1 Olsem we mi bin talem long yufala long leta blong mi bifo mi aot long ples blong mi, se bambae mi raet i kam long yufala wanwan taem mo givim yufala ol infomesen long saed blong plante topik, naoia mi tokbaot bakegen topik blong baptaes long bihaf blong ol dedman, from se topik ia i stap long maen blong mi, mo i stap pusum strong long ol filing blong mi stat long taem we ol enemi blong mi oli stap lukaotem mi.

2 Mi bin raetem sam toktok blong revelesen long yufala long saed blong man blong raetemdaon ol rekod. Mi gat sam moa tingting long saed blong poen ia, we mi stap konfemem naoia. Hem i olsem: mi bin talem long leta blong mi fastaem se i mas gat wan man blong raetemdaon ol rekod, we hem i mas stap olsem wan ae witnes, mo tu, hem i mas harem wetem sora blong hem, blong mekem se hem i testifae wetem trutok long fored blong Lod.

3 Long saed blong poen ia, bae i had tumas blong wan man nomo blong raetemdaon rekod blong i stap long evri taem, mo blong mekem evri bisnis. Blong no fesem problem ia, i save gat wan narafala man blong raetemdaon rekod we oli singaotem long wanwan wod blong siti, we i kwalifae gud blong raetemdaon gud ol samting we i hapen; mo hem i mas lukaot gud blong raetemdaon gud mo raetemdaon stret evri samting we i bin hapen, mo i testifae long rekod blong hem se hem i bin luk wetem ae blong hem, mo i bin harem wetem sora blong hem, mo i givim deit, mo ol nem, mo ol narafala samting moa, mo histri blong ful samting we i bin hapen; mo hem i mas givim nem blong trifala nara man we oli stap, sapos i gat nara man i stap, we bae oli save singaotem eni taem blong testifae long semfala samting, blong mekem se long maot blong tu o tri witnes, bambae evri toktok oli stanap.

4 Afta, i mas gat wan jeneral man blong raetemdaon ol rekod i stap, we bae oli givim ol narafala rekod long hem, we i mas gat ol setifiket wetem signeja long olgeta, we i talem tru se rekod we oli bin raetem i tru. Afta, jeneral man blong raetemdaon rekod bae i save raetemdaon ol rekod ia long jeneral buk blong jos, wetem ol setifiket mo evriwan we oli bin stap blong witnesem, mo wetem toktok blong hemwan se hem i biliv se ol toktok mo ol rekod ia oli tru, hemia folem save blong hem long gudfala fasin blong olgeta ia we jos i bin jusum olgeta. Mo taem hem i mekem hemia long jeneral buk blong jos, rekod ia bae i stret mo tabu, mo bae i mekem odinens ia i laef semmak olsem we hemwan i bin luk long ae blong hem mo i bin harem wetem sora blong hem, mo hem i raetemdaon olsem long jeneral buk blong jos.

5 Ating bae yufala i tingting se oda ia blong mekem ol samting ia i go tumas; be mi mas talem long yufala se hemia i blong folem nomo tingting blong God, taem yumi folem gud odinens ia mo taem yumi folem gud rod blong stap rere we Lod i bin odenem mo i bin rere bifo long stat blong wol, blong hem i sevem olgeta dedman we oli ded bifo oli kasem save long gospel.

6 Mo bakegen, mi wantem yu blong tingbaot se Jon Reveleta i bin stap tingting long topik ia long saed blong ol dedman, taem hem i bin talem, olsem we bae yufala i faenem we oli raetemdaon long Revelesen 20:12—Nao mi luk olgeta dedman, olgeta we bifo oli haeman wetem olgeta we oli no ol haeman, oli kam stanap long fes blong Man ya we i stap sidaon long bigfala jea blong hem. Nao ol enjel oli openem ol buk, mo oli openem wan narafala buk we i gat nem blong ol man we oli gat laef i stap long hem. Nao Man ya i jajem ol dedman from ol fasin we oli mekem bifo, we hem i bin raetemdaon long ol buk ya, folem ol wok we oli bin mekem.

7 Bae yufala i faenem long toktok ia, se ol enjel oli bin openem ol buk; mo i gat wan narafala buk we oli openem, we i buk blong laef; be man we i sidaon long jea i bin jajem olgeta dedman folem ol samting we oli bin raetemdaon long ol buk, folem ol wok blong olgeta; from hemia, ol buk we oli tokbaot ia oli mas ol buk we i gat rekod we oli raetemdaon abaot ol wok blong olgeta, mo i tokbaot ol rekod we oli raetemdaon long wol. Mo buk we i bin buk blong laef, i rekod we i stap long heven; prinsipol ia i agri stret wetem doktrin we Lod i komandem yufala long hem long revelesen we i stap long leta we mi bin raetem long yufala bifo mi bin aot long ples blong mi—blong mekem se evri samting we bae yufala i raetemdaon, bae oli raetemdaon long heven.

