1 Me yibi buch ni fapi gafgow ni un tay ko fare galasia, ni irinʼ fa piʼin ni de michaenʼraed ngakʼ Somoel e ri almarin me tabab gidiiʼen e galasia ko nonnon, ma yaed be nonnon ngakʼ e pi tiyugangʼ roraed ni aram fan; me chel fapi tiyugangʼ ko galasia ngar nonnon gaed nib togopluw ngakʼ Alma. Ere Alma e fek e re oloboch nem iyaen ngakʼ e pilung roraed, i Mosiah. Ere Mosiah e ra puruyʼ gaed e pi priest rokʼ.

2 Me yibi buch ni pilung i Mosiah e wereg e thin nge garar u dakean gaʼangin yang e binaw nib liyeg raed, ni be yoeg ni piʼin de michaenʼ e dab kur gathibthib niged e piʼin ni yaed gidiiʼen fare galasia rokʼ Got.

3 Ma arame bay ba motochiyel u gaʼangin fare galasia ni ngan chuweg e paʼan gafgow nigey u fithikʼraed, ni gubin e gidiiʼ ma nge paer ni taʼareb rogon;

4 Ni nga dabra paged e ufʼuf ara siʼufʼuf nge yibi gatheay e gapas roraed; ya nge gubin e gidiiʼ ma nge tʼufeg e chaʼ ni bugul yoror rokʼ ni boed ir, ni yaed be muruwel nga paʼraed ni fan ko paer roraed.

5 Arragon, nge gubin e pi priest nge sensey roraed ma ngar muruwel gaed nga paʼaraed ni fan ko paer roraed, u fithikʼ gubin banʼen ma kemus ni yigoʼ mʼar, ara gafgow e nge tileg raed; ere bachan e pinnʼey ni kar rinʼed, mar sug gaed ko murnguy rokʼ Got.

6 Ma arame tabab bayay e gapas nga dakean fare nam; ma gidiiʼ e arame tabab ko yoʼor iyaen, mar tabab gaed ko garar u dakean e fayleng, arragon, iyaen nga lan e leluʼoch nge lan e yimuch, nge lan e ngek nge lan e ngael, ma yaed be dumow naʼun ni gagangʼ u dakean e binaw ma yaed be ngongoliy lan e binaw ni gubin yang u dakean e nam.

7 Ma fare Somoel e paer roraed nge monʼog nagraed, mar manged bogi gidiiʼ nib yoʼor ma yaed ba falaʼab.

8 Chiney e fapi pagael ni fak Mosiah yaed ba maʼathuk nga fithikʼ fa piʼin ni de mich Somoel u wunʼraed; nge kureb e pi pagael ni fak Alma e ku bay u fithikraed, ni kanoeg Alma ngakʼ, ni fithingan e chitamangin; machane, i mang beeʼ nib moʼon nib kireb mab taliyoer ko liyos. Ma beeʼ nib moʼon nib yoʼor e thin ni mayoeg, mab yoʼor e sabaenbaen ni tay ngakʼ fapi gidiiʼ; ere boʼor e gidiiʼ ni wawliyraed ngar rinʼed e pi denen ni ma rinʼ.

9 Me yaeni paer ni be magawon nag e monʼog ko fare galasia rokʼ Got; ni be iring gumʼirchaʼen e pi gidiiʼ; ni be kʼaring e maleʼeg thin nga fithikʼ fapi gidiiʼ; me bing kanawoʼen ngakʼ fare toʼogor rokʼ Got ni nge gagyeg nag gelingin nga dakeanraed.

10 Ere chiney e yibi buch u napʼan ni be yaen ni nge gatheay fare galasia rokʼ Got, ya ki iyaen iyaen nib mamith ni yaed fapi pagael ni fak Mosiah ni yaed be gay rogon ni ngar gatheayed fare galasia, ma ngar wawliyed nga kireb fapi gidiiʼ rokʼ Somoel, nib togopluw ko fapi motochiyel rokʼ Got, ara fare pilung—

11 Ma boed ni kugog ngomed faram, napʼan ni yaed be yaen iyaen ni yaed be togopluw ngakʼ Got, musap gaed, fare angel rokʼ fare Somoel e yibi mʼug ngoraed; me yib nga butʼ ni gowa yib u fithikʼ e maguleng; me non nib gaaʼ laman ni boed gaʼangin lingan e dirraʼ, ni rurug e fayleng ni yaed be sakʼiy u dakean.

12 Ma ri balyangaenʼraed nib gel, ma arame ra awgaed riy nga butʼ, ma dar nanged fan e pi thin ni weliy ngoraed.

13 Machane ki non ngoraed nib gaaʼ laman bayay, nibe gaʼar: Alma, mu suwon ngalang mag sakʼiy nga mʼon, ya mangfan ni gabe gafgow nag fare galasia rokʼ Got? Ya fare Somoel e ke gaʼar: Ireray e galasia rog, ni bay gu tabolngin nag; ma dariy banʼen ni nra tileg, ma kemus ni yigoʼ denen ko gidiiʼ rog.

