1 Dou vakatudaliga, Oi kemudou na lewe ni noqu lotu, io koi kemudou sa soli vei kemudou na matanitu; dou vakatudaliga ka vakarorogo vei koya sa tura na yavu kei vuravura, ko koya sa bulia na lomalagi kei ira kecega sa tiko kina, io ko koya sa bulia na ka bula kecega, na ka kecega sa yavala, ka rawata mai vua na nodra bula.

2 Au sa kaya tale, dou rogoca na domoqu, de dou na mate kusarawa; ena auwa dou sa sega ni vakasamataka kina ni sa oti na vula i katakata, sa cava na tatamusuki, ka sega ni vakabulai na yalomudou.

3 Dou vakarorogo vei koya na dautataro vei Tamana, io ki vua sa vakamamasu tiko vei koya ena vukumudou—

4 A sa kaya: Tamaqu, mo ni nanuma na nona rarawa ka vakamatei ko koya sa tawacala, ko koya ko ni sa daulomana vakalevu; raica na nona dra na Luvemuni sa mai vakadavei, na nona dra ko koya ko ni sa solia mai mo ni vakalagilagi kina;

5 Ia Tamaqu, mo ni lomani ira na wekaqu oqo ka ra sa vakabauta na yacaqu, io me ra lako mai vei au ka rawata na bula tawavakaiyalayala.

6 Dou vakatudaliga na lewe ni noqu lotu, dou vakarorogo kece mai na italatala qase, ka rogoca na domoqu edaidai, io dou kakua ni vakaukauwataka na lomamudou;

7 Niu sa kaya vakaidina vei kemudou, koi Au na Alifa kei na Omeka, na ivakatekivu kei na ivakataotioti, na rarama kei na vu-ni-bula kei vuravura—na rarama sa cilava na butobuto, ia na butobuto sa sega ni kunea.

8 Au sa lako mai vei ira na kai noqu, ka ra qai sega ni ciqomi au na kai noqu; ia ko ira kecega sa vakabauti au, au sa solia vei ira na kaukauwa me ra kitaka e levu na cakacaka e veivakurabuitaki, ka yaco me ra luve ni Kalou; io ko ira kecega sa vakabauta na yacaqu, au sa solia vei ira na kaukauwa me ra rawata kina na bula tawamudu.

9 Raica au sa solia yani ki vuravura na noqu veiyalayalati tawamudu, io me nodra rarama na kai vuravura, ka ivakarau vei ira na noqu tamata, io me ra muria na Matanitu Tani, ka dautukutuku yani me caramaka na sala e mataqu.

10 O koya mo dou curuma yani koi kemudou, ia ko koya sa curuma, au na veivosaki vata kaya me vaka ka’u a dau kitaka vei ira e liu, ia au na vakaraitaka vei kemudou na kaukauwa ni noqu vosa.

11 O koya, mo dou vakatudaliga kece mai, ka’u na qai vakatakila vei kemudou na noqu vuku—na nona vuku ko koya dou sa vakatoka me Kalou i Inoki, kei ira na nona tamata.

12 Ko ira era a kau tani mai vuravura, au qai ciqomi ira—na koro levu sa maroroi tu me yacova ni sa yaco mai na siga ni caka dodonu—na siga era a vakasaqara na tamata yalosavasava kecega, ka ra a sega ni kunea ena vuku ni ivalavala ca kei na itovo vakasisila;

13 Ka ra sa vakatusa ni ra a tiko vulagi ga ka veilakoyaki voli e vuravura;

14 Raica a yalataki vei ira ni ra na kunea ka raica vakaidina ena yagodra.

15 O koya mo dou vakarorogo, ka’u na veivosaki kei kemudou, io au na vosa ka parofisai vei kemudou me vaka au a dau kitaka vei ira ena gauna e liu.

16 Kau na vakaraitaka vakavinaka me vaka na noqu vakaraitaka vei iratou na noqu tisaipeli, ni’u a tucake tu vakayago e matadratou ka vosa vei iratou ka kaya: Me vaka ni dou sa taroga vei au na ivakatakilakila ni noqu lako mai, ena siga au na lako mai kina ena veio ni lomalagi ena noqu lagilagi, me’u vakayacora na veika au a yalayala kina vei ira na nomudou qase,

17 Me vaka ni dou sa okata me gauna ni veivakabobulataki na nodrau veitawasei tu vakabalavu na yagomudou kei na yalomudou, au na vakaraitaka vei kemudou na gauna ena yaco kina na siga ni veivueti, kei na nodra vakalesui mai na Isireli era sa veiseyaki tu.

