ພາກທີ 105
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ແມ່ນ້ຳຟິດຊິງ, ລັດມີເຊີຣີ, ວັນທີ 22 ເດືອນມິຖຸນາ, 1834. ພາຍໃຕ້ການນຳພາຂອງສາດສະດາ, ໄພ່ພົນຂອງພຣະເຈົ້າຈາກລັດໂອໄຮໂອ ແລະ ຈາກບ່ອນອື່ນໆ ໄດ້ເດີນຂະບວນໄປລັດມີເຊີຣີ ໃນການໄປສຳຫລວດ ຊຶ່ງຕໍ່ມາເປັນທີ່ຮູ້ຈັກກັນວ່າ ຄ້າຍຊີໂອນ. ຈຸດປະສົງຂອງເຂົາເຈົ້າ ແມ່ນເພື່ອພາໄພ່ພົນຂອງພຣະເຈົ້າ ທີ່ຖືກໄລ່ໜີຈາກລັດມີເຊີຣີ ກັບຄືນໄປຫາທີ່ດິນຂອງເຂົາເຈົ້າ ຢູ່ເຂດແຈ໊ກສັນ. ປະຊາຊົນຂອງລັດມີເຊີຣີຜູ້ໄດ້ຂົ່ມເຫັງໄພ່ພົນຂອງພຣະເຈົ້າ ເກີດຄວາມຢ້ານກົວກັບການໂຕ້ຕອບຂອງຄ້າຍຊີໂອນ ແລະ ໄດ້ວາງແຜນທີ່ຈະໂຈມຕີໄພ່ພົນຂອງພຣະເຈົ້າທີ່ອາໄສຢູ່ເຂດຄະເລ, ລັດມີເຊີຣີ. ຫລັງຈາກເຈົ້າລັດມີເຊີຣີ ໄດ້ຖອນຄຳສັນຍາຂອງເພິ່ນ ທີ່ຈະຊ່ວຍເຫລືອໄພ່ພົນຂອງພຣະເຈົ້າ, ໂຈເຊັບ ສະມິດ ຈຶ່ງໄດ້ຮັບການເປີດເຜີຍນີ້.
1–5, ຊີໂອນຈະຖືກສ້າງຂຶ້ນໂດຍຄວາມສອດຄ່ອງກັບກົດຂອງຊັ້ນສູງ; 6–13, ການໄຖ່ຊີໂອນຈະຊັກຊ້າອອກໄປຊົ່ວໄລຍະໜຶ່ງ; 14–19, ພຣະຜູ້ເປັນເຈົ້າຈະຕໍ່ສູ້ໃນການສູ້ຮົບຂອງຊີໂອນ; 20–26, ໄພ່ພົນຂອງພຣະເຈົ້າຕ້ອງສະຫລາດ ແລະ ບໍ່ເວົ້າອວດອ້າງກ່ຽວກັບວຽກງານອັນຍິ່ງໃຫຍ່ໃນຂະນະທີ່ພວກເຂົາມາເຕົ້າໂຮມກັນ; 27–30, ຄວນຊື້ທີ່ດິນໃນເຂດແຈ໊ກສັນ ແລະ ໃນເຂດໃກ້ຄຽງນັ້ນ; 31–34, ພວກແອວເດີຕ້ອງຮັບເອົາຂອງປະທານສັກສິດຢູ່ໃນບ້ານຂອງພຣະຜູ້ເປັນເຈົ້າໃນເມືອງເຄີດແລນ; 35–37, ໄພ່ພົນຂອງພຣະເຈົ້າຜູ້ຖືກເອີ້ນ ແລະ ຖືກເລືອກ ຈະໄດ້ຮັບການຊຳລະໃຫ້ບໍລິສຸດ; 38–41, ໄພ່ພົນຂອງພຣະເຈົ້າຕ້ອງຍົກປ້າຍສັນຍານແຫ່ງສັນຕິພາບຂຶ້ນຕໍ່ໂລກ.
