ພາກທີ 21
ການເປີດເຜີຍທີ່ມອບໃຫ້ແກ່ໂຈເຊັບ ສະມິດ ຜູ້ເປັນສາດສະດາ, ທີ່ເມືອງເຟແອດ, ລັດນິວຢອກ, ວັນທີ 6 ເດືອນເມສາ, 1830. ການເປີດເຜີຍນີ້ໄດ້ມອບໃຫ້ຕອນຈັດຕັ້ງສາດສະໜາຈັກ, ໃນວັນທີ່ກ່າວຜ່ານມາ, ໃນບ້ານຂອງພີເຕີ ວິດເມີ ຜູ້ພໍ່. ຊາຍຫົກຄົນ, ຜູ້ໄດ້ຮັບບັບຕິສະມາ, ໄດ້ມີສ່ວນຮ່ວມນຳ. ໂດຍການອອກສຽງຢ່າງເປັນເອກະສັນ ຊາຍເຫລົ່ານັ້ນໄດ້ສະແດງຄວາມປາດຖະໜາ ແລະ ຄວາມຕັ້ງໃຈທີ່ຈະຈັດຕັ້ງ, ໃຫ້ເປັນໄປຕາມພຣະບັນຍັດຂອງພຣະເຈົ້າ (ເບິ່ງ ພາກທີ 20). ເຂົາເຈົ້າຍັງໄດ້ອອກສຽງສະໜັບສະໜູນໂຈເຊັບ ສະມິດ ຜູ້ລູກ ແລະ ອໍລີເວີ ຄາວເດີຣີ ອີກ ໃຫ້ເປັນເຈົ້າໜ້າທີ່ຄວບຄຸມຂອງສາດສະໜາຈັກ. ໂດຍການວາງມື, ຈາກນັ້ນໂຈເຊັບໄດ້ແຕ່ງຕັ້ງ ອໍລີເວີໃຫ້ເປັນແອວເດີຂອງສາດສະໜາຈັກ, ແລະ ອໍລີເວີ ກໍໄດ້ແຕ່ງຕັ້ງໂຈເຊັບໃນແບບດຽວກັນນັ້ນ. ຫລັງຈາກການປະຕິບັດສິນລະລຶກ, ໂຈເຊັບ ແລະ ອໍລີເວີໄດ້ວາງມືໃສ່ເທິງຫົວຂອງຜູ້ມາຮ່ວມທຸກຄົນເພື່ອມອບພຣະວິນຍານບໍລິສຸດ ແລະ ເພື່ອຢືນຢັນແຕ່ລະຄົນເປັນສະມາຊິກຂອງສາດສະໜາຈັກ.
1–3, ໂຈເຊັບ ສະມິດ ຖືກເອີ້ນໃຫ້ເປັນຜູ້ພະຍາກອນ, ຜູ້ແປ, ສາດສະດາ, ອັກຄະສາວົກ, ແລະ ແອວເດີ; 4–8, ຖ້ອຍຄຳຂອງເພິ່ນຈະນຳພາອຸດົມການຂອງຊີໂອນ; 9–12, ໄພ່ພົນຂອງພຣະເຈົ້າຈະເຊື່ອ ຖ້ອຍຄຳຂອງເພິ່ນ ເມື່ອເພິ່ນກ່າວໂດຍພຣະຜູ້ປອບໂຍນ.
1 ຈົ່ງເບິ່ງ, ຈະຕ້ອງມີການຂຽນ ບັນທຶກໄວ້ໃນທ່າມກາງພວກເຈົ້າ; ແລະ ໃນນັ້ນ ເຈົ້າຈະຖືກເອີ້ນວ່າເປັນ ຜູ້ພະຍາກອນ, ຜູ້ແປ, ສາດສະດາ, ອັກຄະສາວົກຂອງພຣະເຢຊູຄຣິດ, ແອວເດີຂອງສາດສະໜາຈັກຜ່ານທາງ ພຣະປະສົງຂອງພຣະເຈົ້າອົງເປັນພຣະບິດາ, ແລະ ພຣະຄຸນຂອງອົງພຣະເຢຊູຄຣິດເຈົ້າຂອງພວກເຈົ້າ,
2 ໂດຍໄດ້ຮັບການ ດົນໃຈຈາກພຣະວິນຍານບໍລິສຸດເພື່ອໃຫ້ວາງຮາກຖານຂອງສາດສະໜາຈັກ, ແລະ ເພື່ອສ້າງມັນຂຶ້ນເພື່ອສັດທາອັນສັກສິດທີ່ສຸດ.
3 ຊຶ່ງ ສາດສະໜາຈັກໄດ້ຖືກ ຈັດຕັ້ງ ແລະ ສະຖາປະນາຂຶ້ນໃນປີຂອງພຣະຜູ້ເປັນເຈົ້າຂອງພວກເຈົ້າ ໜຶ່ງພັນແປດຮ້ອຍສາມສິບ, ໃນເດືອນທີສີ່, ແລະ ໃນວັນທີຫົກຂອງເດືອນ ຊຶ່ງຖືກເອີ້ນວ່າເດືອນເມສາ.
