1 Me yibi buch u tomuren ni ke rinʼ Mosiah nrogon ni ke motochiyel nag e chitamangin ngakʼ, me yoloey bbabyor nge garareg u dakean farengi nam ni gaʼangin yang, ni nge mukun nga taʼabang gubin e gidiiʼ ko farengi nam ni gaʼangin yang, ni nga ranoed ko fare temple ngar rungʼaged fapi thin niʼir e nge weliy pilung i Benjamin ngoraed.

2 Ma rib yoʼor e piʼin ni ke mukun, ni ri yaed boʼor ni dakiyog i thiʼeg raed; ya kar riyoʼor riyoʼor gaed ni kar suguyed dakean farengi nam.

3 Ma kur feked e tin nib ilal i fak e pi gamanman roraed, ni gomanga yog nra piiʼed ni maligach nge gamanman ni kan urufiy ni maligach u rogon fare motochiyel rokʼ Moses;

4 Nge ku arragon ni gomanga ki yog nra pininged e magaer ngakʼ fare Somoel ni Got roraed, niʼir e ke fekraed iyib nga wuruʼ fare nam nu Jerusalem, nge ku ire ke chuwegraed u paʼ e pi toʼogor roraed, ma ke melʼeg e pumoʼon nib matʼaw ni nge mang sensey roraed, nge ku beeʼ nib moʼon nib matʼaw ni nge mang pilung roraed, niʼir e ke yognag e gapas nga lan fare nam nu Zarahemla, nge ku ire ke fil ngoraed ni ngar fol gaed ko pi motochiyel rokʼ Got, ni gomanga ra falfalaenʼ gaed me yog ni ngar suggaed ko murnguy nge adag roraed ngakʼ Got nge gubin e gidiiʼ.

5 Me yibi buch u napʼan ni ra baed ko fare temple, mar nʼufed e pi tent roraed ngalang nge liyeg, ni gubin e gidiiʼ nra beeʼ ma rogon e birokʼ e tabinaew, ni ppin rokʼ, nge pi pagael ni fak, nge pi rugod ni fak, nge pi pagael ni fakraed, nge pi rugod ni fakraed, ni tabab ko chaʼ ni nganniʼ nge madaʼ ko en nib wayin, gubin e tabinaew nra reb ma ir rokʼ.

6 Mar nʼufed e pi tent roraed ngalang nge liyeg fare temple, ni rabeeʼ make tay e tent rokʼ nib sap e mab riy ko fare temple, ni nge yog riy ni ngar pired u lan e tent roraed mar rungʼaged fapi thin niʼir e nge weliy pilung i Benjamin ngoraed;

7 Ya yaed ba ulung i gidiiʼ nri yaed bayoʼor ni dabiyog ni ngar taw gaed nga langgin e temple ni nge fil pilung i Benjamin banʼen ngoraed, ere guy rogon ni ngan nʼuf ba gilʼedamit ngalang, ni nge yog riy ni rungʼag e pi gidiiʼ rokʼ e pi thin ni nge yoeg ngoraed.

8 Me yibi buch ni tabab ko numon ngakʼ e pi gidiiʼ rokʼ u pʼebugul fare gilʼedamit; ma dabiyog ni nge yaed gubin mar rungʼaged e pi thin rokʼ ni bachan e ka yigi gaaʼ ulung fapi gidiiʼ; ere guy rogon ni pi thin nibe yoeg e ni yoloey ngan piiʼ nge yaen ngakʼ e piʼin ni dar taw laman ngoraed, ni nge yog niki thap e thin rokʼ ngoraed.

9 Ma ireray e pi thin niʼir e weliy me guy rogon ni ngan yoloey, nibe gaʼar: Pi walageg, gimed gubin e piʼin ni kam kunuyed gimed nga taʼabang, gimed e piʼin ni rayog ni ngam rungʼaged e pi thin rog niʼir e bay gu weliy ngomed e biney e rran; ya gathi kug piningmed ni ngam baed ngaray ni ngam dariy fan niged e pi thin ni nggu weliy, ya ngam motoyil gaed ngog, mi gimed bing telmed ni nge yog ni ngam rungʼaged, nge gumʼirchaʼ romed ni nge yog ni ngam nanged fan, nge laniyaenʼmed ni gomanga yog ni ngam guyed e pi riyulʼ rokʼ Got nib miith.

10 Gathi kug chiyliy ngomed ni ngam baed ngaray ni ngam rus gaed ngog, ara ngam lemniged ni gag beeʼ ni kug thum nga wuruʼ u rogon e gidiiʼ.

