1 ’E i teienei, i muri a’era, ’ia fa’aoti a’era te ari’i Beniamina i te parau atu i te mau parau i hōro’ahia mai iāna e te melahi a te Fatu, ’ua nānā a’era tōna mata i ni’a i te mau ta’ata ē ’ati noa a’e, ’e inaha ’ua ma’iri a’ena rātou ato’a i raro i te repo, i te mea ’ua tae mai te mata’u i te Fatu i ni’a ia rātou.

2 ’E ’ua hi’o rātou ia rātou iho i roto i tō rātou huru tāhuti noa, e mea ’ino a’e ïa i te repo puehu o te fenua. ’E ’ua pi’i pūai mai ra rātou ato’a ma te reo hō’ē, i te nā-’ō-ra’a ē : ’A aroha mai ia mātou nei, ’e ’a tu’u mai i te toto tāra’ehara o te Mesia ’ia fa’a’orehia tā mātou nei mau hara, ’e ’ia mā tō mātou ’ā’au ; tē ti’aturi nei ho’i mātou ia Iesu Mesia, te Tamaiti a te Atua, tei hāmani i te ra’i ’e te fenua, ’e te mau mea ato’a ra ; ’o tē pou mai i raro nei i rotopū i te mau tamari’i a te ta’ata nei.

3 ’E i muri a’era, ’ia oti a’era teie mau parau i te parauhia e rātou, ’ua tae mai ra te Vārua o te Fatu i ni’a ia rātou, ’e ’ua ’ī ihora rātou i te ’oa’oa, nō te fāri’ira’a i te ha’amatarara’a nō tā rātou ra mau hara, ’e te hau i roto i tō rātou ’ā’au, nō tō rātou fa’aro’o rahi ia Iesu Mesia ’o tē tae mai, mai te au i te mau parau i parauhia mai e te ari’i Beniamina ia rātou ra.

4 ’E ’ua hāmama fa’ahou atu ra te ari’i Beniamina i tōna vaha ’e ’ua ha’amata ihora i te parau atu ia rātou, i te nā-’ō-ra’a atu ē : E hōmā, e tō’u mau taea’e, e tō’u mau fēti’i, e tō’u nei mau ta’ata, ’a fa’aro’o fa’ahou mai ’outou iā’u, ’ia fa’aro’o ’e ’ia ’ite ho’i ’outou i te toe’a o tā’u nei mau parau, tā’u e parau atu ia ’outou na.

5 Inaha ho’i, mai te mea ē ’ua fa’aaraara te maita’i o te Atua ia ’outou i teie taime ’ia ’ite i tō ’outou faufa’a ’ore, ’e tō ’outou huru faufa’a ’ore ’e te hi’ara’a—

6 Tē parau atu nei au ia ’outou na, mai te mea ē ’ua fāri’i ’outou i te ’ite i tō te Atua maita’i, ’e tōna mana fāito ’ore, ’e tōna pa’ari, e tōna fa’a’oroma’i, e tōna huru marū i te mau tamari’i a te ta’ata nei ; ’e ’oia ato’a, te ’ite i te tāra’ehara i fa’aineinehia mai te ha’amatara’a mai ā o te ao nei, ’e nā roto i te reira e tae mai ai te fa’aorara’a i te ta’ata ’o tē ti’aturi māite i te Fatu ’e ’o tē fa’aitoito noa i te ha’apa’ora’a i te mau fa’auera’a, ’e i te tāpe’a māite ho’i i te fa’aro’o ē tae noa atu i te hope’a nō tōna orara’a nei, ’oia ho’i te ora o te tino tāhuti—

7 Tē parau nei au ē, ’o ’oia ïa te ta’ata ’o tē fāri’i i te fa’aorara’a, nā roto i te tāra’ehara i fa’aineinehia mai te ha’amatara’a mai ā o te ao nei nō te ta’ata ato’a nei, ’o tē vai ra mai te hi’ara’a o Adamu mai ā, ’e ’o tē vai nei, ’e te vai ā ē tae noa atu i te hope’a o te ao nei.

