1 Ere chiney, e yibi buch u tomuren ni ke ululiy fare pilung i Mosiah e gapas u langgin dalip e duw, me adag ni nge nang morngaʼagen fapi gidiiʼ ni ka ranoed ngar pired ko farengi nam nu Lehi-Nephi, ara lan e binaw nu Lehi-Nephi; ya pi gidiiʼ ney e dariy banʼen ni kar rungʼaged roraed u napʼan ni ranoed ngar chuw gaed ko fare binaw nu Zarahemla; i paer nike magaf laniyaenʼ ngoraed.

2 Me yibi buch ni pilung i Mosiah e yoeg ni ragag nge nelʼ e pumoʼon roraed nib gel e nga ranoed ko farengi nam nu Lehi-Nephi, ni ngar nanged morngaʼagen pi walagraed.

3 Me yibi buch u napʼan ni rebo rran riy mar tabab niged e yaen, ni bay beeʼ roraed ni Ammon, ni beeʼ nib moʼon nib gel mab yargael, ma beeʼ ni gidiiʼ ku Zarahemla; ma ku ire gaaʼ roraed.

4 Ere chiney, e dar nanged e gin ni ngar sor gaed ngay u lan wuruʼ e binaw ni nga ranoed ko farengi nam nu Lehi-Nephi; ere ra malog gaed nib yoʼor e rran u lan wuruʼ e binaw, ni aningeg i ragag e rran ni kar malog gaed.

5 Ma tomuren ni kar malog gaed ni aningeg i ragag e rran mar baed nga bangi falang, ni bay nga leluʼoch ko fare binaw nu Shilom, ma ireram e gin nra nʼufed e tent roraed riy.

6 Ma Ammon e fek dalip i walagen, ni fithingraed e Amaleki, Helem, nge Hem, ma ranoed nga lan farengi binaw ku Nephi.

7 Ma musap gaed, ra madaʼ niged fare pilung ko fapi gidiiʼ ni ur moyed u lan fare binaw rokʼ Nephi, ngo lan fare binaw rokʼ Shilom; make liyegraed e pi matanag ko fare pilung, min fekraed, ngan mʼag raed, ma ninʼ raed nga kalbus.

8 Me yibi buch u tomuren ni ke gaman e lʼagruw e rran yaed u kalbus min fekraed bayay nga pʼoewchen fare pilung, min pithig e mʼag roraed; mar sakʼiy gaed u pʼoewchen fare pilung, me piiʼ matʼawraed ara chiyliy ngoraed, ni ngar piiʼed e fulweg ko duwer ni nge fith ngoraed.

9 Me gaʼar ngoraed: Musap gaed, I gag Limhi, ni fak Noah, ni ir fak Zeniff, niʼir e yib ko fare binaw nu Zarahemla ni nge tafnay e giney e binaw, ni bangi binaw ni tafen e pi chitamangraed, nni pilung nag u lungun fapi gidiiʼ.

10 Ere chiney, e gu baʼadag ni nggu nang ko mangfan ni damur rus gaed ni kam baed nga toʼben e re binaw ney, u napʼan ni gag, nug bay nge pi matanag rog u wuruʼ e garog?

11 Ere chiney, e ireray fan ni kug pag ni ngan taymed ni dab mmʼaed, ni nge yog ni ngug fithmed, ara dangay ma kug pag e pi matanag rog ney ngar liiʼed gimed ngam mʼaed. Ere mu nonaed.

12 Ere chiney, e napʼan ni guy Ammon ni kan piiʼ matʼawon ni nge non, me kan nga mʼon nge siroʼ ngakʼ fare pilung; me bagbag u butʼ ngalang bayay me gaʼar: O pilung, ri gub falfalaenʼ u pʼoewchen Got e bin dabaʼ ney e rran ni kugub fos, ma kam piiʼ matʼawog ni nggu non; ere bay gugay rogon nggu non u fithikʼ e athamgil.

13 Ya kug nang ni faʼan gomanga gam nangeg ma dab mu pag ngan mʼag e tiney e gaf ngog. Ya gag Ammon, ma gag beeʼ ko binaw nu Zarahemla, ma kugub nga wuruʼ e binaw nu Zarahemla ni gube gay morngaʼagen pi walagmaed, ni Zeniff e fekraed nga wuruʼ e re binaw nem.

