1 ’E i teienei ’ua ha’aputuputu mai ra te ari’i ra ’o Mosia i te mau ta’ata ato’a.

2 I teienei, ’aita te mau tamari’i a Nephi i rahi, ’oia ho’i te mau hua’ai o Nephi, i te mau ta’ata o Zarahemela, ’oia ho’i te hua’ai o Muleka, ’o tei pe’e mai iāna i roto i te mēdēbara.

3 ’E ’aita ho’i te mau ta’ata o Nephi ’e te mau ta’ata o Zarahemela i rahi atu i tō te mau ’āti Lamana ; ’oia ïa, ’ua iti iho rātou i te ’āfara’a i te rahi.

4 ’E i teienei ’ua ha’aputuputuhia mai te mau ta’ata ato’a o Nephi, ’e te mau ta’ata ato’a ho’i o Zarahemela, ’e ’ua ha’aputuputuhia rātou i roto i nā pupu e piti.

5 ’E i muri a’era, ’ua tai’o atu ra Mosia, ’e ’ua fa’aue ato’a atu ’oia ’ia tai’ohia te mau pāpa’a parau a Zenifa i tōna ra mau ta’ata ; ’oia ïa, ’ua tai’o atu ’oia i te mau pāpa’a parau nō te mau ta’ata o Zenifa, mai te tau i fa’aru’e atu ai rātou i te fenua ra nō Zarahemela ē tae roa mai i te tau i ho’i fa’ahou mai ai rātou.

6 ’E ’ua tai’o ato’a atu ra ’oia i te ’ā’amu o Alama ’e tōna ra mau taea’e, ’e tō rātou mau ’ati ato’a ho’i, mai te tau i fa’aru’e ai rātou i te fenua ra nō Zarahemela ē tae roa mai i te tau i ho’i fa’ahou mai ai rātou.

7 ’E i teienei, ’ia fa’aoti a’era Mosia i te tai’o i te mau pāpa’a parau, ’ua ro’ohia ihora tōna mau ta’ata i pārahi i taua fenua ra i te māere ’e te ’ūmere.

8 Nō te mea ’aita rātou i ’ite ē, nāhea rātou ’ia feruri ; ’ia ’ite a’era rātou i te feiā i fa’aorahia mai i te fa’atītīra’a ’ua ’ī roa ihora rātou i te ’oa’oa rahi.

9 ’E teie fa’ahou, ’ia ha’amana’o rātou i tō rātou mau taea’e i taparahihia ’e te mau ’āti Lamana, ’ua ’ī roa ihora rātou i te ’oto, ’e ’ua rahi ho’i te tahera’a o tō rātou roimata nō te ’oto.

10 ’E teie fa’ahou, ’ia ha’amana’o rātou i te maita’i o te Atua, ’e tōna ra mana i te fa’aora’a ia Alama ’e tōna mau taea’e i te rima o te mau ’āti Lamana ’e i te fa’atītīra’a ho’i, ’ua fa’ateitei atu ra rātou i tō rātou reo ’e ’ua ha’amāuruuru atu ra i te Atua.

11 ’E teie fa’ahou, ’ia ha’amana’o rātou i te mau ’āti Lamana, i tō rātou mau taea’e, i tō rātou huru ’ino ’e te vi’ivi’i, ’ua ’ī ihora rātou i te māuiui ’e te autā nō te hina’aro ’ia maita’i tō rātou mau vārua.

12 ’E i muri a’era, ’ua riri ihora te mau tamari’i a Amulona ’e tōna mau taea’e ato’a, tei rave i te mau tamāhine a te mau ’āti Lamana ’ei vahine nā rātou, i te mau peu a tō rātou mau metua, ’e ’aita atu ra rātou i fa’ati’a ’ia parauhia rātou i te i’oa o tō rātou mau tupuna, nō reira ’ua rave rātou i te i’oa o Nephi, ’ia parauhia rātou te mau tamari’i a Nephi, ’e ’ia tai’ohia rātou i rotopū i te mau ta’ata i parauhia te mau ’āti Nephi.

13 ’E i teienei, ’ua tai’ohia te mau ta’ata ato’a o Zarahemela i rotopū i te mau ’āti Nephi, ’e ’ua nā-reira-hia nō te mea ’aita te bāsileia i tu’uhia i te tahi atu ta’ata, maori rā i te hua’ai o Nephi.

