1 Ere chiney, yibi buch u napʼan ni ke muʼ fare pilung i Benjamin i weliy e pi thin ney ni piiʼ fare angel rokʼ Somoel ngakʼ, me chachngar u dakean fapi yu ulung i gidiiʼ, me guy ni kar awgaed nga dakean e buutʼ, ya ke aw madguwon Somoel nga dakean raed.

2 Ma kar guyed yaed u bangi banʼen ni tagilʼ e gafgow, ni kub sobutʼ ko ab nu fayleng. Ma yaed gubin mar yoer niged taʼab nʼen nib gaaʼ lamraed, ni yaed be gaʼar: O wurenganʼum, nge yib angin fare bayul ko rachaʼ rokʼ Kristus ni gomanga yog ni ngan nʼaegfan e pi denen romaed, nge gumʼirchaʼ romaed ni gomanga yog ni machalbog; ya ba michaenʼmaed ngakʼ Yesus Kristus, ni Fak Got, niʼir e sunmiy e tharmiy nge fayleng, nge gubin banʼen; niʼir fachaʼ ni bay yib nga fithikʼ e gidiiʼ nu fayleng.

3 Me yibi buch u tomuren ni kar muʼ gaed i yoeg e pi thin ney me yib fare Kan ni Thothup rokʼ Somoel nga dakean raed, mar sug gaed ko falfalaenʼ, ni ke chuw machaan e pi denen roraed, me gapas laniyaenʼraed, ni bachan e mich ni bay roraed ngakʼ Yesus Kristus niʼir e bay yib, nnrogon e pi thin ni ke weliy fare pilung i Benjamin ngoraed.

4 Ere pilung i Benjamin e ki bing lʼugun bayay nge non ngoraed, nibe gaʼar: Pi fager rog nge pi walageg, pi mfen rog nge gidiiʼ rog, gubaʼadag ni ngam motoyil gaed ngog bayay, ni nge yog ni ngam rungʼaged mi gimed nangfan e tin ni kubay e thin rog ni nggu weliy ngomed.

5 Ya musap gaed, faʼanra fare naʼab romed nga falʼngin Got ko ngiyalʼ ney e kam nanged riy ni gimed e dariy rogmed, nge gamʼingimed nge dodow ni kam taw gaed ngay—

6 Gube yoeg ngomed, faʼanra kam nanged falʼngin Got, nge gelingin ni dariy e puluw riy, nge gonop rokʼ, nge gumʼaenʼ rokʼ, nge gafgowaenʼ ni be tay rokʼ e gidiiʼ nib nʼuw napʼan; nge ku arragon, ni fare bayul ni tanmeg aram ko sommʼon nni sunmiy e fayleng, ni ireray e gin ni gomanga rayog riy e thap ngakʼ e chaʼan ra tay e pagaenʼ rokʼ ngakʼ Somoel, me yulʼyulʼ i koel falan e pi motochiyel rokʼ, me ululiy e paer u fithikʼ e mich nge yaeni madaʼ nga tomuren e yafos rokʼ, gube yipʼ fan fare yafos ko dowef ni ra yimʼ—

7 Ere gube yoeg, ni ireray e re moʼon nra yog ni nge thap, u dakean fare bayul nni tanmeg ko sommʼon nni sunmiy e fayleng ni fan ngakʼ gubin e gidiiʼ, ni chaʼ ni gomanga immoy ni kaʼaram u napʼan ni mul Adam, ara chaʼ ni bay e chiney, ara chaʼ ni bay yib, ni arragon iyaen nge madaʼ nga tomuren e fayleng.

8 Ma ireray e gin nra yog ni ngan thap riy. Ma dakuriy reb i woʼen e thap ngab yang ma kemus ni biney niʼir e kan weliy morngaʼagen; ara kubay boech e yalen ngab yang nra yog ni nge thap e gidiiʼ riy, ya kemus ni pi yalen ni kugog ngomed.

9 Nge michaenʼmed ngakʼ Got; me michaenʼmed ni ir, nge ire sunmiy gubin banʼen, u tharmiy ngu fayleng; ma nge michaenʼmed ngay ni gubin e gonop, nge gelingin ma bay rokʼ, u tharmiy ngu fayleng; ma nge mich u wunʼmed ni gidiiʼ e dabiyog ni nge nangfan urngin banʼen ni boed rogon nra yog rokʼ Somoel.

10 Ma ku bayay, nge mich u wunʼmed ni thingar mu kalgaed ngaenʼmed ko pi denen romed mi gimed piiʼ keruʼmed ngay, ma ngam sobutʼ niged gimed u mit Got; mi gimed ning ngakʼ u fithikʼ e yulʼyulʼ u gumʼirchaʼmed ni nge nʼaegfan romed; ere chiney, faʼanra ke mich e pinnʼey u wunʼmed ma ngam guyed rogon ngam fol gaed riy.

