1 ’E i teienei, i muri a’era, ’ua tupu rahi ihora te hāmani-’ino-ra’a ’o tei tu’uhia mai i ni’a iho i te ’ēkālesia ’e te feiā fa’aro’o ’ore, ’e ’ua ha’amata ihora tō te ’ēkālesia i te amuamu ’e i te mutamuta i tō rātou feiā fa’atere nō ni’a i te reira ; ’e ’ua amuamu atu rātou ia Alama. ’E ’ua tu’u atu Alama i te reira i mua i tō rātou ari’i ra ia Mosia. ’E ’ua paraparau atu ra Mosia i tōna mau tahu’a.

2 ’E i muri a’era, ’ua fa’atae atu ra te ari’i ra ’o Mosia i te hō’ē fa’auera’a ē ’ati noa a’e te fenua ē, ’eiaha roa te hō’ē ta’ata fa’aro’o ’ore e hāmani ’ino i te mau ta’ata nō te ’ēkālesia a te Atua.

3 ’E tei roto ho’i i te mau ’āma’a ato’a nō te ’ēkālesia te tahi fa’auera’a ’eta’eta, ’oia ho’i, ’eiaha roa te hāmani ’ino ’ia tupu i rotopū ia rātou, ’ia vai rā te ’aifāitora’a i rotopū i te mau ta’ata ato’a ;

4 ’E ’ia ’ore te te’ote’o ’e te fa’ateitei ’ia ha’ape’ape’a i tō rātou hau ; ’e ’ia faariro te ta’ata tāta’itahi i tōna ta’ata tupu mai iāna iho ; i te ravera’a i te ’ohipa i tō rātou iho rima nō te tauturu ia rātou iho.

5 ’Oia ïa, ’ia rave tō rātou mau tahu’a ato’a ’e tō rātou mau ’orometua ato’a i te ’ohipa i tō rātou iho rima nō te tauturu ia rātou iho i te mau taime ato’a, maori rā i te tau i ro’ohia ai rātou i te ma’i ’e te veve rahi ; ’e nō te ravera’a i teie mau mea i fāri’i ai rātou i te maita’i o te Atua.

6 ’E ’ua tupu fa’ahou te hau rahi i ni’a i te fenua ; ’e ’ua rahi roa ato’a ho’i te mau ta’ata, ’e ’ua ha’amata rātou i te purara nā ni’a i te fenua nei, ’oia ïa, i te pae apato’erau ’e te pae apato’a, ’e i te pae hiti’a o te rā ’e te pae tō’o’a o te rā, i te patura’a i te mau ’oire rarahi ’e te mau ’oire ri’i i roto i te mau tufa’a e maha ato’a o te fenua nei.

7 ’E ’ua aroha mai ’e ’ua ha’amanuia mai te Fatu ia rātou, ’e ’ua riro atu ra rātou ’ei feiā rahi ’e te tao’a rahi.

8 I teienei ’ua tai’ohia te mau tamaiti a Mosia i rotopū i te feiā ti’aturi ’ore ; ’e ’ua tai’ohia ho’i te hō’ē o te mau tamaiti a Alama i rotopū ia rātou ra, ’e ’ua ma’irihia tōna i’oa ’o Alama, te i’oa o tōna ra metua tāne ; ’āre’a rā ’ua riro ’oia ’ei ta’ata parauti’a ’ore rahi ’e te ha’amori ’īdolo. ’E e ta’ata parau rahi ho’i ’oia, ’e ’ua parau atu ’oia i te mau parau tāvaimanino rahi i te mau ta’ata ; nō reira ’ua arata’i ’ē atu ’oia i te mau ta’ata e rave rahi ’ia rave i te mau ’ohipa ’ī’ino mai tāna i nā reira.

9 ’E ’ua riro ’oia ’ei ta’ata ha’ape’ape’a rahi i te tupura’a o te ’ēkālesia a te Atua ; i te fa’afāriu-’ē-ra’a atu i te ’ā’au o te mau ta’ata ; ’e i te fa’atupura’a i te mārōra’a rahi i rotopū i te mau ta’ata ; ’e i te hōro’ara’a atu i te rāve’a e roa’a ai te mana i te ’enemi o te Atua i ni’a iho ia rātou.