18 Ia oqo dou sa raica na valetabu sa duri tu oqo mai Jerusalemi, io dou sa vakatoka me vale ni Kalou, ka ra kaya na nomudou meca ni na sega ni bale rawa na vale oqo.

19 Ia, au sa kaya vakaidina vei kemudou, ena yaco na veivakarusai ki na itabatamata oqo me vaka na daubutako ena bogi, ia era na vakacacani ka veiseyaki ki na veivanua kecega na matatamata oqo.

20 Ia na valetabu dou sa raica tu oqo, ena talaraki sobu ka na sega ni vo e dua na vatu sa veitaqataqai.

21 Ka na qai yaco, ni na sega mada ni sa takali yani na itabatamata ni Jiu ka ra bula tiko oqo, sa na yaco na veivakarusai levu kau sa tukuna oti tiko me baleti ira.

22 Dou sa kaya dou sa kila ni sa voleka na ivakataotioti kei vuravura; dou sa kaya tale ga dou sa kila ni na takali yani na lomalagi kei na vuravura;

23 Ia ena vuku ni ka oqo, dou sa kaya vakaidina kina, ni na vakadina kina; ia na veika au sa tukuna vei kemudou ena sega mada ni takali me yacova ni sa yaco oti na veika kece oqo.

24 Kau sa tukuna vei kemudou na veika oqo me baleti Jerusalemi; ia ni sa yaco mai na siga koya, era na qai veiseyaki ki na veimatanitu kecega na kedra ivovo;

25 Ia era na vakasoqoni vata tale; ia era na tu ga me yacova ni sa yaco na nodra gauna na Matanitu Tani.

26 Ia ena siga ko ya dou na rogoca na ivalu, kei na irogorogo ni valu, ena yavavala ko vuravura taucoko, ka ra kani yatedra na tamata, io era na kaya ni na vakaberaberataka na nona lesu tale mai na Karisito me yacova na ivakataotioti kei vuravura.

27 Raica ena batabata mai na nodra loloma na tamata, ia ena tubu vakalevu sara na itovo ca.

28 Ia ni sa yaco mai na nodra gauna na Matanitu Tani, ena cila yani e dua na rarama vei ira sa tu ena butobuto, io sai koya na taucoko ni noqu kosipeli;

29 Ia era na sega ni ciqoma; ni ra sa sega ni raica na rarama, ka ra sa vagoleya tani mai vei au na lomadra ena vuku ni nodra ivakavuvuli na tamata.

30 Ia ena itabatamata oqori, ena yaco kina na nodra gauna na Matanitu Tani.

31 Raica e so era na bula tiko ena itabatamata oqori, ka na raica na veivakanakuitataki rabailevu ena yaco ni bera ni ra mate; io ena robota na vanua taucoko e dua na matetaka veivakatalai.

32 Ia ko ira na noqu tisaipeli era na tudei tu ena veivanua tabu, ka sega ni yavalati rawa; ia ena kedra maliwa na tamata ca, era na tabalaka cake na domodra na tamata ka vosa vakacacataka na Kalou ka mate yani.

33 Ka na yaco talega na tavuki ni vanua ena veivanua e vuqa, kei na veivakararawataki levu; ia era na vakaukauwataka vei au na tamata na lomadra, ka ra na laveta na nodra iseleiwau me ra veivala vakataki ira, ka ra na veivakamatematei vakataki ira.

34 Ia oqo, ni’u sa vosataka koi au na Turaga, na veivosa oqo, vei ira na noqu tisaipeli, era sa lomaleqa kina.

35 Kau sa qai kaya vei ira: Dou kakua ni rarawa, ni, ena gauna sa yaco kina na veika oqo, mo dou kila sara ni sa vakayacori na veika kecega sa yalataki vei kemudou.