1 ຕາມຄວາມຈິງແລ້ວ ເຮົາກ່າວກັບພວກເຈົ້າຜູ້ໄດ້ມາຊຸມນຸມກັນເພື່ອພວກເຈົ້າຈະໄດ້ຮູ້ຈັກຄວາມປະສົງຂອງເຮົາກ່ຽວກັບ ການໄຖ່ຜູ້ຄົນທີ່ເປັນທຸກຂອງເຮົາ—
2 ຈົ່ງເບິ່ງ, ເຮົາກ່າວກັບພວກເຈົ້າວ່າ ຖ້າຫາກບໍ່ເປັນເພາະ ການລ່ວງລະເມີດຂອງຜູ້ຄົນຂອງເຮົາ, ໂດຍກ່າວກ່ຽວກັບສາດສະໜາຈັກ ແລະ ບໍ່ແມ່ນສ່ວນບຸກຄົນ, ພວກເຂົາອາດໄດ້ຮັບການໄຖ່ແລ້ວແມ່ນແຕ່ໃນຕອນນີ້.
3 ແຕ່ຈົ່ງເບິ່ງ, ພວກເຂົາບໍ່ໄດ້ຮຽນຮູ້ທີ່ຈະເປັນຄົນເຊື່ອຟັງຕໍ່ສິ່ງທີ່ເຮົາໄດ້ຮຽກຮ້ອງຈາກມືຂອງພວກເຂົາ, ແຕ່ເຕັມໄປດ້ວຍຄວາມຊົ່ວຮ້າຍນາໆປະການ, ແລະ ບໍ່ໄດ້ ໃຫ້ເຂົ້າຂອງ ຂອງພວກເຂົາແກ່ຄົນຍາກຈົນ ແລະ ຄົນທີ່ເປັນທຸກໃນບັນດາພວກເຂົາ, ດັ່ງທີ່ໄພ່ພົນຂອງພຣະເຈົ້າຄວນເຮັດ;
4 ແລະ ບໍ່ໄດ້ ພ້ອມໃຈກັນຕາມສະຫະພາບດັ່ງທີ່ກົດຂອງອານາຈັກຊັ້ນສູງຮຽກຮ້ອງ;
5 ແລະ ຊີໂອນບໍ່ສາມາດຖືກສ້າງຂຶ້ນ ຍົກເວັ້ນແຕ່ໂດຍຫລັກທຳຂອງ ກົດຂອງອານາຈັກຊັ້ນສູງ; ຖ້າບໍ່ດັ່ງນັ້ນເຮົາຈະຮັບນາງໄວ້ກັບຕົວເຮົາເອງບໍ່ໄດ້.
6 ແລະ ຜູ້ຄົນຂອງເຮົາຕ້ອງຖືກ ຕີສອນຈົນກວ່າພວກເຂົາໄດ້ຮຽນຮູ້ ການເຊື່ອຟັງ, ຖ້າຫາກຈຳເປັນ, ໂດຍສິ່ງທີ່ພວກເຂົາທົນທຸກ.
7 ເຮົາບໍ່ໄດ້ກ່າວກ່ຽວກັບຜູ້ຄົນເຫລົ່ານັ້ນທີ່ຖືກກຳນົດໃຫ້ນຳພາຜູ້ຄົນຂອງເຮົາ, ຜູ້ເປັນແອວເດີກຸ່ມ ທຳອິດຂອງສາດສະໜາຈັກຂອງເຮົາ, ເພາະພວກເຂົາທັງໝົດບໍ່ໄດ້ຢູ່ໃຕ້ການກ່າວໂທດນີ້;
8 ແຕ່ເຮົາກ່າວກ່ຽວກັບໜ່ວຍຕ່າງໆຂອງສາດສະໜາຈັກຂອງເຮົາ—ມີຫລາຍຄົນຈະເວົ້າວ່າ: ພຣະເຈົ້າຂອງພວກເຂົາຢູ່ໃສ? ຈົ່ງເບິ່ງ, ພຣະອົງຈະປົດປ່ອຍພວກເຂົາໃນເວລາທີ່ມີຄວາມຫຍຸ້ງຍາກ, ຖ້າບໍ່ດັ່ງນັ້ນພວກເຮົາຈະບໍ່ຂຶ້ນໄປຍັງຊີໂອນ, ແລະ ຈະເກັບເງິນຂອງພວກເຮົາໄວ້.
9 ສະນັ້ນ, ເປັນເພາະ ການລ່ວງລະເມີດຂອງຜູ້ຄົນຂອງເຮົາ, ເຮົາຈຶ່ງເຫັນສົມຄວນທີ່ພວກແອວເດີຂອງເຮົາຄວນລໍຖ້າຊົ່ວໄລຍະໜຶ່ງສຳລັບການໄຖ່ຊີໂອນ—
10 ເພື່ອວ່າຕົວພວກເຂົາເອງຈະໄດ້ຕຽມພ້ອມ, ແລະ ວ່າຜູ້ຄົນຂອງເຮົາຈະໄດ້ຖືກສິດສອນໃຫ້ສົມບູນຫລາຍຂຶ້ນ, ແລະ ມີປະສົບການ, ແລະ ຮູ້ຈັກ ໜ້າທີ່ຂອງພວກເຂົາໃຫ້ສົມບູນຫລາຍຂຶ້ນ, ແລະ ສິ່ງທີ່ເຮົາຮຽກຮ້ອງຈາກມືຂອງພວກເຂົາ.