4 ດັ່ງນັ້ນ, ໂດຍໝາຍເຖິງສາດສະໜາຈັກ, ພວກເຈົ້າຈົ່ງເອົາໃຈໃສ່ຕໍ່ ຖ້ອຍຄຳ ແລະ ພຣະບັນຍັດທັງໝົດຂອງລາວ ຊຶ່ງລາວຈະມອບໃຫ້ແກ່ພວກເຈົ້າເມື່ອລາວໄດ້ຮັບມັນ, ໂດຍການເດີນໄປໃນ ຄວາມບໍລິສຸດທັງໝົດຢູ່ຕໍ່ໜ້າເຮົາ;
5 ເພາະ ຖ້ອຍຄຳທີ່ພວກເຈົ້າຈະໄດ້ຮັບ, ກໍຄືກັບວ່າມັນມາຈາກປາກຂອງເຮົາເອງ, ດ້ວຍຄວາມອົດທົນທີ່ສຸດ ແລະ ສັດທາທັງໝົດ.
6 ເພາະໂດຍການເຮັດສິ່ງເຫລົ່ານີ້ ປະຕູນະລົກຈະເອົາຊະນະພວກເຈົ້າບໍ່ໄດ້; ແທ້ຈິງແລ້ວ, ແລະ ອົງພຣະຜູ້ເປັນເຈົ້າຈະເຮັດໃຫ້ອຳນາດແຫ່ງ ຄວາມມືດກະຈາຍໄປຕໍ່ໜ້າພວກເຈົ້າ, ແລະ ເຮັດໃຫ້ຟ້າສະຫວັນ ສັ່ນສະເທືອນເພື່ອຄວາມດີຂອງພວກເຈົ້າ, ແລະ ລັດສະໝີພາບຂອງພຣະນາມຂອງພຣະອົງ.
7 ເພາະອົງພຣະຜູ້ເປັນເຈົ້າໄດ້ກ່າວດັ່ງນີ້: ລາວຜູ້ທີ່ເຮົາໄດ້ດົນໃຈໃຫ້ນຳພາອຸດົມການຂອງ ຊີໂອນໄປໜ້າ ໃນອຳນາດອັນຍິ່ງໃຫຍ່ເພື່ອຄວາມດີ, ແລະ ຄວາມພາກພຽນຂອງລາວ ເຮົາຮູ້, ແລະ ຄຳອະທິຖານຂອງລາວ ເຮົາໄດ້ຍິນ.
8 ແທ້ຈິງແລ້ວ, ການຮ້ອງໄຫ້ຂອງລາວເພື່ອຊີໂອນ ເຮົາໄດ້ເຫັນ, ແລະ ເຮົາຈະເຮັດໃຫ້ລາວບໍ່ໂສກເສົ້າກັບນາງອີກຕໍ່ໄປ; ເພາະວັນແຫ່ງຄວາມປິຕິຍິນດີຂອງລາວມາເຖິງແລ້ວເພາະ ການປົດບາບຂອງລາວ, ແລະ ການສະແດງໃຫ້ປະຈັກເຖິງພອນຂອງເຮົາຕໍ່ວຽກງານຂອງລາວ.
9 ເພາະ, ຈົ່ງເບິ່ງ, ເຮົາຈະ ອວຍພອນທຸກຄົນທີ່ອອກແຮງຢູ່ໃນ ສວນອະງຸ່ນຂອງເຮົາ ດ້ວຍພອນອັນໃຫຍ່ຫລວງ, ແລະ ເຂົາຈະເຊື່ອຖ້ອຍຄຳຂອງລາວ, ຊຶ່ງມອບໃຫ້ລາວຜ່ານເຮົາໂດຍ ພຣະຜູ້ປອບໂຍນ, ຊຶ່ງ ສະແດງໃຫ້ປະຈັກວ່າ ພຣະເຢຊູຖືກ ຄຶງໂດຍຄົນ ບາບ ສຳລັບບາບຂອງ ໂລກ, ແທ້ຈິງແລ້ວ, ເພື່ອການປົດບາບໃຫ້ ໃຈທີ່ສຳນຶກຜິດ.
10 ດັ່ງນັ້ນ ເຮົາເຫັນສົມຄວນທີ່ລາວຈະໄດ້ຮັບການ ແຕ່ງຕັ້ງໂດຍເຈົ້າ, ອໍລີເວີ ຄາວເດີຣີ ອັກຄະສາວົກຂອງເຮົາ;
11 ນີ້ເປັນພິທີການຢ່າງໜຶ່ງແກ່ເຈົ້າ, ວ່າເຈົ້າເປັນແອວເດີໃຕ້ມືຂອງລາວ, ລາວໄດ້ປະຕິບັດຕໍ່ເຈົ້າ ກ່ອນ, ເພື່ອວ່າເຈົ້າຈະໄດ້ເປັນແອວເດີໃຫ້ແກ່ສາດສະໜາຈັກນີ້ຂອງພຣະຄຣິດ, ທີ່ມີນາມຂອງເຮົາ—
12 ແລະ ເປັນຜູ້ສັ່ງສອນຄົນທຳອິດຂອງສາດສະໜາຈັກນີ້ ໃຫ້ແກ່ສາດສະໜາຈັກ, ແລະ ຕໍ່ໂລກ, ແທ້ຈິງແລ້ວ, ຕໍ່ຄົນຕ່າງຊາດ; ແທ້ຈິງແລ້ວ, ແລະ ອົງພຣະຜູ້ເປັນເຈົ້າໄດ້ກ່າວດັ່ງນີ້, ເບິ່ງແມ, ເບິ່ງແມ! ຕໍ່ ຊາວຢິວນຳອີກ. ອາແມນ.