8 Nao, stamba blong odinens ia i stap long paoa blong prishud, tru long revelesen we i kam long Jisas Kraes, we tru long hem i letem blong wanem yufala i silim long wol ia, bae oli silim long heven, mo wanem we bae yufala i tekemaot long wol ia, bae oli tekemaot long heven. O, long narafala toktok, sapos yumi tekem translesen long defren wei, wanem we bae yufala i raetemdaon long wol, bae oli raetemdaon long heven, mo wanem we yufala i no raetemdaon long wol, bae oli no raetemdaon long heven; from we aot long ol buk ia, bae oli jajem ol dedman blong yufala, folem ol wok blong olgeta, nomata olgetawan oli bin mekem ol odinens ia olgetawan, o tru long ol pipol we i ripresentem olgeta, folem odinens we God i bin mekem rere long hem blong sevem olgeta, bifo long stat blong wol, folem ol rekod we oli bin raetemdaon long saed blong olgeta dedman blong olgeta.

9 Ating long sam man, bae hem i wan defren doktrin olgeta we yumi stap tokbaot ia—wan paoa we i raetemdaon o silim samting long wol mo i silim long heven. Be, long eni taem blong wol ia, taem Lod i bin givim wan dispensesen blong prishud long eni man, o eni grup blong man, tru long revelesen, nao hem i bin givim paoa ia oltaem. Folem hemia, wanem we man i bin mekem wetem atoriti, long nem blong Lod, mo i bin mekem i stret mo wetem stret fasin, mo i bin raetemdaon wan stret mo tru rekod abaot samting ia, nao i kam wan loa long wol mo long heven, mo oli no save tekemaot, folem ol toktok we hae Jehova i bin talem wetem atoriti. Hemia i wan tru toktok. ?Hu nao i save harem?

10 Mo bakegen, olsem wan eksampol we i hapen finis, luk long Matiu 16:18, 19: Mo mi mi talem long yu, se yu Pita, we i min se strong ston. Mo bambae mi mi stanemap jos blong mi long strong ston ya, mo paoa blong ded bambae i no naf blong winim jos ia. Bambae mi givim long yu, ol ki blong niufala wol ya we God i king long hem. Nao wanem samting we yu yu joenem long wol ya, bambae God we i stap long heven, hem tu bambae i joenem, mo wanem samting we yu yu tekemaot long wol ya bambae hem tu i tekemaot olsem.

11 Nao, sikret we i impoten mo bigfala long ful poen ia, mo summum bonum o stamba gudfala tingting blong ful topik ia we i stap long fored blong yumi, hem i blong kasem ol paoa blong Tabu Prishud. Long hem we Lod i givim ol ki ia, bae i no had long hem blong kasem save long ol stret samting long saed blong fasin blong sevem ol pikinini blong ol man, tugeta, blong olgeta we oli ded, mo tu, blong olgeta we oli stap laef.

12 Long samting ia i gat glori mo ona, mo fasin blong nomo save ded mo laef we i no save finis—Odinens blong baptaes long wota, blong draon insaed long hem blong ripresentem fasin blong stap ded, blong mekem se wan prinsipol i go wetem narafalawan; blong draon insaed long wota mo kamaot long wota i olsem blong olgeta dedman oli laef bakegen long ded, blong oli kamaot long ol gref blong olgeta; from hemia, odinens ia, Lod i putum blong i go wetem odinens blong baptaes long bihaf blong ol dedman, from se hem i ripresentem ol dedman.

13 From hemia, pul blong baptaes i stap olsem blong ripresentem gref, mo Lod i bin komandem blong i stap long wan ples andanit long ples we olgeta we oli laef bae oli kam tugeta long hem; hemia blong soemaot klia olgeta we oli laef mo olgeta we oli ded, mo we evri samting i ripresentem wan samting, mo we wanwan samting i go wetem narawan—blong mekem se samting we oli stap long wol bae oli stret wetem ol samting we oli stap long heven, olsem Pol i talem long Fas Korin 15:46, 47, mo 48.

14 “Laef ya we Spirit i givim, hem i no kam fastaem. Laef ya long wol, hem i kam fastaem, nao laef ya wetem God, hem i kam biaen. Fas man ya, God i mekem hem long graon, mo hem i man blong laef blong wol ya, be seken man ya, hem i aot long heven i kam. Fasin blong man ya we God i mekem long graon fastaem, hemia fasin blong ol man blong wol ya, be fasin blong man ya we i aot long heven i kam, hemia fasin blong ol man blong heven.” Mo olsem we ol rekod long wol long saed blong ol dedman oli tru i stap, bae i semmak tu long ol rekod long heven. From hemia, hem i paoa we i silim mo joenem samting, mo, long wan narafala wei blong toktok ia, ol ki blong kingdom, hem i ki blong gat save.