36 Ia ni sa tekivu me cila yani na rarama, ena cilavi ira me vaka na vosa vakatautauvata au na tukuna vei kemudou—

37 Dou rai yani ka raica na vu ni lolo, dou wadrava matua tiko e matamudou, ka dou na kaya beka ni sa lavouvou mai na tabana ka tubu na drauna, ni sa voleka sara na vulaikatakata;

38 Ena vakakina ena siga koya ni ra sa raica na veika oqo, era na qai kila ni sa voleka na kena gauna.

39 Ka na qai yaco ni ko ira sa rerevaki au era sa na namaka tiko na kena yaco mai na siga levu koya ni Turaga, io na ivakatakilakila ni nona lako mai na Luve ni Tamata.

40 Ka ra na raica na ivakatakilakila kei na ka e veivakurabuitaki, ni ra na vakaraitaki mai lomalagi e cake, kei na vuravura e ra.

41 Io era na raica na dra, kei na bukawaqa, kei na o kubou.

42 Ia ni sa bera ni yaco na nona siga na Turaga, ena vakabutobutotaki na matanisiga ka vuki na vula me dra, ka lutu mai na veikalokalo ni lomalagi.

43 Raica era na qai soqoni vata mai ki na vanua oqo na kena ivovo;

44 Oti era na qai vakasaqarai au, ia, raica, au na lako dina mai; ka ra na raici au ena veio ni lomalagi, ni’u vakaisulu tu ena kaukauwa kei na lagilagi levu; vata kei ira na agilosi yalosavasava; ia ko ira sa sega ni waraki au, era na muduki tani.

45 Ia ni sa bera ni tau na liga ni Turaga, ena uvuca mada na nona davui e dua na agilosi, ka ra na qai tucake mai ko ira na yalododonu era sa moce no, me ra veitata kei au ena o.

46 Ia, ko sa kalougata kevaka ko sa moce koto ena vakacegu; ia me vaka ni dou sa raici au ka kilai au oqo, dou lako tale ga mai vei au me bula kina na yalomudou, io me taucoko sara na nomudou sereki; ka ra na soqoni vata mai na yalododonu mai na yasai vuravura e va.

47 Raica ena qai tau na lewa ni Turaga ki na veimatanitu.

48 Ia ena qai tu na Turaga ena ulunivanua oqo, ia ena kavida rua, ka na sakure ko vuravura, ka suaigelegele vaka ka vaka, io ena yavavala tale ga ko lomalagi.

49 Raica ena vosa na Turaga ka rogo na domona ki na iyalayala kei vuravura; era na tagi na veimatanitu, ka ra na kila na nodra cala ko ira sa dredre.

50 Ena rarawa sara ko koya sa dauveivakalialiai, ka na oti na veivakacacani; ia ko ira sa dauyadra me ia na ka e sega ni dodonu, era na tamusuki sobu ka biu ki na bukawaqa.

51 Era na qai vakaraici au mai na Jiu ka taroga: A we li ni cava oqori e ligamu kei na yavamu?

52 Ia era na qai kila ni sai Au na Turaga; ni’u na kaya vakaoqo vei ira: Na mavoa oqo sai koya na mavoa au a vakamavoataki kina ena vale ni wekaqu. Raica sai au ga sa laveti cake. Koi Au ko Jisu ka a lauvako ki na kauveilatai. Raica sai au na Luve ni Kalou.

53 Ia era na qai tagicaka na nodra caka cala; io era na tagicaka ni ra a vakararawataka na nodra tui.

54 Ia era na qai sereki na veimatanitu tawa lotu, io ko ira sa sega ni kila na lawa era na vakaitavi vakatikina ena imatai ni tucake tale; io ena sega soti ni bibi sara vei ira na lewa e baleti ira.

55 Ka na qai vesu tu ko Setani, ka na sega ni rawata na lomadra na luve ni tamata.

56 Ia ena siga ko ya, ni’u sa lako mai ena noqu lagilagi, sa na qai vakayacori na vosa vakatautauvata ka’u a tukuna me baleti iratou na goneyalewa savasava e le tini.

