1 ’E i muri a’era, ’ia fa’aoti a’era te ari’i Limehi i te paraparaura’a atu i tōna ra mau ta’ata, i parau atu ho’i ’oia i te mau mea e rave rahi ia rātou, ’e e mea iti roa ho’i tā’u i pāpa’i i roto i teie nei buka, ’ua fa’a’ite atu ra ’oia i tōna mau ta’ata i te mau mea ato’a nō ni’a i tō rātou mau taea’e i te fenua ra nō Zarahemela.

2 ’E ’ua tītau ’oia ’ia ti’a Amona i mua i te mau ta’ata, ’e ’ia fa’a’ite atu ia rātou i te mau mea ato’a tei tupu i tō rātou mau taea’e mai te tau i haere atu ai Zenifa i rāpae i te fenua, ē tae roa mai i te tau i haere mai ai ’oia iho mai taua fenua ra.

3 ’E ’ua fa’a’ite atu ra ’oia ia rātou i te parau hope’a tā te ari’i Beniamina i ha’api’i mai ia rātou, ’e ’ua ha’amāramarama atu ra ’oia i te reira i te mau ta’ata o te ari’i Limehi, ’ia ’ite rātou i te mau parau ato’a tāna i parau ra.

4 ’E i muri a’era, ’ia fa’aoti a’era ’oia i te reira ; ’ua tu’u atu ra te ari’i Limehi i te mau ta’ata ’ia ho’i atu, ’e ’ua fa’aue atu ra ’oia ’ia ho’i rātou ato’a i tō rātou iho fare.

5 ’E i muri a’era, ’ua fa’aue atu ra ’oia ’ia ’āfa’ihia mai te mau ’api, tei ’ō’otihia i te pāpa’a parau o tōna ra mau ta’ata mai te tau i fa’aru’e ai rātou i te fenua ra nō Zarahemela, i mua ia Amona ra, ’ia ti’a iāna ’ia tai’o i te reira.

6 I teienei, i muri noa iho i tō Amona tai’ora’a i taua pāpa’a parau ra, ’ua ani atu ra te ari’i iāna ’ia ’ite ē, e ti’a ānei iāna ’ia ’īriti i taua mau parau ra, ’e ’ua pāhono atu ra Amona iāna, ’aita e ti’a iāna.

7 ’E ’ua parau atu ra te ari’i iāna : ’Ua ’oto na vau nō te mau ’ati o tō’u ra mau ta’ata, ’e ’ua fa’aue atu ra vau ’ia tere atu e maha ’ahuru ma toru o tō’u mau ta’ata i roto i te mēdēbara, ’ia ’imi haere rātou i te fenua ra nō Zarahemela, ’e ’ia ani mātou i tō mātou mau taea’e ’ia fa’aora ia mātou i te tītīra’a.

8 ’E ’ua mo’e rātou i roto i te mēdēbara nō te ārea e rave rahi mahana te maoro, ’āre’a rā ’ua fa’aitoito noa rātou, ’e ’aita te fenua nō Zarahemela i ’itehia ia rātou, ’e ’ua ho’i mai rātou i teie nei fenua, i tere na ho’i rātou i te hō’ē fenua i rōpū i te mau pape e rave rahi ; i ’ite ho’i rātou i te fenua ’o tei ’ī i te mau ivi o te ta’ata e te ’ānimara, ’e ’ua ’ī ho’i i te mau huru fare pē ato’a, ’e i ’ite ho’i rātou i te hō’ē fenua i ta’atahia i te tahi mau ta’ata mai te au i te feiā o ’Īserā’ela i te rahi ’ia tai’o.

9 ’E ’ei fa’a’itera’a pāpū nō te mau mea tā rātou i parau, ’ua ’āfa’i mai rātou i te mau ’api e piti ’ahuru ma maha ’o tei ’ī i te mau parau ’ō’otihia, ’e ’ua hāmanihia te reira i te ’auro mau.

10 ’E inaha, ’ua ’āfa’i ato’a mai ho’i rātou i te mau pāruru ’ōuma rarahi, ’e ’ua hāmanihia te reira i te veo ’e te kapa, ’e e mea pa’ari maita’i.

11 ’E teie fa’ahou ā, ’ua ’āfa’i mai rātou i te mau ’o’e, ’ua pau te tāpe’ara’a, ’e ’ua ’ino te tipi i te tūtae ’āuri ; ’e ’aita roa e ta’ata i ni’a i te fenua tē ti’a ’ia ’īriti i te parau ’e ’aore rā i te mau ’ō’otira’a i ni’a i taua mau ’api ra. Nō reira vau i parau atu ai ia ’oe : E ti’a ānei ia ’oe ’ia ’īriti ?

