1 ’E i muri a’era, ’ua rave Mosia mai tā tōna metua tāne i fa’aue mai iāna, ’e ’ua fa’atae atu ’oia i te parau poro’i i tō te fenua ato’a, ’ia ha’aputuputu mai te mau ta’ata o te fenua pā’āto’a, ’e ’ia haere rātou i ni’a i te hiero nō te fa’aro’o i te mau parau tā te ari’i Beniamina e parau mai ia rātou ra.

2 ’E ’ua rahi roa te mau ta’ata, ’e nō te rahi ’aita a’era i ti’a ia rāua ’ia tai’o ia rātou ; ’e ’ua tupu roa ho’i rātou i te rahi, ’e ’ua riro ’ei feiā rahi i te fenua.

3 ’E ’ua hōpoi ato’a mai ra rātou i te mau fanau’a mātāmua nō tā rātou mau nana, ’ia ti’a ia rātou ’ia pūpū ’ei tusia ’e ’ei mau ō tāauahi mai te au i te ture a Mose ra.

4 ’E ’ia ti’a ato’a ia rātou ’ia ha’amaita’i i te Fatu tō rātou Atua, ’o tei arata’i mai ia rātou i rāpae i te fenua ra nō Ierusalema, ’e ’o tei fa’aora ato’a ia rātou i te rima o tō rātou ra mau ’enemi, ’e tei fa’ata’a i te mau ta’ata parauti’a ’ei ’orometua nō rātou ; ’e te tahi ato’a ta’ata parauti’a ’ei ari’i nō rātou, ’o tei fa’atupu i te hau i ni’a i te fenua ra nō Zarahemela, ’e tei ha’api’i ho’i ia rātou ’ia ha’apa’o i te mau fa’auera’a a te Atua, ’ia ti’a ia rātou ’ia ’oa’oa ’e ’ia fa’a’īhia i te aroha i te Atua ’e i te mau ta’ata ato’a ho’i.

5 ’E i muri a’era, ’ia tae mai ra rātou i te hiero, ’ua fa’ati’a ihora rātou i tō rātou mau ti’ahapa ē ’ati noa a’e taua vāhi ra, te ta’ata ’e tōna ra ’utuāfare, ’oia ho’i tāna vahine, ’e tāna mau tamari’i tamāroa, ’e tāna mau tamari’i tamāhine, ’e tā rātou mau tamari’i tamāroa, ’e tā rātou mau tamari’i tamāhine, mai te matahiapo ē tae noa atu i te hope’a, ’e ’ua ta’a ’ē te tahi ’utuāfare i te tahi ē hope roa a’e.

6 ’E ’ua fa’ati’a ihora rātou i tō rātou mau ti’ahapa ē ’ati noa a’e te hiero, te reira te ta’ata e tōna ti’ahapa ma te fāriu atu te ’ūputa i te hiero, ’ia ti’a ia rātou ’ia pārahi noa i roto i tō rātou mau ti’ahapa ’a fa’aro’o atu ai i te mau parau tā te ari’i Beniamina e parau mai ia rātou ra.

7 Nō te rahi o te ta’ata ’aita atu ra e ti’a i te ari’i Beniamina ’ia ha’api’i atu ia rātou ato’a i roto i te hiero, nō reira ’ua fa’aue a’era ’oia ’ia fa’ati’ahia te tahi pare, ’ia ti’a i tōna mau ta’ata ’ia fa’aro’o i tāna mau parau ’o tāna e parau atu ia rātou.

8 ’E i muri a’era, ’ua ha’amata a’era ’oia i te parau atu i tōna mau ta’ata mai ni’a mai i te pare ; ’e ’aita ho’i i ti’a ia rātou ato’a ’ia fa’aro’o mai i tāna mau parau nō te rahi o te ta’ata ; nō reira ’ua fa’aue atu ra ’oia ’ia pāpa’ihia tāna mau parau ’e ’ia fa’ataehia te reira i rotopū i te mau ta’ata ’o tei ’ore i fa’aro’o mai i tōna reo, ’ia ti’a ato’a ia rātou ’ia fāri’i i tāna mau parau.