11 Machane I gag e taʼab rogog ngomed, ni bay rog gubin mite moʼowaer ko dowef nge tafnaey; machane ke melʼegeg e pi gidiiʼ ney, ma ke gapgep nigeg e chitamag, ma ke dugliyeg Somoel u paʼ ni thingar gu mang mitethin nge pilung ko pi gidiiʼ ney; maki i tayeg ma be ayuwegeg nga gelingin ni dariy e puluw riy, ni nggu pigpig ngomed u poloʼ fanag pasig, nge tafnaey rog, nge gelingig ni ke piiʼ Somoel ngog.

12 Gube yoeg ngomed ni faʼanra kug tay u lan e pi rran rog ni nggu pigpig ngomed, ni aram rogon iyib nge madaʼ ko ngiyalʼ ney, ma dawor gu ning e gol fa silber ara yugub mit e falaʼab ngomed;

13 Ara gupag ngan koelmed ngan taymed nga langgin e kalbus u tanggin e butʼ, ara gupag nge mang bi gimed e falipaʼ rokʼ bi gimed, ara ngam liiʼed gimed ngam mʼaed, fa mu feked banʼen u matgael, fa mmoroʼroʼ gaed ngomed, fa mu rinʼed e tin galong; ara gupagmed ngam rinʼed ni demutrug ko mang e mit i denen, ma kug fil ngomed ni thingar mu fol gaed ko pi motochiyel rokʼ fare Somoel, u fithikʼ gubin banʼen ni ke motochiyel nag ngomed—

14 Ma mus ngog, ni gag, ma kug muruwel nga paʼag ni gomanga gu pigpig ngomed, ni nga dab mu gafgow gaed i piiʼ puluwon e tax, ma nge dabi yib banʼen ngomed nib moʼomawʼ i rinʼ romed—ma gubin e pinnʼey ni kug weliy morngaʼagen, ma kam guyed ke mich nga laniyaenʼmed e biney e rran.

15 Yug arragon machane, gimed pi walageg, e gathi kug rinʼ e pinnʼey ni nge yog ni nggu ʼufʼuf, ara gube yoeg e pinnʼey ni nge yog riy ni ngog ni bay thibngimed; ya gube yoeg ngomed e pinnʼey ni nge yog ni ngam nanged nra yog rog ni gu piiʼ e fulweg riy nib tamilang i kiiʼeg u wunʼug u mit Got e biney e rran.

16 Musap gaed, gube yoeg ngomed ni bachan e kugog ngomed ni kug paer u lan e pi rran rog ni gube pigpig ngomed, ni gathi gube ufʼuf, ya pigpig ni kug tay e kemus ni kug pigpig ngakʼ Got.

17 Ere musap gaed, gube yoeg ngomed e pinnʼey ni nge yog ni ngam filed e gonop; ni nge yog ni ngam nanged u napʼan, ni gimed be pigpig ngakʼ beeʼ ma arame ri gimed be pigpig ngakʼ e Got romed.

18 Musap gaed, kam pininged gag ni pilung romed; ma faʼanra gag, niʼir e gimed be pining ni pilung romed, ma gube pigpig ngomed, ma arame gathi kub tʼuf ni ngam muruwel gaed ngam pigpig gaed ngomed?

19 Ma kum musap gaed, faʼanra gag e gimed be pining ni pilung romed, niʼir e ke piiʼ e pi rran rokʼ nibe pigpig ngomed, ma aram riy ni be pigpig ngakʼ Got, ma bay matʼawon ko magaer ni gimed ra pining ngakʼ, O aram fini rib tʼuf ni thingar mu pininged e magaer ko Pilung romed nu Tharmiy!

20 Gube yoeg ngomed, pi walageg, ni faʼan gimed ra piiʼ gubin e pi magaer nge taʼfan nrogon ni bay u poloʼ i gelingin laniyaenʼmed, ngakʼ fare Got niʼir e sunmiymed, ma ke taymed kam madaʼ gaed ko ngiyalʼ ney, ma be ayuwegmed, ma ki guy rogon ni ngam falfalaenʼ gaed, ma ki tay ni ngam pired nib gapas thilmed—

21 Gube yoeg ngomed ni faʼan gimed ra pigpig ngakʼ e chaʼ ni sunmiymed aram ko sommʼon, ma be thapegmed u rebo rran ngo rebo rran, u rogon ni piiʼ ngomed e pogofan ni gimed be tay, ni nge yog ni ngam pired ni gimed be mithmith, mi gimed rinʼ u rogon ni gimed baʼadag, ni madaʼ ko ayuw nibe tay romed u bangi yalʼ ngki madaʼ nga bangi yalʼ—Gube yoeg, ni mus ni gimed ra pigpig ngakʼ u poloʼ i laniyaenʼmed ma ku dabiyog ni ngam sulweged labgen e magaer.

