ພາກທີ 14
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາແກ່ເດວິດ ວິດເມີ, ທີ່ເມືອງເຟແອດ, ລັດນິວຢອກ, ເດືອນມິຖຸນາ 1829. ຄອບຄົວວິດເມີ ມີຄວາມສົນໃຈຫລາຍນຳການແປພຣະຄຳພີມໍມອນ. ສາດສະດາໄດ້ພັກຢູ່ບ້ານຂອງພີເຕີ ວິດເມີ ຜູ້ພໍ່ ບ່ອນເພິ່ນໄດ້ອາໄສຢູ່ຈົນກວ່າວຽກງານຂອງການແປສຳເລັດ ແລະ ລິຂະສິດພຣະຄຳພີກໍຮຽບຮ້ອຍ. ລູກຊາຍສາມຄົນຂອງຄອບຄົວວິດເມີ, ຊຶ່ງແຕ່ລະຄົນໄດ້ຮັບປະຈັກພະຍານເຖິງຄວາມຈິງແທ້ແນ່ນອນຂອງວຽກງານ, ມີຄວາມເປັນຫ່ວງເປັນໃຍຫລາຍນຳໜ້າທີ່ສະເພາະຂອງຕົນ. ການເປີດເຜີຍນີ້ ແລະ ການເປີດເຜີຍອີກສອງຢ່າງ ຕິດຕາມພາກນີ້ (ພາກທີ 15 ແລະ 16) ໄດ້ຖືກມອບໃຫ້ເປັນຄຳຕອບຕໍ່ຄຳຖາມ ຜ່ານອຸລີມ ແລະ ທຸມມີມ. ຕໍ່ມາເດວິດ ວິດເມີ ໄດ້ກາຍເປັນຜູ້ໜຶ່ງໃນພະຍານສາມຄົນເຖິງພຣະຄຳພີມໍມອນ.
1–6, ຜູ້ທຳງານໃນສວນອະງຸ່ນຈະໄດ້ຮັບຄວາມລອດ; 7–8, ຊີວິດນິລັນດອນເປັນຂອງປະທານອັນຍິ່ງໃຫຍ່ທີ່ສຸດໃນຂອງປະທານຂອງພຣະເຈົ້າ; 9–11, ພຣະຄຣິດໄດ້ສ້າງຟ້າສະຫວັນ ແລະ ແຜ່ນດິນໂລກ.
1 ວຽກງານອັນຍິ່ງໃຫຍ່ ແລະ ໜ້າອັດສະຈັນພວມຈະອອກມາສູ່ລູກຫລານມະນຸດ.
2 ຈົ່ງເບິ່ງ, ເຮົາຄືພຣະເຈົ້າ; ຈົ່ງເອົາໃຈໃສ່ຕໍ່ຄຳຂອງເຮົາ, ຊຶ່ງມີຊີວິດ ແລະ ມີພະລັງ, ແຫລມຄົມຫລາຍກວ່າດາບສອງຄົມ, ຊຶ່ງຈະແຍກທັງຂໍ້ຕໍ່ ແລະ ໄຂໃນກະດູກອອກຈາກກັນ; ສະນັ້ນຈົ່ງເອົາໃຈໃສ່ຕໍ່ຄຳຂອງເຮົາ.
3 ຈົ່ງເບິ່ງ, ທົ່ງກໍຂາວພ້ອມແລ້ວທີ່ຈະເກັບກ່ຽວ; ສະນັ້ນ, ຜູ້ໃດພ້ອມແລ້ວທີ່ຈະເກັບກ່ຽວ, ກໍໃຫ້ເຂົາເດ່ກ່ຽວຂອງເຂົາອອກໄປດ້ວຍສຸດພະລັງຂອງເຂົາ, ແລະ ເກັບກ່ຽວໃນຂະນະທີ່ຍັງເວັນຢູ່, ເພື່ອເຂົາຈະໄດ້ສະສົມຄວາມລອດອັນເປັນນິດໄວ້ໃຫ້ແກ່ຈິດວິນຍານຂອງເຂົາໃນອານາຈັກຂອງພຣະເຈົ້າ.