14 Ere chiney, e yibi buch u tomuren ni ke rungʼag Limhi fapi thin rokʼ Ammon, mari falfalaenʼ ni rib gel, me gaʼar: Chiney, e kar gunang ni pi walageg ni ur moyed u lan fare binaw nu Zarahemla e kuyaed ba fos. Ere chiney, e nggu falfalaenʼ; ma nge rebo rran riy mug guy rogon e gidiiʼ rog ngar falfalaenʼ gaed boech.

15 Ya musap, kad manged sib rokʼ fapi Lamanites, ma kan tax nagdaed ni kad gafgow gaed riy. Ere chiney, e musap gaed, pi walagdaed e bay ra chuweged gadaed u kalbus rodaed, ara u tanpaʼ fapi Lamanites, ma ngad manged sib roraed; ya kub felʼ ni ngad manged sib rokʼ fapi Nephites ko bin baʼaray ni nga ud piiʼed e tax ko fare pilung ko Lamanites ni bachan e nge yog ni nga ud pired u fithikʼ e gapas.

16 Ere chiney, e pilung ni Limhi e yoeg ko pi matanag rokʼ ni dab kur mʼaged Ammon ara walagen, machane guy rogon ni ngar suloed ko farengi falang ni bay ko leluʼoch u Shilom, ngar feked walagraed nga lan fare binaw, ni nge yog nra abich gaed, min garbad, mar toffan gaed ko milekag ni kar tayed; ya bayoʼor banʼen ni kar gafgow gaed riy; ya kar gafgow gaed ko makʼiy, balel, nge magaer.

17 Ere chiney, e yibi buch ni rebo rran riy me piiʼ fare pilung i Limhi ba babyor ni ke yoloey ni nge nang gubin e gidiiʼ rokʼ, ni gomanga yog nra kunuyed yaed nga temple, ni ngar rungʼaged e pi thin ni nge weliy ngoraed.

18 Me yibi buch u napʼan ni kar kunuyed yaed nga taʼabang me non ngoraed ni gaʼar: O gimed, e pi gidiiʼ rog, mu puged oewchmed ngalang ma ngam gapaseged laniyaenʼmed; ya musap gaed, fare ngiyalʼ innʼem e ke chugur ngay, ara daki palog nga orel, ma kad chuw gaed u tanpaʼ e pi toʼogor rodaed, ni yug aram rogon ni ke reb abdaed i lemnag ni ngad chuw gaed, ma dar yog, ere machane ba mich u wunʼug ni kubay taʼabyay e guruboch ni ngad tayed.

19 Ere, mu puged oewchmed ngalang, mi gimed falfalaenʼ, mu tayed e pagaenʼ romed ngakʼ Got, ngakʼ fare Got niʼir fare Got rokʼ Abraham, nge Isaac, nge Jacob; nge ku arragon, ni fare Got niʼir e fek fapi gidiiʼ ku Israel nga wuruʼ fare nam nu Egypt, me bucheg ni ngar thʼaebed farengi day ni Red Sea nga barbaʼ u dakean e buutʼ nib malikʼ, me duruwʼiy raed ko manna ni nga dabra mʼaed u wuruʼ e binaw; ma kub yoʼor boech banʼen ni rinʼ ni fan ngoraed.

20 Nge ku bayay, ku ireram fare Got ni fek e pi chitamangdaed nga wuruʼ fare nam nu Jerusalem, ma i yororiy ma be ayuweg e gidiiʼ rokʼ iyib ke madaʼ ko chiney; ere musap gaed, ri bachan e pi denen rodaed nge pi ngongol rodaed nib kireb me fek daed iyib ngad manged sib.

21 Ma gimed gubin ni mich riy e biney e rran, ni Zeniff, niʼir e mang pilung ko pi gidiiʼ ney, ni bachan e yigi gel i lemnag rokʼ ni nge tafnaʼ tafen e pi chitamangin, ere ni baen nag ko pi sabaenbaen nge sasaliyeb rokʼ fare pilung i Laman, niʼir e ra michmich gow pilung ni Zeniff, me pag nge milfan nga lan paʼ ni nge tafnaʼ bayang ko binaw, ara fare binaw nu Lehi-Nephi, nge fare binaw nu Shilom; nge binaw nib liyeg iyaen—

22 Ma gubin e pinnʼey ni rinʼ, e ri bachan e nge fek e pi gidiiʼ ney nga tanpaʼ ara ngar manged sib rokʼ. Ere musap gaed, gadaed ko ngiyalʼ innʼey e gadaed be piiʼ puluwon e tax ngakʼ fare pilung ko fapi Lamanites, ni balay ko corn rodaed, nge barley rodaed, nge gubin e grain rodaed ni gubin mit, nge baley u urngin i pifak e saaf rodaed nge garbaw rodaed; nge ku baley ko gubin e tin ni bay rodaed, ara chugum rodaed e ngad piiʼed u rogon ni be athpeg rodaed fare pilung ko Lamanites, ara dangay ma yafos rodaed e ngad piiʼed.