10 ’E i teienei, i muri a’era, ’a haere noa ai ’oia nō te ha’amou i te ’ēkālesia a te Atua, ’e ’ua haere huna ho’i ’oia ’e te mau tamaiti a Mosia ato’a ma te ’imi i te rāve’a ’ia ha’amou i te ’ēkālesia, ’e ’ia arata’i ’ē atu ho’i i te mau ta’ata o te Fatu, ma te ha’apa’o ’ore i te mau fa’auera’a a te Atua, ’e i tā te ari’i ato’a ho’i—

11 ’E mai tā’u i parau a’enei ia ’outou, ’a haere noa ai rātou i te pāto’ira’a atu i te Atua, inaha, ’ua fā mai ra te hō’ē melahi a te Fatu ia rātou ; ’e ’ua pou mai ’oia mai te mea ra ē, nā roto i te ata ; ’e ’ua parau mai ra ’oia mai te reo o te pātiri ra, ’e ’ua ’āueue te fenua i ti’ahia e rātou ra ;

12 ’E ’ua tupu tō rātou māere rahi, ’e ’ua ma’iri ihora rātou i raro i te fenua, ’e ’aita ho’i rātou i māramarama i te mau parau tāna i parau mai ia rātou ra.

13 ’Āre’a rā ’ua pi’i fa’ahou mai ra ’oia, i te nā-’ō-ra’a mai ē : E Alama, ’a ti’a mai na ’e ’a haere mai na, nō te aha ho’i ’oe i hāmani ’ino ai i te ’ēkālesia a te Atua ? Tē nā ’ō mai ra ho’i te Fatu : Nā’u teie ’ēkālesia, ’e nā’u ïa e fa’ati’a i te reira ; ’e ’aita roa te hō’ē mea e ha’amōrohi i te reira, maori rā te ’ōfatira’a ture a tō’u ra mau ta’ata.

14 ’E ’ua parau fa’ahou mai ra te melahi : Inaha, ’ua fa’aro’o a’enei te Fatu i te mau pure a tōna ra mau ta’ata, ’e te mau pure ato’a a tōna ra tāvini ’o Alama, tō ’oe metua tāne ; ’e ’ua pure ho’i ’oia nō ’oe ma te fa’aro’o rahi, ’ia arata’ihia ’oe i te ’ite i te parau mau ; nō reira i haere mai ai au nō te fa’a’ite atu ia ’oe i te mana ’e te ha’amanara’a o te Atua, ’ia pāhonohia te mau pure a tōna ra mau tāvini mai te au i tō rātou ra fa’aro’o.

15 ’E i teienei, inaha, e ti’a ānei ia ’oe ’ia pāto’i mai i te mana o te Atua ? Inaha ho’i, ’aita ānei tō’u nei reo i fa’a’āueue i te fenua ? ’E ’aita ānei ’oe i ’ite mai iā’u nei i mua i tō ’oe nā aro ? ’E ’ua tonohia mai au nō ’ō mai i te Atua ra.

16 I teienei, e parau atu vau ia ’oe na : ’A haere, ’e ’a ha’amana’o i te fa’atītīra’ahia tō ’oe mau metua i te fenua ra nō Helama, ’e i te fenua ra ho’i nō Nephi ; ’e ’a ha’amana’o ho’i i te mau mea rarahi tāna i rave nō rātou ra ; i vai na ho’i rātou i roto i te fa’atītīra’a, ’e ’ua fa’aora ’oia ia rātou. ’E i teienei, e parau atu vau ia ’oe, e Alama, ’a haere i tō ’oe haere’a, ’e ’eiaha e ’imi fa’ahou i te rāve’a ’ia ha’amou i te ’ēkālesia, ’e ’ia pāhonohia tā rātou mau pure, noa atu ē ’ua hina’aro ’oe ’ia ti’avaruhia ’oe.

17 ’E i teienei, i muri a’era, ’o teie te mau parau hope’a tā te melahi i parau mai ia Alama, ’e ’ua haere ’ē atu ra ’oia.

18 ’E ’ua ma’iri fa’ahou ihora Alama ’e te mau ta’ata i pīha’i iho iāna i raro i te fenua, ’e ’ua rahi roa tō rātou māere ; nō te mea ’ua ’ite tō rātou iho mata i te hō’ē melahi a te Fatu ; e mai te pātiri ho’i tōna reo, ’o tei fa’a’āueue i te fenua ; ’e ’ua ’ite ho’i rātou ē, ’aita roa te hō’ē a’e mea, maori rā nā te mana o te Atua i fa’a’āueue ’e i fa’arurutaina i te fenua, mai te mea ra ē, tē ’afā ra te reira.

