1 ’E i teienei, i muri a’era, ’ua fāri’i noa te ari’i Mosia i te hau nō te ārea e toru matahiti te maoro, ’e ’ua hina’aro a’era ’oia ’ia ’ite i te parau nō te mau ta’ata i haere i ni’a, nō te fa’aea i te fenua ra nō Lehi-Nephi, ’oia ho’i i te ’oire nō Lehi-Nephi ; nō te mea ’aita tōna mau ta’ata i fa’aro’o i te parau nō ni’a ia rātou, mai te taime i fa’aru’e ai rātou i te fenua ra nō Zarahemela ; nō reira, ’ua ha’ape’ape’a rātou iāna i tā rātou ra mau tītaura’a.

2 ’E i muri a’era, ’ua fa’ati’a atu ra te ari’i Mosia hō’ē ’ahuru ma ono o tōna mau ta’ata pūai ’ia haere i ni’a, i te fenua ra nō Lehi-Nephi nō te ’imi i tō rātou mau taea’e.

3 ’E i muri a’era, ’ia ao a’era, ’ua ha’amata ihora rātou i te haere i ni’a, ’e tei rotopū ia rātou te tahi ta’ata pūai ’e te itoito, ’o Amona, ’e e hua’ai ’oia nō Zarahemela ; ’e e ta’ata fa’atere ho’i ’oia nō rātou.

4 ’E i teienei, ’aita rātou i ’ite i te ’ē’a e haere nā roto i te mēdēbara, e tae atu ai i ni’a i te fenua ra nō Lehi-Nephi ; nō reira ’ua haere ’ē noa rātou i roto i te mēdēbara e rave rahi mau mahana, ’oia ïa, ’ua haere ’ē noa rātou e maha ’ahuru mahana.

5 ’E ’ia ma’iri e maha ’ahuru mahana tō rātou haere-’ē-noa-ra’a, ’ua tae atu ra rātou i te hō’ē ’āivi i te pae apato’erau i te fenua ra nō Siloma, ’e ’ua fa’ati’a ihora rātou i tō rātou mau ti’ahapa i reira.

6 ’E ’ua rave ihora Amona i nā taea’e to’otoru nōna ra, ’o Amaleki, ’o Helema, ’e ’o Hema tō rātou mau i’oa, ’e ’ua haere atu ra rātou i raro, i te fenua ra nō Nephi.

7 ’E inaha, ’ua fārerei atu ra rātou i te ari’i o te feiā e pārahi ra i te fenua ra nō Nephi, ’e i te fenua ra nō Siloma ; ’e ’ua ha’a’atihia rātou e te fa’ehau o te ari’i, ’e ’ua ravehia rātou, ’e ’ua ru’uru’uhia, ’e ’ua tu’uhia i roto i te fare tāpe’ara’a.

8 ’E i muri a’era, ’ua tāpe’ahia rātou e piti mahana i roto i te fare tāpe’ara’a ’e ’ua arata’i-fa’ahou-hia atu ra rātou i mua i te ari’i, ’e ’ua tātarahia tō rātou mau tā’amu ; ’e ’ua ti’a noa ihora rātou i mua i te ari’i, ’e ’ua fa’ati’ahia ’e ’ua fa’auehia rātou ’ia pāhono mai i te mau uira’a tāna e ui atu ia rātou.

9 ’E ’ua parau atu ra ’oia ia rātou : Inaha, ’o vau nei ’o Limehi, te tamaiti a Noa, ’oia te tamaiti a Zenifa, ’o tei haere mai i ni’a nei mai te fenua nō Zarahemela mai, nō te fatu i teie nei fenua, i te fenua o tō rātou ra mau metua, ’o tei fa’arirohia ’ei ari’i nā roto i te reo o te mau ta’ata.

10 ’E i teienei, ’ua hina’aro vau ’ia ’ite i te tumu i ha’afātata mai ai ’outou i te mau patu o te ’oire nei ma te mata’u ’ore, ’a pārahi ai au, ’o vau iho, ’e tō’u mau fa’ehau ato’a ho’i i rāpae’au i te ’ūputa ?