8 ’E ’o te rāve’a ïa teie e tae mai ai te fa’aorara’a. ’E ’aita atu e fa’aorara’a maori rā teie tei parauhia a’enei ; ’e ’aita atu ho’i e rāve’a e ora ai te ta’ata, maori rā te mau rāve’a tā’u i parau atu ia ’outou.

9 ’A ti’aturi i te Atua ; ’a ti’aturi ē tē vai ra ’oia, ’e nāna ho’i i hāmani i te mau mea ato’a, tō te ra’i ’e tō te fenua nei ; ’a ti’aturi ē tei iāna te pa’ari ē hope noa a’e, ’e te mau mana ato’a, tō te ra’i ’e tō te fenua nei ; ’a ti’aturi ē ’aita e ti’a i te ta’ata ’ia māramarama i te mau mea mai tā te Fatu i māramarama.

10 ’E teie fa’ahou ā, ’a ti’aturi e mea ti’a ia ’outou ’ia tātarahapa i tā ’outou mau hara ’e ’ia fa’aru’e roa i te reira, ’e ’ia fa’aha’eha’a ia ’outou iho i mua i te Atua ; ’e ’ia ani ma te ’ā’au tae ’ia fa’a’ore mai ’oia i tā ’outou mau hara ; ’e i teienei, mai te mea e ti’aturi ’outou i teie mau mea, ’a ara ’ia ha’apa’o ’outou i te reira.

11 ’E tē parau fa’ahou atu nei au ia ’outou na, mai tā’u i parau a’enei i te mātāmua ra, ’e ’a ’ite ai ’outou i te hanahana o te Atua, ’e ’aore rā ’āhiri ’ua ’ite ’outou i tōna maita’i ’e ’ua fāri’i i tōna ra aroha, ’e ’ua fāri’i ho’i i te ha’amatarara’a nō tā ’outou ra mau hara, ’o tei fa’atupu i te pōpou rahi i roto i tō ’outou ’ā’au, nō reira ’ua hina’aro vau ’ia ha’amana’o māite ’outou, ’e ’ia tāmau noa i te ha’amana’o i te mana rahi o te Atua, ’e tō ’outou faufa’a ’ore, ’e tōna maita’i ’e te fa’a’oroma’ira’a ia ’outou, ’e te ta’ata ti’amā ’ore, ’e ’ia fa’aha’eha’a ’outou ia ’outou iho i raro, i te ha’eha’a roa ra, ma te pi’i atu i te i’oa o te Fatu i te mau mahana ato’a, ’e ma te ti’a māite i roto i te fa’aro’o ’o tē tae mai, ’o tei parauhia mai ho’i e te vaha o te melahi ra.

12 ’E inaha, tē parau atu nei au ia ’outou na, mai te mea e rave ’outou i te reira, e ’oa’oa noa ïa ’outou, ’e e fa’a’īhia ho’i ’outou i te aroha o te Atua, ’e e fāri’i tāmau noa ’outou i te ha’amatarara’a nō tā ’outou ra mau hara ; ’e e tupu rahi tō ’outou ’ite i te hanahana nōna ’o tei hāmani ia ’outou, ’oia ho’i, i te ’ite i te mea ti’a e te parau mau.

13 E e’ita te mana’o e tupu i roto ia ’outou nō te hāmani ’ino i te tahi, e hina’aro rā ’outou ’ia ora noa ma te hau, ’e ’ia tu’u atu i te ta’ata ato’a i tei au i tāna ra utu’a.

14 ’E ’eiaha roa ’outou e vaiiho noa i tā ’outou mau tamari’i ’ia po’ia rātou, ’e ’ia vai taha’a noa ; ’e ’eiaha roa ho’i ’outou e fa’ati’a ia rātou ’ia ’ōfati i te mau ture a te Atua, ’e ’ia taputō ’e ’ia tātama’i ho’i te tahi i te tahi, ’e ’ia tāvini i te diabolo, te fatu o te hara, ’oia ho’i te vārua ’ino ’o tā tō tātou mau metua i parau mai ra, ’o te ’enemi ’oia nō te mau parauti’a ato’a.

15 E ha’api’i rā ’outou ia rātou ’ia haere nā te ’ē’a o te parau mau ’e te ha’apa’o maita’i ; e ha’api’i ho’i ’outou ia rātou ’ia aroha te tahi i te tahi, ’e ’ia tāvini te tahi i te tahi.

