu’uhia i ni’a iho i tō ’outou mau tapono, ’e e’ita roa ’outou e ’ite i te teiahara’a nō te reira i ni’a i tō ’outou mau tua, ’a vai noa ai ’outou i roto i te fa’atītīra’a ; ’e e rave au i te reira ’ia ti’a ia ’outou ’ia riro ’ei mau ’ite nō’u a muri a’e, ’e ’ia ’ite pāpū ho’i ’outou ē, tē hi’o aroha nei au, te Fatu te Atua, i tō’u mau ta’ata i roto i tō rātou mau ’ati.

15 ’E i teienei, i muri a’era, ’ua riro te mau hōpoi’a i tu’uhia i ni’a iho ia Alama ’e tōna ra mau taea’e ’ei mea māmā ; ’oia ïa, ’ua ha’apūai te Fatu ia rātou ’ia ti’a ia rātou ’ia fa’a’oroma’i i te mau hōpoi’a ma te ’ōhie, ’e ’ua auraro ihora rātou ma te ’ā’au tae ’e te fa’a’oroma’i i te mau hina’aro ato’a o te Fatu.

16 ’E i muri a’era, nō tō rātou fa’aro’o rahi ’e tō rātou fa’a’oroma’i ’ua tae fa’ahou mai ra te reo o te Fatu ia rātou, i te nā-’ō-ra’a mai ē : ’Ia au maita’i noa ’outou, ananahi e fa’aora ai au ia ’outou i te fa’atītīra’a.

17 ’E ’ua parau mai ra ’oia ia Alama : E haere ’oe nā mua i teie nei feiā, ’e e haere ato’a vau nā muri iho ia ’oe ’e e fa’aora i teie nei feiā i te fa’atītīra’a.

18 I teienei, i muri a’era, ’ua ha’aputuputu Alama ’e tōna ra mau ta’ata i tā rātou mau nana i te ru’i, ’e tā rātou sītona ho’i ; ’oia ïa, tē ha’aputuputu noa ra rātou i tā rātou mau nana māmoe ē hope roa a’e te ru’i.

19 ’E ’ia po’ipo’i a’era ’ua fa’atupu te Fatu i te vare’a ta’oto rahi i ni’a i te mau ’āti Lamana, ’oia ïa, ’ua ro’ohia te mau ra’atira hi’opo’a ’ohipa i te ta’oto rahi.

20 ’E ’ua reva atu ra Alama ’e tōna ra mau ta’ata i roto i te mēdēbara ; ’e hope a’era te mahana tā’āto’a i te haerehia e rātou, ’ua fa’ati’a ihora rātou i tō rātou mau ti’ahapa i roto i te hō’ē peho, ’e ’ua ma’iri ihora rātou i te i’oa o taua peho ra ’o Alama, nō te mea nāna i arata’i ia rātou i roto i te mēdēbara.

21 ’Oia ïa, i roto i te peho nō Alama ’ua pūpū atu ra rātou i tō rātou māuruuru i te Atua nō te mea ’ua hi’o aroha mai ’oia ia rātou, ’e ’ua ha’amāmā mai i tā rātou mau hōpoi’a, ’e ’ua fa’aora ho’i ia rātou i te fa’atītīra’a ; i vai na ho’i rātou i roto i te fa’atītīra’a, ’e ’aita roa e ta’ata e ti’a ’ia fa’aora ia rātou, maori rā ’o te Fatu tō rātou Atua.

22 ’E ’ua ha’amāuruuru atu ra rātou i te Atua, ’oia ïa, tō rātou mau ta’ata ato’a, ’e tā rātou mau vahine ato’a, ’e tā rātou mau tamari’i ato’a ’o tei ’ite i te parau, ’ua fa’ateitei rātou i tō rātou reo i te ’āruera’a i tō rātou ra Atua.

23 ’E i teienei ’ua parau mai ra te Fatu ia Alama : ’A haere ’oi’oi atu ’oe ’e teie nei feiā ato’a i rāpae i teie nei fenua, ’ua ara mai ho’i te mau ’āti Lamana, ’e tē tāpapa mai nei rātou ia ’oe na ; nō reira, ’a haere atu ’oe i rāpae i teie nei fenua ’e e tāpe’a vau i te mau ’āti Lamana i roto i teie peho, ’ia ’ore rātou e haere atu nō te tāpapa i teie nei feiā.

24 ’E i muri a’era, ’ua reva ’ē atu ra rātou i rāpae i taua peho ra, ’e ’ua haere noa atu ra rātou nā roto i te mēdēbara.

25 ’E ’ia hope a’era nā mahana e hō’ē ’ahuru ’e ma piti i roto i te mēdēbara ’ua tae atu ra rātou i te fenua ra nō Zarahemela ; ’e ’ua fāri’i mai te ari’i Mosia ia rātou ma te ’oa’oa.