1 Nge kub yay pi walageg, gu baʼadag ni ngam motoyil gaed, ya ku bay boech ni nggu weliy ngomed; ya musap gaed, bay boech banʼen ni nggog ngomed ni morngaʼagen e tin ni bay yib.

2 Nge pinʼen ni nggog ngomed e bogi nʼen ni ke yoeg ba angel rokʼ Got ngog. Ere gaʼar ngog: Muʼod, mug od, mug guy nib sakʼiy u pʼoewcheg.

3 Me gaʼar ngog: Muʼod, ngam telim ko thin ni nggog ngom; ya musap, kugub ni nggog ngom fare morngaʼag ni mangil ni ma piiʼ e falfalaenʼ.

4 Ya fare Somoel e ke rungʼag e pi meybil rom, make dugliy ni gab matʼaw, make lʼugeg ni nggog ngom ni nge yog ni ngam falfalaenʼ; ni nge yog ni nga moeg ngakʼ e pi gidiiʼ rom, ning ki yog nra falfalaenʼ gaed boech.

5 Ya musap, fare ngiyalʼ innʼem e beyib, ma daki palog nga orel, nu dakean e gelingin, ma fare Somoel ni Gubin Marayog Rokʼ niʼir e ba suwey, ire immoy, ma bay e chiney, u gubinechuboeg ko gubinechuboeg, e ra yib nga butʼ u tharmiy nga fithikʼ e gidiiʼ, ma ra paer u lan ba dowef, ma bay yaen iyaen u fithikʼ e gidiiʼ, nga i rinʼ e maʼangʼang, ni boed rogon e golnag e mʼar, faseg e yamʼ, ayuweg e mugutgut nge yaen, pi maʼew nge guy banʼen, nge biling nge rungʼag banʼen, me gol nag gubin mite mʼar.

6 Ma ra tharbog nge chuw e pi moʼoniyanʼ ara pi thagith ni kireb ni yaed be paer u lan e gumʼirchaʼ rokʼ e gidiiʼ.

7 Ere muguy, ra gafgow ko pi lumel, nge amith ko dowef, nge bilig, balel, nge magaer, ni aram rogon nge thumʼ ngaruʼ e gafgow nra yog ni nge tay e gidiiʼ, ma kemus ni yigoʼ yamʼ; ya musap, rachaʼ e yib u gubin yang e mtʼuftʼuf ko yalach u doew, ere rib gel e amith ni tay ni bachan e pi denen ni ubchiyaʼ nge pi fananikan ko gidiiʼ rokʼ.

8 Ma bay ni pining ni Yesus Kristus, ni fare Tir ni fak Got, ni fare Chitamangiy nu tharmiy ngu fayleng, ni Fachaʼ ni sunmiy gubin banʼen aram ko sommʼon; ma chitinngin rokʼ e yira pining ni Mary.

9 Ere musap, ra yib ngakʼ e gidiiʼ rokʼ, ni gomanga yog ni nge thap e gidiiʼ u dakean e michaenʼ roraed nga fithingan; ma aram rogon u tomuren gubin e pinnʼey ma bay ra sap gaed ngakʼ ni yug beeʼ nib moʼon, ma yaedra yoeg ni bay moʼoniyanʼ rokʼ, ma bay ra gafgow niged, mar kuruth niged.

10 Ma ra fos ko yamʼ ko bin dalip e rran; ere musap, ra sakʼiy ni nge pufthin nag e gidiiʼ nu fayleng; ere muguy gubin e pinnʼey ma yira rinʼ ni nge yog ni yibi aw ba pufthin nib matʼaw nga dakean e gidiiʼ.

11 Ere musap, rachaʼen e kura mapʼ nib bayul ko fapi denen rokʼ e piʼin ni kar mul gaed ni bachan e denen rokʼ Adam, ni piʼin ni kar mʼaed ni darnanged laniyaenʼ Got ngoraed, ara chaʼ ni denen ni darnang.

12 Machane gafgow, gafgow ngakʼ e chaʼ niʼir e manang ni be togopluw ngakʼ Got! Ya fare woʼen e thap e dabiyog ngakʼ beeʼ ni aram rogon ya kemus ni rayog riy u dakean e kalngaenʼ nge mich, ngakʼ fare Somoel i Yesus Kristus.

13 Nge fare Somoel ni Got e ke lʼoeg e pi profet rokʼ nib thothup nga fithikʼ gubin e gidiiʼ, ni nga roeged e pinnʼey ngakʼ gubin e mfen, nge nam, nge thin, ni aram riy ni gomanga enra michaenʼ ni Kristus e ra yib, ma ireram e pichaʼ ni gomanga rayog ni nge chuw machaan e denen roraed, mar falaenʼ gaed u fithikʼ e falfalaenʼ ni rib gel, ni boed rogon ni faʼan manga ire bay roraed.

14 Machane fare Somoel ni Got e guy ni gidiiʼ rokʼ e bogi gidiiʼ nib ʼelʼel laniyaenʼ, me dugliy ngoraed ba motochiyel, ni fare motochiyel rokʼ Moses.