14 Ma ku bayay, fare angel e gaʼar: Musap, fare Somoel e ke rungʼag e pi meybil ko gidiiʼ rokʼ, nge ku pi meybil ko tapigpig rokʼ, ni Alma, niʼir e chitamam; ya ke meybil u fithikʼ e mich ni fan ngom ni gomanga yog ni ngam nang fare llowaenʼ ni morngaʼagen e tin riyulʼ; ere, aray fan ni kugub ni nggu micheg ngom fare gelingin nge matʼawon Got, ni nge yog, ni pi meybil ko pi tapigpig rokʼ e ngan piiʼ e fulweg riy u rogon e mich roraed.

15 Ere chiney e musap, rayog ni nge maerwaer u wunʼum fare Got? Ya musap, gathi lamag e ke rurug e fayleng? Ma kuda mur guyeg ni gubay u pʼoewchem? Ma gag e kan lʼugeg kugub rokʼ Got.

16 Ere chiney e gube gaʼar ngom: Mman, mag tay u wunʼum fare kalbus ntay ngakʼ e pi chitamam u lan fare binaw nu Helam, ngo lan fare binaw ku Nephi; mag tay u wunʼum u rogon fini felʼ e pinʼen ni rinʼ ni fan ngoraed; ya ur moyed u kalbus, me chuwegraed riy. Ere chiney e gube yoeg ngom, Alma, mman ngam rinʼ e tirom banʼen, ma dab kum gay rogon ni ngam gatheay fare galasia, ni nge yog nni piiʼ e fulweg ko pi meybil roraed, ma biney e dab kum rinʼ ni woed ni gomanga gabaʼadag ni ngam rinʼ ni bachan e ngan chuwegem riy.

17 Me yibi buch ni ireray e pi yu bugithin ni tomur ni yoeg fare angel ngakʼ Alma, ma arame yaen.

18 Ere chiney e Alma nge piʼin ni yaed bay rokʼ e ra awgaed bayay nga butʼ, ni ke balyangaenʼraed nib gel; ya kar guyed ba angel rokʼ Somoel nga oewchraed; me non nib gaaʼ laman ni boed gaʼangin i lingan e dirraʼ, ni rurug e fayleng; mar nanged ni dariy banʼen nra yog ni nge rurug e fayleng me murur ni gowa nge pil nge wer ma kemus ni yigoʼ fare gelingin Got e rayog riy.

19 Ere chiney e fare balyangaenʼ ni tay Alma e rib gel, me maʼay, ma dakiyog ni nge bing lʼugun; arragon, me mʼay gelingin, ni mus nga paʼ ma dakiyog ni nge mithmitheg; ere fa piʼin ni ur moyed rokʼ e rafeked, mar feked ya dakiyog ni nge ayuweg ir, ni aram rogon nge madaʼ ko ngiyalʼ ni kan moleg nga butʼ u pʼoewchen e chitamangin.

20 Min weliy ngakʼ e chitamangin gubin e pinʼen ni ke buch roraed; ma chitamangin e ri falfalaenʼ, ya manang ni ireray fare gelingin Got.

21 Ere yoeg ni nge moʼolung e gidiiʼ nga taʼabang ni gomanga yog ni ngar guyed ko mang e ke rinʼ fare Somoel ni fan ngakʼ fare pagael ni fak, nge fan ngakʼ fa piʼin ni ur moyed rokʼ.

22 Me yoeg ni pi priest e ngar mukun gaed nga taʼabang; mar tabab gaed i baley nag e abich roraed, ma ngar meybil gaed ngakʼ fare Somoel ni Got roraed ni nge bing lʼugun Alma, ni nge yog ni non, mangki yog ni sul gelingin paʼ nge ay—ni gomanga yog ni mab oewchen fapi gidiiʼ ngar guyed mar nanged morngaʼagen falʼngin nge rir rokʼ Got.

23 Me yibi buch u tomuren ni kar baley niged e abich roraed ma kar meybil gaed u langgin lʼagruw e rran nge lʼagruw e nepʼ, me sul gelingin paʼ nge ay Alma, me sakʼiy ngalang me tabab ko numon ngoraed, ni be yoeg ngoraed ni nge pagaenʼraed:

24 Ya, i gaʼar, kug kalnganʼug ko pi denen rog, ma ke bayuliyeg fare Somoel; musap gaed kan gargelegeg ko fare Kan ni Thothup.

25 Ma fare Somoel e gaʼar ngog: Dabi balyangaenʼ gubin e gidiiʼ, arragon, ni pumoʼon nge ppin, nge gubin e pi nam, nge pi mfen, nge pi thin, nge gidiiʼ, ya thingar ni gargeleg raed bayay; arragon, ngar manged fak Got, ni kar chuw gaed ko falwok nu fayleng nge rangi dodow ni gafgow, ngar thap gaed nga bangi dodow nib matʼaw, ni ke bayuliyraed Got, ma kar manged pagael nge ppin ni fak;

26 Ere aray rogon ni ngar manged boech e yafos nib bieʼch; ma faʼanra dab rrinʼed ni aray rogon, ma dabiyog ni ngar thap gaed nga gilʼilungun Got.