11 ’E i teienei, ’o teie te tumu ’ua fa’aora vau ia ’outou, ’ia ti’a iā’u ’ia ui atu ia ’outou, ’āhiri ’aita te reira mana’o i tupu, ’ua fa’aue atu na ïa vau i tā’u mau fa’ehau ’ia taparahi ia ’outou. ’Ua fa’ati’ahia ’outou ’ia paraparau mai.

12 ’E i teienei, ’ia ’ite a’era Amona ē, ’ua fa’ati’ahia ’oia ’ia paraparau atu, ’ua haere atu ra ’oia i mua ’e ’ua pi’o ihora i mua i te aro o te ari’i ; ’e ’ia ti’a fa’ahou a’era ’oia i ni’a ’ua nā ’ō atu ra ’oia : E te ari’i ē, ’ua māuruuru roa vau i te Atua i teie nei mahana, i te mea tē ora nei ā vau, ’e ’ua fa’ati’ahia vau ’ia paraparau ; ’e e tāmata ho’i au ’ia paraparau atu ma te mata’u ’ore ;

13 Nō te mea ’ua ’ite au ē, ’āhiri ’oe i ’ite ē ’o vai au nei, ’aita ïa ’oe e fa’ati’a ’ia ru’uru’uhia vau i teie nei mau tā’amu. Nō te mea ’o Amona vau, ’e e hua’ai ho’i au nō Zarahemela, ’e i haere mai mātou mai te fenua nō Zarahemela mai nō te ’imi i tō mātou mau taea’e, tā Zenifa i arata’i mai i ni’a nei mai roto mai i taua fenua ra.

14 ’E i teienei, i muri a’era, i tō Limehi fa’aro’ora’a i te mau parau a Amona, ’ua ’oa’oa roa ihora ’oia, ’e ’ua nā ’ō atu ra : I teienei, ’ua ’ite pāpū vau ē tē ora noa nei ā tō’u mau taea’e i te fenua ra nō Zarahemela. ’E i teienei, e ’oa’oa vau ; e ananahi e fa’a’oa’oa ato’a vau i tō’u nei mau ta’ata.

15 Inaha ho’i, tei roto mātou i te fa’atītīra’a a te mau ’āti Lamana, ’e ’ua tutehia mātou i te tute rahi ’o tē ti’a ia mātou ’ia ’aufau. ’E i teienei, inaha, e fa’aora tō tātou mau taea’e ia tātou i te fa’atītīra’a, ’e i te rima ho’i o te mau ’āti Lamana, ’e e riro tātou ’ei tītī nā rātou ; e mea maita’i a’e ho’i ’ia riro tātou ’ei tītī nā te mau ’āti Nephi, i te ’aufau atu i te moni tute i te ari’i o te mau ’āti Lamana.

16 ’E i teienei, ’ua fa’aue atu ra te ari’i Limehi i tōna mau ta’ata tīa’i, ’eiaha rātou e ru’uru’u fa’ahou ia Amona ’e tōna mau taea’e, ’ia ’āfa’i atu rā ia rātou i te ’āivi i te pae apato’erau i Siloma, ’e ’ia arata’i mai i tō rātou mau taea’e i roto i te ’oire, ’ia ti’a ia rātou ia tamaa, ’ia inu, ’e ’ia fa’afa’aea i te mau ’ohipa nō tō rātou tere ; i ro’ohia ho’i rātou i te mau ’ati e rave rahi ; i pohe nā rātou i te poia, ’e te po’ihā, ’e te rohirohi.

17 ’E i teienei, i muri a’era, ’ia ao a’era, ’ua fa’atae atu ra te ari’i Limehi i te hō’ē fa’auera’a i rotopū i tōna ra mau ta’ata ato’a, ’ia ha’aputuputu ’āmui mai rātou i te hiero, nō te fa’aro’o i te mau parau o tāna e parau atu ia rātou.