57 Ia ko ira sa yalomatua ka vakabauta na dina, ka ra sa taura na Yalo Tabu me nodra idusidusi, ka ra qai sega ni rawai—au sa kaya vakaidina vei kemudou, era na sega ni tamusuki sobu ka biu ki na bukawaqa, raica era na tu ena siga ko ya.

58 Ia ena qai soli vei ira ko vuravura me nodra ivotavota vakawa; a ra na tubu me lewe levu ka kaukauwa mai, era na tubu cake ka sega ni ivalavala ca ko ira na luvedra, io era na rawata na veivakabulai.

59 Raica ena tiko ena kedra maliwa na Turaga, ka na serauni ira na nona lagilagi, io ena nodra tui ka nodra daunilewa.

60 Ia oqo, raica, au sa kaya vei kemudou, ena sega ni soli vei kemudou mo dou kila e dua tale na ka me baleta na iwase oqo, me yacova ni sa vakadewataki na Veiyalayalati Vou, ena kilai mai kina na veika kece oqo.

61 O koya au sa vakadonuya kina vei iko mo sa vakadewataka oqo, me rawa ni o vakarautaki iko kina ki na veika ena yaco mai.

62 Ni’u sa kaya vakaidina vei kemudou, ni sa waraki kemudou tu na veika lelevu;

63 Dou sa rogoca na ivalu ena veivanua tani; ia, raica, au sa kaya vei kemudou, sa volekati kemudou sara, io ena mata ni nomudou katuba, ia ena sega soti ni dede dou sa na rogoca na ivalu ena nomudou vanua.

64 A ka oqo au sa kaya kina vei kemudou koi Au na Turaga, dou vakasoqoni kemudou tani mai na veivanua mai na tokalau, dou vakasoqoni kemudou vata vakataki kemudou na italatala qase ni noqu lotu; dou lako yani ki na veivanua ena ra ka vunauci ira na tamata me ra veivutuni, ia ko ira kecega sa veivutuni, dou tauyavutaka vei ira na noqu lotu.

65 Ia mo dou duavata sara ka yalovata, dou kumuna vata na nomudou iyau ka volia me nomudou ivotavota vakawa na vanua ena vakatakilai vei kemudou.

66 Ia ena vakatokai ko Jerusalemi Vou, na vanua ni vakacegu, na idrodro kei na nodra itikotiko na nona yalododonu na Kalou sa Cecere Sara;

67 Ena tiko kina na iserau lagilagi ni Turaga, ka na tiko tale ga kina na nona rerevaki na Turaga, ia era na sega ni curu rawa kina na tamata ca, ia ena yacana ko Saioni.

68 Ka na qai yaco ena kedra maliwa na dau caka ca, ni ko ira kecega era na sega ni cola iseleiwau me vala kei na wekana, me dro ki Saioni me bula kina.

69 Ka ra na soqoni vata yani kina na veimatanitu kecega e rukui lomalagi; ka ni sai ira duadua ga oqo na matatamata era na sega ni veivaluvaluti vakataki ira.

70 Era na qai kaya na tamata ca: Me da kakua sara ni la’ki valuti Saioni, raica era sa rui vakarerevaki na lewei Saioni; eda na sega ni rawati ira.

71 Ka na qai yaco ni ra na vakasoqoni tani mai na veimatanitu kecega o ira na buladodonu, ka ra na lako mai ki Saioni, ka lagata voli na sere ni reki tawavakaiyalayala.

72 Ia oqo au sa kaya vei kemudou, mo dou kakua mada ni tukuna yani na veika oqo me kila ko vuravura me yacova na gauna sa dodonu kina vei au, mo dou vakayacora ga na nomudou cakacaka e matadra na tamata, kei na matadra na nomudou meca, me ra kakua kina ni kila na nomudou cakacaka me yacova na gauna dou sa vakacavara kina na veika au sa vakarota vei kemudou;

73 Ia ni ra sa kila, era na qai vakananuma na veika oqo.

74 Ni ena gauna sa na basika mai kina na Turaga ena vakarerevaki sara vei ira, io ena kani ira sara na rere, era na tu ga vakayawa, ia era na sautaninini.

75 Ia era na rere na veimatanitu ena nona vakarerevaki na Turaga, era na rerevaka na nona lagilagi kei na nona kaukauwa. Ena yaco vakakina. Emeni.