1 Sa’ li oxib’ xb’e li po Octubre, sa’ li chihab’ jun mil b’eleeb’ cient ut waqxaqlaju, kinwan sa’ lin warib’aal chixtz’ilb’al rix sa’ inch’ool eb’ li loq’laj hu;

2 Ut chixk’oxlankil chirix li xnimal ru mayej re xtojb’al rix li maak li b’aanunb’il chaq xb’aan li Ralal li Dios, choq’ re xtojb’al rix li ruchich’och’;

3 Ut li xnimal ru ut sachb’a-ch’oolejil rahok k’eeb’il chaq chi k’utb’esimank xb’aan li Yuwa’b’ej ut li K’ajolb’ej sa’ lix k’ulunik laj Tojol-ix sa’ li ruchich’och’;

4 Re naq rik’in lix tojb’al rix li maak kixb’aanu, ut rik’in xpaab’ankil li jar raqal re li evangelio, te’ruuq chi kole’k li winq.

5 Naq toj yookin chi jo’kan, lin k’a’uxl kisutq’i rik’in lix tz’iib’ahom li apostol aj Pedro, reheb’ li najter aj santil paab’anel li jek’inb’ileb’ chaq chi najt chiru Ponto, Galacia, Kapadocia, ut jalan chik li na’ajej re Asia, b’ar wi’ kijultikaman chaq li evangelio chirix lix kamik li Qaawa’ chiru krus.

6 Kinte li Santil Hu ut kiwil li rox ut xkaa ch’ol re li xb’een hu kixtz’iib’a laj Pedro, ut naq kiwil ru k’a’jo’ naq kitoch’e’ inch’ool, chi q’axal wi’chik chiru lin k’ulum chaq, rik’in li aatin a’in:

7 “Xb’aan naq li Kristo ajwi’ kixk’ul rahilal jun sut choq’ reheb’ li maak, li tiik xch’ool choq’ reheb’ li moko tiikeb’ ta xch’ool, re taaruuq chiqak’amb’al rik’in li Dios, chi kamsinb’il sa’ li tz’ejwalej, a’ut k’eeb’il xyu’am xb’aan li Musiq’ej:

8 “Rik’in li xko’o ajwi’ ut kijultikan aatin chiruheb’ li musiq’ej sa’ tz’alam;

9 “Li jun sut ke’wan chaq chi q’etok aatin, naq junxil ki’oyb’enin xnajtil lix kuyum li Dios sa’ xkutankil laj Noe, naq yoo xkawresinkil li jukub’ kab’l, sa’ li moko k’iheb’ ta ke’kole’ wi’, yal waqxaqib’ ajwi’ li aamej xb’aan li ha’.” (1 Pedro 3:18–20.)

10 “Xb’aan naq choq’ re li ajom a’in kijultikaman li evangelio chiruheb’ ajwi’ li ani kamenaqeb’, re naq taaraqmanq aatin chirixeb’ jo’ chanru li winq sa’ li tz’ejwalej, a’ut te’wanq xyu’am jo’ chanru li Dios sa’ li musiq’ej.” (1 Pedro 4:6.)

11 Naq kintz’il rix sa’ inch’ool li k’a’aq re ru a’in li tz’iib’anb’il, kiteeli li rilob’aal lin nawom, ut lix Musiq’ li Qaawa’ kihilan sa’ inb’een, ut kiwil lix teepaleb’ li kamenaq, jo’ kok’ jo’ ninq.

12 Ut kiwan chi ch’utch’u sa’ jun li na’ajej jun teep maak’a’ rajlankil lix musiq’eb’ li tiikeb’ xch’ool, li tiikeb’ chaq chixpaab’ankil li yaal ch’olob’anb’il chirix li Jesus, naq ke’wan chaq sa’ li yu’am wan wi’ li kamk;

13 Ut li ke’q’axtesink chaq mayej chanchan li nimla mayej re li Ralal li Dios, ut ke’xnumsi chaq li rahilal sa’ lix k’ab’a’ laj Tojol rixeb’.

14 Chixjunileb’ a’in ke’el chaq sa’ li yu’am wan wi’ li kamk, chi xaqxo xyo’onihomeb’ chirix jun wakliik chi yo’yo sa’ loq’alil, xb’aan li rusilal li Dios Yuwa’b’ej ut li Jesukristo, li Ralal Junaj Chirib’il.