18 ’E i muri a’era, ’ia ha’aputuputu ’āmui mai rātou, ’ua parau atu ra ’oia ia rātou mai teie te huru, i te nā-’ō-ra’a ē : ’O ’outou, e tō’u mau ta’ata, ’a fa’ateitei mai na ’outou i tō ’outou upo’o ma te ’oa’oa ; inaha ho’i, teie mai nei te tau, ’oia ho’i tē fātata mai nei te tau ’e ’aita tātou e riro fa’ahou i raro a’e i te fa’aterera’a a tō tātou mau ’enemi, noa atu ā tō tātou mau tāfifira’a rahi ’o tei riro ’ei mea faufa’a ’ore ; tē ti’aturi mau nei rā vau ē, tē vai atu ra te tāfifira’a e noa’a mai te manuia.

19 Nō reira, ’a fa’ateitei mai na ’outou i tō ’outou upo’o ’e ’a ’oa’oa, ’e ’a ti’aturi i te Atua, i te Atua o Aberahama, ’e o Isaaka, ’e o Iakoba ; ’e ’oia ato’a, i taua Atua ra tei arata’i mai i te mau tamari’i o ’Īserā’ela i rāpae i te fenua nō ’Aiphiti, ’e tei arata’i ia rātou nā roto i te miti ’Ute’ute nā ni’a i te fenua marō ra, ’e tei fa’a’amu ho’i ia rātou i te mana, ’ia ’ore rātou ’ia pohe i roto i te mēdēbara ra ; ’e ’ua rahi atu ā te mau mea tāna i rave nō rātou ra.

20 ’E teie fa’ahou ā, i taua iho ā Atua ra tei arata’i mai i tō tātou mau metua i rāpae i te fenua nō Ierusalema, ’e tei ha’apa’o ho’i ’e tei fa’aherehere i tōna mau ta’ata ē tae roa mai i teienei ; ’E inaha, nō tā tātou mau ’ohipa ’ī’ino ’e te mau ’ohipa vi’ivi’i i hōpoi mai ai ’oia ia tātou i roto i te fa’atītīra’a.

21 E ’ite ho’i ’outou ato’a i teie nei mahana ē, nō te hina’aro rahi o Zenifa, ’oia te ari’i o teie nei mau ta’ata, ’ia pārahi fa’ahou i te fenua o tōna ra mau metua, i ha’avarehia ai ’oia e te ha’avare ’e te ’ohipa tāviri a te ari’i ra o Lamana, ’o tei fa’aau i te parau i te ari’i ra ia Zenifa, ’e tei hōro’a atu ho’i i roto i tōna rima i te tahi pae o te fenua, ’oia ho’i te ’oire ra nō Lehi-Nephi, ’e te ’oire nō Siloma ; ’e te mau fenua ē ’ati noa a’e—

22 ’E ’ua nā reira ’oia nō te hō’ē ana’e iho tumu, nō te ’āfa’i mai i teie mau ta’ata i raro a’e i tāna fa’aterera’a ’e ’aore rā i roto i te fa’atītīra’a. ’E inaha, tē ’aufau nei tātou i te tute i teie taime i te ari’i o te mau ’āti Lamana, ē tae noa atu i te ’āfara’a ’o tā tātou tō, ’e tā tātou kerite, ’e tā tātou mau huru sītona ato’a, ’e te ’āfara’a ho’i o te mau fanau’a ’o tā tātou mau nana māmoe ’e tā tātou mau nana pua’atoro ; ’e tē tītau mai nei te ari’i o te mau ’āti Lamana i te ’āfara’a o te mau mea ato’a i roa’a mai ia tātou, ’e ’aore rā i tō tātou ora.

23 ’E i teienei, e ’ere ānei te reira i te mea teiaha ’ia fa’a’oroma’i ? E ’ere ānei teie i te ’ati rahi nō tātou ? ’E i teienei, inaha, ’ua rahi roa te tumu ’ua ti’a roa ia tātou ’ia ’oto.