11 Ma ku bayay gube yoeg ngomed ni boed ni kuggog ngomed faram ko sommʼon, napʼan ni kam naʼab gaed ko rir rokʼ Got, ara faʼanra kam nanged falʼngin ma kam riiʼed lamen e adag rokʼ, make chuw machaan e pi denen romed, niʼir e ke yib nag e falfalaenʼ ngomed ni poloʼ, ere aram rogon ni gu baʼadag ni ngam tayed u wunʼmed, ma nge gubin e ngiyalʼ ma bay u wunʼmed, falʼngin Got, nge gimed ni dariy falʼngimed, nge falʼngin nge gafgow nib nʼuw napʼan ni ke tay ni fan ngomed, e gidiiʼ ni dariy rogmed nga bang, mag gumud niged gimed nga fithikʼ e sobutʼaenʼ, ni gimed be pining fithingan Somoel ni gubin e rran, mi gimed paer ni kam chichiʼiyed gimed u fithikʼ e mich ko renʼen ni bay yib, niʼir e kan weliy kam rungʼaged u lʼugun fare angel.

12 Ere musap gaed, gube yoeg ngomed ni faʼan gimed rarinʼ e rennʼey ma gimed ra falfalaenʼ, ma gimed ra sug ko tʼufeg rokʼ Got, me yog ni nga i mʼay machaan e denen romed; me gaaʼ e llowaenʼ romed ko fare rir rokʼ niʼir e sunmiymed, ara fare llowaenʼ nib matʼaw mab riyulʼ.

13 Ma dabi yib ngaenʼmed ni ngam gafgow niged gimed, machane ngam pired u fithikʼ e gapas, mi gimed piiʼ ngomed ni gimed gubin nra beeʼ ma rogon nib tʼuf rokʼ.

14 Ma dab mu paged pifakmed ngar mʼaed ko bilig, ara ngar pired ni dariy e mad roraed; ara mu paged raed ngar thʼaebed e pi motochiyel rokʼ Got, mar cham gaed, mar maleʼeg thin gaed, mar pigpig gaed ko fare moʼoniyanʼ, niʼir e fare masta ko denen, ara ire yaʼel nib kireb niʼir e kiiʼ i weliy e pi chitamangdaed morngaʼagen, niʼir e togopluw ko gubin mit banʼen nib matʼaw.

15 Machane ngam filed ngoraed ni nga ranoed ko pi woʼen e tin riyulʼ nge tamilngaenʼ; ngam filed ngoraed ni ngar tʼufeged yaed, ma ngar pigpig gaed ngoraed.

16 Nge ku arragon, ni gimed e ngam ayuweged e piʼin nib tʼuf e ayuw roraed; ma ngam piiʼed boech banʼen romed ngakʼ e chaʼ ni ke tʼuf rokʼ, ma dab mu paged beeʼ nib gafgow nge maen ngomed ma dab mu piiʼed ngakʼ, mi gimed pag nge yaeni yimʼ.

17 Ra yog ni ngam gaʼar gaed: Fare moʼon e ire ke gafgow nag ir; ere bay gu tay paʼag rog, ma dab gu piiʼ ngakʼ e ggan rog, ara gu piiʼ ngakʼ boech banʼen rog ni nga dabki gafgow, ya gechig rokʼ e ba matʼaw—

18 Machane gube yoeg ngomed, O pichaʼ, ni en rarinʼ e biney e ireram e chaʼ nib tʼuf rokʼ ni nge kalngaenʼ; ma faʼanra dabi kalngaenʼ ko nʼen ni ke rinʼ ma ra gafgow ni dariy nʼumngin napʼan, ma dariy e lʼagaenʼ rokʼ nga gilʼilungun Got.

19 Ya musap gaed, gathi gadaed gubin ma gafgow? Gathi gadaed gubin ma gadaed be tagaʼ ngakʼ taʼabeeʼ, ni ir Got, ko gubin e pinʼen ni bay rodaed, ko ggan nge mad, nge gol nge silber, nge gubin mite falaʼab ni bay rodaed ko urngin mit?

20 Ere musap gaed, ni mus ko ngiyalʼ ney, ma gimed be pining fithingan, ma gimed be wenig ngakʼ ni nge nʼaeg fan e pi denen romed. Ma ke pagmed nga um wenig gaed ni dariy fan? Dangay; ke puʼoeg e Kan ni Thothup rokʼ nga dakeanmed, make guy rogon ni nge sug lan gumʼirchaʼmed ko falfalaenʼ, ma ke guy rogon ni nge tileg langmed ni nga dab kum nonaed, ere rib gel e falfalaenʼ romed.