12 ’E tē parau fa’ahou atu nei au ia ’oe : ’Ua ’ite ānei ’oe i te hō’ē ta’ata e ti’a iāna ’ia ’īriti i te parau ? ’Ua hina’aro ho’i au ’ia ’īritihia teie nei mau pāpa’a parau i roto i tō tātou nei reo ; penei a’e ’o te fa’a’ite mai te reira ia tātou i te parau nō te toe’a o te nūna’a i ha’amouhia ra, nō rātou teie nei mau pāpa’a parau ; ’e ’aore rā, e fa’a’ite paha te reira ia tātou i te parau nō teie nei feiā i ha’amouhia ra ; ’e ’ua hina’aro vau ’ia ’ite i te tumu nō tō rātou ha’amoura’ahia.

13 ’E i teienei ’ua parau atu ra Amona iāna : E ti’a roa iā’u ’ia fa’a’ite atu ia ’oe, ’e te ari’i, i te hō’ē ta’ata tē ti’a ’ia ’īriti i te mau pāpa’a parau ; tē vai ra tāna tao’a e ti’a ai iāna ’ia hi’o ’e ’ia ’īriti i te mau pāpa’a parau tahito ato’a ra ; ’e e tao’a hōro’a te reira nō ’ō mai i te Atua ra. ’E ’ua parauhia taua mea ra, e mau ’īriti parau, ’e ’aita roa e ti’a i te hō’ē ta’ata ’ia hi’o i roto i te reira, maori rā ’ua fa’auehia mai ’oia, ’o te hi’o ’oia i te mea ’aita e tano iāna ’e ’a pohe ai ’oia. ’E ’o ’oia ’o tē fa’auehia ’ia hi’o i roto i te reira, ’ua parauhia ïa ’oia e hi’o.

14 ’E inaha, te ari’i o te mau ta’ata i te fenua nō Zarahemela, ’o te ta’ata ïa tei fa’auehia ’ia rave i teie nei mau mea, ’e tei iāna taua hōro’a rahi ra nō ’ō mai i te Atua ra.

15 ’E ’ua parau mai ra te ari’i ē, e mea rahi a’e te hi’o i te peropheta.

16 ’E ’ua parau atu ra Amona ē, e heheu parau te hi’o ’e e peropheta ato’a ho’i ; ’e e ’ore roa e ti’a i te ta’ata ’ia fāri’i i te hō’ē hōro’a rahi a’e, maori rā ’ia fāri’i ’oia i te mana o te Atua, ’e ’aita ho’i e ti’a i te hō’ē ta’ata ’ia fāri’i i te reira ; e ti’a rā i te ta’ata ’ia fāri’i i te mana rahi nō ’ō mai i te Atua ra.

17 ’Āre’a rā e ti’a i te hi’o ’ia ’ite i te mau mea i tupu na, ’e te mau mea ho’i e tupu a muri atu, ’e nā roto ho’i ia rātou e heheuhia mai ai te mau mea ato’a, ’oia ho’i e fa’a’itehia mai ai te mau mea mo’e, ’e e tae mai ho’i te māramarama nō te mau mea i hunahia ra, ’e te mau mea ’ite-’ore-hia ra e fa’a’itehia mai ïa e rātou ; ’e e fa’a’ite-ato’a-hia mai te mau mea ’aore e ti’a ’ia fa’a’itehia nā roto ia rātou.

18 ’E ’ua nā reira te Atua i te fa’aineine i te hō’ē rāve’a e ti’a ai i te ta’ata ’ia rave i te mau semeio rarahi nā roto i te fa’aro’o ; nō reira e riro ai ’oia ’ei mea faufa’a rahi i tōna ra mau ta’ata tupu.

19 ’E i teienei, ’ia fa’aoti a’era Amona i te paraura’a i teie nei mau parau, ’ua ’oa’oa roa a’era te ari’i, ’e ’ua ha’amaita’i atu ra ’oia i te Atua, i te nā-’ō-ra’a ē : Tei roto paha i teie nei mau ’api te hō’ē parau ’aro rahi, ’e ’ua fa’aineinehia paha teie nei mau ’īriti parau nō te tātara i te mau parau ’aro ato’a mai te reira te huru i te mau tamari’i a te ta’ata nei.

20 ’Auē ho’i te fa’ahiahia o te mau ’ohipa a te Fatu ē, ’auē ho’i te maorora’a nō tōna fa’a’oroma’i i tōna ra mau ta’ata ; ’oia ïa, ’auē ho’i te matapō ’e te ’eta’eta o te ’ite o te mau tamari’i a te ta’ata nei ē ; ’aita ho’i rātou e ’imi i te pa’ari, ’e ’aita ho’i rātou e hina’aro ’ia fa’atere te reira ia rātou.

21 ’Oia ïa, ’ua riro rātou mai te nana māmoe ’ōviri ’o tē horo ’ē atu i te tīa’i māmoe, ’e te purara atu, ’e te tīahihia, ’e te pau i te mau ’ānimara o te uru rā’au ra.