1 Chiney e yibi buch nib yoʼor gidiiʼen e re mfen nem ni kar ilal gaed ni dabra nanged fan fapi thin rokʼ fare pilung i Benjamin, ni bachan e ku yaed bbitir e ngiyalʼ ni i non ko gidiiʼ rokʼ; ma demich u wunʼraed fapi yalen rokʼ e pi chitamangraed.

2 Demich u wunʼraed e nʼen ni kanoeg ni morngaʼagen fare foskoyamʼ nra tay e pi yamʼ, ara michaenʼraed nga morngaʼagen fare wub nra tay Kristus.

3 Ere chiney e bachan e mich roraed ni dariy, ere dabra nanged fan fare thin rokʼ Got; ma gumʼirchaʼraed e kari ʼelʼel.

4 Ma dubraed ni ngan tawfe nagraed; ara ruʼuned ko fare galasia. Ma yaed bugi gidiiʼ ni yaed ba kiiʼ nge mich roraed, mar pired riy ni aram rogon iyaen ko tomur, u fithikʼ e dodow ko falwok ko tinu fayleng banʼen nge denen roraed; ya dabra meybil gaed ngakʼ fare Somoel ni Got roraed.

5 Ere chiney e napʼan ni Mosiah e bay ko lung ma dar yoʼor gaed ni boed urngin fapi gidiiʼ rokʼ Got; ma bachan e pi togopluw ni maʼangech u fithikʼ fapi gidiiʼen e galasia, ma arame riyoʼor gaed.

6 Ya yibi buch nib yoʼor e piʼin nra uned ngoraed ni yaed ba sug ko safalʼfalʼ thin, ni ur moyed ni yaed boʼor u galasia, mar guyed rogon nge yoʼor i yaed e rinʼ e denen nib yoʼor; ere yibi tʼuf ni piʼin ni yaed be rinʼ e denen ni gidiiʼen e galasia, e fare galasia e nge fonow nagraed.

7 Me yibi buch nni fekraed iyaen nga pʼoewchen fapi priests, me fek raed fapi sensey i yaen ko fapi priest; ma fapi priest e rafeked raed iyaen ngakʼ Alma, niʼir e tolang ko priest.

8 Chiney e fare pilung i Mosiah e ke piiʼ ngakʼ Alma matʼawon ni nge gagyeg nag fare galasia.

9 Me yibi buch ni Alma e denang ko mang e nge rinʼ ngoraed; machane bayoʼor bogi gidiiʼ ni yaed e mich ko pinʼen ni kar rinʼed; arragon, pi gidiiʼ nem e rasakʼiy gaed ngar micheged e pi denen roraed nib yoʼor.

10 Chiney e dariy banʼen ni aray rogon ni ke buch bayay u lan e galasia; ere Alma e ri kirbaenʼ, me yoeg ni ngan fekraed nga pʼoewchen e pilung.

11 Me gaʼar ngakʼ fare pilung: Musap, baʼaray bogi gidiiʼ nib yoʼor ni kug feked iyib nga pʼoewchem, ni yoeg pi walagraed u galasia ni bay e kireb roraed; arragon, kan koelraed nib yoʼor mit e kireb ni kar ngongoliyed. Ma darur kal gaed ngaenʼraed ko pi denen roraed; ere kug feked raed iyib ngom, ni gur e ngam pufthin nagraed ko pi oloboch roraed.

12 Machane pilung i Mosiah e gaʼar ngakʼ Alma: Musap, dab gu pufthin nagraed; ere kug tay raed nga lan paʼam ni ngam pufthin nagraed.

13 Ere chiney e riki kirbaenʼ faʼanem i Alma; me yaen i meybil nge deʼeriy Somoel ko mang e nge rinʼ ko biney ni ke buch, ya be rus ni richey me rinʼ banʼen nib kireb u mit Got.

14 Me yibi buch u tomuren ni ke piiʼ ir ni poloʼ ngakʼ Got, me yib laman Somoel ngakʼ, nibe gaʼar:

15 Ke falanʼug ngom i gur, Alma, ma ke falanʼug ngakʼ e piʼin ni kan tawfe nagraed u lan farengi raen ku Mormon. Gur e ke falanʼug ngom ni bachan e kemus nigoʼ fapi thin rokʼ e tapigpig rog i Abinadi e murungʼag me mich anʼum nib gel.

16 Ma ke falanʼug ngoraed ni bachan e kemus nigoʼ thin e mu weliy ngoraed me michaenʼraed nib gel.

17 Ma ke falanʼug ngom ni bachan e gur e kam yarmiy e galasia nga fithikʼ e pi gidiiʼ ney; ma bay rapired ni yaed ba miyuluy, ma bay ra manged e gidiiʼ rog.

18 Arragon, ke falanʼug ko pi gidiiʼ ney ni ke mʼagaenʼraed ngay ni ngar feked fithingag nga dakeanraed; ya fithingag e yira piningraed u dakean; ma yaed e gidiiʼ rog.

19 Nge bachan e gur e kam meybil ngog ngam fitheg ni morngaʼagen fapi tadenen, ere ke falanʼug ngom.

20 Gur e tapigpig rog; ere gube michmich ngom u lan e mʼag ni gur e rayog ngom e yafos ni gubinfen; ma gur e ngam pigpig ngog mag yaen ngam rinʼ e pi muruwel rog u fithingag, mag kunuy nga taʼabang e saaf rog.

21 Ma chaʼ ni ra rungʼag e thin rog me fol riy e ramang saaf rog; ma ireram e chaʼ ni gimed rafek nga langgin e galasia rog, ma kug fek ngog.