22 Ere musap gaed, ma urngin ni be athpeg romed e ngam fol gaed ko pi motochiyel rokʼ; ma ke michmicheg ngomed ni faʼan gimed rafol ko pi motochiyel rokʼ ma ra felʼ rogmed u dakean farengi nam; ya dar ma pag e tin ni ke yoeg; ere, faʼan gimed rafol ko pi motochiyel rokʼ ma ra tawaʼath nagmed me felʼ rogmed.

23 Ere chiney, e sommʼon riy, e sunmiymed, me piiʼ ngomed e yafos romed, niʼir e ke paer riy ni malfith romed ngakʼ.

24 Nge bin lʼagruw ngay, e be athpeg ni ngam rinʼed ni boed rogon ni ke motochiyel nag ngomed; ya faʼan gimed rarinʼ ni aram rogon, me tawaʼath nagmed riy nib papay; ere arame ke piiʼ puluwmed. Ma arame ku bay e malfith romed ngakʼ, ma arragon e chiney, ma ku aram rogon ni bayi paer iyaen e ngaram, ni dariy nʼumngin i napʼan me tal biʼid; ere, mang e ngam ʼuf gaed ngay?

25 Ere chiney e nggu duwer, rayog ni nga moeged ni bay e towaey romed? Nggu fulweg ngomed, Dabiyog. Dabiyog ni nga moeged ni taʼab rogmed ko fiyath nu fayleng; machane ni sunmiymed ko fiyath nu fayleng; machane musap gaed, kub milsuwon ngakʼ e chaʼ ni sunmiymed.

26 Ere gag, nri gag, e chaʼ ni gimed be pining ni pilung romed, e da guthil nggu felʼ ngomed; ya kugag ma gusum ko fiyath. Ma kam guyed ni kug pilibthir, ma arame ke chugur nga napʼan ni nge sul e re dagur ney ko chitiningin ni fayleng.

27 Ere, boed faram ni kugog ngomed ni kug pigpig ngomed, ni gube yaen nib tamilang anʼug u pʼoewchen Got, ni boed rogon ko ngiyalʼ ney ni kug kunuy med nga taʼabang, ni gomanga ni pirʼeg ni dariy thibngig, ma dabi aw e kireb romed nga dakeanag, u napʼan ni nggu sakʼiy ni nge pufthin nigeg Got ko pinʼen ni ke motochiyel nag ngog ni morngaʼagmed.

28 Gube yoeg ngomed ni kug kunuy med nga taʼabang ni gomanga yog ni ngug chuweg rachaʼmed ko mad rog, ko ngiyalʼ ney ni ke chugur ni ngan kʼeygeg, ni gomanga nni kʼeygeg u fithikʼ e gapas, nge yaʼel rog ni dabi yimʼ e gomanga yog ni un ko piʼin ma tang u leang ngar tanggaed ni yaed be oge magaer ngakʼ ba Got nib matʼaw.

29 Nge ku arragon, ni gube yoeg ngomed ni kug guy rogon ni ngam kunuyed gimed nga taʼabang, ni nge yog ni ngug weliy ngomed ni dab kiyog ni nggu mang sensey romed, ara pilung romed;

30 Ya mus ko ngiyalʼ ney, ma dugreg ni poloʼ e be tʼon ni rib gel u napʼan ni gube nomeg ni nggu non ngomed; machane fare Somoel ni Got e be ayuwegeg, ma kepag ni thingar gu non ngomed, make motochiyel ngog ni nggu weliy ngomed e biney e rran, ni fakag i Mosiah e pilung nge mitethin romed.

31 Ere chiney, gimed pi walageg, gu baʼadag ni thingar mu rinʼed ni boed rogon ni kug rinʼ. Ni boed ni kam fol gaed ko pi motochiyel rog, nge ku boed ni kam fol gaed ko pi motochiyel rokʼ e chitamag, ma ke felʼ rogmed, ma kan ayuwegmed ni nge siy mmul gaed nga lan paʼ e pi toʼogor romed, ni ku aram rogon ni faʼan gimed rafol ko pi motochiyel rokʼ fakag, ara pi motochiyel rokʼ Got niʼir e bay ni piiʼ rokʼ ngomed, ma ra felʼ rogmed u dakean farengi nam, ma pi toʼogor romed e dabiyog ni ngar gel gaed ngomed.

32 Machane, O gimed e pi gidiiʼ rog, mu kol ayuw gaed ya richey me sum e maleʼeg thin nga fithikʼmed, mi gimed adag ni ngam fol gaed ko fabin nib kireb e yaʼel, niʼir e weliy e chitamag i Mosiah morngaʼagen.