11 ແລະ ສິ່ງນີ້ຈະເກີດຂຶ້ນບໍ່ໄດ້ຈົນກວ່າ ພວກແອວເດີຂອງເຮົາ ໄດ້ຮັບອຳນາດຈາກເບື້ອງບົນເສຍກ່ອນ.
12 ເພາະຈົ່ງເບິ່ງ, ເຮົາໄດ້ຕຽມຂອງປະທານສັກສິດ ແລະ ພອນອັນຍິ່ງໃຫຍ່ທີ່ຈະ ຖອກເທລົງມາເທິງພວກເຂົາ, ຕາບໃດທີ່ພວກເຂົາຍັງຊື່ສັດ ແລະ ດຳເນີນຕໍ່ໄປໃນຄວາມຖ່ອມຕົວຢູ່ຕໍ່ໜ້າເຮົາ.
13 ສະນັ້ນ ເຮົາເຫັນສົມຄວນທີ່ພວກແອວເດີຂອງເຮົາຄວນລໍຖ້າຊົ່ວໄລຍະໜຶ່ງ, ສຳລັບການໄຖ່ຊີໂອນ.
14 ເພາະຈົ່ງເບິ່ງ, ເຮົາບໍ່ໄດ້ຮຽກຮ້ອງຈາກມືຂອງພວກເຂົາໃຫ້ຕໍ່ສູ້ໃນການສູ້ຮົບຂອງຊີໂອນ; ເພາະ, ດັ່ງທີ່ເຮົາໄດ້ກ່າວໃນບັນຍັດຂໍ້ທີ່ຜ່ານມາສັນໃດ, ເຮົາຈະເຮັດໃຫ້ມັນສຳເລັດຜົນສັນນັ້ນ—ເຮົາຈະ ສູ້ຮົບໃຫ້ພວກເຈົ້າ.
15 ຈົ່ງເບິ່ງ, ເຮົາໄດ້ສົ່ງ ຜູ້ທຳລາຍອອກໄປທຳລາຍ ແລະ ເຮັດໃຫ້ສັດຕູຂອງເຮົາເສຍຫາຍ; ແລະ ບໍ່ຫລາຍປີຈາກນັ້ນ ພວກເຂົາຈະບໍ່ເຫລືອຢູ່ເພື່ອເຮັດໃຫ້ມໍລະດົກຂອງເຮົາເປິເປື້ອນ, ແລະ ໝິ່ນປະໝາດນາມຂອງເຮົາຢູ່ເທິງແຜ່ນດິນບ່ອນທີ່ເຮົາໄດ້ ອຸທິດໄວ້ສຳລັບການເຕົ້າໂຮມຂອງໄພ່ພົນຂອງເຮົາ.
16 ຈົ່ງເບິ່ງ, ເຮົາໄດ້ບັນຊາຜູ້ຮັບໃຊ້ຂອງເຮົາໂຈເຊັບ ສະມິດ, ຜູ້ລູກ, ໃຫ້ກ່າວກັບ ກຳລັງຂອງຄົວເຮືອນຂອງເຮົາ, ແມ່ນແຕ່ນັກຮົບຂອງເຮົາ, ຊາຍໜຸ່ມຂອງເຮົາ, ແລະ ຄົນໃນໄວກາງອາຍຸ, ໃຫ້ມາເຕົ້າໂຮມກັນເພື່ອການໄຖ່ຜູ້ຄົນຂອງເຮົາ, ແລະ ທຳລາຍຫໍສູງຂອງສັດຕູຂອງເຮົາ, ແລະ ເຮັດໃຫ້ ຄົນຍາມຂອງພວກເຂົາແຕກກະຈັດກະຈາຍໄປ.
17 ແຕ່ກຳລັງຂອງຄົວເຮືອນຂອງເຮົາບໍ່ໄດ້ເຊື່ອຟັງຖ້ອຍຄຳຂອງເຮົາ.