24 ’Oia ïa, tē parau atu nei au ia ’outou na, ’ua rahi roa te mau tumu ’ua ti’a roa ia tātou ’ia ’oto ; inaha ho’i, ’ua rahi roa tō tātou mau taea’e i taparahihia, ’e ’ua ha’amani’ihia tō rātou toto ma te faufa’a ’ore nō te mau ’ohipa ’ī’ino.

25 ’E ’āhiri ’aita teie nei feiā i ’ōfati i te mau ture, ’aita ïa te Fatu e fa’ati’a ’ia tae mai teie nei ’ino rahi i ni’a iho ia rātou. Inaha rā, ’aita rātou i fa’aro’o i tāna mau parau, ’e ’ua tupu a’era te mau mārōra’a i rotopū ia rātou, ’e ’ua ha’amani’i ihora rātou i tō rātou toto te tahi i te tahi.

26 ’E ’ua taparahi rātou i te hō’ē peropheta o te Fatu ; ’oia ïa, i te hō’ē ta’ata mā’itihia e te Atua, ’o tei fa’a’ite atu ia rātou i tā rātou mau ’ohipa ’ī’ino e mau ’ohipa vi’ivi’i, ’e ’ua tohu ho’i ’oia i te mau mea e tupu a muri atu, ’oia ïa, i te taera’a mai o te Mesia.

27 ’E nō te mea ’ua parau mai ’oia ia rātou ē, ’o te Mesia ra, ’o te Atua ïa, te Metua o te mau mea ato’a ra, ’e i parau ho’i ’oia ē, e riro mau ’oia mai te ta’ata nei te huru, i te hōho’a o te ta’ata i hāmanihia i te mātāmua ra ; ’oia ho’i, i parau mai ’oia ē, ’ua hāmanihia te ta’ata i te hōho’a o te Atua ra, ’e e haere mai te Atua i raro nei i rotopū i te mau tamari’i a te ta’ata nei, ’e e rave mai ho’i ’oia i te tino ’i’o ’e te toto, ’e e hāhaere ho’i nā ni’a i te fenua nei—

28 ’E i teienei, nō te mea i parau mai ’oia i te reira, ’ua taparahi rātou iāna ; ’e ’ua rahi atu ā te mau mea tā rātou i rave tei fa’atae mai i te riri ’ū’ana o te Atua i ni’a ia rātou. Nō reira, ’o vai tei māere i te mea tei roto rātou i te tītīra’a, ’e ’ua tā’irihia ho’i rātou i te ’ati māuiui rahi roa ?

29 Inaha ho’i, ’ua parau mai te Fatu ē : E’ita roa vau e tauturu atu i tō’u ra mau ta’ata i te mahana nō tā rātou ’ōfatira’a i te mau ture ; e fa’aapiapi rā vau i tō rātou mau ’ē’a ’ia ’ore rātou ’ia manuia, ’e e riro ho’i tā rātou mau rāve’a ’ei turorira’a i mua ia rātou ra.

30 ’E tē parau fa’ahou mai ra ’oia ē : ’Ia ueue tō’u mau ta’ata i te mau ’ohipa vi’ivi’i ra, e ’ō’oti ïa rātou i te ota nō reira mai i roto i te pūāhiohio ra ; ’e e mea ta’ero ho’i te roa’a.

31 ’E tē parau fa’ahou mai ra ’oia ē : ’Ia ueue tō’u mau ta’ata i te mau ’ohipa vi’ivi’i ra, e ’ō’oti ïa rātou i te mata’i nō te hiti’a o te rā ra, ’o tē hōpoi ’oi’oi mai i te pau rahi.

32 ’E i teienei, inaha, ’ua tupu te fafaura’a a te Fatu, ’e ’ua tā’irihia ’e ’ua ro’ohia ho’i ’outou i te ’ati.

33 ’E mai te mea e fāriu mai ’outou i te Fatu ma te ’ā’au ato’a, ’e ma te ti’aturi iāna, ’e ma te tāvini iāna ma tō ’outou mana’o ato’a ra, ’ia nā reira ’outou, e fa’aora ïa ’oia ia ’outou i tō ’outou tītīra’a, mai te au i tōna ra hina’aro ’e tōna mana’o.