1 Dou rogoca na domoi Jisu Karisito, na nomudou Dauveivueti, O Koya sa Bula ka Cecere Sara, o koya sa sorovaka na nomudou ivalavala ca ena liga ni nona loloma cecere;

2 Ko koya ena vakasoqoni ira vata na nona tamata me vaka na toa yalewa sa vakasoqoni ira vata na luvena e ruku ni tabana, io ko ira kecega sa rogoca na domoqu ka vakayalomalumalumutaki ira vei au, ka masuta vagumatua na yacaqu.

3 Raica, e dina, e dina, au sa kaya vei kemudou, sa vosoti vei kemudou na nomudou ivalavala ca ena gauna oqo, o koya dou sa rawata kina na isolisoli oqo; ia dou nanuma mo dou kakua tale ni ivalavala ca, de na yaco vei kemudou na veivakarusai.

4 Ia au sa kaya vakaidina vei kemudou, dou sa digitaki mai vei ira kecega na kai vuravura mo dou vunautaka na noqu kosipeli ena yalomarau, me vaka na domo ni davui.

5 Dou laveta cake na yalomudou ka marau, niu sa tiko ena kemudou maliwa, ka’u sa nomudou dautataro vei Tamada; ia ena nona yalololoma sa solia kina vei kemudou na matanitu.

6 Ia, me vaka sa volai—A ka kecega dou sa kerea ena vakabauta, ni dou sa duavata ena masu me vaka na noqu ivakaro, dou na rawata vakaidina.

7 Ka ni dou sa lesi mo dou vakasoqoni ira vata na noqu digitaki; ko ira na noqu digitaki era na rogoca na domoqu ka sega ni vakaukauwataka na lomadra;

8 Sa vakarota oti tu ko Tamaqu me ra na soqoni vata yani ki na dua na vanua eke, io me ra vakarautaka kina na yalodra ka vakarautaki ira ena veika kece ki na veika ena yaco ena siga ni nodra vakararawataki ka vakarusai na tamata dau caka ca.

9 Ni sa roro mai na auwa ka voleka sara na kena siga me sa matua kina na vuravura; era na vaka na vu ni co na dau viavialevu kei ira na dau caka ca; kau na qai vakamai ira, sa kaya na Turaga ni Lewevuqa, io me muduki kina na ivalavala ca e delai vuravura;

10 Ni sa roro sara mai na kena auwa, me vakayacori kina na veika era sa tukuna na noqu iapositolo; ia na ka kecega era sa tukuna ena yaco;

11 Niu na vakaraitaki au mai lomalagi ena kaukauwa kei na lagilagi cecere, kei ira kece na lewei lomalagi, kau na mai tiko ena buladodonu vata kei ira na tamata e vuravura me dua na udolu na yabaki, ia ko ira na dau caka ca era na sega ni vosota rawa.

12 E dua tale, e dina, e dina, au sa kaya vei kemudou, ni sa tau yani e dua na lewa tudei, me vaka na lewa nei Tamaqu, me ratou na tiko ena ligaqu imatau na noqu iapositolo, ko iratou na Le Tinikarua ka ratou a qarava vata kei au na noqu ilesilesi mai Jerusalemi, ena siga au sa lako sobu mai kina ena duru bukawaqa, ka vakaisulutaki ena icurucuru balavu ni buladodonu, kei na isala vakatui e uludratou, ena lagilagi me vakataki au, me lewai ira kece na mataqali i Isireli, ko ira ga sa dau lomani au ka muria na noqu vunau, ka sega tale e dua.

13 Ni na uvuci vakabalavu ka vakadomoilevu e dua na davui, me vaka mai na ulunivanua ko Saineai, ka na sakure kina ko vuravura, ka ra na qai tucake mai—io, ko ira sa mate ena vukuqu, me ra tokara na isala ni buladodonu, ka vakaisulutaki, me vakataki au, me ra tiko vata kei au, me keimami sa duabau ga.