18 ແຕ່ຕາບໃດທີ່ມີຄົນເຊື່ອຟັງຖ້ອຍຄຳຂອງເຮົາ, ເຮົາໄດ້ຕຽມພອນ ແລະ ຂອງປະທານສັກສິດໄວ້ໃຫ້ພວກເຂົາ, ຖ້າຫາກພວກເຂົາຊື່ສັດຕໍ່ໄປ.
19 ເຮົາໄດ້ຍິນຄຳອະທິຖານຂອງພວກເຂົາ, ແລະ ຈະຮັບເອົາເຄື່ອງຖວາຍຂອງພວກເຂົາ; ແລະ ເຮົາເຫັນສົມຄວນທີ່ພວກເຂົາຈະຖືກນຳພາມາໄກເຖິງບັດນີ້ເພື່ອການທົດລອງ ສັດທາຂອງພວກເຂົາ.
20 ແລະ ບັດນີ້, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ເຮົາຈະມອບບັນຍັດຂໍ້ໜຶ່ງໃຫ້ແກ່ພວກເຈົ້າ, ວ່າຫລາຍຕໍ່ຫລາຍຄົນທີ່ໄດ້ຂຶ້ນມາບ່ອນນີ້, ທີ່ຈະຢູ່ໄດ້ໃນພາກພື້ນທີ່ອ້ອມຮອບ, ກໍໃຫ້ພວກເຂົາຢູ່.
21 ແລະ ຄົນທີ່ຢູ່ບໍ່ໄດ້, ຜູ້ມີຄອບຄົວຢູ່ໃນພາກຕາເວັນອອກ, ໃຫ້ພວກເຂົາຢູ່ຕໍ່ໄປຊົ່ວໄລຍະໜຶ່ງ, ຕາບໃດທີ່ຜູ້ຮັບໃຊ້ຂອງເຮົາໂຈເຊັບຈະກຳນົດໃຫ້ພວກເຂົາຢູ່;
22 ເພາະເຮົາຈະແນະນຳລາວກ່ຽວກັບເລື່ອງນີ້, ແລະ ທຸກສິ່ງທັງປວງອັນໃດກໍຕາມທີ່ລາວຈະກຳນົດໃຫ້ພວກເຂົາ ກໍຈະສຳເລັດຄົບຖ້ວນ.
23 ແລະ ໃຫ້ຜູ້ຄົນຂອງເຮົາທຸກຄົນທີ່ອາໄສຢູ່ໃນພາກພື້ນຕ່າງໆທີ່ອ້ອມຮອບຊື່ສັດໃຫ້ຫລາຍ, ແລະ ອະທິຖານໃຫ້ຫລາຍ, ແລະ ຖ່ອມຕົວຢູ່ຕໍ່ໜ້າເຮົາ, ແລະ ບໍ່ເປີດເຜີຍສິ່ງທີ່ເຮົາໄດ້ເປີດເຜີຍແກ່ພວກເຂົາ, ຈົນກວ່າວ່າມັນເປັນຄວາມສະຫລຽວສະຫລາດຂອງເຮົາ ທີ່ສິ່ງເຫລົ່ານັ້ນຄວນຖືກເປີດເຜີຍ.
24 ຢ່າເວົ້າເຖິງການພິພາກສາ, ທັງບໍ່ກ່າວ ອວດອ້າງເລື່ອງສັດທາ ຫລື ວຽກງານອັນຍິ່ງໃຫຍ່, ແຕ່ໃຫ້ມາເຕົ້າໂຮມກັນຢ່າງລະມັດລະວັງ, ໃຫ້ຫລາຍເທົ່າທີ່ຈະຫລາຍໄດ້ໃນພາກພື້ນບ່ອນດຽວກັນ, ໂດຍສອດຄ່ອງກັບຄວາມຮູ້ສຶກຂອງຜູ້ຄົນ;
25 ແລະ ຈົ່ງເບິ່ງ, ເຮົາຈະມອບຄວາມໂປດປານ ແລະ ພຣະຄຸນໃຫ້ແກ່ພວກເຈົ້າໃນສາຍຕາຂອງພວກເຂົາ, ເພື່ອວ່າພວກເຈົ້າຈະໄດ້ຢູ່ໃນ ສັນຕິສຸກ ແລະ ໃນຄວາມປອດໄພ, ໃນຂະນະທີ່ພວກເຈົ້າກ່າວກັບຜູ້ຄົນວ່າ: ຈົ່ງດຳເນີນການພິພາກສາ ແລະ ຄວາມຍຸດຕິທຳແກ່ພວກເຮົາຕາມກົດ, ແລະ ຂໍໃຫ້ມີການຊົດໃຊ້ສຳລັບການເຮັດຜິດຕໍ່ພວກເຮົາ.