23 Ere chiney, gathi kaygi gel e gafgow ko biney ni yibe rinʼ ngodaed? Ma gathi biney e kirbaenʼ rodaed, ni kaygi gel? Ere chiney e musap gaed, ri ireray tapgin e kirbaenʼ ni ngad tayed.

24 Arragon, gube yoeg ngomed, ni ri ireray tapgin i fan ni thingari kirbaenʼ daed; ya musap gaed ke uw urngin pi walagdaed ni kan liiʼraed kar mʼaed, ma kan puʼoeg rachaʼraed ni dariy fan, ma gubin e pinnʼey ni ke buch e bachan e denen.

25 Ya faʼan gomanga pi gidiiʼ ney e dar mul gaed nga fithikʼ e denen ma fare Somoel e dabi pag ni nge yibi awe biney e gafgow ni buchbuchaenʼ ngoraed. Machane musap gaed, dabra motoyil gaed ngar fol gaed ko thin rokʼ; ere yibi sum bogi maleʼeg thin nga fithikʼraed, ma ri almarin ngar cham gaed nga ur liiʼed yaed ngar mʼaed.

26 Nge ba profet rokʼ Somoel ni kar liiʼed ke yimʼ; arragon, beeʼ nib moʼon rokʼ Got niʼir e melʼeg, niʼir e yoeg ngoraed e pi denen roraed ni ubchiyaʼ nge pi fananikan roraed, me prophesy nag bogi banʼen nib yoʼor ni bay yib, arragon, ni boed e wub rokʼ Kristus.

27 Nge ku bachan e ke yoeg ngoraed ni Kristus e ir fare Got, fare Chitamangin gubin banʼen, me yoeg nra mʼug ni boed yaʼan beeʼ nib moʼon, ma ireram rogon yaʼan e gidiiʼ nni sunmiy ko sommʼon; ara ngan pingeg iyoeg, ma, i yoeg ni gidiiʼ e ni sunmiy ni boed yaʼan Got, mare Got nem e ra yib nga fithikʼ e gidiiʼ u fayleng, nra sum ni bay doewngin ni ufin nge rachaʼ, me yaen u dakean e fayleng—

28 Ere chiney, ri bachan e ke yoeg e biney, ere riliiʼed nge yimʼ; ma kub yoʼor boech banʼen ni ur rinʼed niʼir e fek e damomuw rokʼ Got nga dakeanraed. Ere, miniiʼ e piʼaroraed ni ke balyangaenʼ ni yaed be lemnag ni kar manged sib, ma yibe gechig nagraed ko pi gafgow ni ubchiyaʼ?

29 Ya musap gaed, fare Somoel e gaʼar: Dabgu gapaseg laniyaenʼ e gidiiʼ rog u lan e re rran ni yaed be rinʼ e ngongol ni kireb; ma bay gu magawon nag e pi woʼ roraed ni nga dab kur monʼog gaed; nge pi ngongol roraed e bayi mang magawon nib woldabchey nga mʼon roraed.

30 Ma ku bayay, i gaʼar: Faʼanra gidiiʼ rog e ngar yunged e kireb ma yaedra tʼaer fitiruʼ e waʼamngin e gechig riy u paʼ e yokoʼ; ma wengan ni ra yib riy e boed e yub.

31 Ma ku bayay, i gaʼar: Faʼanra gidiiʼ rog e ngar yunged e kireb ma yaedra pirʼeg fare nifngin e ngek, niʼir e ma yibnag e mogothgoth nib papay.

32 Ere chiney, musap gaed, fare michmich rokʼ Somoel e ke muguʼul, ma kan gechig nagmed ke kirbaenʼmed.

33 Machane faʼanra gimed ra chel ngam sap gaed ngakʼ Somoel u poloʼ i gumʼirchaʼmed, mi gimed tay e pagaenʼ romed ngakʼ, mi gimed pigpig ngakʼ u fithikʼ e lʼagaenʼ romed, ni faʼan gimed ra rinʼ e rennʼey, ma ra rinʼ, u rogon nib mʼagaenʼ ngay ma baʼadag, ni nge chuwegmed u tanpaʼ e pi toʼogor romed.