9 ’E teie ïa te mau parau tāna i parau atu ’e tāna ho’i i fa’aue ’ia pāpa’ihia, ’e tē nā ’ō ra te reira : E tō’u mau taea’e, e ’outou pā’āto’a ’o tei ha’aputuputu ’āmui mai, ’outou ’o tē fa’aro’o mai nei i tā’u nei mau parau, ’o tā’u e a’o atu ia ’outou i teie nei mahana ; ’aore ho’i au i fa’aue atu ia ’outou ’ia haere mai i’ō nei nō te ha’afaufa’a ’ore i te mau parau ’o tā’u e parau nei, ’ia fa’aro’o rā ’outou iā’u nei, ’e ’ia ha’afatafata i tō ’outou tari’a ’ia fa’aro’o ’outou, ’e i tō ’outou ’ā’au ’ia māramarama ’outou, ’e tō ’outou mana’o ’ia ti’a i te mau parau ’aro a te Atua ’ia fa’a’itehia mai i mua i tō ’outou nā mata.

10 ’Aita ho’i au i fa’aue atu ia ’outou ’ia haere mai i’ō nei ’ia mata’u mai ’outou iā’u nei, ’e ’ia mana’o ho’i ’outou ē, ’ua hau atu vau i te hō’ē ta’ata tāhuti nei i te huru.

11 E ta’ata mau rā vau mai ia ’outou ato’a na te huru, e ti’a ho’i iā’u ’ia ro’ohia i te mau paruparu pae tino nei ’e pae mana’o ho’i ; ’ua mā’itihia rā vau e teie nei feiā, ’e ’ua fa’atōro’ahia vau e tō’u metua tāne, ’e ’ua fa’ati’ahia ho’i au e te rima o te Fatu ’ia riro ’ei tāvana ’e ’ei ari’i i ni’a i teie nei feiā ; ’e ’ua ha’apa’ohia ’e ’ua fa’ahereherehia ho’i au e tōna ra mana fāito ’ore, nō te tāvini ia ’outou ma te mana ato’a, ’e te mana’o ato’a, ’e te pūai ato’a ’o tā te Fatu e hōro’a mai iā’u nei.

12 Tē parau atu nei au ia ’outou na, ’ua fa’ati’ahia vau ’ia fa’a’ohipa i tō’u pu’e mahana nō te tāvini ia ’outou, ē tae roa mai i teie nei taime, ’e ’aita ho’i au i tītau i te ’auro, ’e te ’ārio, ’e te tahi atu ā mau tao’a nō ’ō na mai ia ’outou na.

13 ’Aita ho’i au i fa’ati’a ’ia tu’uhia ’outou i roto i te mau piha tāpe’ara’a i raro i te fenua, ’e ’ia riro te tahi o ’outou ’ei tītī nā te tahi atu, ’e ’ia taparahi ’outou i te ta’ata, ’e ’ia haru i te tao’a, ’e ’ia ’eiā, ’e ’ia fa’aturi ; ’e ’aita ho’i au i fa’ati’a ’ia rave ’outou i te mau huru ’ohipa parauti’a ’ore, ’e ’ua ha’api’i au ia ’outou ’ia ha’apa’o ’outou i te mau fa’auera’a a te Fatu, i roto i te mau mea ato’a ’o tāna i fa’aue mai ia ’outou—

14 ’E ’ua rave ato’a vau, ’o vau iho, i te ’ohipa i tō’u iho nei rima ’ia tāvini au ia ’outou, ’e ’ia ’ore ho’i ’outou ’ia teiaha i te ’aufaura’a i te moni tute, ’e ’ia ’ore ho’i te hōpoi’a rahi ’ia tae mai i ni’a iho ia ’outou—’e ’ua riro ho’i ’outou ’ei ’ite i teie nei mahana i te mau mea tā’u e parau nei.

15 Terā rā, e tō’u mau taea’e, ’aita vau i rave i teie mau mea ’ia ti’a iā’u ’ia fa’aahaaha, ’e ’aita ho’i au i fa’a’ite atu i teie mau mea ’ei parira’a ia ’outou ; ’ua fa’a’ite rā vau i teie mau mea ia ’outou, ’ia ’ite ’outou ē, e ti’a iā’u ’ia ti’a i mua i te Atua i teie nei mahana ma te ’ā’au hapa ’ore.

16 Inaha, tē parau atu nei au ia ’outou, ’ua parau a’enei au ia ’outou ē, ’ua fa’a’ohipa vau i tō’u pu’e mahana nō te tāvini ia ’outou, ’aita rā vau i hina’aro ’ia fa’aahaaha, nō te mea tē tāvini noa ra ho’i au i te Atua.

17 ’E inaha, e fa’a’ite atu vau ia ’outou i teie mau mea, ’ia ha’api’i mai ’outou i te pa’ari ; ’ia ’ite ho’i ’outou ē, ’a tāvini ai ’outou i tō ’outou mau ta’ata tupu, tē tāvini ra ïa ’outou i tō ’outou Atua.

