ພາກທີ 28
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ ແກ່ອໍລີເວີ ຄາວເດີຣີ, ທີ່ເມືອງເຟແອດ, ລັດນິວຢອກ, ເດືອນກັນຍາ 1830. ໄຮຣຳ ເພຈ໌, ສະມາຊິກຂອງສາດສະໜາຈັກ, ມີຫີນກ້ອນໜຶ່ງ ແລະ ອ້າງວ່າໄດ້ຮັບການເປີດເຜີຍດ້ວຍຄວາມຊ່ວຍເຫລືອຈາກກ້ອນຫີນກ່ຽວກັບການເສີມສ້າງຂອງຊີໂອນ ແລະ ລະບຽບຂອງສາດສະໜາຈັກ. ສະມາຊິກຫລາຍຄົນໄດ້ຖືກຫລອກເພາະການກ່າວອ້າງນັ້ນ, ແລະ ແມ່ນແຕ່ອໍລີເວີ ຄາວເດີຣີ ກໍຖືກຫລອກຄືກັນ. ບໍ່ດົນກ່ອນກອງປະຊຸມໃຫຍ່ເທື່ອໜຶ່ງທີ່ກຳນົດໄວ້, ສາດສະດາໄດ້ທູນຖາມພຣະຜູ້ເປັນເຈົ້າຢ່າງຈິງຈັງກ່ຽວກັບເລື່ອງນີ້, ແລະ ໄດ້ຮັບການເປີດເຜີຍຕໍ່ໄປນີ້.
1–7, ໂຈເຊັບ ສະມິດ ຖືຂໍກະແຈແຫ່ງຄວາມລຶກລັບ, ແລະ ເພິ່ນຄົນດຽວເທົ່ານັ້ນທີ່ໄດ້ຮັບການເປີດເຜີຍສຳລັບສາດສະໜາຈັກ; 8–10, ອໍລີເວີ ຄາວເດີຣີ ຕ້ອງໄປສັ່ງສອນຊາວເລມັນ; 11–16, ຊາຕານໄດ້ຫລອກລວງໄຮຣຳ ເພຈ໌ ແລະ ມອບການເປີດເຜີຍເທັດໃຫ້ລາວ.
1 ຈົ່ງເບິ່ງ, ເຮົາກ່າວກັບເຈົ້າ, ອໍລີເວີ, ວ່າມັນຈະຖືກມອບໃຫ້ແກ່ເຈົ້າ ເພື່ອສາດສະໜາຈັກຈະໄດ້ຍິນເຈົ້າ ໃນທຸກສິ່ງ ບໍ່ວ່າສິ່ງໃດກໍຕາມທີ່ເຈົ້າຈະ ສິດສອນເຂົາໂດຍ ພຣະຜູ້ປອບໂຍນ, ກ່ຽວກັບການເປີດເຜີຍ ແລະ ບັນຍັດ ຊຶ່ງເຮົາໄດ້ປະທານໃຫ້.
2 ແຕ່, ຈົ່ງເບິ່ງ, ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ບໍ່ມີຄົນໃດໄດ້ຮັບການແຕ່ງຕັ້ງໃຫ້ຮັບບັນຍັດ ແລະ ການເປີດເຜີຍໃນສາດສະໜາຈັກນີ້ ຍົກເວັ້ນແຕ່ຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ເພາະລາວໄດ້ຮັບມັນເໝືອນດັ່ງໂມເຊ.
3 ແລະ ເຈົ້າຈົ່ງເຊື່ອຟັງສິ່ງທີ່ເຮົາຈະປະທານໃຫ້ແກ່ລາວ, ແມ່ນແຕ່ເໝືອນດັ່ງ ອາໂຣນ, ເພື່ອປະກາດບັນຍັດ ແລະ ການເປີດເຜີຍດ້ວຍຄວາມຊື່ສັດ, ດ້ວຍອຳນາດ ແລະ ສິດອຳນາດຕໍ່ສາດສະໜາຈັກ.
4 ແລະ ຖ້າຫາກເຈົ້າຖືກນຳພາໂດຍພຣະຜູ້ປອບໂຍນໃຫ້ ກ່າວ ຫລື ສິດສອນ, ຫລື ໃນຕະຫລອດເວລາໂດຍທາງບັນຍັດຕໍ່ສາດສະໜາຈັກ, ເຈົ້າສາມາດເຮັດໄດ້.
5 ແຕ່ເຈົ້າຈະບໍ່ຂຽນເປັນແບບບັນຍັດ, ຍົກເວັ້ນແຕ່ໂດຍຄວາມສະຫລຽວສະຫລາດເທົ່ານັ້ນ;
6 ແລະ ເຈົ້າຈະບໍ່ບັນຊາຜູ້ເປັນຫົວໜ້າຂອງເຈົ້າ, ແລະ ເປັນຫົວໜ້າຂອງສາດສະໜາຈັກ;
7 ເພາະເຮົາໄດ້ມອບ ຂໍກະແຈແຫ່ງ ຄວາມລຶກລັບ, ແລະ ການເປີດເຜີຍຊຶ່ງຜະນຶກໄວ້ແລ້ວໃຫ້ແກ່ລາວ, ຈົນກວ່າເຮົາຈະກຳນົດຄົນອື່ນໃຫ້ເຮັດແທນລາວ.