15 Mo nao, ol gudfala brata mo sista blong mi we mi lavem tumas, letem mi talem stret long yufala se ol prinsipol ia long saed blong olgeta we oli ded mo olgeta we oli laef, bae yumi no save tingting nating long hem, hemia long saed blong fasin blong sevem yumi. From fasin blong sevem olgeta i wan nid mo i wan mas long fasin blong sevem yumi, olsem we Pol i talem long saed blong ol papa blong bifo—se olgeta, sapos i no gat yumi, oli no save kam stret gud evriwan—mo semmak, yumi, sapos i no gat olgeta dedman blong yumi, bae yumi no save kam stret gud evriwan.

16 Mo naoia, long saed blong baptaes long bihaf blong ol dedman, bae mi givim yufala wan narafala toktok we i kam long Pol, long Fas Korin 15:29: “?Mo bakegen, sipos ol dedman oli no save laef bakegen, from wanem ol man oli stap mekem baptaes long bihaf blong ol dedman? Sipos ol dedman ya oli no save laef bakegen samtaem, fasin ya i krangke nomo.”

17 Mo bakegen, blong i go wetem toktok ia, bae mi givim yufala wan narafala toktok we i kam long wan long ol profet, we ae blong hem i stap long kambak blong prishud, ol glori we Lod bae i talemaot long ol las dei, mo speseli topik ia, we i gat moa glori bitim ol narafala topik we i blong gospel ia we i no gat en, we i baptaes long bihaf blong ol dedman; from Malakae i talem, long las japta, ol ves 5 mo 6: “Bambae mi sendem Profet Elaeja i kamtru long yufala fastaem, nao biaen, bigfala Dei blong mi, bambae i jes kamtru we olgeta man bambae oli fraet long hem. Taem profet ya i kamtru, hem bambae i mekem we ol papa wetem ol pikinini blong olgeta we oli stap seraot, oli joen gud bakegen, oli stap gud. Sapos i no olsem, bambae mi mas kam spolemgud ples blong yufala.”

18 Ating bae mi save givim wan translesen we i moa klia long hemia, be hem i klia inaf olsem we i stap, blong tokbaot samting we mi wantem tokbaot. Hem i inaf blong talem, long naoia, se wol ia bae oli kilim wetem wan strong nogud tok sapos i no gat wan kaen ring blong jen o narafala samting i joenem ol bubu mo ol pikinini, hemia folem wan topik o sam narawan—mo luk, ?wanem nao topik ia? Hem i baptaes long bihaf blong ol dedman. From we yumi, sapos i no gat olgeta, yumi no save kam stret gud evriwan; mo semmak, olgeta, sapos i no gat yumi, oli no save kam stret gud evriwan. Semmak tu, bae olgeta, o yumi, i no save kam stret gud evriwan, sapos i no gat olgeta we oli bin ded long gospel; from se i nid, long stat blong dispensesen ia blong taem blong evri wok blong God i kamtru, mo dispensesen ia i stap stat naoia, blong i mas hapen se i gat wan ring we i joenem mo i weldem fulwan, mo stret gud evriwan ol dispensesen, mo ol ki, mo ol paoa, mo ol glori; mo blong Lod i talemaot ol samting we i hapen stat long ol dei blong Adam i kam kasem taem naoia. Mo i no hemia nomo, be tu, blong hem i talemaot ol samting we hem i neva bin talemaot stat long stat blong wol, be i bin holem i haed long olgeta we oli waes mo olgeta we oli skul gud; nao bae hem i talemaot long olgeta pikinini mo smol pikinini, long dispensesen ia, we i dispensesen blong taem blong evri wok blong God i kamtru.

19 Nao, ?wanem nao yumi stap harem long gospel ia we yumi bin kasem? !Wan voes blong stap glad! Wan voes blong sore we i kam long heven; mo wan voes blong trutok we i kamaot long graon; ol gudfala nius blong olgeta we oli ded; wan voes blong stap glad blong olgeta we oli laef mo olgeta we oli ded; ol gudfala nius blong bigfala glad. Hamas nao ol leg ia oli naes antap long ol hil; ol leg ia blong olgeta we oli karem ol gudfala nius blong ol gudfala samting, mo oli talem long Saeon se: !Luk! !God blong yu i rul! !Olsem we smolsmol ren blong moning i foldaon long Kamel, bae i semmak, bae save blong God bae i kamdaon long olgeta!