14 Ia, raica, au sa kaya vei kemudou, ni sa bera ni yaco mai na siga sa levu ko ya ena vakabutobutotaki na matanisiga, ka vuki na vula me dra, ka na lutu mai lomalagi na veikalokalo, ia ena qai rairai mai e vuqa na ivakatakilakila mai lomalagi e cake kei vuravura e ra;

15 Ena rogo na domo ni nodra tagi kei na tagiyaso na lewevuqa;

16 Ka na qai talai mai e dua na cava rerevaki me vakarusa na veika sa teivaki e vuravura.

17 Ka na qai yaco, ena vuku ni nodra caka ca na kai vuravura, ni’u na sauma vei ira na dau caka ca, ni ra sa sega ni veivutuni; ni sa vuabale na bilo ni noqu cudru; ia raica, era na sega ni vakasavasavataki ena noqu dra kevaka era sega ni rogoci au.

18 O koya, koi au na Turaga na Kalou, au na tala yani ki na delai vuravura vei ira na lewena na yavusa lago, io era na kania na yagodra ka na vuca mai;

19 Ka na vesuki na yamedra me ra kakua ni vosa vakacacani au; ka na lutu tani mai suidra na lewedra; kei na yaloka ni matadra mai na kena dreke;

20 Ia era na kani ira na manumanu vuka kei na manumanu kila kecega ni veikau.

21 Raica ena bale ka kama yavu na lotu vakaitamera ka vakasisila ko ya, na dautagane ni vuravura taucoko, ia sa yaco oqo me vaka a cavuti mai na gusuna na parofita ko Isikeli, ka a tukuna na veika oqo, ka ra se bera ni yaco, ia me vaka ga na noqu bula tiko, ena yaco vakaidina, ni na sega ni laivi me tomani tiko na ivalavala vakasisila.

22 Ka dua tale, e dina, e dina, au sa kaya vei kemudou ni sa oti e dua na udolu na yabaki, ka ra sa baci cakitaka tale na nodra Kalou na tamata, ia au na vosoti vuravura tale mada vakalailai;

23 Ka na qai yaco mai na ivakataotioti, ena takali yani ko lomalagi kei vuravura, ia ena qai dua na lomalagi vou kei na vuravura vou.

24 Ena takali yani na veika makawa, ka na yaco me vou na ka kecega, na lomalagi kei na vuravura sara mada ga, kei na ka taucoko ga sa tu kina, na tamata kei na manumanu ni vanua, na manumanu vuka, kei na ika ni waitui;

25 Ka na sega ni dua na drau ni ulu se dua na tiki ni yago lailai sara me yali, raica oqori na cakacaka ni ligaqu.

26 Ia, raica, au sa kaya vakaidina vei kemudou, ni se bera ni takali yani na vuravura, ena uvuca mada na nona davui ko Maikeli, na noqu agilosi liu, ia ena tadola na ibulubulu ka ra na tucake mai kina ko ira sa mate, ka ra na qai lako mai—io, ko ira kece sara.

27 Ka ra na soqoni ena yasaqu imatau ki na bula tawamudu ko ira na buladodonu; kei ira na dau caka ca era na soqoni vata ena yasaqu imawi kau na madualaki ira e matai Tamaqu;

28 O koya au na qai kaya kina vei ira—Ni lako tani vei au koi kemuni sa cudruvi, ki na bukawaqa tawavakaiyalayala, sa vakarautaki me nona na tevoro kei ira na nona agilosi.

29 Ia oqo, raica, au sa kaya vei kemudou, au se sega mada ni cavuta mai gusuqu ena dua na gauna ni ra na lesu tale mai, ni ra na sega ni lako rawa mai ki na vanua ka’u sa tiko kina, ni sega vei ira na kena kaukauwa.

30 Ia mo dou kila ni sega ni dau vakatakilai vei ira na tamata na noqu lewa kece; ia na ka kecega au sa tukuna ena yaco, ia ko koya sa liu ena muri, kei koya sa muri ena liu ena veika kecega ka’u sa bulia ena vosa ni noqu kaukauwa, sai koya na kaukauwa ni noqu Yalotabu.

31 Ia, ena kaukauwa ni noqu Yalotabu au sa buli ira kina; io, na ka kecega, vakayalo ka vakayago tale ga—

32 Taumada me vakayalo, qai tarava me vakayago, e vakaoqori na itekivu ni noqu cakacaka; ka dua tale, me na liu vakayago qai muri vakayalo, sai koya na icavacava ni noqu cakacaka—

33 Au sa vakamacalataka vakaoqo vei kemudou mo dou kila kina; ia na noqu cakacaka sa sega na kena itekivu ka sega talega na kena itinitini; raica au sa vakamacalataka wale ga vakaoqo mo dou kila kina me vaka dou a kerea vei au.