4 ແທ້ຈິງແລ້ວ, ຄົນໃດກໍຕາມທີ່ຈະເດ່ກ່ຽວຂອງຕົນອອກໄປ ແລະ ເກັບກ່ຽວ, ຄົນໆນັ້ນແມ່ນຖືກເອີ້ນ ຈາກພຣະເຈົ້າ.
5 ສະນັ້ນ, ຖ້າຫາກເຈົ້າໝັ່ນຂໍຈາກເຮົາ ເຈົ້າກໍຈະໄດ້ຮັບ; ຖ້າເຈົ້າໝັ່ນເຄາະ ແລ້ວຈະມີຜູ້ໄຂປະຕູໃຫ້ເຈົ້າ.
6 ຈົ່ງສະແຫວງຫາທີ່ຈະນຳຊີໂອນຂອງເຮົາອອກມາ ແລະ ສະຖາປະນາມັນຂຶ້ນ. ຈົ່ງຮັກສາບັນຍັດຂອງເຮົາໃນທຸກສິ່ງ.
7 ແລະ, ຖ້າເຈົ້າ ຮັກສາບັນຍັດຂອງເຮົາ ແລະ ອົດທົນຈົນເຖິງທີ່ສຸດ ເຈົ້າຈະມີ ຊີວິດນິລັນດອນ, ຊຶ່ງເປັນຂອງປະທານອັນຍິ່ງໃຫຍ່ທີ່ສຸດໃນຂອງປະທານທັງໝົດຂອງພຣະເຈົ້າ.
8 ແລະ ເຫດການຈະບັງເກີດຂຶ້ນຄື ຖ້າຫາກເຈົ້າຈະທູນຖາມພຣະບິດາໃນນາມຂອງເຮົາ, ໃນສັດທາທີ່ເຊື່ອ, ແລ້ວເຈົ້າຈະໄດ້ຮັບ ພຣະວິນຍານບໍລິສຸດ, ຊຶ່ງໃຫ້ເອີ່ຍປາກ, ເພື່ອວ່າເຈົ້າຈະໄດ້ຢືນ ເປັນພະຍານເຖິງສິ່ງທີ່ເຈົ້າທັງຈະ ໄດ້ຍິນ ແລະ ໄດ້ເຫັນ, ແລະ ເພື່ອວ່າເຈົ້າຈະປະກາດການກັບໃຈແກ່ຄົນລຸ້ນນີ້ນຳອີກ.
9 ຈົ່ງເບິ່ງ, ເຮົາຄື ພຣະເຢຊູຄຣິດ, ພຣະບຸດຂອງ ພຣະເຈົ້າຜູ້ຊົງພຣະຊົນຢູ່, ຜູ້ ໄດ້ສ້າງຟ້າສະຫວັນ ແລະ ແຜ່ນດິນໂລກ, ເປັນ ຄວາມສະຫວ່າງ ຊຶ່ງບໍ່ສາມາດຊຸກເຊື່ອງໄວ້ຢູ່ໃນ ຄວາມມືດ;
10 ດັ່ງນັ້ນ, ເຮົາຈະຕ້ອງນຳ ຄວາມສົມບູນແຫ່ງພຣະກິດຕິຄຸນຂອງເຮົາອອກມາຈາກ ຄົນຕ່າງຊາດ ໄປສູ່ເຊື້ອສາຍອິດສະຣາເອນ.
11 ແລະ ຈົ່ງເບິ່ງ, ເຈົ້າຄືເດວິດ, ແລະ ເຈົ້າຖືກເອີ້ນໃຫ້ມາຊ່ວຍ; ຊຶ່ງສິ່ງນັ້ນຖ້າຫາກເຈົ້າເຮັດ, ແລະ ຊື່ສັດ, ເຈົ້າຈະໄດ້ຮັບພອນ ທັງທາງຝ່າຍວິນຍານ ແລະ ທາງຝ່າຍໂລກ, ແລະ ລາງວັນຂອງເຈົ້າຈະຍິ່ງໃຫຍ່. ອາແມນ.