26 ບັດນີ້, ຈົ່ງເບິ່ງ, ເຮົາກ່າວກັບພວກເຈົ້າ, ເພື່ອນຂອງເຮົາ, ໃນວິທີນີ້ ພວກເຈົ້າຈະພົບຄວາມໂປດປານໃນສາຍຕາຂອງຜູ້ຄົນ, ຈົນກວ່າ ກອງທັບຂອງອິດສະຣາເອນຈະໃຫຍ່ໂຕ.
27 ແລະ ເຮົາຈະເຮັດໃຫ້ຫົວໃຈຂອງຜູ້ຄົນອ່ອນລົງ, ດັ່ງທີ່ເຮົາໄດ້ເຮັດກັບຫົວໃຈຂອງ ຟາໂຣ, ເປັນບາງຄັ້ງ, ຈົນກວ່າຜູ້ຮັບໃຊ້ຂອງເຮົາໂຈເຊັບ ສະມິດ, ຜູ້ລູກ, ແລະ ພວກແອວເດີຂອງເຮົາ, ຜູ້ຊຶ່ງເຮົາໄດ້ກຳນົດໄວ້, ຈະມີເວລາເຕົ້າໂຮມກຳລັງຂອງຄົວເຮືອນຂອງເຮົາ,
28 ແລະ ຈະສົ່ງຜູ້ຊາຍທີ່ ສະຫລາດ, ໄປເຮັດສິ່ງທີ່ເຮົາໄດ້ບັນຊາໃຫ້ສຳເລັດກ່ຽວກັບການ ຊື້ທີ່ດິນທັງໝົດໃນເຂດແຈ໊ກສັນ, ແລະ ໃນເຂດໃກ້ຄຽງນັ້ນ.
29 ເພາະມັນເປັນຄວາມປະສົງຂອງເຮົາທີ່ຕ້ອງຊື້ທີ່ດິນເຫລົ່ານີ້; ແລະ ຫລັງຈາກໄດ້ຊື້ມັນແລ້ວ ໄພ່ພົນຂອງເຮົາຈະເປັນເຈົ້າຂອງມັນຕາມ ກົດຂອງການອຸທິດຖວາຍ ຊຶ່ງເຮົາໄດ້ມອບໃຫ້.
30 ແລະ ຫລັງຈາກໄດ້ຊື້ທີ່ດິນເຫລົ່ານີ້ແລ້ວ, ເຮົາຈະຖືວ່າ ກອງທັບຂອງອິດສະຣາເອນບໍ່ມີຄວາມຜິດໃນການເຂົ້າໄປເປັນເຈົ້າຂອງທີ່ດິນຂອງພວກເຂົາ, ຊຶ່ງພວກເຂົາໄດ້ຊື້ມາກ່ອນດ້ວຍເງິນຂອງພວກເຂົາ, ແລະ ໃນການທຳລາຍຫໍສູງຂອງສັດຕູຂອງເຮົາທີ່ອາດໂຈມຕີພວກເຂົາຢູ່, ແລະ ເຮັດໃຫ້ຄົນຍາມຂອງພວກເຂົາແຕກກະຈັດກະຈາຍໄປ, ແລະ ແກ້ແຄ້ນສັດຕູຂອງເຮົາຈົນເຖິງຄົນລຸ້ນທີສາມ ແລະ ທີສີ່ຂອງພວກເຂົາທີ່ກຽດຊັງເຮົາ.
31 ແຕ່ກ່ອນອື່ນ ໃຫ້ກອງທັບຂອງເຮົາໃຫຍ່ໂຕກ່ອນ, ແລະ ໄດ້ຮັບ ການຊຳລະໃຫ້ບໍລິສຸດຢູ່ຕໍ່ໜ້າເຮົາ, ເພື່ອວ່າມັນຈະງົດງາມດັ່ງດວງຕາເວັນ, ແລະ ແຈ່ມແຈ້ງດັ່ງ ດວງເດືອນ, ແລະ ວ່າປ້າຍຂອງນາງຈະເປັນໜ້າຢ້ານກົວຕໍ່ທຸກປະຊາຊາດທັງປວງ;
32 ເພື່ອວ່າອານາຈັກຕ່າງໆຂອງໂລກນີ້ຈະຖືກບັງຄັບໃຫ້ຮັບຮູ້ອານາຈັກຂອງຊີໂອນເປັນ ອານາຈັກຂອງພຣະເຈົ້າແທ້ໆ ແລະ ພຣະຄຣິດຂອງພຣະອົງ; ສະນັ້ນ, ໃຫ້ພວກເຮົາ ຂຶ້ນຢູ່ກັບກົດຂອງນາງ.