15 Nge pow ni yoʼor, nge maʼangʼang, nge ʼang, nge pi foen banʼen ni dag ngoraed, ni morngaʼagen e wub rokʼ; nge ku aram rogon ngakʼ e pi profet nib thothup ni kar weliyed ngoraed morngaʼagen e wub rokʼ; machane ra ʼelʼel niged gumʼirchaʼraed, ma dar nanged fan ni fare motochiyel rokʼ Moses e dabi yib falʼngin ma kemus nu dakean fare bayul ni mapʼ rachaʼen riy.

16 Ma mus ni faʼan gomanga rayog ni nge denen e bitir nib achichig ma ku dabiyog ni yaedra thap; machane gube yoeg ngom ni yaed e bafelʼ waʼathraed; ya musap, u dakean Adam, ara dakean e rarogon, mar mul gaed, ere ku arragon ngoraed ni rachaʼen Kristus e bayuliy e denen roraed.

17 Ma, kug be yoeg ngom, ni dakuriy rebe fithingan ni kan piiʼ ara kureb e kanawoʼ ara banʼen nra yog ni nge thap e gidiiʼ riy, ma kari mus nu fithikʼ ngo dakean fare fithingan Kristus, ni fare Somoel ni Gubin Marayog Rokʼ.

18 Ya musap, ir e ra pufthin nigey, ma pufthin nra tay e ba matʼaw; ma bitir nib madway e dabi gafgow nra yimʼ ni kab madway; ma gidiiʼ e yaedra miliy e gechig nga dakeanraed ma kemus ni faʼan yaedra gumud niged yaed ngar boeded rogon e piʼin bitir, me michaenʼraed ni fare woʼen e thap e immoy, ma bay e chiney, ma kubay yib, u fithikʼ ngo dakean fare bayul ni rachaʼen Kristus, ni fare Somoel ni Gubin Marayog Rokʼ.

19 Ya gidiiʼ nib fekyath e toʼogor rokʼ Got, ni kaʼaram u napʼan e mul ni tay Adam, ma bayi paer riy ni aram rogon, ni dabi thil biʼid ma kemus ni faʼanra mʼag ir ko fare Kan ni Thothup, me pag e fekyath nge mang reb i gidiiʼen u dakean fare bayul rokʼ Kristus ni ir Somoel, me boed beeʼ nib bitir, ni ma fol, mab muding, mab gumud, mab gumʼaenʼ mab sug ko murnguy, mab mʼagaenʼ ngay ni nge fol u gubin banʼen nibe guy Somoel nib mʼag ni nge chiyliy ngakʼ, ni boed rogon beeʼ nib bitir nib mʼagaenʼ ni nge fol ko chitamangin.

20 Ma, kug be yoeg ngom, ni fare ngiyalʼ innʼem e bay yib u napʼan ni ke garar fare llowaenʼ ni morngaʼagen ba Tathapeg u dakean gubin e nam, nge mfen, nge thin, nge gidiiʼ.

21 Ere musap, napʼan nra taw e re ngiyalʼ innʼem, ma dariy beeʼ ni yira pirʼeg ni dariy thibngin u pʼoewchen Got, ma kemus ni yigoʼ piʼin bitir nib achichig, ngo dakean e kalngaenʼ nge mich, nga fithingan fare Somoel ni Got ni Gubin ma ra yoeg rokʼ.

22 Ma kuboed e ngiyalʼ ney, ni kam fil ngakʼ e gidiiʼ rom fapinʼen niʼir e ke motochiyel nag fare Somoel ni Got rom ngom, ni boed ni aram rogon ni dab kiyog ni ngan pirʼeg raed ni da riy thibngiraed u mit Got, ma kemus ni woed rogon e thin ni kuggog ngom.

23 Ere chiney e kuggog fapi thin niʼir e ke motochiyel nag fare Somoel ni Got ngog.

24 Ma aray rogon ni yoeg fare Somoel: Bay ra pired ni yaed bogi michriy nib tamilang nib togopluw ngakʼ e pi gidiiʼ ney, ko fare rran ni ngan pufthin; ere yira pufthin nagraed, ni gubin e gidiiʼ nira beeʼ ma rogon e pi muruwel rokʼ, ko mangil fa ba kireb.

25 Ere faʼanra yaed ba kireb ma bayi pag ngoraed ni ngar guyed nib buch faraed nge pi ngongol roraed nib kireb me kʼaring e murus ngoraed, mar chuw gaed rokʼ Somoel nga ranoed ra awgaed nga fithikʼ e buchbuchaenʼ nge gafgow ni gechig ni dariy nʼumngin i napʼan, u bangi banʼen ni dab kiyog ni yaedra chuw riy; ere kar miliyed e gechig nga dakeanraed.

26 Ere, kar unumed ko fare kap ko damomuw rokʼ Got, nib justice ni dab kiyog i siyeg ni woed rogon ngakʼ Adam ni thingari mul ni bachan e ke kay fare waʼamngin nib mathngeluwol; ere, murnguy e dakuriy angin ngoraed ni manechubog.

27 Ma gechig roraed e boed ba lupath ko nifiy nge dramrom, ni dramrom riy e dabi math, nge ath riy e be yaen ngalang ni dariy nʼumngin i napʼan. Ni aray rogon ni motochiyel nag Somoel ngog. Amen.