21 Ere chiney, e faʼanra Got, niʼir e sunmiymed, niʼir e gimed be tagaʼ ngakʼ ko yafos romed nge gubin banʼen ni bay romed nge gimed, ma be piiʼ ngomed e tin ni gimed be ning ngakʼ nib mangil, u fithikʼ e mich, nib michaenʼmed ngay nra yog ngomed e tin ni gimed be ning, O ere, rib tʼuf ni thingar mu piiʼed boech banʼen romed ngakʼ boech i gimed.

22 Ma faʼan gimed ra guy laniyaenʼmed rokʼ beeʼ nibe ning boech banʼen romed ngomed ni nga dabki gafgow, mi gimed gathibthib nag, ma arame rib matʼaw e gechig romed ni fan e gimed betel e tiromed banʼen ni dab mu piiʼed boech ngakʼ, ni bogi banʼen ni de milsuwon ngomed ya Got e ba milsuwon ngakʼ, niʼir e kub milsuwon e yafos romed ngakʼ; machane damur piiʼed e ayuw romed, ara mu kalgaed ngaenʼmed ko pinʼen ni kam rinʼed.

23 Gube yoeg ngomed, ni nge buch waʼathan e chaʼanem, ya pinʼen ni bay rokʼ e raʼun ngakʼ ko yamʼ; ere chiney e, gube yoeg e pinnʼey ngakʼ e piʼin ni yaed ba falaʼab ko tinu fayleng banʼen.

24 Nge ku bayay, gube yoeg ngakʼ e piʼin gafgow, ni gimed e piʼin ni dariy banʼen romed, machane gimed ba gaman ko tin bay romed, nibe yog ni ngam afgaed riy u rebo rran ngo reb, gube yipʼ fan ngomed ni gimed gubin e piʼin ni gimed be siyeg e piʼin gafgow, ni bachan e dariy banʼen romed; gu baʼadag ni nga moeged u lan gumʼirchaʼmed ni gabe gaʼar: Dagur piiʼ ya dariy rog, machane faʼanra bay rog ma gura piiʼ.

25 Ere chiney, e faʼanra gimed be yoeg ni aray rogon u lan gumʼirchaʼmed ma dariy thibngimed, ara dangaʼ mab buch fanmed; ma gechig romed e ba matʼaw ya kam chagow niged e tin ni dariy romed.

26 Ere chiney, riffan ko pinnʼey ni kug weliy ngomed—ni, fan ko nge yog ni mʼay machaan e pi denen romed u rebo rran ngo rebo rran, ni gomanga yog ni ngam maroed ni dariy thibngimed u pʼoewchen Got—Gu baʼadag ni thingar mu piiʼed boech banʼen romed ngakʼ e piʼin gafgow, ni gubin e gidiiʼ nra beeʼ ma be yaen u rogon e chuʼuw ni bay rokʼ, ni boed rogon ni ngan piiʼ gane piʼin be yimʼ ko makʼiy, ngan piiʼ e mad ko piʼin ni dariy e mad roraed, ngan nang salapen e piʼin nib mʼar min piiʼ ngoraed e tin nib tʼuf roraed, ni fan ko yaʼel nge fan ko dagur, ni boed rogon ni yaed baʼadag.

27 Mi gimed guy rogon ni pinnʼey e ngan rinʼ u fithikʼ e gonop nge yaram; ya detʼuf ni nge miil beeʼ nib moʼon nib machreg nga rogon gelingin. Nge ku bayay, rib tʼuf ni thingari gonop, ni gomanga yog riy ni fek puluwon; ere, gubin banʼen ma thingar nrinʼ nib yaram.

28 Ma gubaʼadag ni ngam tayed u wunʼmed, ni aromed u fithikʼmed ni ke fek banʼen rokʼ beeʼ nib bugul yoror rokʼ ni kura sulweg e thingari sulweg, ni boed rogon ni yoeg ni rarinʼ, ara dangaʼ ma gara denen; ma sana gur e gara kʼaring e bugul yoror rom ngki denen.

29 Nge bin tomur, e dabiyog ni ngog ngomed gubin banʼen u rogon e gin ni gimed ra denen riy; ya bay nib thilthil woʼen nge rarogon, ni rib yoʼor ni dabiyog i thiʼeg rog.

30 Machane baʼaray chirogon ni rayog ni nggog ngomed, ni faʼanra dab mu kol ayuw gaed ngomed, nge pi tafnaey romed, nge pi thin romed, nge pi ngongol romed, mi gimed fol ko fapi motochiyel rokʼ Got, mi gimed ʼulʼul ko paer u fithikʼ e mich ko pinʼen ni kam rungʼaged ni morngaʼagen fare wub rokʼ Somoel rodaed, ni aram rogon iyaen nge madaʼ nga tomuren e yafos romed, ma thingar mmʼaed. Ere chiney, O pichaʼ, mu tayed u wunʼmed, me siy mmʼaed.