27 Gube yoeg ngomed, ni faʼanra gathi aray rogon, ma thingar ni chuwegraed; ma gumnang ni aray rogon, ya gag, ma ni guy rogon ni ngan chuwegeg.

28 Machane, tomuren ni kug waen u fithikʼ e gafgow ni kirbaenʼ, mug kalnganʼug ko ngiyalʼ ni ke chugur ni nggumʼ, ma fare Somoel e guy u fithikʼ e murnguy rokʼ, nib tʼuf ni nge chuwegeg u fithikʼ ba nifiy ni manechubog, mug mang fak Got.

29 Yaʼel rog e kan bayuliy ke chuw u fithikʼ e gafgow ni amith nge mʼagan e denen. ʼUg moy u muloew nib lumor; ma chiney e kug guy fare tamilang rokʼ Got ni rib felʼ. Yaʼel rog e pirʼeg e gafgow ni amith ni gubinfen; machane kan chuwegeg u fithikʼ, ere yaʼel rog e ke chuw u fithikʼ e amith.

30 Kug fek yathin e Tabiyul rog, mug keruʼuy e pinʼen ni weliy e pi chitamangdaed; machane chiney, nra yog ni ngar guyed ni ra yib, ma kubay u waenʼ gubin e gidiiʼ nge pinʼen ni sunmiy, ma ra mʼug ngakʼ gubin e gidiiʼ.

31 Arragon, ma gubin e gidiiʼ ma ra ragbug nga butʼ, nge gubin e yunmon ma ra pogofay u pʼoewchen. Arragon, ko bin tomur e rran, u napʼan ni gubin e gidiiʼ ni yaedra sakʼiy nge pufthin nagraed, ma fin arame bay roeged ni ir Got; ma fin arame bay roeged, ni piʼin ni ur pired u fayleng ni de michaenʼraed ngakʼ Got, e ke dugil ba gechig ni gubinechubog nib matʼaw nga dakeanraed; ma bay ra daʼadaʼ gaed, ma yaed be tʼon, mar lulʼ gaed nga lan dagurraed ni murus nge tamraʼ u tanggin e gachin ko chachngar rokʼ.

32 Ere chiney e yibi buch ni Alma e tabab ko ngiyalʼ ney iyaen nga mʼon i fil e machib ko fapi gidiiʼ, nge fa piʼin ni ur moyed rokʼ Alma u napʼan ni mʼug fare angel ngoraed, ni yaed be yaen u dakean e nam ni gaʼangin yang, ni yaed be weliy ko gubin e gidiiʼ e pinʼen ni kar rungʼaged ma kar guyed, ma yaed be machib nag fare thin rokʼ Got u fithikʼ e gafgowaenʼ, ni be gafgow nagraed e piʼin ni dariy e mich roraed, mar mʼaed nga paʼ boʼor iyaed.

33 Machane yug aram rogon gubin e pinnʼey, ma bagaʼ e gapasaenʼ nra piiʼed ko galasia, ma yaed be gelnag e mich ko pi chongin e galasia, ma yaed be piiʼ e athamgil nga laniyaenʼraed u fithikʼ e gumʼaenʼ nge muruwel nib gel ni ngar fol gaed ko pi motochiyel rokʼ Got.

34 Ma aningeg i yaed riy e fapi pagael ni fak Mosiah; ni fithingraed e Ammon, nge Aron, nge Omner, nge Himni; ireray fithingan fapi pagael ni fak Mosiah.

35 Mar milekag gaed u dakean gaʼangin yang fare binaw nu Zarahemla, ngu fithikʼ gubin fapi gidiiʼ ni yaed bay u tane lung ko fare pilung i Mosiah, ni ri yaed be athamgiliy rogon ni ra yog ni ngar yalʼuweged gubin e pi gafgow ni kar tayed ko fare galasia, ni yaed be pogofay nag gubin e pi denen roraed, ma yaed be weliy gubin e pinʼen ni kar guyed, ma yaed be weliy fan fapi prophecy nge pi chep nib thothup ngakʼ gubin e piʼin ni yaed baʼadag ni ngar rungʼaged.

36 Ere ra manged talin e muruwel u paʼ Got ni ngar feked e gidiiʼ nib yoʼor iyib ko fare llowaenʼ ni morngaʼagen e tin riyulʼ, arragon, ni ngar nanged morngaʼagen fare Tabiyul roraed.

37 Ma ri falaenʼ Somoel ngoraed! Ya ra weliyed ni bay e gapas; ma yaed be weliy e pi thin nib felʼ nib mangil; ma yaed be yoeg ni fare Somoel e ire suwon e lung.