15 Kink’e reetal naq nujenaqeb’ rik’in sahil ch’oolejil ut xsahileb’ li raam, ut yookeb’ chi saho’k sa’ xch’ool sa’ komonil xb’aan naq ak xwulak xkutankil lix kolb’aleb’.

16 Eb’ a’an ch’utch’uukeb’ chaq chiroyb’eninkil lix chalik li Ralal li Dios sa’ li ruchich’och’ reheb’ li musiq’ej, re tixch’olob’ resil lix tojb’aleb’ rix chiru xb’ak’leb’ li kamk.

17 Lix poqsileb’ li yoo chaq chi wark taak’ojob’amanq wi’chik sa’ xxaqalil chi tz’aqal re ru, li b’aqelej rik’in li b’aqelej, ut li ich’mulej ut li tib’elej chiru, li musiq’ej ut li tz’ejwalej te’junajiiq re naq maajo’q’e chik te’jachmanq ru, re naq te’xk’ul xtz’aqalil li sahil ch’oolejil.

18 Naq li jun ch’uut a’in chi tenamit q’axal nim ke’oyb’enin ut ke’aatinak, ut yookeb’ chaq chi saho’k xch’ool rik’in lix hoonal lix tojb’aleb’ rix chiru li b’ak’leb’ ch’iich’ re li kamk, li Ralal li Dios kixk’ut rib’, ut kixch’olob’ resil li ach’ab’aak chiruheb’ li preex li tiikeb’ chaq chi paab’ank;

19 Ut aran kixjultika chiruheb’ li evangelio li junelik nakana, li tzol’leb’ chirix li wakliik chi yo’yo ut lix tojb’aleb’ rix li winq chiru li t’ane’k, ut chiru xmaak li junjunq wi na’ux li jalb’a-k’a’uxlej.

20 A’b’anan rik’ineb’ laj maak moko xwulak ta, ut sa’ xyanqeb’ li moko useb’ ta ut li moko jalb’ileb’ ta xk’a’uxl li ke’xmux chaq rib’ naq wankeb’ sa’ li tz’ejwalej, ink’a’ kitaqsiman lix yaab’ xkux;

21 Chi moko ke’ril li ru laj po’resihom ch’oolej li ke’tz’eqtaanank re li yaal ke’xch’olob’ ut lix tijomeb’ li najter profeet, chi moko ke’ilok chiru li rilob’aal.

22 B’ar wankeb’ chaq a’in, ki’awa’b’ejin li q’ojyin, a’b’an sa’ xyanqeb’ li tiikeb’ xch’ool kiwan li tuqtuukilal;

23 Ut eb’ laj santil paab’anel ke’saho’ xch’ool rik’in lix tojb’aleb’ rix, ut ke’xb’as li xb’een raq’eb’ ut ke’xk’ulub’a li Ralal li Dios jo’ aj Tojol rixeb’ ut aj Kolol reheb’ chiru li kamk ut lix b’ak’leb’ ch’iich’ li xb’alb’a.

24 Ke’lemtz’un li rilob’aaleb’, ut lix lemtz’unkil ru li rilob’aal li Qaawa’ kihilan sa’ xb’eeneb’, ut ke’b’ichan re xnimankil ru lix santil k’ab’a’.

25 Kinkana chi sachso inch’ool, xb’aan naq tawb’il chaq ru inb’aan naq li Kolonel kixnumsi oxib’ chihab’ tana’ sa’ lix k’anjel sa’ xyanqeb’ laj Judio ut eb’ li wankeb’ sa’ lix junkab’al laj Israel, ut kixyal xq’e chixk’utb’al chiruheb’ li evangelio li junelik nakana, ut chixb’oqb’aleb’ sa’ li jalb’a-k’a’uxlej;

26 A’b’anan, us ta kixb’aanu xninqal ru k’anjel, ut sachb’a-ch’oolej, ut kixch’olob’ li yaal, rik’in nimla wankilal ut chi k’eeb’il xwankil, yal moko k’iheb’ ta li ke’ab’in chiru lix yaab’ xkux, ut li ke’saho’ xch’ool chi wank chiru, ut li ke’xk’ul li kolb’a-ib’ sa’ ruq’.