34 Ia au sa kaya vakaidina vei kemudou, au sa okata na ka kecega me ka vakayalo, io au sa sega mada ni bau solia vei kemudou ena dua na gauna e dua na lawa vakayago; se vua e dua na tamata se dua na luve ni tamata, se kivei Atama na nomudou qase ka’u a bulia.

35 Raica au sa solia vua me lewai koya ga; au sa solia tale ga vua na ivunau, ia sa sega ni ivunau vakayago au solia vua, ni sa vakayalo na noqu ivunau kecega; io sa sega sara ni ka vakayago se ka vakatamata, ka sega tale ga ni ka vakavuravura se ka dau garogaro.

36 Ka sa yaco ni sa temaki Atama na tevoro—ia, raica, sa tiko e liu vei Atama na tevoro, ni a vorati au, ka kaya, Mo solia vei au na nomu lagilagi, sai koya na noqu kaukauwa; sa vagolea tani talega ko koya e dua na ikatolu ni lewei lomalagi ena vuku ni nodra galala ni digidigi;

37 Ka ra sa debelaki sobu kina, ka sa vakaoqori na nona lako sobu mai na tevoro kei ira na nona agilosi;

38 Ia, raica, sa dua na vanua sa vakarautaki mai na ivakatekivu me nodra, na vanua oqori ko eli.

39 Ka sa dodonu kina me temaki ira na luve ni tamata na tevoro, me ra lewa kina vakataki ira na ka me ra kitaka; ni kevaka era sega ni kila na wiwi era na sega ni kila na kamikamica—

40 Ia, ka sa yaco ni sa temaki Atama na tevoro, ka kania na vuanikau vakatabui ka talaidredre kina ki na ivakaro, ka sa lewai koya na tevoro, ni sa rawai ena nona veitemaki.

41 Ia, koi Au na Turaga na Kalou, au sa vakatalai koya tani mai na Were ko Iteni, mai na kequ iserau, ena vuku ni nona talaidredre, a sa mate kina vakayalo, sai koya na imatai ni mate, sa tautauvata ga kei na mate ena iotioti ni mate, e ka vakayalo, ka na cavuti vei ira na dau caka ca ena noqu na kaya: Dou lako tani vei au, koi kemudou sa cudruvi.

42 Ia, raica, au sa kaya vei kemudou, ni’u sa lewa koi Au na Turaga na Kalou me kakua mada ni yaco vei Atama kei ira na nona kawa na mate vakayago, io me yacova ni’u sa talai ira na noqu agilosi me ra vunauci ira me ra veivutuni ka sereki, ena nodra vakabauta na Luvequ e Duabau ga.

43 Ka sa vakaoqori na noqu lesia koi Au, na Turaga na Kalou, kivei ira na tamata na gauna ni nodra bula vakatovolei—ena mate me rawa ni qai vakaturi cake me na tawa mate rawa ka bula tawamudu, io ko ira kecega sa vakabauta;

44 Ia ko ira kecega sa sega ni vakabauta ki na cudruvi tawamudu; ni ra na sega ni sereki rawa mai na nodra lutu vakayalo, baleta ni ra sega ni veivutuni;

45 Ni ra sa taleitaka cake na butobuto mai na rarama, ka sa vakasisila na nodra ivalavala, ka ra sa ciqoma na kedra isau mai vua era a digitaka me ra talairawarawa kina.

46 Ia raica, au sa kaya vei kemudou, era sa sereki na gonelalai mai na tauyavutaki ni vuravura, ena vukuna na noqu Le Duabau ga;

47 O koya, era sa sega ni rawa ni ivalavala ca, ni sa sega ni soli vei Setani na kaukauwa me temaki ira na gonelalai, me yacova na gauna era sa tekivu me ra saumi taro kina vakai ira e mataqu;

48 Ni sa soli vei ira me vaka na noqu lewa, me vaka na ka sa vinaka vei au, me na gadrevi kina na veika lelevu e ligadra na nodra qase.

49 Kau sa kaya tale vei kemudou, oi kemudou kecega sa kila na ka, au sa sega beka ni vakaroti kemudou mo dou veivutuni?

50 Ia ko ira kece era sa yalowai, au na kitaka me vaka na ka sa volai. Raica sa yala mada eke na noqu itukutuku vei kemudou. Emeni.