33 Ya musap gaed, bay ba gafgow ni kan dugliy nga dakean e chaʼ nra melʼeg ni nge fol ko fabin nib kireb e yaʼel; ya faʼanra melʼeg ni nge fol rokʼ, me paer riy nge yimʼ nga fithikʼ e pi denen rokʼ, ma taʼab rogon ngay ni ke unum e gafgow ni tinoewey ngakʼ e yaʼel rokʼ; ya ke thog nag ngakʼ puluwon ni ba gechig ni dariy nʼumngin i napʼan, ni ke denen nib togopluw ko motochiyel rokʼ Got nib thil nga rogon e llowaenʼ ni manang.

34 Gube yoeg ngomed, ni dariy beeʼ u fithikʼmed, ma kemus ni bitir nib achichig e dawoʼ ni fil ngoraed morngaʼagen e pinnʼey, machane gimed manang ni bay e malfith ni manemus romed ngakʼ e Chitamangmed nu tharmiy, ni ngam piiʼed ngakʼ ni gubin ni bay romed nge gimed; ma ki fil ngomed morngaʼagen fapi chep ni bay fapi prophecy riy niʼir e kiiʼ i weliy fapi profet nib thothup morngaʼagen, ni aram iyib nge madaʼ ko ngiyalʼ ni chitamangdaed, i Lehi, e chuw u Jerusalem;

35 Nge ku arragon, ni gubin e tin ni ke weliy e pi chitamangdaed nge madaʼ ko chiney. Ere musap gaed, ku arragon, ni ra weliyed e pinʼen ni motochiyel nag Somoel ngoraed; ere, yaed ba matʼaw ma yaed ba yulʼyulʼ.

36 Ere chiney, gube yoeg ngomed, pi walageg, u tomuren ni kam nanged ma kan fil ngomed gubin e pinnʼey, ma faʼan gimed rarinʼ e ngongol ni kireb mi gimed togopluw ko tin ni kan weliy, ma kam palog niged gimed ko fare Kan ni Thothup rokʼ Somoel, ni nga dab kiyib tagilʼ u fithikʼmed ni nge powiʼiymed u fithikʼ pi woʼen e gonop ni ngam tawaʼath gaed, me felʼ rogmed, me yoeg ni ngan ayuweg med—

37 Gube yoeg ngomed, ni re moʼon nra rinʼ e rennʼey, e ireram e chaʼ ni be yib nga tamilang ni be togopluw ngakʼ Got; ere ke melʼeg ni nge fol ko fare yaʼel ni kireb, me mang beeʼ nib toʼogor ko urngin banʼen nib matʼaw; ere, fare Somoel e dakuriy tagilʼ rokʼ faʼanem, ya dar ma paer u lan e pi temple ni de thothup.

38 Ere faʼan rachey ni re moʼon nem e dabi kalngaenʼ, me paer riy nge yimʼ ni ba toʼogor rokʼ Got, ma pi athap ko justice nu tharmiy e be tamilngeg u laniyaenʼ me gagyel u waenʼ nib kireb e rokʼ, ni ireram e gin ra nomeg ni nge lingeg ir riy u pʼoewchen Somoel, ma ra suguy lan ngorngoren ko mʼingaenʼ, nge amith, nge amthun e kalngaenʼ, ni boed ba nifiy ni dabi math, ni be yaen e dramrom riy ngalang ni dariy nʼumngin i napʼan.

39 Ere chiney e gube yoeg ngomed, ni murnguy e dakuriy ngakʼ e re moʼon nem; ere bin tomur e buch waʼathan ni ra tay e nge paer u fithikʼ ba amith nge gafgow ni dabi mʼay.

40 O, gimed gubin e pumoʼon ni pilibthir, nge ku arragon ngomed e piʼin pagael nib felʼ yangren, nge gimed e piʼin bitir nra yog ni ngam nanged fan e pi thin rog, ya kug non nib tamilang ngomed ni gomanga yog ni ngam nanged fan, gube meybil nag ni gomanga paer u wunʼmed fare murus ni rarogon e piʼin ni kar awgaed nga fithikʼ e ngongol ni kireb.

41 Nge ku arragon, ni gu baʼadag ni thingar mu lemniged rogon e tawaʼath nge falfalaenʼ rokʼ e piʼin ni yaed mafol ko fapi motochiyel rokʼ Got. Ya muguyed, kan tawaʼath nagraed u fithikʼ gubin banʼen, ni lʼagruw mit, ni tinu fayleng nge tinu tharmiy; ma faʼan yaedra athamgil nge madaʼ ko tomur ma yaedra thap nga tharmiy, ni ginem e yaedra paer riy rokʼ Got u fithikʼ e falfalaenʼ ni dariy nʼumngin i napʼan. O mu tayed u wunʼmed, mu tayed u wunʼmed, ni pinnʼey e bogi banʼen nib riyulʼ, ya fare Somoel ni Got e ke yoeg.