27 A’b’anan lix k’anjel sa’ xyanqeb’ li ani kamenaqeb’ ka’ajwi’ ki’ux chiru xb’ab’ayil li hoonal li kiwan chirix lix kamik chiru krus ut rub’elaj lix waklijik chi yo’yo;

28 Ut kinkana chixk’oxlankil li raatin laj Pedro—sa’ li kixye wi’ naq li Ralal li Dios kijultikan aatin chiruheb’ li musiq’ej sa’ tz’alam, li jun sut ke’wan chi q’etok aatin, naq junxil ki’oyb’enin xnajtil li royb’enihom li Dios sa’ xkutankil laj Noe—ut chan ru naq kiru chiru a’an jultikank aatin chiruheb’ li musiq’ej a’an ut xb’aanunkil li k’anjel li ki’ajman sa’ xyanqeb’ chiru xb’ab’ayil li hoonal a’an.

29 Ut naq yookin chi k’oxlak, kiteeli li wilob’aal, ut kik’ehe’ xyu’am lin nawom, ut kink’e reetal naq li Qaawa’ moko xko’o ta a’an sa’ xyanqeb’ laj maak ut laj q’etol aatin li ke’tz’eqtaanank chaq re li yaal, re xtzolb’aleb’;

30 K’ehomaq b’an reetal, sa’ xyanqeb’ chaq li tiikeb’ xch’ool, kixk’uub’eb’ ru lix k’anjelanel ut kixxaqab’eb’ lix k’amol esil, chi tiqtookeb’ rik’in wankilal ut li wankil k’eeb’il reheb’, ut kixk’e xtaqlankileb’ re te’xik ut te’xk’am li saqen re li evangelio rik’ineb’ li wankeb’ chaq sa’ q’ojyin, rik’ineb’ ajwi’ chixjunil lix musiq’eb’ li winq; ut chi jo’kan kijultikaman li evangelio chiruheb’ li kamenaq.

31 Ut eb’ laj k’amol esil li sik’b’ileb’ ru xkoheb’ chixch’olob’ankil resil li k’ulub’ajel kutan re li Qaawa’ ut chixch’olob’ankil li ach’ab’aak reheb’ li preex li b’ak’b’ookeb’, reheb’ chixjunil li te’xjal xk’a’uxl chirix lix maakeb’ ut te’xk’ul li evangelio.

32 Chi jo’kan kijultikaman li evangelio chiruheb’ li ke’kam sa’ lix maakeb’, chi maak’a’ xnawomeb’ chirix li yaal, malaj sa’ li q’etok aatin, chirix xtz’eqtaanankileb’ li profeet.

33 Eb’ a’in kik’utman chiruheb’ li paab’aal chirix li Dios, li jalb’a-k’a’uxlej chirix li maak, li kub’iha’ chi uuchilej choq’ re li risinkil li maak, ut li maatan re li Santil Musiq’ej rik’in xk’eeb’al li uq’ej,

34 Ut chixjunil chik li jar raqal re li evangelio li ki’ajman naq te’xnaw re taaruuq te’xtaw xk’ulub’ejilal re taaraqmanq aatin chirixeb’ jo’ chanruheb’ li winq sa’ li tz’ejwalej, a’ut te’wanq xyu’ameb’ jo’ chanru li Dios sa’ li musiq’ej.

35 Ut jo’kan kik’ehe’ chi nawmank sa’ xyanqeb’ li kamenaq, jo’ kok’ jo’ ninq, li moko tiikeb’ ta xch’ool jo’ ajwi’ li tiikeb’ chi paab’ank, naq k’anjelanb’il li tojb’al-ix rik’in naq kimayejaman li Ralal li Dios chiru li krus.

36 Chi jo’kan kik’ehe’ chi nawmank naq laj Tojol qix kixnumsi lix kutan sa’ lix b’eenik sa’ li ruchich’och’ reheb’ li musiq’ej, rik’in xtzolb’aleb’ ut xkawresinkileb’ lix musiq’eb’ li profeet li tiikeb’ chi paab’ank, li ke’xch’olob’ chaq xyaalal a’an sa’ li tz’ejwalej;

37 Re naq eb’ a’an te’xk’am li esil re li tojb’al-ix rik’in chixjunileb’ li kamenaq, rik’ineb’ wi’ li ink’a’ kiru chi xik tz’aqal a’an, xb’aan lix po’resihomeb’ xch’ool ut li q’etok aatin xb’aaneb’, re naq eb’ a’an, rik’in lix k’anjelahomeb’ lix moos, te’rab’i ajwi’ li raatin.