19 ’E i teienei nō te rahi o tō Alama mata’u ’ua vāvāhia ’oia, ’e ’aita i ti’a iāna ’ia hāmama i tōna vaha ; ’oia ïa, ’ua paruparu roa a’era ’oia, ’e ’aita i ti’a iāna ’ia hā’uti’uti i tōna rima ; nō reira ’ua ravehia ’oia e te mau ta’ata i pīha’i iho iāna, ’e ’ua hōpoihia atu ra ma te paruparu rahi, ē tae noa atu ’ua tu’uhia ’oia i mua i tōna ra metua tāne.

20 ’E ’ua fa’a’ite atu ra rātou i tōna metua tāne i te mau mea ato’a i tupu i ni’a ia rātou ; ’e ’ua ’oa’oa ihora tōna metua tāne, nō te mea ’ua ’ite ’oia ē, nā te mana o te Atua te reira.

21 ’E ’ua ha’aputuputu ’āmui mai ra ’oia i te mau ta’ata e rave rahi ’ia ’ite rātou i tā te Fatu i rave i tāna ra tamaiti, ’e ’ia rātou ato’a ho’i i pīha’i iho iāna ra.

22 ’E ’ua ha’aputuputu ’āmui mai ra ’oia i te mau tahu’a ; ’e ’ua ha’amata ihora rātou i te ha’apae i te mā’a, ma te pure i te Fatu tō rātou Atua, ’ia fa’ahāmama mai ’oia i te vaha o Alama, ’ia ti’a iāna ’ia paraparau mai, ’e ’ia fa’a’eta’etahia tōna ’āvae—’ia ’ara’ara te mata o te mau ta’ata ’e ’ia ’ite ho’i rātou i te maita’i ’e te hanahana o te Atua.

23 ’E i muri a’era, i muri iho i tō rātou ha’apaera’a i te mā’a ’e i te purera’a nō te ārea e piti mahana ’e e piti ru’i te maoro, ’ua fāri’i ihora tō Alama nā ’āvae i te pūai, ’e ’ua ti’a a’era ’oia i ni’a ’e ’ua ha’amata ihora i te parau atu ia rātou, ma te ani atu ia rātou ’ia fa’aitoito :

24 ’E ’ua nā ’ō atu ra ho’i ’oia ia rātou, ’Ua tātarahapa vau i tā’u mau hara, ’e ’ua fa’aorahia ho’i e te Fatu ; inaha ’ua fānauhia vau i te Vārua.

25 ’E ’ua parau mai ra te Fatu iā’u : ’Eiaha e māere i te mea ’ia fānau-fa’ahou-hia te mau ta’ata ato’a e ti’a ai, ’oia ïa, te mau tāne ’e te mau vahine, ’e tō te mau nūna’a ato’a, ’e tō te mau ’ōpū ato’a, ’e tō te mau reo ato’a, ’e tō te mau ta’ata ato’a ; ’oia ïa, ’ia fānauhia i te Atua ra, ’ia tauihia mai tō rātou huru tāhuti ’e te huru hi’ara’a, ’ei huru parauti’a, ’ia fa’aorahia e te Atua, ’ia riro ’ei mau tamari’i tamāroa ’e ’ei mau tamari’i tamāhine nāna.

26 ’E nā roto i te reira, e riro rātou ’ei mau ta’ata fa’a’āpīhia ; ’e ’ia ’ore rātou ’ia nā reira, e ’ore roa rātou e fāri’i i te bāsileia o te Atua.

27 Tē parau atu nei au ia ’outou na, ’ia ’ore ’ia nā-reira-hia, e hurihia rātou i rāpae ; ’e ’ua ’ite ho’i au i te reira, nō te mea i fātata vau i te hurihia i rāpae.

28 ’Āre’a rā, i muri iho i tō’u haerera’a nā roto i te mau ’ati rahi e rave rahi, ’e ’ia tātarahapa ho’i au ’e ’ia fātata i te pohe, ’ua ti’a i te Fatu nā roto i tōna aroha ’ia haru mai iā’u mai roto mai i te auahi ’ama mure ’ore, ’e ’ua fānauhia vau i te Atua ra.