33 ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ເຮົາເຫັນສົມຄວນທີ່ແອວເດີກຸ່ມທຳອິດ ຂອງສາດສະໜາຈັກຂອງເຮົາຄວນຮັບເອົາ ຂອງປະທານສັກສິດຂອງພວກເຂົາຈາກເບື້ອງບົນຢູ່ໃນບ້ານຂອງເຮົາ, ຊຶ່ງເຮົາໄດ້ບັນຊາໃຫ້ສ້າງແດ່ນາມຂອງເຮົາໃນແຜ່ນດິນເຄີດແລນ.
34 ແລະ ໃຫ້ບັນຍັດເຫລົ່ານັ້ນທີ່ເຮົາໄດ້ມອບໃຫ້ກ່ຽວກັບຊີໂອນ ແລະ ກົດຂອງນາງຖືກນຳໄປປະຕິບັດ ແລະ ເກີດສຳເລັດຜົນ, ຫລັງຈາກການໄຖ່ຂອງນາງ.
35 ໄດ້ມີວັນແຫ່ງ ການເອີ້ນແລ້ວ, ແຕ່ເວລາໄດ້ມາເຖິງສຳລັບວັນແຫ່ງການເລືອກ; ແລະ ໃຫ້ຄົນທີ່ ມີຄ່າຄວນ ໄດ້ຖືກເລືອກ.
36 ແລະ ມັນຈະຖືກສະແດງໃຫ້ປະຈັກແກ່ຜູ້ຮັບໃຊ້ຂອງເຮົາ, ໂດຍສຽງຂອງພຣະວິນຍານກ່ຽວກັບຜູ້ທີ່ ຖືກເລືອກ; ແລະ ພວກເຂົາຈະໄດ້ຮັບ ການຊຳລະໃຫ້ບໍລິສຸດ;
37 ແລະ ຕາບໃດທີ່ພວກເຂົາຍັງຕິດຕາມ ຄຳແນະນຳຊຶ່ງພວກເຂົາໄດ້ຮັບ, ພວກເຂົາຈະມີພະລັງຫລັງຈາກຫລາຍມື້ທີ່ຈະບັນລຸຄວາມສຳເລັດໃນທຸກສິ່ງທັງປວງທີ່ກ່ຽວພັນກັບຊີໂອນ.
38 ແລະ ອີກເທື່ອໜຶ່ງ ເຮົາກ່າວກັບພວກເຈົ້າວ່າ ຈົ່ງຂໍສັນຕິພາບ, ບໍ່ພຽງແຕ່ກັບຜູ້ຄົນທີ່ໄດ້ຂ້ຽນຕີພວກເຈົ້າເທົ່ານັ້ນ, ແລະ ກັບທຸກຜູ້ຄົນນຳອີກ;
39 ແລະ ຈົ່ງຍົກ ປ້າຍສັນຍານແຫ່ງ ສັນຕິພາບຂຶ້ນ, ແລະ ປະກາດຄວາມເປັນສັນຕິພາບຈົນເຖິງທີ່ສຸດຂອງແຜ່ນດິນໂລກ;
40 ແລະ ໃຫ້ຂໍສັນຕິພາບຈາກຄົນທີ່ໄດ້ຂ້ຽນຕີພວກເຈົ້າ, ຕາມສຽງຂອງພຣະວິນຍານທີ່ຢູ່ໃນພວກເຈົ້າ, ແລະ ທຸກສິ່ງທັງປວງຈະທຳງານນຳກັນເພື່ອຄວາມດີຂອງພວກເຈົ້າ.
41 ສະນັ້ນ, ຈົ່ງຊື່ສັດ; ແລະ ຈົ່ງເບິ່ງ, ແລະ ເບິ່ງແມ, ເຮົາຈະຢູ່ກັບພວກເຈົ້າແມ່ນແຕ່ຈົນເຖິງທີ່ສຸດ. ແມ່ນເປັນດັ່ງນັ້ນ. ອາແມນ.