18 Inaha, ’ua fa’ariro ’outou iā’u ’ei ari’i nō ’outou ; ’e ’ia rave au, ’o tā ’outou i fa’ariro ’ei ari’i nō ’outou i te ’ohipa nō te tāvini ia ’outou, ’aita ānei ïa e ti’a ia ’outou ’ia rave i te ’ohipa nō te tāvini te tahi i te tahi ?

19 ’E inaha ho’i, mai te mea ē ’ua ti’a roa iā’u ’ia fāri’i i te mau ha’amaita’ira’a nō ’ō na mai ia ’outou na, ’o vau nei ’o tā ’outou i fa’ariro ’ei ari’i nō ’outou, ’e ’o tei fa’a’ohipa i tōna pu’e mahana nō te tāvini ia ’outou na, ’e tei tāvini na ho’i i te Atua, ’ua ti’a roa ïa ’ia rahi roa atu tā ’outou ha’amaita’ira’a atu i tō ’outou Ari’i i te ra’i ra !

20 Tē parau atu nei au ia ’outou na, e tō’u mau taea’e, mai te mea e hope te mana ato’a o tō ’outou vārua i te ha’amaita’i ’e i te ’ārue i taua Atua ra ’o tei hāmani ia ’outou, ’e tei ha’apa’o ia ’outou, ’e tei fa’aherehere ia ’outou, ’e tei fa’a’oa’oa ia ’outou, ’e tei fa’ati’a ’ia pārahi hau ’outou te tahi i te tahi—

21 Tē parau atu nei au ia ’outou na, mai te mea e tāvini ’outou iāna ’o tei hāmani ia ’outou mai te mātāmua mai ā, ’e ’o tē fa’aherehere nei ia ’outou i terā mahana ’e i terā mahana, i te hōro’ara’a atu i te aho nō ’outou, ’ia ti’a ia ’outou ’ia ora ’e ’ia hāhaere ’e ’ia rave ho’i mai te au i tō ’outou iho hina’aro, ’e ’o tē tauturu mai nei ho’i ia ’outou i terā taime ’e i terā taime—e parau atu vau mai te mea e tāvini ’outou iāna ma tō ’outou vārua ato’a, e mau tāvini faufa’a ’ore ā ’outou i reira.

22 ’E inaha, hō’ē ana’e mea tāna i hina’aro ia ’outou ’ia rave, ’o te ha’apa’ora’a ïa i tāna mau fa’auera’a ; ’e ’ua fafau mai ho’i ’oia ia ’outou ē, mai te mea e ha’apa’o ’outou i tāna mau fa’auera’a, e manuia ’outou i te fenua nei ; ’e ’aita roa ho’i ’oia e fa’ahuru ’ē i tāna i parau mai ; nō reira, mai te mea e ha’apa’o ’outou i tāna mau fa’auera’a, e ha’amaita’i mai ’e e ha’amanuia mai ho’i ’oia ia ’outou.

23 ’E i teienei, nā mua roa, ’ua hāmani ’oia ia ’outou, ’e ’ua hōro’a mai ’oia i tō ’outou ora ia ’outou, ’e ’ua riro ïa ’outou ’ei ’aitārahu nāna.

24 ’E te piti ra : ’Ua hina’aro ’oia ’ia ha’apa’o ’outou i tāna i fa’aue mai ia ’outou ra ; ’e mai te mea e nā reira ’outou, e ha’amaita’i ’oi’oi mai ’oia ia ’outou ; ’e nō reira, ’ua ’aufau ïa ’oia ia ’outou. ’E e ’aitārahu ā ho’i ’outou iāna, i teienei, i te mau taime i mua nei, ē a muri ē a muri noa atu ; ’e nō reira, e aha tā ’outou e ti’a ai ia ’outou ’ia fa’aahaaha ?

25 ’E i teienei, tē ui atu nei au, e ti’a ānei ia ’outou ’ia fa’aahaaha ia ’outou iho na ? E parau atu vau, ’Aita. ’Aita roa e ti’a ia ’outou ’ia parau ē, e mea faufa’a a’e ’outou i te repo puehu o te fenua nei ; ’ua hāmanihia rā ’outou i te repo puehu o te fenua ; inaha rā, nōna ïa, ’o tei hāmani ia ’outou na.

