1 I teienei, i muri a’era, ’ia oti a’era teie mau mea i te ravehia ’e te mau tamaiti a Mosia ra, ’ua rave ihora rātou i te tahi pae iti o te mau ta’ata ’e ’ua ho’i fa’ahou atu ra i tō rātou metua tāne, i te ari’i, ’e ’ua hina’aro rātou iāna ’ia fa’ati’a mai ia rātou ’ia haere atu rātou ’e teie mau ta’ata tā rātou i mā’iti, i ni’a i te fenua ra nō Nephi, ’ia ti’a ia rātou ’ia a’o atu i te mau mea tā rātou i fa’aro’o, ’e ’ia fa’a’ite atu ho’i i te parau a te Atua i tō rātou ra mau taea’e, i te mau ’āti Lamana—

2 Penei a’e ’o te fa’afāriu mai rātou ia rātou i te ’ite i te Fatu tō rātou Atua, ’e ’ia ’ite ho’i rātou i te mau ’ohipa ’ī’ino a tō rātou ra mau metua ; ’e penei a’e ho’i ’o te fa’a’orehia tō rātou ’ino’ino i te mau ’āti Nephi, ’e ’ia fa’afāriuhia mai ho’i rātou ’ia ’oa’oa i te Fatu tō rātou Atua, ’e ’ia riro rātou ’ei mau hoa te tahi i te tahi, ’e ’ia fa’a’orehia te mau mārōra’a i ni’a i te mau fenua ato’a tā te Fatu tō rātou Atua i hōro’a mai ia rātou.

3 I teienei ’ua hina’aro rātou ’ia a’ohia atu te parau nō te fa’aorara’a i te mau ta’ata ato’a, ’aita roa ho’i rātou i hina’aro ’ia pohe te vārua o te hō’ē noa atu ta’ata ; ’oia ïa, ’ia mana’o rātou nō ni’a i te hō’ē vārua ta’ata ’o tē fa’a’oroma’i i te māuiui hope ’ore, ’ua fa’a’āueue ïa ’e ’ua fa’arurutaina te reira ia rātou.

4 ’E ’ua nā reira te Vārua o te Fatu i te ’ohipa i ni’a iho ia rātou, e mau ta’ata hara ’ino roa ho’i rātou. ’E nō te aroha mure ’ore o te Fatu i fa’aora noa ai ’oia ia rātou ; ’āre’a rā ’ua fāri’i tō rātou vārua i te mamae rahi nō tā rātou mau ’ohipa ’ī’ino, i te mamae rahi ’e te mata’u ’o te ti’avaruhia rātou i rāpae ē a muri noa atu.

5 ’E i muri a’era ’ua tītau māite atu ra rātou i tō rātou metua tāne i te mahana e rave rahi ’ia fa’ati’a mai ia rātou ’ia haere atu i te fenua ra nō Nephi.

6 ’E ’ua haere atu ra te ari’i ra ’o Mosia ’e ’ua ani atu ra i te Fatu, mai te mea e mea ti’a iāna ’ia tu’u atu i tāna mau tamari’i tamāroa ’ia haere atu i rotopū i te mau ’āti Lamana nō te a’o haere i te parau.

7 ’E ’ua parau mai ra te Fatu ia Mosia : ’A tu’u ia rātou ’ia haere atu, ’e e rave rahi ta’ata ’o tē ti’aturi i tā rātou mau parau, ’e e roa’a ia rātou te ora mure ’ore ; ’e nā’u ho’i e fa’aora i tā ’oe mau tamari’i tamāroa i te rima o te mau ’āti Lamana.

8 ’E i muri a’era, ’ua fa’ati’a atu ra Mosia ia rātou ’ia haere ’e ’ia rave mai te au i tā rātou anira’a.

9 ’E ’ua tere atu ra rātou i roto i te mēdēbara, nō te haere atu e a’o haere i te parau i rotopū i te mau ’āti Lamana ; ’e e fa’a’ite atu vau i te ’ā’amu nō tā rātou mau ’ohipa i rave i muri nei.

10 I teienei ’aita tā te ari’i ra ’o Mosia e tamari’i tamāroa nō te hōro’a atu i tōna bāsileia, nō te mea ’aita roa te hō’ē o tāna mau tamari’i tamāroa i hina’aro ’ia fāri’i i te bāsileia.