20 Mo bakegen, ?wanem nao yumi stap harem? !Ol gudfala nius we i kam long Kumora! Moronae, wan enjel we i kam long heven, i stap talem wanem we ol profet oli bin talem—buk ia we bae i kamaot. !Wan voes blong Lod long ples we i no gat samting long hem long Feyet, Seneka kaonti, we i talem long ol trifala witnes blong testifae abaot buk ia! !Voes blong Mikael long saed blong reva ia, Suskehana, we i luksave devel ia taem hem i kamaot olsem wan enjel blong laet! !Voes blong Pita, Jemes, mo Jon, long bus bitwin Hamoni, Suskehana kaonti, mo Kolesvil, Brumi kaonti, long Suskehana reva, we olgetawan oli talemaot se oli holem ol ki blong kingdom, mo blong dispensesen blong taem blong evri wok blong God i kamtru!

21 Mo bakegen, !voes blong God long rum blong Olfala Papa Witma, long Feyet, Seneka kaonti, mo long ol narafala taem, mo long ol defdefren ples long taem we jos ia, Jos Ia blong Jisas Kraes blong Ol Lata-dei Sent i stap travel mo stap gat hadtaem! !Mo voes blong Mikael, jif enjel; voes blong Gabriel, mo blong Rafael, mo blong ol narafala enjel, stat long Mikael o Adam i kam kasem taem naoia, evriwan we i stap talemaot dispensesen blong olgeta, ol raet blong olgeta, ol ki blong olgeta, ona blong olgeta, paoa mo glori blong olgeta, mo paoa blong prishud blong olgeta; we oli stap givim tijing folem tijing, rul folem rul; smol long ples ia mo smol longwe; mo stap leftemap tingting blong yumi taem oli talemaot wanem we bae i kam, we i konfemem wanem yumi hop from!

22 Ol brata. ?Olsem wanem? ?Bae yumi no gohed long wan bigfala wok olsem? Go fored be i no biaen. !Gat strong paoa long tingting ol brata; mo gohed, go fored kasem viktri! Hat blong yumi i mas stap glad, mo stap glad tumas. Wol i mas stat blong singsing. Olgeta we oli ded oli mas singsing long ol singsing blong pres we i no save finis i go long King Emanuel, we i bin odenem, bifo wol i stap, samting ia we bae i mekem se yumi pemaot olgeta long kalabus blong olgeta; from we ol prisena bae oli go fri.

23 !Bae ol bigfala hil oli mas singaot from oli glad, mo yufala evriwan ol vale, yufala i mas singaot strong; mo yufala evriwan ol solwota mo ol drae graon, yufala i mas talemaot ol samting blong sapraes we i blong King blong yufala we I No Save Finis! !Mo yufala ol reva, mo ol krik, mo ol smolsmol reva, yufala i ron wetem glad! !Ol bus mo evri tri long evri ples oli mas presem Lod; mo yufala ol strong ston, yufala i krae wetem glad! !Mo san, mun, mo ol sta blong moning oli mas singsing tugeta, mo evri pikinini blong God bae oli singaot from oli glad! !Mo ol kriesen we oli no save finis bae oli mas presem nem blong hem blong oltaem mo oltaem! Mo bakegen, mi talem: !Voes we yumi harem we i kamaot long heven i gud tumas, we i stap talemaot long sora blong yumi, glori, fasin blong sevem man, mo ona, mo fasin blong nomo save ded, mo laef we i no save finis; ol kingdom, ol ples blong prins i rul, mo ol paoa!

24 Luk, bigfala dei blong Lod i kam kolosap nao; mo ?huia nao i save stap long dei we bae hem i kam? mo ?huia nao i save stanap long taem we bae hem i kamaot? From hem i olsem wan faea blong man blong mekem aean, mo olsem sop blong man blong wasem klos; mo bae hem i sidaon olsem man we i mekem aean, mo man we i mekem silva i klin mo stret gud evriwan, mo bae hem i mekem ol boe blong Livae oli kam klin evriwan, mo i klinim olgeta olsem gol mo silva, blong oli save givim long Lod wan ofring long stret mo gud fasin. From hemia, olsem wan jos mo wan pipol, mo olsem Ol Lata-dei Sent, yumi mas givim long Lod, wan ofring long stret mo gud fasin; mo yumi mas givim insaed long tabu tempol blong hem, taem hem i finis, wan buk we oli raetemdaon insaed, ol rekod blong olgeta dedman blong yumi, we i inaf blong Lod i akseptem.

25 Ol brata. Mi gat plante samting blong talemaot long yufala long saed blong topik ia; be bae mi endem leta ia fastaem, mo bae mi gohed long topik ia long wan narafala taem. Mi stap, olsem oltaem, wokman blong yufala we i gat tingting i stap daon, mo wan fren we i stap oltaem,