26 ’E ’aore ho’i au, ’o vau iho, ’o tei parauhia e ’outou e ari’i nō ’outou, i hau atu i te maita’i ia ’outou ; ’e nō te repo ato’a ho’i au nei. ’E ’ua ’ite ’outou ē, ’ua ruhiruhiā vau, ’e ’ua fātata ho’i au i te tu’u atu i teie nei tino tāhuti i roto i te repo, i te vāhi nō reira mai ’oia ra.

27 Nō reira, mai tā’u i parau iho nei ia ’outou, i tāvini nā vau ia ’outou, ma te haere ’ā’au hapa ’ore i mua i te Atua ; ’e ’ua ha’aputuputu ’āmui mai ho’i au ia ’outou i teie nei taime, ’ia ’ore au ’ia fa’ahapahia, ’e ’ia ’ore ho’i tō ’outou toto ’ia iri mai i ni’a iho iā’u, ’ia ti’a atu vau ’e ’ia ha’avāhia e te Atua nō te mau mea tāna i fa’aue mai iā’u nō ni’a ia ’outou na.

28 Tē parau atu nei au ia ’outou na, ’ua ha’aputuputu ’āmui mai au ia ’outou ’ia tāmā vau i tō’u nei mau ’ahu i tō ’outou toto i teie nei taime, i te taime ’a fātata ai au i te haere i raro i tō’u ra mēnema, ’ia ti’a iā’u ’ia haere atu i raro ma te hau, ’e ’ia ’āmui ato’a tō’u vārua tāhuti ’ore i te mau pupu hīmene i ni’a ra, i te hīmenera’a i te mau ha’amaita’ira’a i te Atua parauti’a ra.

29 ’E tē parau fa’ahou atu nei ā vau ia ’outou na, ’ua ha’aputuputu ’āmui mai au ia ’outou nō te fa’a’ite atu ia ’outou ē, ’aita e ti’afa’ahou iā’u ’ia riro noa ’ei ’orometua ’e ’ei ari’i nō ’outou.

30 I teienei ā ho’i taime, tē rurutaina noa nei tō’u nei tino tā’āto’a ’a tāmata’i au i te a’o atu ia ’outou na ; ’āre’a rā ’ua tauturu mai te Fatu te Atua iā’u nei, ’e ’ua fa’ati’a mai ho’i iā’u ’ia parau atu vau ia ’outou na, ’ua fa’aue mai ho’i iā’u ’ia fa’a’ite atu vau ia ’outou i teie nei mahana, ’ua riro tā’u tamaiti ra ’o Mosia ’ei ari’i, ’e ’ei tāvana nō ’outou.

31 ’E i teienei, e tō’u mau taea’e, ’ua hina’aro vau ’ia rave ’outou mai tā ’outou i rave nā mua a’enei. Mai tā ’outou ho’i i ha’apa’o i tā’u mau fa’auera’a, ’e te mau fa’auera’a ho’i a tō’u ra metua tāne, i manuia ai ’outou, ’e i fa’aorahia ai ho’i ’ia ’ore ’outou ’ia ma’iri i roto i te rima o tō ’outou ra mau ’enemi ; ’e ’ia nā reira ato’a ’outou i te ha’apa’o i te mau fa’auera’a a tā’u tamaiti, ’e ’aore rā i te mau fa’auera’a a te Atua ’o tē hōro’ahia mai ia ’outou nā roto iāna, e manuia ïa ’outou i ni’a i te fenua nei, ’e ’aita tō tō ’outou mau ’enemi e mana i ni’a ia ’outou.

32 ’Āre’a rā, e tō’u mau ta’ata, ’a ara ’o te tupu te mau mārōra’a i rotopū ia ’outou, ’e ’o te ha’apa’o ’outou i te vārua ’ino ’o tei parauhia e tō’u ra metua tāne e Mosia.

33 Inaha ho’i, ’ua fa’a’itehia na te utu’a e tae mai i ni’a i te ta’ata ’o tē fa’aro’o atu i tā taua vārua ra ; ’e ’ia fa’aro’o atu ’oia iāna, ’e ’ia pārahi noa ’e ’ia pohe ho’i i roto i tāna ra mau hara, ’ua inu ïa ’oia i te pohe nō tōna ihora vārua ; ’e e fāri’i ho’i ’oia i te fa’autu’ara’a mure ’ore ’ei utu’a nāna, nō te mea ’ua ’ōfati ’oia i te ture a te Atua, mai tei ’ore i au i tōna ihora ’ite.