29 ’Ua fa’aorahia tō’u vārua i te au ’ava’ava ’e te mau ru’uru’ura’a nō te mau ’ohipa ’ī’ino ra. Tei roto ho’i au i te ’ābuso pōiri ta’ota’o roa ra ; i teienei rā tē ’ite nei au i te māramarama māere o te Atua. ’Ua ha’amāuiuihia tō’u vārua i te māuiui mure ’ore ; ’ua haruhia mai rā vau, ’e ’aita tō’u vārua e māuiui fa’ahou.

30 ’Ua pāto’i na vau i tō’u Tāra’ehara, ’e ’ua huna na ho’i au i tei parauhia mai e tō tātou ra mau metua ; i teienei rā, ’ia ’ite rātou ē, e tae mai ’oia, ’e tē ha’amana’o nei ā ’oia i te mau ta’ata ato’a tāna i hāmani ra, ’e e fa’a’ite mai ’oia iāna iho i te mau ta’ata ato’a.

31 ’Oia ïa, e pi’o te mau turi ato’a i raro, ’e e fā’i ho’i te mau vaha ato’a i mua iāna ra. ’Oia ïa, ’ia tae i te mahana hope’a ra, ’ia ti’a mai te mau ta’ata ato’a ’ia ha’avāhia e ana ra, ’ei reira rātou e fā’i ai ē, ’o ’oia te Atua ; ’ei reira ato’a ho’i rātou ’o tei ’ore i ’ite i te Atua i teie nei ao, e fā’i ai ē, ’ua tano i te ha’avāra’a nō te fa’autu’ara’a mure ’ore ’ia ma’iri mai i ni’a iho ia rātou ; ’e e ’āueue, e rurutaina, ’e e fa’a’ōtemutemu ho’i rātou i raro a’e i te hi’ora’a a tōna mata ’imi māite ra.

32 ’E i teienei, i muri a’era, ’ua ha’amata ihora Alama ’e rātou ato’a ho’i tei pīha’i iho ia Alama i te tau i fā mai ai te melahi ia rātou ra, i te ha’api’i atu i te mau ta’ata ; i te haerera’a ē ’ati noa a’e te fenua ato’a, i te fa’a’itera’a atu i te mau ta’ata ato’a i te mau mea tā rātou i fa’aro’o ’e i hi’o, ’e i te poro-haere-ra’a i te parau a te Atua ma te ’ati rahi, ’e ’ua hāmani-’ino-rahi-hia rātou e te feiā ti’aturi ’ore, ’e ’ua papa’ihia mai ho’i e taua mau ta’ata e rave rahi ra.

33 ’E noa atu ā teie mau mea nei, ’ua tāmāhanahana rahi rātou i te ’ēkālesia, i te ha’apūaira’a i tō rātou fa’aro’o, ’e i te tītaura’a atu ia rātou ma te fa’a’oroma’i rahi ’e te māuiui rahi ’ia ha’apa’o i te mau fa’auera’a a te Atua.

34 E to’omaha ho’i o rātou e mau tamaiti ïa nā Mosia ; ’e tō rātou mau i’oa ’o Amona, ’e ’o Aarona, ’e ’o Omonera, ’e ’o Himeni ; ’o teie ïa te mau i’oa o te mau tamaiti a Mosia.

35 ’E ’ua haere rātou ē ’ati noa a’e te fenua nō Zarahemela, ’e i rotopū i te mau ta’ata ato’a i raro a’e i te fa’aterera’a a te ari’i ra ’o Mosia ; i te ’imi-māite-ra’a ’ia fa’a’ore i te mau ’ino tā rātou i rave i te ’ēkālesia ; i te fā’ira’a i tā rātou mau hara ato’a, i te fa’a’itera’a atu i te mau mea tā rātou i ’ite, ’e i te ha’amāramaramara’a atu ho’i i te mau tohura’a ’e te mau pāpa’ira’a mo’a i te mau ta’ata ato’a i hina’aro ’ia fa’aro’o mai ia rātou ra.

36 ’E nō reira ’ua riro ihora rātou ’ei mau mauha’a i roto i te rima o te Atua i te arata’ira’a i te mau ta’ata e rave rahi i te ’ite i te parau mau, ’oia ïa, i te ’ite i tō rātou Tāra’ehara.

37 ’E ’ua ha’amaita’ihia rātou ! Nō te mea ’ua fa’a’ite atu rātou i te parau hau ; ’ua fa’a’ite atu ho’i rātou i te mau parau maita’i nō te maita’i ; ’e ’ua fa’a’ite atu ho’i rātou i te mau ta’ata ē, tē fa’atere ari’i nei te Fatu.