22 Ya musap, ireray e galasia rog; ni chaʼ ni yira tawfe nag e thingar ni tawfe nag nga dakean e kalngaenʼ. Ma chaʼ ni gimed rafek e thingari michaenʼ nga fithingag; me mʼaganʼug ngay ni nggu nʼaegfan rokʼ.

23 Ya ri gag e chaʼ ni gura fek nga dakeanaeg e pi denen ko gidiiʼ nu fayleng; ya rigag e chaʼ ni gu sunmiy raed; nge rigag e chaʼ ni gura piiʼ ngakʼ e enra michaenʼ nge madaʼ ko tomur, bangi tagilʼ u baʼni matʼaw i paʼag.

24 Ya musap, u fithingag e yira piningraed riy; ma faʼanra yaed manngeg ma yaedra yib, ma bay tagilʼ raed ni gubinfen u baʼan matʼaw i paʼag.

25 Ma bay yibi buch u napʼan ni lʼagruw yay ni kan thoey e yabul ma fin arame bay yib e piʼin dar nanged gag ngar sakʼiy gaed nga pʼoewcheg.

26 Ma fin arame bay ra nanged ni gag fare Somoel ni Got roraed, ni gag e Tabiyul roraed; machane dab ni bayuliy raed.

27 Ma arame bay gog ngoraed ni dagnang raed; ma bay ranoed nga fithikʼ e fare nifiy ni gubinechuboeg nni gonopiy rogon ngan tay ni fan ngakʼ fare moʼoniyanʼ nge pi angel rokʼ.

28 Ere gube yoeg ngomed, ni chaʼ ni dabi rungʼag e thin rog, e ku arame chaʼ ni dab mu feked nga langgin e galasia rog, ya ire dab gufek ngog ko bin tomur e rran.

29 Ere gube yoeg ngom, Mman; ma enra denen nib togopluw ngog, mag pufthin nag u rogon e pi denen ni ke rinʼ; ma faʼanra pogofay nag e pi denen rokʼ ngom nge gag, me kal ngaenʼ u fithikʼ e yulʼyulʼ u lan gumʼirchaʼen, mag nʼaegfan rokʼ, ma ku bay gu nʼaegfan rokʼ.

30 Arragon, ma oren yay ni gidiiʼ rog e yaed be kalngaenʼ ma gura nʼaegfan roraed e pi ngongol roraed nib togopluw ngog.

31 Nge gimed, mang kuʼum nʼaegedfan e kireb romed romed; ya rriyulʼ ni gube yoeg ngomed, ni enra dabi nʼaegfan e kireb rokʼ beeʼ ni bugul yoror rokʼ me yoeg ni ke kalngaenʼ ko kireb rokʼ, e ireram e chaʼ ni ke fek ir iyaen nga fithikʼ e gafgow.

32 Ere chiney e gube yoeg ngom, Mman; ma chaʼ ni dabi kalngaenʼ ko pi denen rokʼ e ireram e chaʼ ni dabi un ko mathaʼeg nga fithikʼ e gidiiʼ rog; ma aray rogon ni ngam fol riy mag rinʼ e chiney iyaen e ngaram.

33 Me yibi buch u napʼan ni Alma e ke rungʼag e pi thin ney me yoloey nga butʼ ni nge yog ni paer rokʼ, ma nge yog ni nga i puf-oloboch ko fapi gidiiʼ ko fare galasia u rogon fapi motochiyel rokʼ Got.

34 Me yibi buch ni Alma e yaen nge pufthin nag fa piʼin ni kan koelraed ko kireb roraed, nrogon fare thin rokʼ Somoel.

35 Ma piʼin ni kar kalgaed ngaenʼraed ko denen roraed mar pogofay niged, e ireram e piʼin ni uneg raed ko mathaʼeg nga fithikʼ fapi gidiiʼen fare galasia;

36 Ma piʼin ni dar pogofay nag e pi denen roraed ma dabra kalgaed ngaenʼraed ko ngongol roraed nib kireb, e ireram e piʼin ni dan uneg raed ko mathaʼeg nga fithikʼ fapi gidiiʼen fare galasia, ma fithingraed e ni thang u babyoren e galasia.

37 Me yibi buch ni Alma e gagyeg nag gubin e pi gamʼing ko galasia; ma arame kur tabab niged bayay e paer u fithikʼ e gapas mar monʼog gaed nge felʼ rograed u fithikʼ e pi gamʼing ko galasia, me ere u ranoed ni yaed be kolchiyaʼ u mit Got, ma boʼor e piʼin ni be yib nga galasia, ma boʼor e piʼin ni yibe tawfe nagraed.

38 Ere chiney e gubin e pinnʼey ni rinʼ Alma nge pi taʼayuw rokʼ ni yaed e gaaʼ ko fare galasia, ni ranoed u fithikʼ e lʼagaenʼ, ni yaed be fil fare thin rokʼ Got u fithikʼ gubin banʼen, mar gafgow gaed ni gubin mite gafgow, ni gafgow nagraed e piʼin ni gathi yaed gidiiʼen fare galasia rokʼ Got.

39 Ere ra fonow niged pi walagraed; nge chongin e galasia ni gubin nni fonow nagraed, ko fare thin rokʼ Got ni yaed gubin, nra beeʼ ma be yanu rogon e pi denen rokʼ, ara rogon e pi denen ni ke rinʼ, ni ke chiyliy Got ngoraed ni ngar meybil gaed ni gubin e ngiyalʼ, mar oged e magaer u fithikʼ gubin banʼen.