34 Tē parau atu nei au ia ’outou na, ’aita roa te hō’ē i rotopū ia ’outou ’o tei ’ore ā i ha’api’ihia i teie mau mea, maori rā tā ’outou mau tamari’i ri’i, ’e ’ua ’ite ho’i ’outou ē, ’ua riro ’outou ’ei aitārahu i tō ’outou Metua i te ao ra ē a muri noa atu, nō reira ’ua ti’a roa ia ’outou ’ia hōro’a atu iāna i tā ’outou mau tao’a ato’a ’e tā ’outou faufa’a ato’a e vai nei ; ’e ’oia ato’a ’ua ha’api’ihia ’outou nō ni’a i te mau pāpa’a parau tei roto i te reira te mau tohura’a i parauhia e te mau peropheta mo’a ra, ē tae roa mai i te tau i fa’aru’e ai tō tātou ra metua tāne ’o Lehi ia Ierusalema ;

35 ’E ’oia ato’a, te mau parau ato’a ho’i i parauhia e tō tātou ra mau metua ē tae roa mai i teienei. ’E inaha ho’i, ’ua parau ato’a rātou i te mau mea i fa’auehia mai ia rātou e te Fatu ; nō reira, e parau mau ’e te parauti’a ho’i te reira.

36 ’E i teienei, tē parau atu nei au ia ’outou na, e tō’u mau taea’e, ’ia hope ’outou i te ’ite ’e i te ha’api’ihia i teie mau mea ato’a, ’e ’ia hara ’outou, ’e ’ia haere ’ē atu i tei parauhia ra, ’e ’ia fa’aātea ’ē atu ho’i ’outou ia ’outou iho i te Vārua o te Fatu ra, ’ia ’ore tōna e vāhi i roto ia ’outou nō te arata’i ia ’outou nā te ’ē’a o te pa’ari ra, ’ia ti’a ia ’outou ’ia ha’amaita’ihia, ’ia ha’amanuiahia, ’e ’ia fa’ahereherehia ho’i—

37 Tē parau atu nei au ia ’outou na, ’o te ta’ata e nā reira i te rave, ’ua pāto’i ’ū’ana ïa ’oia i te Atua ; nō reira ’ua ha’apa’o ïa ’oia ’ia auraro i te vārua ’ino, ’e ’ua riro ’oia ’ei ’enemi nō te parauti’a ato’a ; nō reira, ’aita tō te Fatu e vāhi i roto iāna, nō te mea ’aita ’oia e pārahi i roto i te mau hiero vi’ivi’i.

38 Nō reira, ’ia ’ore taua ta’ata ra ’ia tātarahapa, ’e ’ia pārahi noa ’oia ’ei ’enemi ’e ’ia pohe ho’i ’ei ’enemi nō te Atua, e fa’aaraara mai ïa te tītaura’a o te parauti’a mo’a i tōna vārua tāhuti ’ore, ’ia ’ite pāpū ’oia i tāna ihora hapa, tei fa’a’ōtemutemu iāna i mua i te aro o te Fatu, ’e tei fa’a’ī i tōna ’ōuma i te ’oto, ’e te māuiui, ’e te ’auē, mai te auahi pohe ’ore ra, ’o tē pe’e atu tōna ura i ni’a ē a muri ē a muri noa atu.

39 ’E i teienei, tē parau atu nei au ia ’outou na, ’aita tō te aroha e mana i ni’a i taua ta’ata ra ; nō reira tāna utu’a hope’a ra ’o te fa’a’oroma’i ïa i te māuiui hope ’ore.

40 E te mau ta’ata ruhiruhiā ato’a, ’e te mau ta’ata ’āpī, ’e te mau tamari’i ri’i ho’i ’o tei māramarama i tā’u nei mau parau, i parau pāpū na ho’i au ’ia māramarama ’outou, ’e tē pure nei au ’ia ara ’outou i te ha’amana’ora’a i te ti’ara’a ri’ari’a o te mau ta’ata i ma’iri i roto i te ’ōfatira’a ture.

41 ’E ’oia ato’a, ’ua hina’aro ho’i au ’ia ha’amana’o ’outou i te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua. Inaha ho’i, ’ua ha’amaita’ihia rātou i roto i te mau mea ato’a, i te pae tino ’e te pae vārua ato’a ho’i ; ’e mai te mea e ha’apa’o maita’i noa rātou ē tae noa atu i te hope’a ra, e fāri’ihia ïa rātou i te ao ra, ’e e pārahi rātou i pīha’i iho i te Atua i roto i te ’oa’oa hope ’ore ra. ’A ha’amana’o, ’a ha’amana’o ē e parau mau teie mau mea ; ’e nā te Fatu te Atua i parau mai i te reira.