Seksen 27
Revelesen we God i givim long Profet Josef Smit, long Hamoni, Pensilvania, long Ogis 1830. Taem oli stap rere long wan jos seves we bae oli givim sakramen blong bred mo waen, Josef i bin go blong tekem waen i kam. Wan mesenja blong heven i bin mitim hem mo hem i bin kasem revelesen ia, mo wan pat blong revelesen ia oli bin raetem long stret taem ia, mo haf blong hem oli bin raetem long manis Septemba we i folem. Naoia, oli yusum wota be i no waen long ol sakramen seves blong Jos.
1–4, Oli eksplenem ol samting blong yusum blong tekem sakramen; 5–14, Kraes mo ol wokman blong Hem blong evri dispensesen bambae oli tekem sakramen; 15–18, Putum ful klos blong faet blong God.
1 Lisin long voes blong Jisas Kraes, Lod blong yu, God blong yu, mo Ridima blong yu, we toktok blong hem i laef mo i gat paoa.
2 From luk, mi talem long yufala, i nomata wanem nao yufala i kakae o wanem nao yufala i dring taem yufala i tekem sakramen, sapos nomo yufala i mekem wetem wan ae we i lukluk nomo long glori blong mi—taem yufala i tingbaot long fored blong Papa, bodi ia blong mi we mi givim from yufala, mo blad blong mi ia we i bin ron, blong yufala i kam klin aot long ol sin blong yufala.
3 Taswe, wan komanmen mi givim long yufala, se bambae yufala i no mas pem waen o wan strong drink long ol enemi blong yufala;
4 Taswe, yufala i no save tekem mo dring waen ia, be nomo sapos yufala i mekem yufalawan nomo; yes, insaed long kingdom ia blong Papa blong mi we i stanap long wol ia.
5 Luk, mi talem se hemia i waes; taswe, yufala i no sapraes; aoa ia bae i kam taem bae mi dring frut blong grep wetem yufala long wol ia, mo wetem Moronae, we mi bin sendem hem long yufala blong soemaot Buk blong Momon we i tekem ful gospel blong mi we i no gat en, mo tu, we mi givim hem ol ki blong histri blong stik blong laen blong Efrem;
6 Mo tu, wetem Elaeas, we mi givim ol ki blong mekem i hapen, wok ia blong putumbak evri samting we evri tabu profet i bin talem, stat long stat blong wol, long saed blong ol las dei;
7 Mo tu, wetem Jon, boe blong Sakaraeas, we Sakaraeas ia, hem (Elaeas) i bin visitim mo givim hem promes se bae hem i gat wan boe, mo nem blong hem bae i Jon, mo bambae hem i fulap wetem spirit blong Elaeas;
8 Mo Jon ia, mi bin sendem hem i kam long yutufala, ol wokman blong mi, Josef Smit Junia mo Oliva Kaodri, blong hem i odenem yutufala long fas prishud we yutufala i bin kasem, blong Lod i save singaotem mo odenem yutufala semmak olsem Eron.
9 Mo tu, wetem Elaeja, we mi bin givim hem ol ki blong paoa blong tanem hat blong ol papa i go long ol pikinini, mo hat blong ol pikinini i go long ol papa, blong Lod i no kilim ful wol ia wetem wan strong nogud tok.
10 Mo tu, wetem Josef mo Jekob, mo Aesak, mo Ebraham, ol papa blong yutufala, we tru long olgeta, ol promes ia oli stap laef yet;
11 Mo tu, wetem Mikael, o Adam, papa blong evriwan, prins blong evriwan, olfala blong taem bifo;
12 Mo tu, wetem Pita, mo Jemes, mo Jon, we mi sendem olgetatri i kam long yutufala, we tru long olgetatri mi bin odenem yutufala mo konfemem yutufala blong kam ol aposol, mo ol spesel witnes blong nem blong mi, mo blong gat ol ki blong seves blong yutufala mo blong ol sem samting ia we mi bin talemaot long olgetatri;
13 we mi bin givim long tufala ol ki blong kingdom blong mi, mo wan dispensesen blong gospel ia blong ol las taem ia; mo blong en blong taem we evri wok blong God i kamtru, we bae mi putum evri samting i kam wan, tugeta ol samting we oli stap long heven, mo ol samting we oli stap long wol;
14 Mo tu, wetem evriwan ia we Papa i bin givim long mi long wol ia.
15 Taswe, leftemap hat blong yufala mo stap glad, mekem yufalawan i rere, mo putum long yufala ful klos blong faet blong mi, blong yufala i save stanap agensem rabis dei ia, from we yufala i mekem evri samting finis, blong yufala i save stanap.
16 Nao stanap, wetem trutok we i raonem wes blong yufala, wetem jesplet blong stret mo gud fasin antap long yufala, mo wetem leg blong yufala we i stanap wetem wok blong rere long gospel blong pis, we mi bin sendem ol enjel blong mi blong givim long yufala;
17 Mo wetem sil blong fet we tru long hem, bae yufala i save blokem evri spia blong faea blong olgeta we oli nogud;
18 Mo tekem hat blong fasin blong sevem man, mo naef blong faet blong Spirit blong mi we bae mi kapsaetem long yufala, mo toktok blong mi we bambae mi talemaot long yufala, mo yufala i agri long saed blong evri samting we yufala i askem long mi, mo yufala i mas stap fetful kasem taem we mi kam, mo bae yufala i go antap long heven, blong mekem se ples we mi mi stap long hem, bambae yufala tu i stap long hem. Amen.