14 ’E i teienei, i muri a’era, ’ia fa’aoti a’era Mosia i te paraura’a ’e i te tai’ora’a atu i te mau ta’ata, ’ua hina’aro ’oia ’ia paraparau ato’a atu Alama i te mau ta’ata.

15 ’E ’ua paraparau atu Alama ia rātou, i muri iho i tō rātou ha’aputuputura’a ia rātou i roto i te tahi mau pupu rarahi, ’e ’ua haere atu ra ’oia i terā pupu ’e i terā pupu, i te porora’a atu i te mau ta’ata i te parau nō te tātarahapa ’e te fa’aro’o i te Fatu.

16 ’E ’ua a’o atu ’oia i te mau ta’ata o Limehi ’e tōna mau taea’e, ’e te mau ta’ata ato’a i fa’aorahia i te fa’atītīra’a, ’ia ha’amana’o rātou ē nā te Fatu i fa’aora ia rātou.

17 ’E i muri a’era, ’ia oti a’era tā Alama ha’api’ira’a i te mau ta’ata i te mau mea e rave rahi, ’e ’ia fa’aoti ho’i ’oia i tāna paraparaura’a atu ia rātou, ’ua hina’aro ihora te ari’i ra ’o Limehi ’ia bāpetizohia ’oia ; ’e ’ua hina’aro ho’i tōna mau ta’ata ato’a ’ia bāpetizo-ato’a-hia rātou.

18 Nō reira, ’ua haere atu ra Alama i raro i te pape, ’e ’ua bāpetizo ihora ’oia ia rātou ; ’oia ïa, ’ua bāpetizo ’oia ia rātou mai tāna i nā reira i tōna mau taea’e i roto i te mau pape nō Moromona ; ’oia ïa, ’e te mau ta’ata ato’a i bāpetizohia ra, ’ua riro rātou ’ei mau ta’ata nō te ’ēkālesia a te Atua ; ’e nō tō rātou fa’aro’o i te mau parau a Alama ra i nā-reira-hia ai rātou.

19 ’E i muri a’era, ’ua fa’ati’a atu ra te ari’i ra ’o Mosia ’ia fa’ati’a Alama i te mau ’āma’a nō te ’ēkālesia ē ’ati noa a’e te fenua nō Zarahemela ; ’e ’ua hōro’a atu ’oia i te mana iāna nō te fa’atōro’a i te mau tahu’a ’e te mau ’orometua i roto i te mau ’āma’a ato’a nō te ’ēkālesia.

20 I teienei nō te rahi ho’i o te mau ta’ata i nā-reira-hia ai, nō te mea ’aita e ti’a i te hō’ē noa iho ’orometua ’ia fa’atere ia rātou ato’a ; ’e ’aita ato’a e ti’a ia rātou ato’a ’ia fa’aro’o i te parau a te Atua i roto i te hō’ē putuputura’a.

21 Nō reira ’ua ha’aputuputu rātou ia rātou i roto i te tahi mau pupu ta’a ’ē, i parauhia te mau ’āma’a nō te ’ēkālesia ; tei roto ho’i i te mau ’āma’a ato’a nō te ’ēkālesia te mau tahu’a ’e te mau ’orometua, ’e ’ua ha’api’i atu te mau tahu’a ato’a i te parau mai te au i tei hōro’ahia mai ia rātou e te vaha o Alama.

22 ’E noa atu ā te rahi o te mau ’āma’a o te ’ēkālesia, hō’ē noa iho rā ïa ’ēkālesia ; ’oia ïa, te ’ēkālesia a te Atua ; ’e ’aita roa ho’i e mea ’ē atu i ha’api’ihia i roto i te mau ’āma’a ato’a nō te ’ēkālesia, maori rā te parau nō te tātarahapa ’e te fa’aro’o i te Atua.

23 ’E i teienei tē vai ra e hitu ’āma’a nō te ’ēkālesia i te fenua ra nō Zarahemela. ’E i muri a’era ’o rātou ’o tei hina’aro i te rave i ni’a iho ia rātou i te i’oa o te Mesia, ’e ’aore rā i tō te Atua, ’ua ’āmui mai ïa rātou i roto i te mau ’āma’a nō te ’ēkālesia a te Atua ;

24 ’E ’ua pi’ihia rātou te mau ta’ata o te Atua. ’E ’ua nīni’i mai te Fatu i tōna Vārua i ni’a iho ia rātou, ’e ’ua ha’amaita’ihia ’e ’ua ha’amanuiahia rātou i ni’a i te fenua.