38 Sa’ xyanqeb’ li xninqaleb’ ru ut li kaweb’ xmetz’ew li ch’utch’uukeb’ sa’ li ch’utam q’axal nim a’in reheb’ li tiikeb’ xch’ool, kiwan li qayuwa’ aj Adan, li Najter Xkutankil ut xyuwa’eb’ chixjunil,

39 Ut li qana’ nim xloq’al, li xEva, rochb’een naab’aleb’ lix ko’ li tiikeb’ chi paab’ank, li ke’wan chaq chiru li jar q’e kutan ut ke’xloq’oni chaq li tz’aqal ut yo’yookil Dios.

40 Laj Abel, li xb’een li kikamsiik sa’ xk’ab’a’ xpaab’aal, kiwan aran, ut laj Set li riitz’in, jun reheb’ li kaweb’ xmetz’ew, li kiwan tz’aqal jo’ xjalam-uuch laj Adan, lix yuwa’.

41 Laj Noe, li kixye resil naq taawanq b’uut’iha’; laj Sem li xnimal ru taqenaqil aj tij; laj Abraham, lix yuwa’eb’ li tiikeb’ chi paab’ank; laj Isaak, laj Jakob, ut laj Moises, li xnimal ru aj k’ehol chaq’rab’ re Israel;

42 Ut laj Isaias, li kixch’olob’ rik’in profeetil aatin naq laj Tojol-ix kiyule’ re xlanb’aleb’ li yot’b’ileb’ xch’ool, re xch’olob’ankil li ach’ab’aak chiruheb’ li preex, ut lix tehonik li tz’alam chiruheb’ li b’ak’b’ileb’—ke’wan ajwi’ aran.

43 Ut chi jo’kan ajwi’, laj Esekiel, li kik’ute’ chiru sa’ k’utb’esinb’il matk’ li nimla ru taq’a wankeb’ wi’ li chaqi b’aq, li te’tiqib’aaq rik’in li tib’elej, re te’elq chaq wi’chik sa’ lix waklijikeb’ chi yo’yo li kamenaq, jo’ yo’yookil aamej;

44 Laj Daniel, li kiril ut kixye resil chi rub’elaj lix k’ojlajik lix awa’b’ejihom li Dios sa’ roso’jikeb’ li kutan, li maajo’q’e chik taasache’q chi moko taak’ehe’q re jalaneb’ chik li tenamit;

45 Laj Eliyah, li kiwan rochb’een laj Moises sa’ li Tzuul re Jaltesiik-u;

46 Ut laj Malakias, li profeet li kixch’olob’ xyaalal lix k’ulunik laj Elias—a’ li ki’aatinak ajwi’ laj Moroni chirix rik’in li Profeet aj Jose Smith, ut kixch’olob’ naq a’an taachalq rub’elaj xtikib’ankil li xnimal ru ut xuwajel xkutan li Qaawa’—ke’wan ajwi’ aran.

47 Li Profeet aj Elias taaraw sa’ xch’ooleb’ li alal k’ajolb’ej li k’a’ru yeechi’inb’il reheb’ lix yuwa’eb’,

48 Li naxk’ut chi rub’elaj li xnimal ru k’anjel taa’ajmanq xb’aanunkil sa’eb’ li santil ochoch re li Qaawa’ sa’ lix k’ojlajik lix tz’aqalil ru li kutan, choq’ re xtojb’aleb’ rix li kamenaq, ut xtz’apb’aleb’ sa’ junajil li alal k’ajolb’ej rik’in lix na’ yuwa’eb’, maare anchal taasak’e’q chixjunil li ruchich’och’ rik’in jun majewank ut taasachmanq chi junajwa sa’ xk’ulunik.