11 Nō reira ’ua rave ’oia i te mau pāpa’a parau i ’ō’otihia i ni’a i te mau ’api veo, ’e te mau ’api ho’i a Nephi, ’e te mau mea ato’a ho’i tāna i ha’apa’o ’e i fa’aherehere mai te au i te mau fa’auera’a a te Atua, i muri iho i te ’īritira’ahia ’e te pāpa’ira’ahia te mau pāpa’a parau i ’ō’otihia i ni’a i te mau ’api ’auro ra, ’e tei ’iteahia ho’i e te mau ta’ata o Limehi ra, ’e tei hōro’ahia ho’i iāna e te rima o Limehi.

12 ’E i nā reira ’oia nō te hina’aro rahi o tōna ra mau ta’ata ; ’e ’ua hina’aro mau ho’i rātou ’ia ’ite i te parau nō nō ni’a i taua mau ta’ata i ha’amouhia.

13 ’E i teienei ’ua ’īriti ’oia i te reira nā roto i te tauturura’a a nā ’ōfa’i e piti i ha’amauhia i ni’a i nā hiti e piti o te vaira’a menemene ra.

14 I teienei ’ua fa’aineinehia teie mau mea mai te mātāmua mai ā, ’e ’ua tu’uhia mai ho’i mai terā u’i i terā u’i, ’ei rāve’a nō te ’īritira’a i te mau reo.

15 ’E ’ua ha’apa’ohia te reira ’e ’ua fa’ahereherehia ho’i e te rima o te Fatu, ’ia ti’a iāna ’ia fa’a’ite atu i te mau ta’ata ato’a ’o tē pārahi i ni’a i te fenua i te mau ’ohipa ’ī’ino ’e te mau ’ohipa vi’ivi’i a tōna ra mau ta’ata.

16 ’E ’o te ta’ata ho’i tei iāna teie mau mea ra, ’ua parauhia ïa ’oia e hi’o, mai te au i te peu i te tau tahito ra.

17 I teienei i muri iho i tō Mosia ’īritira’a i teie mau pāpa’a parau, inaha, ’ua tuatāpapa mai te reira i te ’ā’amu nō te mau ta’ata i ha’amouhia, mai te tau i ha’amouhia ai rātou ra, ē tae roa atu i mua i te patura’ahia o te pare rahi ra, i te tau i fa’ahuru ’ē ai te Fatu i te reo o te mau ta’ata ’e ’ua ha’apurarahia rātou i te ātea nā roto i te ao ato’a nei, ’oia ïa, ’e mai reira ē tae roa atu i te hāmanira’ahia o Adamu.

18 I teienei ’ua fa’atupu teie ’ā’amu i te ’oto rahi i roto i te mau ta’ata o Mosia, ’oia ïa, ’ua ’ī roa rātou i te ’oto ; ’āre’a rā ’ua hōro’a mai te reira i te ’ite rahi ia rātou, ’e nā roto ho’i i te reira ’ua pōpou rātou.

19 ’E pāpa’ihia teie ’ā’amu i muri nei ; inaha ho’i, e mea ti’a roa ’ia ’ite te mau ta’ata ato’a i te mau mea i pāpa’ihia i roto i teie nei ’ā’amu.

20 ’E i teienei, mai tā’u i parau iho nei ia ’outou, ’ia oti a’era teie mau mea i te ravehia e te ari’i ra ’o Mosia, ’ua rave ihora ’oia i te mau ’api veo, ’e te mau mea ato’a i pāpa’ihia e ana ra, ’e ’ua tu’u atu ra ia Alama, te tamaiti a Alama ra ; ’oia ïa, te mau pāpa’a parau ato’a, ’e nā ’īriti parau ho’i, ’e ’ua tu’u atu ra iāna ra, ’e ’ua fa’aue atu ra iāna ’ia ha’apa’o ’e ’ia fa’aherehere i te reira, ’e ’ia ha’apa’o ato’a ’oia i te pāpa’a parau nō te mau ta’ata, ’e ’ia tu’u i te reira i terā u’i ’e i terā u’i, mai tei tu’uhia mai ra mai te tau i fa’aru’e ai Lehi i Ierusalema ra.