16 ’E ’oia ato’a, e aupuru ’outou ia rātou tei au ia ’outou ’ia aupuru ; e hōro’a atu ho’i ’outou i tā ’outou tao’a iāna ’o tei ’ere i te reira ; ’e ’eiaha ho’i ’outou e vaiiho noa i te ta’ata tāparu ’ia ani faufa’a ’ore noa mai ia ’outou, ’e ’ua vaiiho atu ’outou iāna ’ia pohe.

17 E parau paha ’outou ē : Nā te ta’ata iho i ’āfa’i mai i tōna ’ati i ni’a iho iāna ; nō reira e’ita vau e fa’atoro i tō’u rima, e’ita ato’a ho’i au e hōro’a atu i tā’u mā’a nāna, ’e e’ita ho’i au e ’ōpere atu i tā’u tao’a nāna ’ia fa’aora iāna i te pohe, nō te mea ’ua ti’a tāna mau utu’a—

18 ’Āre’a rā tē parau atu nei au ia ’outou na, e te ta’ata i rave i te reira, e mea ti’a roa ïa iāna ’ia tātarahapa ; ’e ’ia ’ore ’oia e tātarahapa i tāna i rave ra, e pohe ïa tōna ē a muri noa atu, ’e ’aita roa tāna e faufa’a i te bāsileia o te Atua ra.

19 Inaha ho’i, e ’ere ānei tātou pā’āto’a i te feiā tāparu ? ’Aita ānei tātou pā’āto’a e ti’aturi nei i te hō’ē ā ta’ata, ’oia ho’i i te Atua, nō te mau mea ato’a tā tātou i fāri’i ; nō te mā’a ’e te ’ahu, ’e nō te ’auro, ’e nō te ’ārio, ’e nō te mau huru tao’a ato’a tā tātou i fāri’i ?

20 ’E inaha, i teie nei ā taime, tē pi’i noa ra ’outou i tōna i’oa, ’e i te tāparura’a nō te ha’amatarara’a i tā ’outou ra mau hara. ’Ua vaiiho ānei ’oia ’ia tāparu faufa’a ’ore noa ’outou iāna ? ’Aita roa ; ’ua nīni’i mai rā ’oia i tōna Vārua i ni’a ia ’outou, ’e ’ua fa’a’ī ’oia i tō ’outou ’ā’au i te ’oa’oa, ’e ’ua tāpiri ’oia i tō ’outou vaha i ’ore i ti’a ai ia ’outou ’ia parau atu nō tō ’outou ’oa’oa rahi.

21 ’E i teienei, mai te mea e fa’ati’a mai te Atua, ’o tei hāmani ia ’outou, ’e tei roto ho’i iāna te parau nō tō ’outou ora, ’e nō te mau mea ato’a tā ’outou i fāri’i, nō te hōro’a mai i tā ’outou e ani atu iāna ma te parauti’a, ’e ma te fa’aro’o, ’e ma te ti’aturi e fāri’i ’outou, e mea ti’a roa ïa ia ’outou ’ia ’ōpere atu i te tao’a tā ’outou i fāri’i nā te tahi ’e te tahi.

22 ’E mai te mea e ha’avā ’outou i te ta’ata ’o tē fa’atae mai i tāna anira’a ia ’outou nō tā ’outou tao’a ’ia ’ore ’oia ’ia pohe, ’e ’ua fa’ahapa atu ’outou iāna, e aha atu ïa tē ti’a nō tō ’outou fa’ahapara’ahia, ’o ’outou i tāpe’a i tā ’outou tao’a, e ’ere ho’i te reira i tā ’outou iho, nā te Atua rā, tei iāna ato’a ho’i tō ’outou ora ; ’e ’aita ho’i ’outou i tu’u atu i tā ’outou anira’a i ni’a, ’e ’aita ato’a ho’i i tātarahapa i te mea tā ’outou i rave.

23 Tē parau atu nei au ia ’outou, ’auē ho’i taua ta’ata ra ē, nō te mea e mou ho’i tāna faufa’a e ’oia ato’a ; ’e i teienei, e parau atu vau i teie nei mau mea i te mau ta’ata tao’a rahi i te mau mea nō teie nei ao.