49 Chixjunileb’ a’in ut naab’aleb’ chik, li profeet ajwi’ li ke’wan chaq sa’ xyanqeb’ laj Nefita ut ke’xch’olob’ chaq xyaalal lix k’ulunik li Ralal li Dios, ke’wan chi junajinb’il sa’ li ch’utlajik q’axal nim, ut ke’royb’eni lix kolb’aleb’,

50 Xb’aan naq eb’ li kamenaq ke’ril lix najtil ru lix jachikeb’ ru lix musiq’eb’ rik’in lix tib’eleb’ jo’ jun moosil.

51 Eb’ a’in li Qaawa’ kixtzoleb’, ut kixk’e wankilal reheb’ re te’elq chaq, chirix lix waklijik a’an chi yo’yo sa’ xyanqeb’ chaq li kamenaq, re te’ok sa’ li rawa’b’ejihom lix Yuwa’, re taak’eemanq choq’ xkorooneb’ li kole’k chiru li kamk ut li junelik yu’am,

52 Ut te’kanaaq chirix a’an chi k’anjelak jo’ chanru yeechi’inb’il chaq xb’aan li Qaawa’, ut te’wanq choq’ aj tz’aqonel sa’ chixjunil li osob’tesink li k’uulanb’il chaq choq’ reheb’ li neke’rahok re.

53 Li Profeet aj Jose Smith, ut lin yuwa’, aj Hyrum Smith, laj Brigham Young, laj John Taylor, laj Wilford Woodruff, ut jalaneb’ chik li musiq’ej sik’b’ileb’ ru li ke’k’uulaman chaq chi elk sa’ xtz’aqalil ru li kutan re te’tz’aqonq sa’ xk’eeb’al xk’ojob’ankil li xnimal ru k’anjel re roso’jik li kutan,

54 Sa’ li wan wi’ xkab’lankileb’ li santil ochoch ut xb’aanunkil li k’ojob’anb’il k’anjel chi sa’eb’ choq’ re lix tojb’aleb’ rix li kamenaq, ke’wan ajwi’ sa’ li ruchich’och’ reheb’ li musiq’ej.

55 Kiwil naq eb’ a’an ke’wan ajwi’ sa’ xyanqeb’ li tiikeb’ li raam ut li xnimaleb’ ru li ke’sik’e’ chaq ru sa’ xtiklajik re te’wanq choq’ aj taqlanel sa’ lix Iglees li Dios.

56 Rub’elaj ajwi’ naq ke’yo’la, eb’ a’an, rochb’een naab’al chik, ke’xk’ul xb’een wa lix tzolb’aleb’ sa’ li ruchich’och’ reheb’ li musiq’ej ut ke’kawresiik re te’elq chaq sa’ li kutan k’oxlanb’il xb’aan li Qaawa’ re k’anjelak sa’ li rawimq choq’ re lix kolb’aleb’ li raameb’ li winq.

57 Kink’e reetal naq eb’ li xb’eenil li tiikeb’ chi paab’ank sa’ li jun k’ojlajik a’in, naq neke’el chaq sa’ li yu’am wan wi’ li kamk, neke’kana chi k’anjelak sa’ xjultikankil li evangelio re li jalb’a-k’a’uxlej ut li tojb’al-ix, sa’ xk’ab’a’ lix mayej li K’ajolb’ej Junaj Chirib’il chiru li Yuwa’b’ej, sa’ xyanqeb’ li wankeb’ sa’ q’ojyin ut rub’el xmoosil li maak sa’ li nimla ruchich’och’ reheb’ lix musiq’eb’ li kamenaq.

58 Eb’ li kamenaq li te’xjal xk’a’uxl te’toje’q rix, rik’in ab’ink chiruheb’ li k’ojob’anb’il k’anjel re li rochoch li Dios,

59 Ut chirix naq xe’xtoj jo’ nimal li tojb’a-maak xb’aan li q’etok aatin ke’xb’aanu, ut xe’ch’aje’ toj reetal naq ch’ajb’ileb’, te’xk’ul jun xq’ajkamunkileb’ a’ yaal jo’ chanru lix k’anjeleb’, xb’aan naq a’aneb’ aj eechanihom re li kolb’a-ib’.

60 Jo’ka’in ut li k’utb’esinb’il matk’ chirix lix tojb’aleb’ rix li kamenaq li kik’utb’esiman chiwu, ut ninch’olob’ resil, ut ninnaw naq yaal li esil a’in, xb’aan li rosob’tesihom laj Eechal qe ut li qaKolonel, a’ li Jesukristo; chi jo’kan. Amen.