8 ແລະ ບັດນີ້, ຈົ່ງເບິ່ງ, ເຮົາກ່າວກັບເຈົ້າວ່າ ເຈົ້າຈະໄປຫາ ຊາວເລມັນ ແລະ ສັ່ງສອນ ພຣະກິດຕິຄຸນຂອງເຮົາໃຫ້ແກ່ພວກເຂົາ; ແລະ ຕາບໃດທີ່ພວກເຂົາໄດ້ຮັບຄຳສອນຂອງເຈົ້າ, ເຈົ້າຈົ່ງເຮັດໃຫ້ສາດສະໜາຈັກຂອງເຮົາຖືກສະຖາປະນາຂຶ້ນໃນບັນດາພວກເຂົາ; ແລະ ເຈົ້າຈະໄດ້ຮັບການເປີດເຜີຍ, ແຕ່ບໍ່ໃຫ້ຂຽນມັນໄວ້ເປັນແບບບັນຍັດ.
9 ແລະ ບັດນີ້, ຈົ່ງເບິ່ງ, ເຮົາກ່າວກັບເຈົ້າວ່າ ມັນບໍ່ໄດ້ເປີດເຜີຍ, ແລະ ບໍ່ມີຄົນໃດຮູ້ຈັກບ່ອນທີ່ ເມືອງ ຊີໂອນຈະຖືກສ້າງຂຶ້ນ, ແຕ່ຈະມອບໃຫ້ຫລັງຈາກນີ້. ຈົ່ງເບິ່ງ, ເຮົາກ່າວກັບເຈົ້າວ່າ ມັນຈະຢູ່ຊາຍແດນໃກ້ ຊາວເລມັນ.
10 ເຈົ້າຈະບໍ່ໄປຈາກບ່ອນນີ້ ຈົນກວ່າກອງປະຊຸມໃຫຍ່ສິ້ນສຸດລົງ; ແລະ ຜູ້ຮັບໃຊ້ຂອງເຮົາ ໂຈເຊັບໄດ້ຮັບການແຕ່ງຕັ້ງໃຫ້ຄວບຄຸມກອງປະຊຸມໃຫຍ່ໂດຍສຽງໃນທີ່ປະຊຸມ, ແລະ ສິ່ງໃດທີ່ລາວໄດ້ກ່າວກັບເຈົ້າ ໃຫ້ເຈົ້າບອກສິ່ງນັ້ນ.
11 ແລະ ອີກເທື່ອໜຶ່ງ, ໃຫ້ເຈົ້າພາອ້າຍນ້ອງຂອງເຈົ້າ, ໄຮຣຳ ເພຈ໌, ອອກໄປຕາມລຳພັງ ລະຫວ່າງເຈົ້າກັບລາວເທົ່ານັ້ນ, ແລະ ໃຫ້ບອກລາວວ່າສິ່ງທີ່ລາວໄດ້ຂຽນໄວ້ຈາກຫີນກ້ອນນັ້ນ ບໍ່ໄດ້ມາຈາກເຮົາ ແລະ ວ່າ ຊາຕານໄດ້ ຫລອກລວງລາວ;
12 ເພາະ, ຈົ່ງເບິ່ງ, ສິ່ງເຫລົ່ານີ້ບໍ່ໄດ້ຖືກກຳນົດໃຫ້ແກ່ລາວ, ທັງຈະບໍ່ກຳນົດສິ່ງໃດໃຫ້ຄົນໃດໃນສາດສະໜາຈັກນີ້ທີ່ກົງກັນຂ້າມກັບພັນທະສັນຍາຂອງສາດສະໜາຈັກ.
13 ເພາະທຸກສິ່ງຈະຕ້ອງຖືກເຮັດໄປຕາມລະບຽບ, ແລະ ໂດຍ ການເຫັນຊອບດ້ວຍກັນໃນສາດສະໜາຈັກ, ໂດຍ ການອະທິຖານດ້ວຍສັດທາ.
14 ແລະ ເຈົ້າຈະຊ່ວຍແກ້ໄຂທຸກສິ່ງເຫລົ່ານີ້, ຕາມພັນທະສັນຍາຂອງສາດສະໜາຈັກ, ກ່ອນເຈົ້າຈະເດີນທາງໄປໃນບັນດາຊາວເລມັນ.
15 ແລະ ມັນຈະ ຖືກມອບໃຫ້ແກ່ເຈົ້າຈາກເວລາທີ່ເຈົ້າຈະໄປ, ຈົນເຖິງເວລາທີ່ເຈົ້າຈະກັບຄືນ, ວ່າເຈົ້າຈະເຮັດສິ່ງໃດ.
16 ແລະ ເຈົ້າຕ້ອງເປີດປາກຂອງເຈົ້າໃນທຸກເວລາ, ປະກາດພຣະກິດຕິຄຸນຂອງເຮົາດ້ວຍສຽງທີ່ມີຄວາມປິຕິຍິນດີ. ອາແມນ.