24 ’E teie fa’ahou ā, e parau atu vau i te feiā veve, ’outou ’o tei ’ere i te faufa’a, maori rā ’ua nava’i noa tā ’outou nō te ora i terā mahana ’e i terā mahana ; ’oia ho’i, ’outou pā’āto’a ’o tei fa’a’ere i te ta’ata tāparu, nō te mea ’aita a ’outou ; teie tō’u hina’aro ia ’outou, ’ia parau ’outou i tō ’outou iho ’ā’au ē : ’Aita vau e hōro’a nō te mea ’aita tā’u ; ’āre’a rā ’āhiri tē vai ra tā’u, e hōro’a ïa vau.

25 ’E i teienei, ’āhiri ē parau ’outou i te reira i roto i tō ’outou ’ā’au, tē vai ra ïa ’outou i roto i te hapa ’ore ; ’e mai te mea ē ’aita, ’ua fa’ahapahia ïa ’outou, ’e ’ua ti’a roa ho’i tō ’outou fa’ahapara’ahia nō te mea tē nounou ra ’outou i tei ’ore i fāri’ihia e ’outou.

26 ’E i teienei, nō teie mau mea tā’u i parau iho nei ia ’outou na—’oia ho’i, nō te fāri’ira’a i te ha’amatarara’a i tā ’outou ra mau hara i terā mahana ’e i terā mahana, ’ia ti’a ia ’outou ’ia haere ma te hapa ’ore i mua i te aro o te Atua—tē hina’aro nei au ’ia ’ōpere atu ’outou i tā ’outou tao’a nā te mau ta’ata veve, ’o te ta’ata ato’a i tei au i tāna ra faufa’a, i te fa’a’amura’a i tei po’ia, ’e te fa’a’ahura’a i tei taha’a noa ra, ’e i te utuutura’a i tei ma’ihia, ’e te ha’amāmāra’a i tā rātou hōpoi’a i te pae vārua ’e i te pae tino ho’i, mai te au i tō rātou ra hina’aro.

27 ’E ’a ara ’ia ravehia teie mau mea ato’a ma te pa’ari ’e ma te nahonaho ; ’aita ho’i i tītauhia i te hō’ē ta’ata ’ia horo ’oi’oi atu i tei au i tōna ra pūai. ’E teie fa’ahou ā, e mea ti’a roa iāna ’ia ha’apa’o maita’i, ’e nā roto i te reira e roa’a iāna te rē ; nō reira, ’ia ravehia te mau mea ato’a ma te nahonaho.

28 ’E ’ua hina’aro vau ’ia ha’amana’o ’outou ē, ’o te ta’ata i rotopū ia ’outou ’o tē tīpe’e i tā tōna ta’ata tupu, ’ia fa’aho’i ’oia i te mea tāna i tīpe’e mai, mai te au i te parau tāna i fa’aau atu ; mai te mea ’aita ’ua rave ïa ’oe i te hara ; ’e e riro ato’a paha te reira i te fa’atupu i te hara i roto i tō ’oe ta’ata tupu.

29 ’E i te pae hope’a, ’aita e ti’a iā’u ’ia fa’a’ite atu ia ’outou i te mau mea ato’a ē hope roa a’e e hara ai ’outou ; ’ua rau te huru o te ’ē’a ’e te rāve’a, ’e nō te rahi ’aita roa ïa e ti’a iā’u ’ia tai’o i te reira.

30 ’Āre’a rā teie noa te tahi tufa’a tā’u e ti’a ’ia fa’a’ite atu ia ’outou, ’oia ho’i, ’ia ’ore ’outou e hi’opo’a ia ’outou iho, ’e tō ’outou mau mana’o, ’e tā ’outou mau parau, ’e tā ’outou mau ’ohipa, ’e e ha’apa’o ho’i i te mau fa’auera’a a te Atua, ’e e mau pāpū noa i te fa’aro’o i tei fa’aro’ohia e ’outou nō te taera’a mai o tō tātou Fatu, ē tae noa atu i te hope’a o tō ’outou orara’a, e pohe mau ïa ’outou. ’E i teienei, ’e te ta’ata ē, ’a ha’amana’o, ’ia ’ore ’ia pohe.